Alɔdlɛndonǔ Kplé Gbɛzán kpo Sinsɛnzɔ́ kpo Tɔn Sín Azɔ̌wema Tɔn Lɛ
25-31 DÉCEMBRE
DƆKUN MAWUXÓ Ɔ TƆN ÐÉ LƐ | MALACÍI 1-4
“Alɔwliwli Towe ka Nɔ Hɛn Xomɛ Jehovah Tɔn Hun À?”
jd-F 125-126 akpá. 4-5
Blǒ Bonu Gbɛzán Xwédo Tɔn Towe Ni Nyɔ́ Mawu Nukúnmɛ
4 Ðò Malacíi hwenu, ɖò xwè kanweko atɔ́ɔ́ngɔ ɔ J.H.M tɔn ɔ, asigbigbɛ jɛ kpɔ́ sú jí ɖò Jwifu lɛ tɛntin. Malacíi ɖɔ nú ye ɖɔ: “Mi dó akpá ɖò Mawu Mavɔmavɔ nukɔn ɖɔ emi na nɔ gbeji nú asì e mi da ɖò winnyawinnya mɛ é. Asì mitɔn wɛ é nyí, mi wɛ da cobo ka lɛ́ jó è dó.” Ðó gbejimanɔ sín nǔ e asú lɛ nɔ wà é wutu ɔ, ɖasin nyɔnu e è táfú lɛ é tɔn lɛ gbɔn vɔsakpe Jehovah tɔn jí, ye nɔ “y’avǐ bo nɔ wɛn azɔn.” Vɔsanúxwlémawutɔ́ ahizinɔ lɛ nɔ myɔ nukún dó dakaxixo ɖaxó mɔhun!—Malacíi 2:13, 14.
5 Etɛ Jehovah ka lin dó linlin nyanya e mɛ lɛ ɖó dó alɔwliwli wu ɖò Malacíi hwenu é wu? Malacíi wlan ɖɔ: “Mawu Mavɔmavɔ ɔ, Mawu Izlayɛli tɔn, Mawu Mavɔmavɔ Nǔbǐwukpétɔ́ ɔ ɖɔ: ‘Un gbɛ́ wǎn nú asigbigbɛ abǐ asugbigbɛ.’” É lɛ́ ɖɔ ɖɔ Jehovah ‘kún huzu ó.’ (Malacíi 2:16; 3:6) A ka mɔ xó taji ɔ à? Sín bǐbɛ̌mɛ wɛ Jehovah ko gbɛ́ wǎn nú asigbigbɛ abǐ asugbigbɛ. (Bǐbɛ̌mɛ 2:18, 24) É gbɛ́ wǎn na ɖò Malacíi hwenu. B’ɛ ka kpó ɖò mɔ̌ n’i kaka jɛ égbé. Mɛɖé lɛ sixu wá gbeta ɔ kɔn bá jó mɛ e ye da é dó kpowun, ɖó kpɔ́ninɔ xá ɛ sɔ́ jɛmɛ nú ye ǎ wutu. Amɔ̌, ayi yetɔn na bo hizi mɔ̌ ɔ, Jehovah nɔ mɔ nǔ jɛ mɛ. (Jelemíi 17:9, 10) Mɛɖé na bo ɖó linlin nyanya ɖ’ayi mɛ, bo ba hwɛjijɔ bo gbɛ́ asú tɔn alǒ asì tɔn ɔ, Mawu nɔ mɔ bǐ. Nugbǒ ɔ, “nǔ lɛ bǐ wɛ é nɔ mɔ ɖò mɛ̌, bo nɔ mɔ ye ɖò wěxo; é wɛ mǐ bǐ ɖó na ɖó gbè na.”—Eblée lɛ 4:13.