février

Jexóva nɔ ba ɖɔ mɛ e nɔ sɛn émí lɛ́ é bǐ ní ɖó awǎjijɛ. É lín dó ɖokpó ɖokpó mǐtɔn ǎ; bɔ ényí wǔ kú mǐ, alǒ, awakanmɛ kú mǐ ɔ, é nɔ ɖ’ayi wú. (Ðɛh. 145:18, 19) Mǐ ní kpɔ́n lěe nǔ gbeyíɖɔ Elíi tɔn ɖu ayi mɛ nú Jexóva gbɔn é. Nya gbejínɔtɔ́ énɛ́ nɔ gbɛ ɖo táan e vɛ́ wǔ tawun ɖo hwenuxó Izlayɛ́li tɔn mɛ é ɖé mɛ. È dó ya nú mɛsɛntɔ́ Jexóva tɔn lɛ́ syɛ́nsyɛ́n, bɔ kɛntɔ́ hlɔ̌nhlɔ́nnɔ e klán gbe xá Mawu lɛ́ é ɖo biba wɛ nukún myámyá bo ná hu Elíi. (1 Axɔ́. 19:1, 2) Nǔ e sixú ko lɛ́ gba ayi dó nú Elíi é wɛ nyí ɖɔ é lin ɖɔ émíɖokpónɔ wɛ nyí gbeyíɖɔ e kpo ɖo gbɛ é. (1 Axɔ́. 19:10) Tlóló jɛ́n Mawu wa nǔɖé dó d’alɔ Elíi. Jexóva sɛ́ wɛnsagun ɖé dó b’ɛ vɔ́ gǎnjɛwú ná Elíi ɖɔ é kún ɖo éɖokpó ó, lé é kpo Izlayɛ́li-ví gěgé ɖěvo e nɔ ɖó sísí nú Mawu lɛ́ é! ( 1 Axɔ́. 19:5, 18) Jezu vɔ́ gǎnjɛwú ná ahwanvú tɔn lɛ́ kpó akpakpa sɔ́ mɛ kpó ɖɔ yě ná ɖó xwédo gbigbɔ tɔn ɖaxó ɖé. (Mak. 10:29, 30.) Gɔ́ ná ɔ, Jexóva Tɔ́ mǐtɔn jǐxwé tɔn ɔ d’akpá ɖɔ, émí ná nɔ gǔdo nú mɛ ɖěɖěe ba ná sɛn émí lɛ́ é.—Ðɛh. 9:10. w21.06 8-9 akpá. 3-4

Nǔkplɔ́nmɛ jínjɔ́n Biblu jí mǐtɔn lɛ́ nɔ ɖe sinsɛn-núkplɔ́nmɛ adingban tɔn lɛ́ gba, b’ɛ nɔ nyí afɔklɛ́nnú nú mɛ gěgé. Sinsɛngán lɛ́ nɔ kplɔ́n agunví yětɔn lɛ́ ɖɔ Mawu nɔ dɔn tó nú mɛ nyanya lɛ́ ɖo zomɛ. Yě nɔ zán adingban-núkplɔ́nmɛ énɛ́ dó dó xɛsi mɛ lɛ́ bónú yě ná se tónú nú yě. Ðó mǐ nyí mɛsɛntɔ́ Jexóva, Mawu wǎnyíyínɔ ɔ tɔn lɛ́ wútu ɔ, mǐ nɔ ɖe mɛ̌ adingban-núkplɔ́nmɛ énɛ́. Sinsɛngán lɛ́ nɔ lɛ́ kplɔ́n mɛ ɖɔ lǐndɔ̌n nyí jɔmakú. Ényí nǔkplɔ́nmɛ énɛ́ ɔ nǔgbó wɛ é nyí ɔ, é sɔ́ ná byɔ́ ɖɔ è ní fɔ́n mɛɖé sín kú ǎ. Mǐ nɔ xlɛ́ ɖɔ nǔkplɔ́nmɛ énɛ́ kún ɖo Biblu mɛ ó. Sinsɛn gěgé nɔ kplɔ́n mɛ ɖɔ nǔ bǐ nyí byɔ̌wá, amɔ̌, mǐdɛɛ lɛ́ nɔ kplɔ́n mɛ ɖɔ gbɛtɔ́ lɛ́ bǐ ɖó mɛɖésúsínínɔ bo sixú wá gbeta ɔ kɔn bo sɛn Mawu. Nɛ̌ sinsɛngán lɛ́ ka nɔ wa nǔ gbɔn? Hwɛhwɛ ɔ, é nɔ sin xomɛ nú yě tawun! Ényí mǐ yí wǎn nú nǔgbó ɔ ɔ, mǐ ɖó ná se tónú nú Mawu. (Jaan 8:45, 46) Mǐ ná gbɛ́ nǔgbó ɔ gbeɖé Satáan Awoví ɖɔhun ǎ. Nú nǔɖé ma sɔgbe xá nǔ e mǐ ɖi nǔ ná lɛ́ é ǎ ɔ, mǐ ná wa gbeɖé ǎ. (Jaan 8:44) Mawu byɔ́ ɖo togun tɔn sí ɖɔ é ní “gbɛ́ wǎn nú nǔnyanyawiwa,” bo “ɖó kan dó nǔɖagbewiwa wú” Jezu ɖɔhun.—Hlɔ̌. 12:9; Ebl. 1:9. w21.05 10 akpá. 10-11

Ényí mǐ nɔ mɔ ɖɔ mǐ nɔ yí go, alǒ mǐ nɔ dó nukúnkɛ́n ɔ ka lo? Mǐ sixú ɖyɔ́! Mɛsɛ́dó Pɔ́lu ɖɔ ɖɔ mɛ ɖěɖěe Awǒvi “wlí [gbɛɖe]” lɛ́ é sixú lɛ́ tɔ́n sín mɔ tɔn mɛ. (2 Tim. 2:26) Nɔ flín hwebǐnu ɖɔ Jexóva ɖ’agbɔ̌n tawun hú Satáan. Énɛ́ wú ɔ, ényí mǐ nɔ yí gbe nú alɔdó Jexóva tɔn ɔ, mǐ sixú tɔ́n sín mɔ, alǒ fɛ́ca e Awǒvi nɔ ɖó nú mɛ lɛ́ é bǐ mɛ. Nǔgbó ɔ, é ná nyɔ́ hú gǎn ɖɔ mǐ ní nyi alɔ nú goyíyí kpó nukúnkɛ́ndídó kpó. Alɔdó Mawu tɔn kɛ́ɖɛ́ jɛ́n sixú nyí tɔn, bɔ mǐ kpé énɛ́ wú. Énɛ́ wú ɔ, nɔ sa vo nú Jexóva gbe bǐ gbe, ɖɔ é ní d’alɔ we nú a ná tuun nú jijɔ baɖabaɖa énɛ́ lɛ́ ko ɖo nǔ wa dó linlin kpó nǔwalɔ towe lɛ́ kpó wú wɛ a jí. (Ðɛh. 139:23, 24) Má lɔn gbeɖé nú yě mɔ tɛn ɖo wǔ we ó! Sín xwe afatɔ́n mɔ̌kpán ɖíe wɛ Satáan ko nyí gběnyatɔ́ ɖé. Amɔ̌ zaanɖé din ɔ, è ná dó wlɔ ɛ, bo ná wá su kún tɔn dó. (Nǔɖe. 20:1-3, 10) Mǐ ɖo nukún ɖó azǎn énɛ́ wɛ vɛ́návɛ́ná. Amɔ̌, káká jɛ hwe énɛ́ nu ɔ, nɔ cɔ́ hwiɖée dó mɔ Satáan tɔn lɛ́ wú. Wa nǔ e wú a kpé é bǐ, bónú goyíyí, alǒ nukúnkɛ́ndídó ma wa nǔ dó wǔ we ó. Kánɖejí bo ná “ló dǒ ɖo Awǒvi nukɔn, énɛ́ ɔ, é ná hɔn yi zɔ nú [we].” w21.06 19 akpá. 15-17

Ényí mɛɖé yí gbe nú nǔgbó Biblu tɔn lɛ́, bo lɛ́ má xá mɛ ɖěvo lɛ́ ɔ, é nɔ víví nú Jexóva. (Nǔx. 23:15, 16) Ée Jexóva ná ɖo nǔ e wa wɛ togun tɔn ɖe ɖo égbé é mɔ wɛ é ɔ, kpɔ́n lě do é ná ɖó awǎjijɛ sɔ é! Ði kpɔ́ndéwú ɔ, jɛmɛjí ɖé ɖo nǔ gba wɛ gbɔn gbɛ ɔ bǐ mɛ có, ɖo xwe sinsɛnzɔ́ tɔn 2020 tɔn mɛ ɔ, gbɛtɔ́ 7705765 wɛ è kplɔ́n Biblu xá, bo d’alɔ mɛ 241994 bɔ yě zé yěɖée jó nú Jexóva, bo bló batɛ́mu. Ahwanvú yɔ̌yɔ́ énɛ́ lɛ́ lɔ ná kplɔ́n Biblu xá mɛ gěgé, bɔ yě ná húzú ahwanvú. (Luk. 6:40) É ɖo wɛn ɖɔ ényí mǐ nɔ ɖo alɔ ɖó ɖo nǔ kplɔ́nkplɔ́n mɛ lɛ́ bónú yě ná húzú ahwanvú sín azɔ̌ ɔ mɛ wɛ ɔ, xomɛ nɔ hun Jexóva. Nǔ kplɔ́nkplɔ́n mɛ lɛ́ bónú yě ná húzú ahwanvú sín azɔ̌ ɔ bɔ wǔ ǎ, amɔ̌, kpó alɔdó Jexóva tɔn kpó ɔ, mǐ sixú w’azɔ̌ e nyí mǐtɔn é, bo kplɔ́n nǔ mɛ yɔ̌yɔ́ lɛ́ bɔ yě ná yí wǎn nú Tɔ́ mǐtɔn jǐxwé tɔn ɔ. Mǐ sixú nya nǔ élɔ́ gbé: é hwe bǐ ɔ, mǐ ná bɛ́ Biblu kplɔ́nkplɔ́n xá mɛ ɖokpó, bo lɛ́ kpé nukún d’é wú. Ényí mǐ nɔ gbɔn ninɔmɛ e jɛxá lɛ́ é bǐ sín yɛkan mɛ, bo nɔ byɔ́ mɛ e mǐ xo go lɛ́ é bǐ ɖɔ yě ní wá kplɔ́n nǔ xá mǐ ɔ, bɔ́yá nǔ e mǐ ma ɖó nukún tɔn ǎ é wɛ ná jɛ. w21.07 6-7 akpá. 14-16

Axɔ́sú Davídi ná nǔ xɔ akwɛ́ gěgé ɖo dɔkun tɔn lɛ́ mɛ dó nɔ gǔdo nú tɛ́npli ɔ gbigbá. (1 Tan 22:11-16) Ényí gǎn ma sɔ́ kpo ɖo mǐ wú bónú mǐ ná ɖ’alɔ ɖo yɛhwexɔ́súɖuto ɔ sín xɔ lɛ́ gbigbá mɛ ǎ ɔ, mǐ sixú ná nǔníná lɛ́ lěe mǐ kpé wú gbɔn é dó nɔ gǔdo nú azɔ̌ énɛ́ lɛ́. Gɔ́ ná ɔ, mǐ sixú bló bɔ mɛ wínnyáwínnyá lɛ́ ná ɖu le nǔ e mǐ ko mɔ kpɔ́n lɛ́ é tɔn. Kpɔ́n kpɔ́ndéwú alɔhundónánǔmɛ tɔn e mɛsɛ́dó Pɔ́lu zé ɖ’ayǐ é. Pɔ́lu byɔ́ Timɔtée ɖɔ é ní wá gɔ́ nú émí ɖo mɛsɛ́dózɔ́ ɔ mɛ, bo má wlɛnwín Mawuxóɖiɖɔ kpó mɛkplɔ́nkplɔ́n kpó tɔn e éɖésúnɔ nɔ zán lɛ́ é xá dɔ̌nkpɛvú énɛ́. (Mɛ. 16:1-3) Pɔ́lu kplɔ́n azɔ̌ Timɔtée bónú Mawuxóɖiɖɔzɔ́ ɔ ná bí alɔ n’i. (1 Kɔ. 4:17) Wǎgbɔ tɔn ɔ, Timɔtée zán wlɛnwín Pɔ́lu tɔn lɛ́ dó kplɔ́n azɔ̌ mɛ ɖěvo lɛ́. w21.09 12 akpá. 14-15

Étɛ́ kpɔ́ndéwú ahwanvú Apolósu kpó mɛsɛ́dó Pɔ́lu kpó tɔn ka sixú kplɔ́n mǐ? Yě mɛ we lɛ́ bǐ wɛ tuun Mawuxówéma ɔ ganjí, bo lɛ́ nyɔ́ nǔ kplɔ́n mɛ ɖésú. Yě d’alɔ bɔ è kplɔ́n nǔ mɛ gěgé bɔ yě húzú ahwanvú. Amɔ̌, yě ɖě ka nɔ hwlɛ́n agba xá yěɖée ǎ. (Mɛ. 18:24) Nǔgbó ɔ, Apolósu gosín Kɔlɛ́nti b’ɛ ná nɔ zaan é ɔ, Pɔ́lu dó wǔsyɛ́n lanmɛ n’i ɖɔ é ní lɛ́ lɛ́ kɔ yi dɔ̌n. (1 Kɔ. 16:12) Apolósu zán nǔníná tɔn lɛ́ ɖo ali ɖagbe nu; énɛ́ wɛ nyí ɖɔ é jlá wɛn ɖagbe ɔ, bo lɛ́ dó wǔsyɛ́n lanmɛ nú nɔví tɔn lɛ́. Mǐ sixú lɛ́ kú d’é jí ɖɔ Apolósu ɔ, nya mɛɖéesɔ́hwetɔ́ ɖé wɛ. Ði kpɔ́ndéwú ɔ, è wlán dó fí ɖě ɖo Biblu mɛ ɖɔ é sin xomɛ hwenu e Akilási kpó Plisílu kpó “tín Mawu sín ali ɔ mɛ n’i” é ǎ. (Mɛ. 18:24-28) Mɛsɛ́dó Pɔ́lu mɔ nǔ jɛ azɔ̌ ɖagbe e Apolósu wa lɛ́ é wú. Amɔ̌, Pɔ́lu nɔ mɔ ɖɔ mɛ ɖěvo lɛ́ ná lin ɖɔ Apolósu kpɔ́n te hú gǎn émí ǎ. Mɛɖéesɔ́hwe kpó jlɛ̌jinínɔ kpó Pɔ́lu tɔn tɔ́n ɖo wě e é ɖe xá agun e ɖo Kɔlɛ́nti é mɛ.—1 Kɔ. 3:4-6. w21.07 18-19 akpá. 15-17

Adámu kpó Ɛvu kpó sɔ́ jlǒ dó hu hwɛ dó Mawu, énɛ́ wú ɔ, yě sɔ́ jɛxá bo ná nɔ xwédo tɔn mɛ ǎ. Bɔ vǐ yětɔn lɛ́ ka ló? Jexóva yí wǎn nú gbɛtɔ́ lɛ́, énɛ́ wú ɔ, é hun ali nú vǐ yětɔn ɖěɖěe se tónú lɛ́ é, bónú yě ná nɔ xwédo tɔn mɛ. Bɔ vɔ̌ e vǐɖokpónɔ tɔn sá é gblamɛ wɛ é gbɔn bo hun ali mɔ̌hun. (Jaan 3:16) Vɔ̌sísá Jezu tɔn zɔ́n bɔ è sɔ́ gbɛtɔ́ gbejínɔtɔ́ 144000 dó ɖó vǐ Mawu tɔn. (Hlɔ̌. 8:15-17; Nǔɖe. 14:1) Gɔ́ ná ɔ, gbejínɔtɔ́ ɖěvo lɛ́ lǐvi mɔ̌kpán ɖo jlǒ Mawu tɔn wa wɛ. Yě ɖo nukún ɖó wɛ bo ná nɔ xwédo Mawu tɔn mɛ, ɖo mɛtɛ́nkpɔ́n gǔdo tɔn ɔ gúdo ɖo vivɔnu xwe afatɔ́n ɔ tɔn. (Ðɛh. 25:14; Hlɔ̌. 8:20, 21) Yě tlɛ ko ɖo Gbɛɖótɔ́ yětɔn Jexóva ylɔ́ ɖɔ “Tɔ́” wɛ. (Mat. 6:9) Mɛ e è ná fɔ́n sín kú lɛ́ é lɔ ná kpéwú bo kplɔ́n nǔ e Jexóva ba ɖɔ yě ni wa lɛ́ é. Mɛ ɖěɖěe ná xwedó alixlɛ́mɛ tɔn lɛ́ télélé lɛ́ é lɔ ná wá nɔ xwédo tɔn mɛ. w21.08 5 akpá. 10-11

È sɔ́ azɔ̌ ɖé d’así nú mɛsɛ́dó Pɔ́lu, bɔ nú xwe mɔ̌kpán ɔ, é sɔ́ sinsɛnzɔ́ e è sɔ́ d’así n’i é dó mɔ nǔ tají hú gǎn ɔ ɖo gbɛzán tɔn mɛ. É nɔ jlá wɛn ɖagbe ɔ ɖo “agbawungba kpódó xwé . . . lɛ́ gbe kpó.” (Mɛ. 20:20) È ná ɖɔ ɔ, é nɔ gbɔn ali e hun n’i lɛ́ é bǐ sín yɛkan mɛ dó jlá wɛn ɖagbe ɔ! Ði kpɔ́ndéwú ɔ, hwenu e é ɖo te kpɔ́n azɔ̌watɔ́ hǎtɔ́ tɔn ɖé lɛ́ ɖo Atɛ́ni é ɔ, é jlá wɛn ɖagbe ɔ gbɛ̌ta e mɛ gbɛtɔ́ nukúnɖéjí lɛ́ ɖe é ɖé, bɔ mɛɖé lɛ́ ɖo yě mɛ bó yí wɛn ɔ ganjí. (Mɛ. 17:16, 17, 34) Pɔ́lu ɖo “gankpá mɛ” có, é jlá wɛn ɖagbe ɔ mɛ ɖěɖěe lɛ́ lɛ̌ dó è lɛ́ é. (Filí. 1:13, 14; Mɛ. 28:16-24) Pɔ́lu nɔ zán hwenu tɔn ganjí. Hwɛhwɛ wɛ é nɔ byɔ́ mɛ ɖěvo lɛ́ ɖɔ yě ní wá gɔ́ nú émí ɖo sinsɛnzɔ́ ɔ mɛ. Ði kpɔ́ndéwú ɔ, ɖo tomɛyiyi mɛsɛ́dó tɔn tɔn nukɔntɔn ɔ hwenu ɔ, é kplá Jaan Maki, bɔ ɖo wegɔ́ ɔ hwenu ɔ, é kplá Timɔtée. (Mɛ. 12:25; 16:1-4) É ɖo wɛn ɖɔ Pɔ́lu wa nǔ e wú é kpé é bǐ, bó kplɔ́n súnnu énɛ́ lɛ́ lěe è nɔ bló tuto nú agun ɖé gbɔn é, lěe è nɔ wa lɛ̌ngbɔ́nyitɔ́zɔ́ gbɔn é kpó lěe è nɔ nyí nǔkplɔ́nmɛtɔ́ alɔsekpɛ́nnánɔ ɖé gbɔn é kpó.—1 Kɔ. 4:17. w22.03 27 akpá. 5-6

Mɛɖé lɛ́ ɖi nǔ ɖɔ Gbɛɖótɔ́ ɖé tíin ǎ, ɖó yě nɔ ɖɔ ɖɔ nǔ e émí mɔ é jɛ́n émí sixú ɖi nǔ ná. Amɔ̌, è ná ɖɔ xó jɔ xó ɔ, nǔɖé lɛ́ tíin bɔ yě nɔ mɔ ǎ bo ka ɖi nǔ ná, ɖó yě ɖó kúnnuɖenú ɔ ɖɔ yě tíin nǔgbó wútu. Kpɔ́ndéwú tɔn ɖokpó wɛ nyí jɔhɔn. Nǔɖiɖi e xó Biblu ɖɔ é nɔ byɔ́ ɖɔ è ní ɖó kúnnuɖenú nǔ ɖěɖěe ‘è ma nɔ mɔ ǎ, bɔ yě ka tíin lɛ́ é tɔn.’ (Ebl. 11:1) É nɔ byɔ́ hwenu kpó gǎndídó kpó cóbɔ mǐɖésúnɔ ná gbéjé kúnnuɖenú lɛ́ kpɔ́n; mɛ gěgé ka nɔ ba ná wa mɔ̌ ǎ. Ényí mɛɖé ma gbéjé kúnnuɖenú lɛ́ kpɔ́n éɖésúnɔ ǎ ɔ, é sixú wá gbeta ɔ kɔn ɖɔ Mawu ɖě kún tíin ó. Ée nǔnywɛ́ xwítíxwítízɔ́watɔ́ ɖé lɛ́ gbéjé kúnnuɖenú lɛ́ kpɔ́n gúdo é ɔ, yě kúdéjí ɖɔ Mawu wɛ ɖó wɛ̌kɛ́ ɔ. Ðo bǐbɛ́mɛ ɔ, yě ɖɔ ɖɔ Gbɛɖótɔ́ ɖě kún ɖe ó, ɖó è nɔ kplɔ́n mɛ gbeɖé ɖo kplɔ́nyijí-alavɔ ɖɔ dǎ wɛ è dá nǔ lɛ́ ǎ wútu. É ɖo mɔ̌ có, yě wá tuun Jexóva din, bo yí wǎn n’i. Din ɔ, mǐ mɛ bǐ ɖó ná bló bɔ nǔ e mǐ ɖi nú Jexóva é ná lí dǒ, ényí mǐ ná bo tlɛ se wěma gbɔn ɖěbǔ ɔ nɛ́. w21.08 14 akpá. 1; 15-17 akpá. 6-7

Jezu dó lǒ dó vǐ ɖuvanɔ ɔ wú bo ná dó d’alɔ mǐ bónú mǐ ná mɔ nǔ jɛ lě do Jexóva nɔ ba ná kú nǔbláwǔ nú mɛ sɔ é wú. Vǐ ɔ gosín xwégbe, “bó zán nǔ tɔn lɛ́ dó akpa mɛ.” (Luk. 15:13) Nukɔnmɛ ɔ, é jó gbɛ gblégblé e zán wɛ é ɖe é dó, bo sɔ́ éɖée hwe, lobo lɛ́ kɔ wá xwégbe. Nɛ̌ tɔ́ tɔn ka wa nǔ gbɔn? Jezu ɖɔ: “Hwenu e [vǐ ɔ] ɖo zɔ jawě ɔ, tɔ́ tɔn mɔ ɛ sɛ́dó, bɔ nǔ tɔn blá wǔ n’i, bɔ é bɛ́ wezun, bo yi zunfán ɛ, bo kísi n’i.” Tɔ́ ɔ dó winnyá vǐ tɔn ǎ. É nyɔ́ wa ɔ, afɔjíafɔjí ɔ, é kú nǔbláwǔ n’i gbɔn hwɛ e é sɔ́ kɛ ɛ é kpo yǐ e é yí i dó xwégbe é kpó gblamɛ. Vǐ ɖuvanɔ ɔ hu hwɛ syɛ́nsyɛ́n, amɔ̌, ɖó é lɛ́ kɔ sín hwɛ tɔn lɛ́ gúdo wútu ɔ, tɔ́ tɔn sɔ́ hwɛ kɛ ɛ. Jexóva wɛ tɔ́ nǔbláwǔkúnúmɛtɔ́ e xó lǒ ɔ ɖɔ é nɔ te ná. Jezu gbɔn lǒ énɛ́ e byɔ́ lanmɛ nú mɛ tawun é sín yɛkan mɛ dó xlɛ́ ɖɔ Jexóva ba ná sɔ́ hwɛ kɛ hwɛhutɔ́ ɖěɖěe lɛ́ kɔ sín hwɛ yětɔn lɛ́ gúdo nǔgbó nǔgbó lɛ́ é.—Luk. 15:17-24. w21.10 8-9 akpá. 4, 6

Égbé ɔ, sinsɛngán gěgé ko wa nǔ e wú yě kpé é bǐ, bo ná dó bló bónú mɛɖé ma tuun nú Mawu ɖó nyǐkɔ éɖésúnɔ tɔn ɖé ó. Yě ɖe nyǐkɔ Mawu tɔn sín lǐlɛ́dógbeɖévomɛ Biblu tɔn yětɔn lɛ́ mɛ, bɔ ɖo ninɔmɛ ɖé lɛ́ mɛ ɔ, yě gbɛ́ ɖɔ mɛɖé ní ma zán nyǐkɔ Mawu tɔn ɖo amǐsa yětɔn lɛ́ hwenu ó. É ɖo wɛn ɖɔ Kúnnuɖetɔ́ Jexóva tɔn lɛ́ kɛ́ɖɛ́ wɛ nɔ ɖó sísí nú nyǐkɔ Jexóva tɔn, lobo nɔ lɛ́ wlí yɛ̌yi e jɛxá ɛ é ná. Mǐ ɖo nyǐkɔ Mawu tɔn ɖe xlɛ́ wɛ gbɔn gbɛ ɔ bǐ mɛ, hú sinsɛn ɖěvo ɖěbǔ. Énɛ́ wú ɔ, mǐ nɔ wa nǔ e wú mǐ kpé lɛ́ é bǐ dó ɖe xlɛ́ ɖɔ Kúnnuɖetɔ́ Jexóva tɔn lɛ́ wɛ nú mǐ. (Eza. 43:10-12) Mǐ ko zín Biblu Lẹdogbedevomẹ Aihọn Yọyọ Tọn lǐvi 240 jɛjí. Biblu énɛ́ sɔ́ nyǐkɔ Jexóva ɔ dó tɛn e mɛ é ɖó ná nɔ bɔ lǐlɛ́dógbeɖévomɛtɔ́ ɖěvo lɛ́ ɖe síìn lɛ́ é. Gɔ́ ná ɔ, mǐ nɔ ɖe wěma jínjɔ́n Biblu jí ɖěɖěe mɛ è nɔ zán nyǐkɔ Jexóva ɔ ɖe lɛ́ é tɔ́n dó gbe 1000 jɛjí mɛ. w21.10 20-21 akpá. 9-10

Ényí mǐ nɔ d’alɔ klisánwun hǎtɔ́ e ɖo hudó mɛ lɛ́ é hǔn, Jexóva sɛn wɛ mǐ ɖe nɛ́. Jexóva dó akpá nú Izlayɛ́li ví lɛ́ ɖɔ émí ná sú xomɛnyínyɔ́nú e yě wa nú wamamɔnɔ lɛ́ é sín axɔ́ yě. (Sɛ́n. 15:10) Nǔgbó ɔ, ényí mǐ d’alɔ nǔɖitɔ́ hǎtɔ́ e ɖo hudó mɛ é ɖé hweɖébǔnu ɔ, Jexóva nɔ mɔ ɖɔ émí wɛ è ná nǔ. (Nǔx. 19:17) Ði kpɔ́ndéwú ɔ, hwenu e Pɔ́lu ɖo gantɔ́ nyí wɛ é ɔ, klisánwun e ɖo Filípu lɛ́ é sɛ́ nǔníná d’è, bɔ Pɔ́lu ylɔ́ nǔníná énɛ́ ɖɔ “vɔ̌sísá e nɔ nyɔ́ Mawu nukúnmɛ bɔ é nɔ yí gbe ná é.” (Filí. 4:18) Lin tamɛ dó mɛ ɖěɖěe ɖo agun towe mɛ lɛ́ é jí, bó kanbyɔ́ hwiɖée ɖɔ: ‘Mɛɖé ka ɖe bɔ un sixú d’alɔ a?’ Ényí mǐ nɔ zán hwenu, hlɔ̌nhlɔ́n, nǔwúkpíkpé kpó nǔɖókan kpó mǐtɔn lɛ́ dó d’alɔ mɛ ɖěɖěe ɖo hudó mɛ lɛ́ é ɔ, é nɔ su Jexóva nukúnmɛ tawun, b’ɛ nɔ mɔ dó mɔ akpáxwé Mawusinsɛn mǐtɔn tɔn ɖé. (Ja. 1:27) Jexóva sinsɛn nɔ byɔ́ hwenu kpó gǎndídó kpó. Amɔ̌, é ka nyí agban bó ɖo kɔ jí nú mǐ ǎ. (1 Jaan 5:3) Aniwú? Wǎn e mǐ yí nú Jexóva, nɔví súnnu mǐtɔn lɛ́ kpó nɔví nyɔ̌nu mǐtɔn lɛ́ kpó é wú wɛ. w22.03 24 akpá. 14-15

Cóbónú nɔví mǐtɔn lɛ́ sín nǔ ná blá wǔ nú mǐ ɔ, é ɖo dandan ɖɔ mǐ ní lin tamɛ dó tagba e ɖí xwi xá wɛ yě ɖe lɛ́ é jí. Ði kpɔ́ndéwú ɔ, nɔví nyɔ̌nu ɖé sixú ɖo azɔn syɛ́nsyɛ́n ɖé jɛ wɛ. É nɔ ɖo gbɛ vo sa wɛ ǎ, amɔ̌, vlafo ényí mɛɖé d’alɔ ɛ ɔ, é ná hun xomɛ n’i tawun. Mǐ ka sixú d’alɔ ɛ ɖo nǔɖiɖá alǒ xwégbezɔ́ lɛ́ kɔn a? Azɔ̌ sixú gblé dó nɔví súnnu ɖé. Mǐ sixú ná ɛ akwɛ́ kléwún ɖé bo ná dó d’alɔ ɛ káká jɛ hwenu e é ná mɔ azɔ̌ ɖěvo dó é. Vlafo mǐ sixú nɔ ma ɖe xlɛ́ ɖɔ mǐ wɛ ná ɛ. Mǐ ɖó ná nɔ te kpɔ́n hwenu e nɔví mǐtɔn lɛ́ ná wá byɔ́ alɔdó mǐtɔn dó é, cóbó ɖe nǔbláwǔkúnúmɛ xlɛ́ yě ǎ. Jexóva ɖɔhun ɔ, mǐ sixú ɖe afɔ ɔ jɛ nukɔn. Mǐ tlɛ nɔ byɔ́ ɛ ɖɔ hwe ní tɔ́n cóbónú éɖésúnɔ nɔ wa mɔ̌ nú mǐ gbe bǐ gbe ǎ. Gɔ́ ná ɔ, mɛ bǐ wɛ nɔ ɖu le tɔn, é nyí mɛ e nǔ nɔ su nukún mɛ ná é kɛ́ɖɛ́ ǎ. A ná yí gbe ɖɔ ɖó Jexóva nɔ sú hudó mǐtɔn lɛ́ sín do wútu ɔ, wǎn e é yí nú mǐ é ɖe xlɛ́ wɛ é ɖe gbɔn mɔ̌ nɛ a cé? Mǐ yí wǎn nú Jexóva tawun ɖó é nyɔ́ xomɛ ɖésú, bo nɔ lɛ́ hun alɔ dó ná nǔ mɛ tawun! w21.09 22-23 akpá. 12-13

Xomɛnyínyɔ́ Mawu tɔn nɔ sísɛ́ ɛ b’ɛ nɔ sɔ́ hwɛ kɛ mɛ. Ényí Jexóva mɔ hwɛhutɔ́ e lɛ́ kɔ sín hwɛ tɔn lɛ́ gúdo é ɖé ɔ, xomɛnyínyɔ́ tɔn nɔ sísɛ́ ɛ b’ɛ nɔ sɔ́ hwɛ kɛ ɛ. Ðɛhanwlántɔ́ Davídi ɖɔ xó élɔ́ dó Jexóva wú: “É nɔ kpɔ́n dó hwɛ e mǐ hu é wú, bo nɔ wa nǔ tɔn xá mǐ ǎ. É nɔ sɔ́ nǔ e mǐ wa nyi do é sín bǎ dó xo mǐ ǎ.” (Ðɛh. 103:8-11) Nǔ e gbo Davídi lɛ́ é zɔ́n bɔ é tuun ɖɔ ényí ayixa mɛtɔn nɔ ɖo hwɛ dó mɛ wɛ ɔ, é nɔ vɛ́ wǔ tawun. Amɔ̌, é lɛ́ tuun ɖɔ Jexóva “ɖo gbesisɔmɛ bo ná sɔ́ hwɛ kɛ mɛ.” Étɛ́ ka nɔ sísɛ́ Jexóva b’ɛ nɔ sɔ́ hwɛ kɛ mɛ? Xósin ɔ ɖo tɛ́si égbé tɔn mɛ. Nǔgbó ɔ, lěe Davídi ɖɔ gbɔn ɖo ɖɛ mɛ é ɔ, Jexóva nɔ sɔ́ hwɛ kɛ mɛ, ɖó é nɔ nyɔ́ xomɛ dó mɛ ɖěɖěe nɔ sú xó ylɔ́ ɛ lɛ́ é bǐ wú. Ényí mǐ hu hwɛ ɔ, é sɔgbe bo tlɛ lɛ́ nyɔ́ ɖɔ é ní vɛ́ nú mǐ. Énɛ́ sixú zɔ́n bɔ mǐ na lɛ́ kɔ sín hwɛ e mǐ hu é gúdo, bo wa nǔɖé lɛ́ dó jlá nǔ e mǐ wa nyi do é ɖó. w21.11 5 akpá. 11-12

Jexóva yí wǎn nú nyǐkɔ tɔn, bo nɔ ba ɖɔ mɛ bǐ ní ɖó sísí ná. Biblu ɖɔ: “Nyi wɛ nyí [Jexóva, nwt]; mɔ̌ wɛ nyǐkɔ ce nyí; susu e nyí ce ɔ, un nɔ jó dó nú mɛɖé ǎ. Un ka nɔ jó yɛ̌yi e nyí ce ɔ dó nú bǒcyɔ́ ɖé ǎ.” (Eza. 42:8) Amɔ̌, nú xwe afatɔ́n donu ayizɛ́n mɔ̌ ɔ, è kɔn cí dó nyǐkɔ tɔn wú. (Ðɛh. 74:10, 18, 23) Nǔ lɛ́ bɛ́ hwenu e Awǒvi (tínmɛ tɔn wɛ nyí “Jidómɛtɔ́”) dó hwɛ Mawu ɖɔ é tɛ nǔ e sín hudó Adámu kpó Ɛvu kpó ɖó é yě é. (Bǐb. 3:1-5) Sín hwenɛ́nu ɔ, è dó hwɛ agɔ Mawu ɖɔ é tɛ nǔ e sín hudó gbɛtɔ́ lɛ́ ɖó tawun é yě. Cí e è kɔn dó nyǐkɔ Mawu tɔn wú é ɖu ayi mɛ nú Jezu. Jexóva ɖokpónɔ wɛ ɖ’acɛ bo ná kp’acɛ ɖo jǐxwé, bo lɛ́ kp’acɛ dó ayǐkúngban jí, bɔ lěe é nɔ kp’acɛ gbɔn é wɛ nyɔ́ hú gǎn. (Nǔɖe. 4:11) Amɔ̌, Awǒvi tɛ́n kpɔ́n, bo flú wɛnsagun ɖé lɛ́ kpó gbɛtɔ́ ɖé lɛ́ kpó bɔ yě nɔ lin ɖɔ Mawu kún ɖó acɛ énɛ́ ó. Zaanɖé din ɔ, Mawu ná ɖeɖɛ Nǔbǐwúkpétɔ́ e É nyí é sín xó e ɖo atɛ jí é bǐ mlɛ́mlɛ́. Jexóva ná klɔ́ cí sín nyǐkɔ tɔn wú hwenu e é ná xlɛ́ ɖɔ Axɔ́súɖuto émítɔn kɛ́ɖɛ́ jɛ́n sixú bló bɔ fífá kpó ayijayǐ kpó ná tíin ɖo ayǐkúngban ɔ jí nǔgbó nǔgbó é. w21.07 9 akpá. 5-6

Jɔwámɔnú wɛ é nyí ɖɔ tatɔ́ xwédo tɔn ɖé ní ba ná sú nǔɖuɖu, nǔzinzán kpó xɔ kpó sín hudó e asi tɔn kpó vǐ tɔn lɛ́ kpó ɖó é sín do. Akwɛ́yózó syɛ́nsyɛ́n ɖé mɛ wɛ a ɖe a? Ényí mɔ̌ hǔn, hwenu vɛ́ wǔ ɖé mɛ wɛ a ɖe. É ɖo mɔ̌ có, a sixú zán hwenu énɛ́ dó hɛn nǔɖiɖi towe lí dǒ. Xo ɖɛ sɛ́dó Jexóva, bo xa xó Jezu tɔn e ɖo Matie 6:25-34 mɛ lɛ́ é, lobo lin tamɛ dó yě jí. Gbějé kpɔ́ndéwú hwe mǐtɔn nu tɔn e xlɛ́ ɖɔ Jexóva nɔ nɔ gǔdo nú mɛ ɖěɖěe hɛn alɔnu yětɔn ján ɖo yɛhwexɔ́súɖuto ɔ sín azɔ̌ lɛ́ kɔn é kpɔ́n. (1 Kɔ. 15:58) Ényí a wa mɔ̌ ɔ, a ná ná hlɔ̌nhlɔ́n jiɖiɖe a ɖó ɖɔ, lěe Tɔ́ towe jǐxwé tɔn ɔ d’alɔ mɛ ɖěɖěe ɖo ninɔmɛ mɔ̌hun mɛ lɛ́ é gbɔn é ɔ, é ná d’alɔ émílɔ é. É tuun nǔ e sín hudó a ɖó é, bo lɛ́ tuun lěe é ná sú do tɔn gbɔn é. Ényí a ɖo lěe Jexóva ɖo alɔ dó we wɛ ɖo gbɛzán towe mɛ gbɔn é mɔ wɛ ɔ, nǔɖiɖi towe ná lí dǒ d’é jí, énɛ́ ɔ, a ná kpé wú bo ná dɛ ɖo mɛtɛ́nkpɔ́n syɛ́nsyɛ́n e ɖo nukɔn ja lɛ́ é nu. w21.11 20-21 akpá. 3; 21-22 akpá. 6

Nǔkplɔ́nmɛ e kúnkplá gbɛxixɔ ɔ é ko hɛn nǔɖiɖi klisánwun gěgé tɔn lí dǒ. Gbeklánxámɛ lɛ́ nɔ ɖo fínɛ́ có, yě nɔ ɖo Mawuxó ɖɔ wɛ, bo nɔ lɛ́ dɛ ɖo mɛtɛ́nkpɔ́n alɔkpa lɛ́ bǐ nu ɖo gbɛzán yětɔn mɛ. Mǐ ní kpɔ́n kpɔ́ndéwú mɛsɛ́dó Jaan tɔn. Xwe 60 jɛjí wɛ é sixú ko jlá nǔgbó e kúnkplá Klísu kpó gbɛxixɔ ɔ kpó é ná kpó gbejíninɔ kpó. Ðibla yi xwe 100 ɖó wɛ é ɖe có, acɛkpikpa Hlɔ̌ma tɔn mɔ ɖɔ é nyí dǎkaxotɔ́ bo sú i dó gankpá mɛ ɖo tɔtɛ́ntinto Patimɔ́si tɔn mɛ. Étɛ́ é ka wa nyi do? É “jlá Mawuxó ɔ, bo ɖekúnnu nú Jezu.” (Nǔɖe. 1:9) Kpɔ́ndéwú nǔɖiɖi kpó didɛ kpó tɔn nukúnɖéjí tɛ́ ɖíe! Ðo wěma e Mawu sɔ́ d’ayi mɛ nú mɛsɛ́dó Jaan b’ɛ wlán é mɛ ɔ, é ɖe lě do é yí wǎn nú Jezu bɔ gbɛxixɔ ɔ lɛ́ su nukún tɔn mɛ sɔ é xlɛ́. Azɔn 100 jɛjí wɛ é ɖɔ xó dó gbɛxixɔ ɔ, alǒ nǔ ɖagbeɖagbe e sín ali gbɛxixɔ ɔ hun lɛ́ é jí. (Nǔɖe. 19:10) É ɖo wɛn ɖɔ gbɛxixɔ ɔ su nukún Jaan tɔn mɛ tawun. w21.04 17 akpá. 9-10

Jexóva nɔ ba ɖɔ togun tɔn ní nyɔ́ xomɛ dó wɔ̌nɖowǔnánɔ lɛ́ wú. Ði kpɔ́ndéwú ɔ, Izlayɛ́li-ví lɛ́ ɖó ná zun tókúnɔ ɖé ǎ. Mɛzunzun énɛ́ nɔ byɔ́ ɖɔ è ní gblɔ́n adǎn n’i, alǒ ɖɔ nǔ nyanya dó wǔ tɔn. Nǔ wa gbɔn mɔ̌ xá tókúnɔ ɖé nylá tawun! É sixú se nǔ e ɖɔ dó wǔ tɔn wɛ è ɖe é ɖě ǎ, énɛ́ wú ɔ, é ná sixú jɛ ahwan éɖée jí ǎ. Gɔ́ ná ɔ, ɖo Levíi-ví lɛ́ 19:14 mɛ ɔ, mǐ kplɔ́n ɖɔ mɛ e nyí mɛsɛntɔ́ Mawu tɔn lɛ́ é kún ɖó ná “sɔ́ nǔ ɖó alixo nú nukúntíntɔ́nnɔ bónú é wá klɛ́n afɔ d’é wú ó.” Wěma ɖé ɖɔ dó wɔ̌nɖowǔnánɔ lɛ́ wú ɖɔ: “Ðo Izlayɛ́li hwexónu tɔn ɔ, è nɔ kɔ́n wi sín ta nú yě, bo nɔ xo dǎka yě wǔ.” Bóyá adǎkaxotɔ́ ɖé ná sɔ́ afɔklɛ́nnú ɖé ɖó ali jí nú nukúntíntɔ́nnɔ ɖé, bo ná dó gblé wǔ i, alǒ, bo ná dó ko è. Énɛ́ ka nylá tawun! Jexóva ná sɛ́n énɛ́, bo ná dó d’alɔ togun tɔn bónú é ná mɔ nǔ jɛ wú ɖɔ émí ɖó ná se wǔvɛ́ xá mɛ ɖěɖěe ɖó wɔ̌n ɖo wǔ lɛ́ é. w21.12 8-9 akpá. 3-4

Ado hu Jakɔ́bu ɖɔ fofó émítɔn sixú kpó ɖo xomɛ sin dó émí wɛ. Énɛ́ wú ɔ, é xo ɖɛ vívɛ́ sɛ́dó Jexóva dó xó ɔ wú. Énɛ́ gúdo ɔ, é ɖe nǔ e é hɛn lɛ́ é ɖě, bo sɛ́ dó Esáwu. (Bǐb. 32:10-16) Gǔdo mɛ hwenu e yě mɛ we lɛ́ wá mɔ yěɖée é ɔ, Jakɔ́bu wɛ ɖe afɔ nukɔntɔn ɔ, bo wlí yɛ̌yi nú Esáwu. É ɖe kɔ́ nú Esáwu, é nyí ɖokpó ǎ, é ka lɛ́ nyí we ǎ, loɔ, azɔn tɛ́nwe kwíɖíkwíɖí wɛ é wa mɔ̌. Jakɔ́bu sɔ́ éɖée hwe, bo ɖe sísí xlɛ́ Esáwu, lobo dó hwɛ gbɔ xá ɛ. (Bǐb. 33:3, 4) Lěe Jakɔ́bu sɔ́ nǔ gbɔn cóbó yi mɔ Esáwu é kpó lěe é kpé è gbɔn é kpó kplɔ́n nǔɖé mǐ. Jakɔ́bu sɔ́ éɖée hwe, bo byɔ́ alɔdó Jexóva tɔn. Énɛ́ gúdo ɔ, é ɖe xlɛ́ ɖɔ nǔ e takúnmɛ émí xo ɖɛ dó é ɖu ayi mɛ nú émí, bo wa nǔ e wú é kpé é bǐ, bo dó hwɛ gbɔ xá nɔví tɔn. Hwenu e nɔví nɔví lɛ́ mɔ yěɖée é ɔ, Jakɔ́bu jɛ ɖiɖɔ nú Esáwu jí ɖɔ mɛ lě sín hwɛ wɛ jɔ, bɔ mɛ lě sín hwɛ kú ǎ. Nǔ e gbé nya wɛ Jakɔ́bu ɖe é wɛ nyí ɖɔ é ní dó hwɛ gbɔ xá nɔví tɔn. A ka sixú xwedó kpɔ́ndéwú Jakɔ́bu tɔn a?—Mat. 5:23, 24. w21.12 25-26 akpá. 11-12

Ényí a lin tamɛ dó kú e Jezu wá kú dó ta towe mɛ, bo súnsún hwɛ towe lɛ́ é jí ɔ, a sixú ɖɔ, ‘Un vó nǔɖé ǎ, un jɛxá yɛ̌yi énɛ́ ǎ.’ Étɛ́wú nǔ ka sixú cí mɔ̌ nú we? Ayixa mǐtɔn sixú blɛ́ mǐ, bo ná bló bɔ mǐ ná mɔ ɖɔ mǐ kún xɔ akwɛ́, alǒ jɛxá bɔ è ná yí wǎn nú mǐ ó. (1 Jaan 3:19) Ényí mǐ jɛ nǔ mɔ̌hun lɛ́ lin jí ɔ, mǐ ɖó ná flín ɖɔ “Mawu hú gǎn ayi mǐtɔn.” Wǎnyíyí e Tɔ́ mǐtɔn jǐxwé tɔn ɔ ɖó nú mǐ é, kpó hwɛsɔ́kɛmɛ tɔn kpó hú gǎn linlin agɔ ɖěbǔ e mǐ sixú ɖó é flaflá tɔn. Mǐ ɖó ná kplɔ́n, bo kú d’é jí ɖɔ Jexóva yí wǎn nú mǐ. bo ná dó kpé énɛ́ wú ɔ, mǐ ɖó ná nɔ kplɔ́n Xó tɔn hwɛhwɛ, xo ɖɛ hwɛhwɛ, bo nɔ zán hwenu ɖó kpɔ́ xá mɛ ɖěɖěe nɔ sɛn ɛ lɛ́ é. Étɛ́wú nǔ énɛ́ lɛ́ wiwa ka ɖo tají sɔmɔ̌? A ná mɔ nukúnnú jɛ jijɔ ɖaaɖagbe Jexóva tɔn lɛ́ wú vaan. A ná mɔ nukúnnú jɛ wú ɖɔ é yí wǎn nú we tawun. Tamɛ linlin dó akpáxwé Xó Mawu tɔn tɔn ɖé jí ayǐhɔ́ngbe ayǐhɔ́ngbe sixú d’alɔ we bɔ a ná dó nukún nǔ lɛ́ mɛ kpɔ́n ganjí, bɔ énɛ́ ná lɛ́ “ɖe [nǔjɛdo]” e ɖo ayi towe mɛ lɛ́ é “xlɛ́.”—2 Tim. 3:16. w21.04 23-24 akpá. 12-13

Nǔɖiɖi e lí dǒ é ɖé ɖíɖó nɔ byɔ́ nǔ hú nǔkplɔ́nkplɔ́n kpowun. É byɔ́ ɖɔ mǐ ní nɔ lin tamɛ dó nǔ e kplɔ́n wɛ mǐ ɖe é jí. Ð’ayǐ kpɔ́ndéwú mɛ e wlán Ðɛhan 77gɔ́ é tɔn wú. É byɔ́ linkpɔ́n mɛ ɖó é mɔ ɖɔ nǔ émí kpó Izlayɛ́li-ví hǎtɔ́ émítɔn lɛ́ kpó tɔn kún sɔ́ nɔ nyɔ́ Jexóva nukúnmɛ ó. Linlin mɔ̌hun lɛ́ nɔ ɖó amlɔ ma dɔ́ n’i. (Wěmafɔ 3-9) Étɛ́ é ka wa? É ɖɔ nú Jexóva ɖɔ: “Un ná lin tamɛ dó nǔ e a bló lɛ́ wú, un ná lin tamɛ dó azɔ̌ ɖaxó ɖaxó e a wa lɛ́ wú.” (Wěmafɔ 13) Nǔgbó ɔ, ɖɛhanwlántɔ́ ɔ tuun nǔ ɖěɖěe Jexóva ko wa nú togun tɔn wá yi lɛ́ é ganjí, amɔ̌, é kpo ɖo kinkanbyɔ́ éɖée wɛ ɖɔ: “Mawu sɔ́ flín ɖɔ émí nɔ wa fɛ́nú nú mǐ ǎ cé? É sin xomɛ ɔ, é sɔ́ ná kú nǔbláwǔ nú mǐ ǎ wɛ a?” (Wěmafɔ 10) Ðɛhanwlántɔ́ ɔ lin tamɛ dó nǔ ɖěɖěe Jexóva ko wa wá yi lɛ́ é jí, bo lɛ́ lin tamɛ dó nǔ ɖěɖěe xlɛ́ ɖɔ Mawu ɖe nǔbláwǔkúnúmɛ kpó wǔvɛ́sexámɛ kpó xlɛ́ wá yi lɛ́ é jí. (Wěmafɔ 12) Étɛ́ mɛ énɛ́ ka tɔ́n kɔ dó? Ðɛhanwlántɔ́ ɔ wá kúdéjí ɖɔ Jexóva kún ná jó togun tɔn dó ó. (Wěmafɔ 16) w22.01 30-31 akpá. 17-18

Nɛ̌ nǔ ka nɔ cí nú Jexóva dó súnnu kpó nyɔ̌nu kpó gbejínɔtɔ́ e kú lɛ́ é wú? Akpakpa ɖo sísɔ́ ɛ wɛ, b’ɛ ná lɛ́ mɔ yě. (Jɔb. 14:15) Dǒ nukún lě do Jexóva jɛ do xɔ́ntɔn tɔn Ablaxámu tɔn sɔ é mɛ kpɔ́n! (Ja. 2:23) Bɔ Mɔyízi e kpó é kpó “nɔ kpé nu bo nɔ ɖɔ xó” é ka lo? (Tín. 33:11) Gɔ́ ná ɔ, kpɔ́n lěe é ná ko ɖo nukún ɖó wɛ bo ná se bɔ Davídi kpó Ðɛhanwlántɔ́ ɖěvo lɛ́ kpó ná ɖo susu kpikpa sín han ɖaaɖagbe yětɔn lɛ́ ji wɛ sɔ é! (Ðɛh. 104:33) Nǔgbó wɛ ɖɔ xɔ́ntɔn Jexóva tɔn énɛ́ lɛ́ ko kú có, é ka wɔn yě ǎ. (Eza. 49:15) É kpo ɖo mɛ alɔkpa e yě nyí é flín wɛ hlɛ́nhlɛ́n. Gbe ɖokpó ɔ, é ná fɔ́n yě, bo ná ɖótó ɖɛ vívɛ́ yětɔn lɛ́, lobo lɛ́ yí gbe bɔ yě ná sɛn ɛ. Ényí mɛvívɛ́ ɖé kú dó we kpɔ́n ɔ, linlin énɛ́ lɛ́ sixú dó gbɔ nú we. Hwenu e gǔfínfɔ́n bɛ́ ɖo Edɛ́ni é ɔ, Jexóva tuun ɖɔ ninɔmɛ lɛ́ ná nylá, cóbó ná lɛ́ wá kpɔ́n te. Nǔnyanyawiwa, hwɛagɔɖiɖɔ kpó dǎkaxixo kpó e gɔ́ gbɛ ɔ mɛ égbé é nɔ vɛ́ mɔ nú Jexóva. w21.07 10 akpá. 11; 12 akpá. 12

Ényí mǐ nɔ ɖe wǎnyíyí mɔ̌hun xlɛ́ ɔ, mǐ nɔ lɛ́ xlɛ́ ɖɔ gbɛxixɔ ɔ su nukún mǐtɔn mɛ. Étɛ́wú? Ðó mǐ kɛ́ɖɛ́ sín takúnmɛ wɛ Jezu zé gbɛ tɔn jó dó ǎ, loɔ, é lɛ́ zé jó dó nɔví mǐtɔn lɛ́ takúnmɛ. Ényí Jezu ɖo gbesisɔmɛ bo sɔ́ gbɛ tɔn jó dó ta yětɔn mɛ ɔ, é ɖo wɛn ɖɔ yě xɔ akwɛ́ tawun ɖo nukún tɔn mɛ. (1 Jaan 3:16-18) Mǐ nɔ ɖe wǎn e mǐ yí nú nɔví mǐtɔn lɛ́ é xlɛ́ gbɔn lěe mǐ nɔ wa nǔ xá yě gbɔn é gblamɛ. (Efɛ́. 4:29, 31–5:2) Ði kpɔ́ndéwú ɔ, ényí yě ɖo azɔn jɛ wɛ, alǒ ɖo xwi ɖí xá wǔvɛ́ syɛ́nsyɛ́n lɛ́ wɛ, ɖi adla lɛ́ mɔ̌ ɔ, mǐ nɔ d’alɔ yě. Amɔ̌, ényí nǔɖitɔ́ hǎtɔ́ ɖé wa, alǒ ɖɔ nǔɖé b’ɛ dó xomɛsin nú mǐ ɔ, étɛ́ mǐ ka ɖó ná wa? A nɔ mɔ ɖɔ é nɔ vɛ́ wǔ nú émí hweɖélɛ́nu, bónú émí ná sɔ́ hwɛ kɛ mɛ wɛ a? (Lev. 19:18) Ényí mɔ̌ hǔn, xwedó wěɖexámɛ élɔ́: “Mi nɔ mɔ miɖée gbɔ; ényí mɛɖé wa nǔ nyi do nú mɛɖé ɖo mi mɛ hweɖěbǔnu hǔn, mi nɔ sɔ́ kɛ miɖée. Mi ɖó ná nɔ sɔ́ hwɛ kɛ miɖée lěe Aklúnɔ sɔ́ kɛ mi é ɖɔhun.” (Koló. 3:13) Hweɖěbǔnu e mǐ sɔ́ hwɛ kɛ nɔví mǐtɔn lɛ́ é ɔ, mǐ nɔ xlɛ́ Tɔ́ mǐtɔn jǐxwé tɔn ɔ ɖɔ gbɛxixɔ ɔ su nukún mǐtɔn mɛ nǔgbó nǔgbó. w21.04 17-18 akpá. 12-13

Mǐ sixú w’azɔ̌ syɛ́nsyɛ́n nú Jexóva, bo lɛ́ d’alɔ mɛ gěgé bɔ yě ná yi nukɔn bo bló batɛ́mu. Amɔ̌, mǐ tuun ɖɔ nǔ ɖěbǔ e wú mǐ kpé bo wa é ɔ, nyɔ̌ná Jexóva tɔn wɛ nyí tɔn. Kpɔ́ndéwú Apolósu kpó Mɛsɛ́dó Pɔ́lu tɔn kpó lɛ́ kplɔ́n nǔ tají ɖěvo mǐ. Énɛ́ wɛ nyí ɖɔ ényí mǐ ɖó wǔjɔmɛzɔ́ gěgé ɖo agun ɔ mɛ ɔ, mǐ sixú wa nǔ gěgé bo gɔ́ so nú fífá e ɖo agun ɔ mɛ é. Ényí nɔví agbanɖotananɔ lɛ́ nɔ zán Xó Mawu tɔn dó ɖe wě xá mɛ, bo ma nɔ sɔ́ ayi ɖó yěɖée jí ǎ, lobo nɔ xwedó kpɔ́ndéwú Jezu Klísu tɔn ɔ, yě nɔ bló bɔ fífá kpó bǔninɔ kpó nɔ tíin. Énɛ́ nɔ su nukún mǐtɔn mɛ tawun! (1 Kɔ. 4:6, 7) Mǐ mɛ ɖokpó ɖokpó wɛ Mawu ná nǔwúkpíkpé ɖé lɛ́. Mǐ sixú nɔ mɔ ɖɔ nǔ e wa wɛ mǐ ɖe é kún hwɛ́n nǔɖé ó. Amɔ̌, nǔwiwa kléwún kléwún lɛ́ sixú gɔ́ so nú bǔninɔ ɖo agun ɔ mɛ, lěe blǐki kpɛví kpɛví lɛ́ ɖo dandan cóbɔ è na gbá xɔ ɖé gbɔn é ɖɔhun. Mi nú mǐ ní wa nǔ e wú mǐ kpé é bo hɔn ɖɔ nú linlin agbahwlɛnhwlɛ́n tɔn ɖěbǔ e ɖo ayi mɛ nú mǐ é. Mi nú mǐ ní kán ɖ’é jí bá wa nǔ bǐ dó gɔ́ so nú fífá kpó bǔninɔ kpó ɖo agun ɔ mɛ.—Efɛ́. 4:3. w21.07 19 akpá. 18-19

A sixú kúdéjí ɖɔ a ná lɛ́ wá mɔ mɛ vívɛ́ná towe ɖěɖěe ko kú lɛ́ é. Énɛ́ wú ɔ, étɛ́ avǐ e Jezu ya hwenu e é ɖo gbɔ dó nú xɔ́ntɔn tɔn ɖěɖěe ɖo aluwɛ mɛ lɛ́ é wɛ é ka kplɔ́n mǐ? É kplɔ́n mǐ ɖɔ akpakpa ɖo sísɔ́ ɛ wɛ bónú é ná fɔ́n mɛkúkú lɛ́! (Jaan 11:35) A sixú nɔ gǔdo nú mɛ ɖěɖěe ɖo aluwɛ mɛ lɛ́ é. Avǐ kɛ́ɖɛ́ wɛ Jezu ya xá Mali kpó Mata kpó ǎ, loɔ, é lɛ́ ɖótó yě, lobo lɛ́ dó gbɔ nú yě. (Jaan 11:25-27) Mǐ sixú wa nǔ ɖokpó ɔ nú mɛ ɖěɖěe ɖo aluwɛ mɛ lɛ́ é. Dan nyí mɛxó agun tɔn ɖé, bo nɔ nɔ Australie; é ɖɔ: “Ée asi ce kú gúdo é ɔ, un ɖó hudó alɔdó tɔn. Nɔví sǔnnu gěgé kpó asi yětɔn lɛ́ kpó ɖo gbesisɔmɛ hwebǐnu bá ɖótó mì. Yě ná tɛn mì bɔ un ɖe aluwɛ e mɛ un ɖe é xlɛ́, bɔ avǐ e un nɔ ya é ka nɔ lɛ́ d’akpɔ nú yě ǎ. Yě lɛ́ d’alɔ tawun tawun lɛ́ mì, ɖi mɔ̌to klɔ́klɔ́, axi xwléxwlé, nǔ ɖiɖa ɖo hwenu e un ma sixú kpé nǔ énɛ́ lɛ́ wú ǎ é. Gɔ́ ná ɔ, hwɛhwɛ wɛ yě nɔ xo ɖɛ ɖó kpɔ́ xá mì. Yě xlɛ́ ɖɔ xɔ́ntɔn nǔgbó kpó ‘nɔví súnnu e wú è sixú ɖeji dó ɖo wǔvɛ́ lɛ́ hwenu é’ kpó wɛ émí nyí.”—Nǔx. 17:17, nwt. w22.01 16 akpá. 8-9

Nǔ e nyɔ́ hú gǎn é wɛ Jexóva nɔ ba nú mǐ. (Nǔx. 4:20-22) É nɔ xlɛ́ ɖɔ émí yí wǎn nú mǐ gbɔn wě e é nɔ ɖe xá mǐ gbɔn Xó tɔn, wěma jínjɔ́n Biblu jí ɖé kpó klisánwun hǎtɔ́ e zin ɖo gbigbɔ lixo é ɖé kpó gblamɛ é. (Ebl. 12:9, 10) Sɔ́ ayi ɖó wěɖexámɛ ɔ jí; ma sɔ́ ayi ɖó lěe è ɖe wě ɔ xá we gbɔn é jí ó. Hweɖélɛ́nu ɔ, mǐ sixú mɔ ɖɔ wěɖéxámɛ ɔ kún jɛ gan ó. Nǔgbó ɔ, ényí mɛ ɖěbǔ ɖo wě ɖe xá mɛ wɛ ɔ, é ɖó ná bló bɔ wěɖexámɛ ɔ ná bɔkun lěe é nyɔ́ bló gbɔn é bónú è ná yí gbe ná. (Ga. 6:1) Amɔ̌, ényí mǐdɛɛ lɛ́ ɖe wě xá wɛ è ɖe ɔ, é ná nyɔ́ hú gǎn ɖɔ mǐ ní sɔ́ ayi ɖó wěɖexámɛ ɔ jí, nú mǐ ná bó tlɛ mɔ ɖɔ è kún ɖe wě ɔ xá mǐ ganjí ó ɔ nɛ́. Mǐ sixú kanbyɔ́ mǐɖée ɖɔ: ‘Ényí lěe è ɖe wě ɔ xá mǐ gbɔn é ná bó ma tlɛ jɛjí nú mǐ ǎ ɔ, nǔgbó ka ɖo nǔ e ɖɔ nú mǐ wɛ è ɖe é mɛ a? Mǐ ka sixú mɔ nǔ zɛ nǔwanyido wěɖexámɛtɔ́ ɔ tɔn lɛ́ wú, bó ɖu le wěɖexámɛ ɔ tɔn a?’ Nǔnywɛ́nú wɛ é ná nyí ɖɔ mǐ ní nɔ ba ali e nu mǐ ná ɖu le wě e è ɖe xá mǐ é ɖé tɔn ɖe é. w22.02 12-13 akpá. 13-14

Jexóva tuun ɖɔ é ná byɔ́ hwenu kpó gǎndídó kpó ɖo mǐ sí cóbɔ mǐ ná nyi alɔ nú linlin masɔgbe kpó nǔwalɔ nyanya lɛ́ kpó. (Ðɛh. 103:13, 14) É ɖo mɔ̌ có, Jexóva nɔ ná mǐ nǔnywɛ́, hlɔ̌nhlɔ́n kpó alɔdó kpó e sín hudó mǐ ɖó, bó ná dó bló hǔzúhúzú lɛ́ ɖo mɛ alɔkpa e mǐ nyí é wú, gbɔn Xó tɔn, gbigbɔ tɔn kpó tutoblónúnǔ tɔn kpó gblamɛ. Nɔ zán Biblu dó gbéjé hwiɖée kpɔ́n ganjí. Xó Mawu tɔn cí nǔkpɛ́n ɖɔhun; é sixú d’alɔ we bɔ a ná gbéjé lěe a nɔ lin tamɛ, ɖɔ xó, bó nɔ lɛ́ wa nǔ gbɔn é kpɔ́n. (Ja. 1:22-25) Gɔ́ ná ɔ, Jexóva ɖo gbesisɔmɛ hwebǐnu bó ná d’alɔ we. É wɛ nyí mɛ ɖagbe hú gǎn e sixú d’alɔ we é, ɖó é tuun nǔ e ɖo ayi towe mɛ lɛ́ é. (Nǔx. 14:10; 15:11) Énɛ́ wú ɔ, nɔ xo ɖɛ sɛ́dó è hwɛhwɛ, bó nɔ lɛ́ kplɔ́n Xó tɔn ayǐhɔ́ngbe ayǐhɔ́ngbe. Kú d’é jí ɖɔ nǔgbódodó Jexóva tɔn lɛ́ wɛ nyɔ́ hú gǎn. Mǐ sixú ɖu le nǔ ɖěɖěe Jexóva byɔ́ mǐ ɖɔ mǐ ní wa lɛ́ é bǐ tɔn. Mɛ ɖěvo lɛ́ nɔ ɖó sísí nú mɛ ɖěɖěe nɔ zán gbɛ sɔgbe xá nǔgbódodó Jexóva tɔn lɛ́ é, gbɛ yětɔn nɔ ɖó nu, bɔ yě nɔ lɛ́ ɖó awǎjijɛ adodwé ɔ.—Ðɛh. 19:9-12. w22.03 4 akpá. 8-10

Ényí mǐ nɔ gbá fí e mǐ nɔ sɛn Jexóva ɖe lɛ́ é, bó nɔ lɛ́ hɛn yě dó mǐmɛ́ jí hǔn, Jexóva sɛn wɛ mǐ ɖe nɛ́. Biblu ɖɔ ɖɔ Goxɔ ɔ gbígbá kpó nǔ e kúnkplá ɛ lɛ́ é blóbló kpó nyí “azɔ̌ mímɛ́.” (Tín. 36:1, 4) Égbé ɖésú ɔ, Jexóva nɔ kpɔ́n kpléxɔ Axɔ́súɖuto ɔ tɔn lɛ́ kpó xɔ yɛhwexɔ́súɖuto ɔ tɔn ɖěvo e è nɔ gbá lɛ́ é kpó dó mɔ sinsɛnzɔ́ mímɛ́. Nɔví súnnu kpó nɔví nyɔ̌nu kpó ɖé lɛ́ nɔ zán hwenu gěgé dó azɔ̌ énɛ́ lɛ́ takúnmɛ. Fún e yě nɔ jɔ dó azɔ̌ Axɔ́súɖuto ɔ tɔn sín takúnmɛ é nɔ su nukún mǐtɔn mɛ. Nǔgbó ɔ, yě nɔ lɛ́ ɖ’alɔ ɖo Mawuxóɖiɖɔzɔ́ ɔ mɛ. Yě mɛ ɖé lɛ́ tlɛ sixú ba bó ná nyí gběxosín-alijítɔ́ hwebǐnu tɔn. Ényí nɔví súnnu kpó nɔví nyɔ̌nu kpó azɔ̌syɛ́nsyɛ́nwatɔ́ énɛ́ lɛ́ jɛxá bó ná nyí gběxosín-alijítɔ́ hwebǐnu tɔn ɔ, mɛxó agun tɔn lɛ́ ná yí gbe ná, bó ná dó xlɛ́ ɖɔ émí ɖo gǔdo nú xɔgbígbázɔ́ e è nɔ wa lɛ́ é. Ényí mǐ tuun azɔ̌ ɖo xɔgbígbá linu kpó mǐ gbɔ kpó ɔ, mǐ mɛ bǐ sixú d’alɔ bɔ xɔ lɛ́ ná nɔ mǐmɛ́ jí, bó lɛ́ nɔ ninɔmɛ ɖagbe mɛ. w22.03 22-23 akpá. 11-12