Wema-Sɛ́dó-Mɛ Hagbɛ̌ Alixlɛ́mɛtɔ́ Ɔ Tɔn

Mɛvívɛ́ E Yí Wǎn nú Jehovah lɛ Emi:

“Mi na tuùn nugbǒ ɔ, bɔ nugbǒ ɔ na ɖè mi sín kannumɔgbenu,” wɛ Jezu ɖɔ. (Jaan 8:32) Xógbe enɛ lɛ dó wusyɛn lanmɛ nú mɛ tawun mɛ! Nú è na ɖɔ xó jɔ xó ɔ, è hɛn ɔ è na tuùn nugbǒ ɔ, é na bo tlɛ nyí ɖò “azǎn gudogudo” tɔn elɔ lɛ e mɛ hwenu lɛ vɛwǔ bɔ adingban gbakpé fí lɛ bǐ é ɔ nɛ. (2 Timɔtée 3:1) A ka flín azɔn nukɔntɔn e a mɔ nǔ jɛ nugbǒ e ɖò Xó Mawu Tɔn mɛ é wu é à? Xomɛ na ko hun we tawun!

É ɖò mɔ̌ có, lee e nyí nùjɔnǔ ɖɔ mǐ ni ɖó nukúnnúmɔjɛnǔmɛ e sɔgbe é dó nugbǒ ɔ wu bo nɔ ɖɔ nú mɛ ɖevo lɛ hwɛhwɛ sɔ é ɔ, mɔ̌ jɛn nǔwiwa mǐtɔn lɛ lɔ ɖó na nɔ sɔgbe xá nugbǒ ɔ é nɛ. Bo na dó sixu bló mɔ̌ ɔ, mǐ ɖó na hɛn mǐɖée ɖò wanyiyi Mawu tɔn mɛ. Etɛ lɛ enɛ ka byɔ? È na mɔ xósin nùkanbyɔ enɛ tɔn ɖò xó e Jezu ɖɔ ɖò zǎn e jɛ nukɔn nú kú tɔn é mɛ. É ɖɔ nú mɛsɛ́dó tɔn gbejinɔtɔ́ lɛ ɖɔ: “Enyi mi nyì sɛ́n ce lɛ ɔ, mi na nɔ wanyiyi ce mɛ, lee nyɛ nyì Tɔ́ ce sín sɛ́n lɛ, bo ɖò wanyiyi tɔn mɛ ɔ ɖɔhun.”​—Jaan 15:10.

Ðǒ ayi wu ɖɔ Jezu hɛn éɖée ɖò wanyiyi Mawu tɔn mɛ gbɔn tónúsíse nú sɛ́n Tɔ́ tɔn tɔn lɛ gblamɛ. Mɔ̌ jɛn mǐ lɔ ɖó na bló gbɔn ɖò égbé. Bo na dó hɛn mǐɖée ɖò wanyiyi Mawu tɔn mɛ ɔ, mǐ ɖó na nɔ zán nugbǒ ɔ ɖò gbɛzinzan mǐtɔn ayihɔngbe ayihɔngbe tɔn mɛ. Gbadanu ɖokpo enɛ ɔ, Jezu ɖɔ: “Nǔ lɛ bǐ mɛ nɛ mi mɔ nukúnnú jɛ nɛ; enyi mi bló ɖ’eji ɔ, é na nyɔ́ nú mi.”​—Jaan 13:17.

Mǐ ɖò nukún ɖó wɛ tawun ɖɔ wema elɔ ni d’alɔ we bonu a na kpó ɖò nugbǒ ɔ zán wɛ ɖò gbɛzinzan towe mɛ, bɔ mɔ̌ mɛ ɔ a na nɔ hɛn hwiɖée ‘ɖò wanyiyi Mawu tɔn mɛ, bo ɖò te kpɔ́n gbɛ̀ mavɔmavɔ.’​—Judi 21.