TÀN 40
Mɔyizi Dó Kpò Só Ɔ
XWÈ 10, 20, 30, 39 wá yì, bɔ Izlayɛli-ví lɛ kpó ɖò gbetótló mɛ. Amɔ̌, Jehovah kpé nukún dó togun tɔn wu xwè enɛ lɛ bǐ gblamɛ. É na mana ye, bɔ ye ɖu. É sɔ́ dotín akpɔ́kpɔ́nɔ dó xlɛ́ ali ye kéze, bo sɔ́ dotín myɔnɔ dó xlɛ́ ali ye zǎnmɛ. Xwè enɛ lɛ bǐ gblamɛ ɔ, avɔ yetɔn lɛ gbì ǎ, afɔ yetɔn lɛ lɔ ka jǐ ǎ.
Izlayɛli-ví lɛ lɛ́vɔ wá Kadɛci. Ye tɔ́n sín Ejipu é ɔ, sun nukɔntɔn xwè 40 gɔ́ ɔ tɔn mɛ wɛ ye ɖè nɛ. Fí e ye ɖè xwè 40 ɖíe, bɔ è sɛ́ amɛ̌ 12 dó ɖɔ ye ni yì ba dò nú tò Kanaa tɔn é nɛ. Mɔyizi sín dada Miliamu kú ɖò Kadɛci. Lee mǐ na mɔ gbɔn zaanɖé dìn é ɔ, tagba ɖevo fɔ́n ɖò finɛ xwè 40 ɖíe tɔn ɖɔhun.
Togun ɔ mɔ sìn ɖebǔ bo na nu ǎ. Enɛ wu ɔ, ye jɛ nǔ hlun ɖɔ dó Mɔyizi wu jí ɖɔ: ‘Enyi mǐ gbɔ bo kú ɔ, é nyɔ́ hú. Aniwu a ka kplá mǐ sín Ejipu wá fí baɖabaɖa elɔ e nǔ ɖebǔ ma nɔ nyɔ́ ɖè ǎ é? Jinukún kpo atín sínsɛ́n kpo ɖebǔ ɖò fí ǎ. Sìn nunu vɔ́vɔ́ ɖò fí ǎ.’
Ee Mɔyizi kpo Alɔɔn kpo yì ɖɛ xò gbé ɖò goxɔ Jehovah tɔn mɛ é ɔ, Jehovah ɖɔ nú Mɔyizi ɖɔ: ‘Xò gbɛtɔ́ lɛ kplé. Enɛ gudo hǔn, ɖɔ xó nú só ɔ ɖò ye bǐ nukɔn. Enɛ ɔ, sìn na gosin só ɔ mɛ, bɔ ye kpo kanlin yetɔn lɛ kpo bǐ na mɔ nu.’
Nugbǒ ɔ, Mɔyizi xò gbɛtɔ́ lɛ kplé bo ɖɔ: ‘Mi ɖótó, mi nǔmaɖi nú Mawu tɔ́ elɔ lɛ! Nyɛ kpo Alɔɔn kpo ni na mi sìn sín só elɔ mɛ à?’ Enɛ gudo ɔ, Mɔyizi dó kpò só ɔ azɔn wè, bɔ sìn wú sín só ɔ mɛ. Sìn ɔ sukpɔ́ bo kpé gbɛtɔ́ kpo kanlin kpo bǐ.
Amɔ̌, xomɛ sìn Jehovah dó Mɔyizi kpo Alɔɔn kpo wu. A ka tuùn nǔ e zɔ́n é à? Ðó Mɔyizi kpo Alɔɔn kpo ɖɔ emi na na sìn togun ɔ sín só ɔ mɛ. Loɔ Jehovah wɛ ka na sìn ɔ ye. Ee Mɔyizi kpo Alɔɔn kpo ma ɖɔ nugbǒ ǎ é ɔ, Jehovah ɖɔ emi na dɔn tó nú ye. É ɖɔ: ‘Mi na kplá togun ce yì Kanaa ǎ.’
É nɔ zaan bɔ Izlayɛli-ví lɛ tɔ́n sín Kadɛci. Hwenu kpɛɖé gudo ɔ, ye wá Ɔɔ Só kɔn. Só enɛ jí wɛ Alɔɔn kú ɖè. Xwè 123 ɖó wɛ é ɖè bo kú. Wǔ kú Izlayɛlinu lɛ kaka, bɔ ye ya Alɔɔn ví nú azǎn 30. Vǐ tɔn Eleazaa jɛ tɛn tɔn mɛ bo huzu vɔsanúxwlémawutɔ́ ɖaxó nú akɔta Izlayɛli tɔn.
Nombres 20:1-13, 22-29; Deutéronome 29:5; Nehémia 9:21.