Wema-Sɛ́dó-Mɛ Hagbɛ̌ Alixlɛ́mɛtɔ́ ɔ Tɔn
Sɛ́dó Nɔví Mǐtɔn Sunnu kpo Nyɔnu kpo Vívɛ́ Lɛ:
É ko ɖó xwè nabi ɖé dìn bɔ ɖò gbè gègě kpo tò gègě kpo mɛ ɔ, xota ɖé lɛ nɔ tɔ́n ɖò La Tour de Garde mɛ ɖò xota “Imitez leur foi” (Ði Nǔ Ye Ðɔhun) glɔ. Xota enɛ lɛ nɔ gbajɛ̌mɛ nú tan mɛ e xó Biblu ɖɔ é ɖé lɛ tɔn, bo nɔ d’alɔ mǐ bɔ mǐ nɔ lin nǔ kpɔ́n dó nùɖiɖi e sunnu kpo nyɔnu kpo hwexónu tɔn enɛ lɛ ɖexlɛ́ ɖò mɛtɛnkpɔn lɛ kpo wuvɛ̌ lɛ kpo mɛ é jí.
Etɛ lɛ nǔxatɔ́ lɛ ka ko mɔ dó xota enɛ lɛ wu? Hwenu e nyɔnu ɖé xà xota e ɖɔ xó dó Mata jí é gudo é ɔ, é wlan ɖɔ: “Un ko nǔ hwenu e un xà é, ɖó é ɖɔhun pɛ́ɛ́ wɛ un cí. Un nɔ ba na nyí jonɔyitɔ́ ɖagbe hwebǐnu, bɔ alɔnu ce nɔ ján, amɔ̌, un nɔ wɔn hweɖelɛnu ɖɔ un ɖó na yí agbɔ̌n bo nɔ kpɔ́ kpodo xɔ́ntɔn ce e ba jonɔ mì lɛ é kpo.” Nyɔnuví xwè 15 mɛví ɖokpo ɖɔ dó tan Ɛsitɛ́ɛ tɔn wu ɖɔ: “Nǔ e mǐ na dó lɛ é kpo nǔ yaɖeyaɖe e tɔ́n lɛ é kpo sixu nɔ vɛ́ adɔ̌ mǐ. Mǐ ɖó na nɔ sɔnǔ ganji; é ɖò mɔ̌ có, mǐ ɖó na zɛ̀kpá ǎ.” É ɖɔ gɔ́ na ɖɔ: “Nǔ e mǐ nyí ɖò xomɛ é wɛ Jehovah nɔ ba.” Xota e ɖɔ xó dó mɛsɛ́dó Piyɛ́ɛ jí é ɖé sísɛ́ nɔví nyɔnu Klisanwun ɖé bɔ é ɖɔ: “Hwenu e un ɖò tan ɔ xà wɛ é ɔ, un sɔ́ nyiɖée bǐ d’emɛ kpátákpátá. É cí ɖɔ un ɖò tɛn tɔn mɛ finɛ wɛ ɖɔhun! Un zán nukún ce, tó ce, awɔntín ce, alɔ ce kpo ɖɛ̌ ce kpo bo dó sixu mɔ nǔ jɛ nǔ e ɖɔ wɛ akpáxwé lɛ ɖè é wu.”
Nǔxatɔ́ enɛ lɛ kpo maxamaxa ɖevo lɛ kpo ee wlan wema bo tinmɛ lee xota enɛ lɛ sù nukún yetɔn mɛ sɔ́ é xlɛ́ ɖɔ nǔ elɔ e mɛsɛ́dó Pɔlu wlan sín xwè mɔkpan ɖíe é nyí nugbǒ: “Nǔ e è ko wlan dó Mawuxówema ɔ mɛ ɖ’ayǐ xóxó lɛ bǐ ɔ, è wlan ye, bo na dó kplɔ́n nǔ mǐ.” (Hlɔ. 15:4) Jehovah bló bɔ tan enɛ lɛ ɖò Biblu mɛ bonu ye na kplɔ́n nǔ taji lɛ mǐ. Mǐ mɔ nugbǒ ɔ é ɔ, é ko lín wɛ oo alǒ é ko lín ǎ wɛ oo, mǐ bǐ wɛ tan enɛ lɛ sixu kplɔ́n nǔ.
Kaka jɛ dìn ɔ, xota enɛ lɛ ko tíìn nú Fɔngbe xatɔ́ mǐtɔn lɛ ǎ. Xomɛ hun mǐ ɖɔ dìn ɔ, mǐ ɖè ye tɔ́n dó wema elɔ mɛ. Mǐ dó wusyɛn lanmɛ nú we ɖɔ a ni yawu xà wema elɔ lee é na nyɔ́ bló gbɔn é. Ni nyí akpáxwé ɖé ɖò Sinsɛn-Biblo Xwédo Tɔn towe sín tuto mɛ; vǐ lɛ na yí wǎn na tawun! Hwenu e è na kplɔ́n wema elɔ ɖò Biblu Kplɔnkplɔn Agun Tɔn sín hwenu ɖò kplé jí é ɔ, ma gɔn ɖokpo vɔ́vɔ́ ɖ’emɛ ó. Ba hwenu bo xà ganji. Lin tamɛ kpɔ́n d’eji; sɔ́ hwiɖée bǐ d’emɛ. Tɛnkpɔn bonu lee nǔ cí nú mɛ e sín tan ɖ’emɛ lɛ é ni cí mɔ̌ nú hwi lɔ, tɛnkpɔn bo mɔ nǔ e ye mɔ é. Sɔ́ lee ye wà nǔ gbɔn é sɔ́ jlɛ́ dó lee hwɛ na ko wà gbɔn é wu.
É víví nú mǐ tawun ɖɔ mǐ ɖè wema elɔ tɔ́n. Ðɛ mǐtɔn wɛ nyí ɖɔ é ni nyí nyɔna ɖé nú mi kpodo xwédo mitɔn kpo. Kpodo wanyiyi ɖaxó kpan,
Hagbɛ̌ Alixlɛ́mɛtɔ́ Kúnnuɖetɔ́ Jehovah tɔn lɛ tɔn