Alɔdlɛndónǔ Kplé Gbɛzán kpo Sinsɛnzɔ́ kpo Tɔn Sín Azɔ̌wema Tɔn Lɛ
7-13 OCTOBRE
DƆKUN MAWUXÓ Ɔ TƆN ÐÉ LƐ | JAKI 3-5
“Nɔ Ðè Nǔnywɛ E Gosin Mawu Gɔ́n É Xlɛ́”
cl 221-222 akpá. 9-10
“Nǔnywɛ E Gosin Mawu Gɔ́n É” ka Ðò Azɔ̌ Wà Wɛ Ðò Gbɛzán Towe Mɛ À?
9 “É tó mɛ́ hwɛ̌.” È ni mɛ́ sín tinmɛ wɛ nyí è fɛ́wǔ, è ni ɖò cékée ɖò wěxo kpo xomɛ kpo. Biblu cá nǔnywɛ kpo ayi kpo ɖó kpɔ́, amɔ̌, nǔnywɛ e gosin jixwé é sixu byɔ ayi e mɛ linlin nyanya lɛ, kpo jlǒ nyanya lɛ kpo gɔ́ é ǎ. (Nǔnywɛxó 2:10; Matie 15:19, 20) É ɖò mɔ̌ có, nú ayi mǐtɔn mɛ́ ɔ, mǐ na “jó nǔnyanyawiwa dó, bo wà ɖagbe.” (Ðɛhan 37:27; Nǔnywɛxó 3:7) É sɔgbe ɖɔ mimɛ̌ xó ɔ jɛ nukɔn ɖò jijɔ nǔnywɛ tɔn e è slɛ́ lɛ é mɛ à cé? È na ɖɔ ɔ, nú mǐ ma mɛ́ ɖò walɔ kpo gbigbɔ kpo lixo ǎ ɔ, nɛ̌ mǐ ka sixu ɖè jijɔ nǔnywɛ e gosin Mawu gɔ́n é tɔn ɖevo lɛ xlɛ́ gbɔn?
10 “É nɔ xò fífá kan.” Nǔnywɛ e gosin Mawu gɔ́n é nɔ sísɛ́ mǐ bonu mǐ na xò fífá e nyí sínsɛ́n gbigbɔ Mawu tɔn tɔn ɖé é sín kan. (Galatinu lɛ 5:22, nwt) Mǐ nɔ tɛ́n kpɔ́n, bo nɔ d’avaja “fífá e dɔn” togun Jehovah “cá” é mɛ ǎ. (Efɛzinu lɛ 4:3) Nú è d’avaja fífá ɔ mɛ ɔ, mǐ nɔ lɛ́ dó gǎn bɔ é nɔ lɛ́ tíìn. Etɛwu é ka ɖò taji? Biblu ɖɔ: “Mi fá xomɛ dó miɖée wu; enɛ ɔ, Mawu wanyiyi kpo fífá kpo nɔ ɔ na nɔ kpɔ́ xá mi.” (2 Kɔlɛntinu lɛ 13:11) Enɛ wu ɔ, nú mǐ kpó ɖò fífá gbɛ̀ zán wɛ jɛn wɛ ɔ, Mawu fífánɔ ɔ na nɔ kpɔ́ xá mǐ. Lee mǐ nɔ wà nǔ xá Mawu sɛntɔ́ hatɔ́ mǐtɔn lɛ gbɔn é nɔ kúnkplá kancica e ɖò mǐ kpo Jehovah kpo tɛntin é tlɔlɔ. Nɛ̌ mǐ ka sixu ɖexlɛ́ ɖɔ mǐ nyí fífákanxotɔ́ gbɔn? Mǐ ni kpɔ́n kpɔ́ndéwú ɖokpo.
cl 223-224 akpá. 12
“Nǔnywɛ E Gosin Mawu Gɔ́n É” ka Ðò Azɔ̌ Wà Wɛ Ðò Gbɛzán Towe Mɛ À?
12 “Nɔ nɔ jlɛ̌ jí.” Etɛ ka nyí tinmɛ è ni nɔ nɔ jlɛ̌ jí tɔn? Sɔgbe xá nǔ e akɔwé lɛ ɖɔ é ɔ, é vɛwǔ bɔ è na lilɛ xókwín dodó Glɛkigbe tɔn e è lilɛ dó “nɔ nɔ jlɛ̌ jí” ɖò Jaki 3:17 mɛ é. Lilɛdógbeɖevomɛtɔ́ lɛ zán xókwín lěhun lɛ: “xomɛnyínyɔ́,” “suúlu,” kpo “yakénúmɛ” kpo. Tinmɛ e ɖò dò ɖò Lẹdogbedevomẹ Aihọn Yọyọ Tọn tɔn mɛ é xlɛ́ ɖɔ tinmɛ tɔn tlɔlɔ ɔ wɛ nyí “jǒ xó dó.” Nɛ̌ mǐ ka sixu ɖexlɛ́ ɖɔ nǔnywɛ e gosin Mawu gɔ́n é sín akpáxwé enɛ ɖò azɔ̌ wà wɛ ɖò gbɛzán mǐtɔn mɛ gbɔn?
cl 224-225 akpá. 14-15
“Nǔnywɛ E Gosin Mawu Gɔ́n É” ka Ðò Azɔ̌ Wà Wɛ Ðò Gbɛzán Towe Mɛ À?
14 “Nɔ ɖò gbesisɔmɛ bo na setónú.” È sɔ́ mɔ xókwín Glɛkigbe tɔn e è lilɛ dó “nɔ ɖò gbesisɔmɛ bo na setónú” é ɖò fí ɖevo ɖebǔ ɖò Akpáxwé Biblu Tɔn E È Wlan Dó Glɛkigbe Mɛ É mɛ ǎ. Sɔgbe xá nǔ e akɔwé ɖé ɖɔ é ɔ, “ahwanzɔ́ sín akpáxwé wɛ è nɔ zán” xógbe enɛ ɖè “hwɛhwɛ.” É nɔ ɖè linlin é “bɔwǔ ɖɔ è ni ɖu ɖò mɛ jí” kpo “mɛɖée hwíhwɛ́ hwíhwɛ́” kpo tɔn xlɛ́. Mɛ e ɖó nǔnywɛ e gosin Mawu gɔ́n é nɔ yawǔ hwihwɛ́ éɖée dó nǔ e Mawuxówema ɔ ɖɔ é glɔ́. É nyí mɛ e nɔ sɔ́ linlin tɔn ɖó ta, bo nɔ gbɛ́ nǔ ɖěɖee ma xò nǔ dó akpa ɖokpo ɔ mɛ xá linlin tɔn ǎ é gbɛ́tɔ́ ǎ. É nyɔ́ wà ɔ, enyi è xlɛ́ ɛ kúnnuɖenú jinjɔn Biblu jí e ɖò wɛn, bo xlɛ́ ɖɔ é ɖò afɔ nyanya ɖè wɛ, alǒ ɖò gbeta masɔgbe lɛ kɔn wá wɛ é ɔ, é nɔ yawǔ huzu. Lee mɛ ɖevo lɛ tuùn we gbɔn é nɛ à?
“Nɔ Kú Nǔblawu nú Mɛ Tawun Bo Ðó Sínsɛ́n Ðagbe Gegě”
15 “Nɔ kú nǔblawu nú mɛ tawun bo ɖó sínsɛ́n ɖagbe gegě.” Nǔblawukúnúmɛ nyí akpáxwé taji nǔnywɛ e gosin aga é tɔn ɖé, ɖó è ɖɔ dó nǔnywɛ mɔhun wu ɖɔ é “nɔ kú nǔblawu nú mɛ tawun.” Ð’ayi wu ɖɔ è dɔn “nǔblawukúnúmɛ” kpo “sínsɛ́n ɖagbe gegě” kpo ɖó kpɔ́. Enɛ sɔgbe, ɖó ɖò Biblu mɛ ɔ, hwɛhwɛ wɛ nǔblawukúnúmɛ nɔ dó gesí nǔ mɛ ɖevo lɛ tɔn e nɔ ɖu ayi mɛ nú mɛ hugǎn é, é wɛ nyí wuvɛ̌sexámɛ e nɔ ɖè xomɛnyínyɔ́ núwiwa sín sínsɛ́n gegě tɔ́n é. Alɔdlɛndónǔ ɖé tinmɛ nǔblawukúnúmɛ gbɔn lě: “aluwɛ e mɛ ninɔmɛ baɖabaɖa mɛɖé tɔn dɔn mɛ dó bɔ è ɖò tintɛnkpɔn wɛ bo na wà nǔɖe dó ta tɔn mɛ é wɛ.” Nǔnywɛ Mawu tɔn cí axékó ɖɔhun, nɔ gɔn ya ké nú mɛ, alǒ ɖò blɔtɔɔ mɔ̌ kpowun ǎ. É nyɔ́ wà ɔ, é nɔ nyɔ́ xomɛ, gɔ́ngɔ́n, bɔ nǔ mɛtɔn nɔ lɛ́ ɖu ayi mɛ n’i. Nɛ̌ mǐ ka sixu xlɛ́ ɖɔ mǐ nɔ kú nǔblawu nú mɛ bǐ mlɛ́mlɛ́ gbɔn?
cl 226-227 akpá. 18-19
“Nǔnywɛ E Gosin Mawu Gɔ́n É” ka Ðò Azɔ̌ Wà Wɛ Ðò Gbɛzán Towe Mɛ À?
18 “É nɔ ɖè mɛɖé ɖó vo ɖò mɛɖé mɛ ǎ.” Nǔnywɛ Mawu tɔn fɔn ta te wǎn gbɛ́ nú akɔ kpo tò mɛtɔn sísɔ́ ɖó ajo kpo. Enyi nǔnywɛ mɔhun xlɛ́ ali mǐ ɔ, mǐ nɔ tɛ́n kpɔ́n bo nɔ hɔn ɖɔ nú wangbɛnúmɛ sín linlin ɖebǔ e ɖò ayi mǐtɔn mɛ é. (Jaki 2:9) Mǐ nɔ zɔn dó wemasise mɛ ɖevo lɛ tɔn, lee ye ɖó akwɛ gbɔn é, alǒ agunzɔ́ e ye ɖó lɛ é wu dó wà nǔ xá ye ǎ; mɔ̌ jɛn mǐ ma ka nɔ lɛ́ wɔn ya nú Mawusɛntɔ́ hatɔ́ mǐtɔn ɖebǔ ɖó nǔ gbɛ́ dó ye wutu ǎ é nɛ. Enyi Jehovah gbɔn wanyiyi tɔn gblamɛ bo sɔ́ mɛ enɛ lɛ dó ɖó nǔɖokan tɔn lɛ na ɔ, mǐ ɖó na mɔ ɖɔ ye jɛxa wanyiyi mǐtɔn.
19 “É ka nɔ wà yɛmɛnú ǎ.” Xókwín Glɛkigbe tɔn e lilɛ dó “yɛmɛnú” é sixu dó gesí “manahɛnvlɛtɔ́ e ɖò nǔɖe wà wɛ é” é. Ðò hwexónu ɔ, manahɛnvlɛtɔ́ Glɛkinu lɛ kpo Hlɔmanu lɛ kpo nɔ xwè kalétanukún hwenu e ye ɖò manahɛn vlɛ́ wɛ é. Enɛ wu ɔ, è nɔ zán xókwín Glɛkigbe tɔn e è lilɛ dó “yɛmɛnú” é nú mɛ e ɖò yɛ wà wɛ é, alǒ mɛ e ɖò awo xò wɛ é. Nǔnywɛ Mawu tɔn sín akpáxwé enɛ ɖó na jɛ wě ɖò lee mǐ nɔ wà nǔ xá nǔɖitɔ́ hatɔ́ mǐtɔn lɛ gbɔn é mɛ kpowun ǎ, loɔ, é ɖó na lɛ́ tɔ́n ɖò lee nǔ nɔ cí nú mǐ dó ye wu é mɛ.
Nǔ Xɔ Akwɛ Biblu Tɔn lɛ Biba
w08 15/11 20 akpá. 6
Nǔ Taji Ðěɖee Ðò Wema-Sɛ́dó-Mɛ Jaki kpo Piyɛ́ɛ kpo Tɔn lɛ Mɛ lɛ É
4:5—Wemafɔ tɛ mɛ Jaki ka ɖè xó sín? Jaki ɖè xó sín wemafɔ ɖě mɛ lě tawun ǎ. É ɖò mɔ̌ có, é cí ɖɔ linlin ɖěɖee ɖò Bǐbɛ̌mɛ 6:5; 8:21; Nǔnywɛxó 21:10; kpo Galatinu lɛ 5:17 kpo mɛ lɛ é jí wɛ é na ko zɔn dó dó wlan xó enɛ lɛ e Mawu sɔ́ dó ayi mɛ n’i lɛ é ɖɔhun.
w97 1/12 16-17 akpá. 8
Nǔɖiɖi Nɔ Bló Bɔ Mǐ Nɔ Ðó Suúlu Bo Nɔ Lɛ́ Xoɖɛ
8 Hwɛhuhu wɛ é nyí ɖɔ è ni ɖɔ xó nyanya dó nǔɖitɔ́ hatɔ́ mɛtɔn ɖé wu. (Jaki 4:11, 12) É ɖò mɔ̌ có, mɛɖé lɛ nɔ mɔ xó ɖɔ dó Klisanwun hatɔ́ yetɔn lɛ wu, vlafo ɖó ye nɔ mɔ ɖò yeɖée mɛ ɖɔ emi nyí nǔjlɔjlɔwatɔ́, alǒ ye jló na ɖè mɛ ɖevo lɛ kpò, bá sɔ́ yeɖesunɔ dó jǐ. (Ðɛhan 50:20; Nǔnywɛxó 3:29) Xógbe Glɛkigbe tɔn e è lilɛ dó ‘ɖɔ nǔ nyanya’ é ɖè wangbɛnúmɛ syɛnsyɛn xlɛ́, bo lɛ́ xlɛ́ ɖɔ è ɖò hwɛ dó mɛ wɛ zɛ xwé wu alǒ ɖò hwɛ agɔ dó mɛ wɛ. Enɛ ɖè bǎ e mɛ è dóhwɛ nɔví ɖé syɛnsyɛn ɖó é xlɛ́. Nɛ̌ enɛ ka nyí ‘nǔ nyanya ɖiɖɔ kpo hwɛ ɖiɖɔ dó sɛ́n Mawu tɔn kpo’ gbɔn? Sɛ́nkplɔnmɛtɔ́ lɛ kpo Falizyɛn lɛ kpo nɔ xò gbeɖiɖe Mawu tɔn lɛ nyi kɛ́n, bo ‘nɔ xwedó nǔgbododó yeɖesunɔ tɔn lɛ dó ɖɔ hwɛ.’ (Maki 7:1-13) Enyi mǐ ɖó hwɛ nú mɛ e Jehovah ma ɖó hwɛ na ǎ é ɔ, ‘sɛ́n Mawu tɔn dá hwɛ na wɛ mǐ ɖè,’ bo lɛ́ ɖò ɖiɖexlɛ́ wɛ kpo hwɛhuhu kpo ɖɔ é kún sɔgbe ó nɛ à cé? Nú mǐ ka nɔ mɔ nǔɖɔ dó nɔví mǐtɔn lɛ wu agɔ mɔ̌ ɔ, mǐ na nyi sɛ́n e ɖɔ mǐ ni yí wǎn nú mɛ é ganji ǎ.—Hlɔmanu lɛ 13:8-10.
ZĚ HWIÐÉE BǏ JÓ NÚ MAWUXÓÐIÐƆZƆ́ Ɔ
w10 1/9 23-24
Mɛ̌ Mǐ ka Ðó Na Ðɔ Hwɛ Mǐtɔn lɛ Na?
Mawu na acɛ gbɛtɔ́ lɛ ɖɔ ye ni sɔ́ hwɛ e è hu dó Emi lɛ é kɛ mɛ ǎ; éɖokponɔ géé jɛn sixu wà mɔ̌. Biblu ɖɔ nyi wɛn nú mǐ ɖɔ: “Enyi mǐ ka ɖɔ hwɛ mǐtɔn lɛ nú Mawu ɔ, mǐ hɛn ɔ, mǐ na ɖeji dó wǔ tɔn, ɖó nǔ jlɔjlɔ wɛ é nɔ wà; é na sɔ́ hwɛ mǐtɔn lɛ kɛ mǐ, bo na lɛ̀ mǐ wé sín nǔ nyanya e mǐ wà lɛ é bǐ mɛ.” (1 Jaan 1:9) É ɖò mɔ̌ có, mɛ̌ mǐ ka ɖó na ɖɔ hwɛ mɔhun lɛ na?
Ðó Mawu kɛɖɛ gɔ́n jɛn hwɛsɔ́kɛmɛ sixu gosin wutu ɔ, é wɛ mǐ ɖó na ɖɔ hwɛ mǐtɔn lɛ na. Lee mǐ ko mɔ gbɔn é ɔ, nǔ e Davidi wà é nɛ. Amɔ̌, etɛ jí è ka na zɔ́n dó bo na sɔ́ hwɛ kɛ mǐ? Biblu ɖɔ nú mǐ ɖɔ: “Hǔn mi bo lɛkɔ sín hwɛ mitɔn lɛ gudo, bo wá Mawu gɔ́n, bonu é na súnsún hwɛ mitɔn lɛ. Aklunɔ Mawu na sɛ́ fífá sín hwenu lɛ dó mi.” (Mɛsɛ́dó 3:19, 20a) Nǔgbo ɔ, hwɛsɔ́kɛmɛ nɔ byɔ ɖɔ è ni tuùn hwɛ e è hu é bo ɖɔ kɛɖɛ ǎ, loɔ, é nɔ lɛ́ byɔ ɖɔ è ni sɔ́ jlǒ bo lɛkɔ sín ali nyanya ɔ jí. Hwɛhwɛ wɛ afɔ enɛ e gɔ́ na é ɖiɖe nɔ vɛwǔ. Amɔ̌, alɔdó ɖé ka ɖè.
Lɛ̌vɔ flín xó elɔ e ahwanvu Jaki ɖɔ bɔ mǐ ko ɖɔ xó d’ewu ɖò aga lɛ é: “Mi bo ɖɔ hwɛ e mi hu lɛ nú miɖée, bo xoɖɛ nú miɖée, bonu azɔn mitɔn na gbɔ.” Jaki lɛ́ ɖɔ gɔ́ na ɖɔ: “Ðɛ e hwɛjijɔnɔ nɔ xò ɔ nɔ ɖó hlɔnhlɔn ɖesu.” (Jaki 5:16) “Hwɛjijɔnɔ” ɔ sixu nyí ɖokpo ɖò “agunmɛxo” e xó Jaki ɖɔ ɖò wemafɔ 14gɔ́ ɔ mɛ lɛ é mɛ. “Agunmɛxo lɛ” alǒ mɛxo agun tɔn ɖěɖee nyí gbɛtɔ́ gbigbɔ tɔn bɔ è sɔ́, lobɔ ye na d’alɔ mɛ ɖěɖee ba na mɔ hwɛsɔ́kɛmɛ Mawu tɔn lɛ é ɖò agun Klisanwun tɔn ɔ mɛ. “Agunmɛxo” enɛ lɛ ɖebǔ sixu sɔ́ hwɛ e mɛɖé hu lɛ é kɛ ɛ ǎ, ɖó è na acɛ gbɛtɔ́ bonu é na sɔ́ hwɛ e nɔzo tɔn hu dó Mawu é kɛ ɛ ǎ. É ɖò mɔ̌ có, ɖò gbigbɔ lixo ɔ, ye jɛxa bo na gbɛ́ nǔ nú mɛ e hu hwɛ syɛnsyɛn ɖé é lobo lɛ́ ɖè é d’ali jí, gbɔn alɔ didó è bonu é ni mɔ ɖɔ hwɛ e emi hu é syɛn bɔ emi ɖó na lɛkɔ sín gudo gblamɛ.—Galatinu lɛ 6:1.
Etɛwu Mǐ ka Ðó Na Nɔ Ðɔ Hwɛ Mǐtɔn Lɛ?
Hwɛ ɔ na bo syɛn kpo é gbɔ kpo ɔ, mɛ e hu hwɛ ɔ é ko wà nǔ dó kancica e ɖò é kpo nɔzo tɔn kpo kpodo Mawu kpan tɛntin é wu. Wǎgbɔ tɔn ɔ, ayi tɔn sixu j’ayǐ alǒ vo ǎ. Azɔ̌ e ayixa e Gbɛɖotɔ́ mǐtɔn na mǐ é nɔ wà é nɛ. (Hlɔmanu lɛ 2: 14, 15) Etɛ è ka sixu wà?
Nú mǐ lɛ́ lɛkɔ yì wema Jaki tɔn mɛ ɔ, mǐ na mɔ wusyɛn dó lanmɛ nú mɛ xó elɔ lɛ: “Mɛɖé ɖò mi mɛ bo ɖò azɔn jɛ wɛ [ɖò gbigbɔ lixo] à? Ni ylɔ́ agunmɛxo lɛ; ye na xoɖɛ n’i, bo na kɔn ami dó ta n’i ɖò Aklunɔ nyikɔ mɛ. Ðɛ enɛ e è xò kpo nǔɖiɖi kpo ɔ na hwlɛn azinzɔnnɔ ɔ gán. Aklunɔ na bló bɔ é na jɛte, bɔ enyi hwɛ ɖé ɖò kɔ tɔn ɔ, Mawu na sɔ́ kɛ ɛ.”—Jaki 5:14, 15.
Ðò akpá elɔ xwé ɖesu ɔ, è byɔ agunmɛxo lɛ alǒ mɛxo agun tɔn lɛ ɖɔ ye ni sú hudo lɛngbɔ̌kpó ɔ tɔn lɛ sín dò. Gbɔn nɛ̌ é? Ye ɖó na ɖótó mɛ e ɖò hwɛ e é hu lɛ é ɖɔ wɛ é kpowun ǎ. É nyɔ́ wà ɔ, ɖó é lɛ́ kúnkplá ganjininɔ ɖò gbigbɔ lixo wutu ɔ, ye ɖó na wà nǔɖe bo na “hwlɛn azinzɔnnɔ ɔ gán.” Jaki ɖɔ nǔ we ɖé lɛ xó bɔ è sixu bló.
Nukɔntɔn ɔ, è “na kɔn ami dó ta n’i.” Azɔngbɔnúmɛ sín hlɔnhlɔn e Xó Mawu tɔn ɖó é dó gesí wɛ enɛ ɖè. Mɛsɛ́dó Pɔlu tinmɛ ɖɔ: “Mawuxó ɔ ɖò gbɛ̀, bo ɖó hlɔnhlɔn . . . É nɔ ɖeɖɛ jlǒ kpodo linlin e ɖò gbɛtɔ́ sín ayi mɛ lɛ kpan ɖó vovo.” É nɔ byɔ fí e gɔ́ngɔ́n ɖò mɛɖé sín linlin kpo ayi kpo mɛ é. (Eblée lɛ 4:12) Nú Biblu zinzan bǐ alɔ nú agunmɛxo lɛ ganji ɔ, ye sixu d’alɔ mɛ e ɖò azɔn jɛ wɛ ɖò gbigbɔ lixo é b’ɛ na mɔ nǔ e wu nǔ ɔ sín é, bo ɖè afɔ e jɛxa lɛ é bá ɖeɖɛ ninɔmɛ ɔ ɖò Mawu nukɔn.
Enɛ gudo ɔ, è ‘na xoɖɛ kpo nǔɖiɖi kpo.’ Ðɛ e agunmɛxo lɛ na xò lɛ é na ɖyɔ lee Mawu na ɖɔhwɛ tɔn gbɔn é ǎ có, ɖɛ enɛ lɛ ka nɔ xɔ akwɛ ɖò Mawu nukúnmɛ, ɖó é ɖò gbesisɔmɛ bo na sɔ́ hwɛ kɛ mɛ, gbɔn vɔsisa gbɛxɔnúmɛ tɔn Klisu tɔn gblamɛ. (1 Jaan 2:2) Mawu ɖò gbesisɔmɛ bo na d’alɔ hwɛhutɔ́ ɖebǔ e lɛkɔ sín hwɛ tɔn gudo nǔgbo nǔgbo, bo ‘wà nǔ e na ɖexlɛ́ ɖɔ é lɛkɔ sín hwɛ tɔn lɛ gudo’ lɛ é.—Mɛsɛ́dó 26:20.
Hwɛjijɔ taji e wu mǐ ɖó na ɖɔ hwɛ e mǐ hu é, é sixu nyí dó nɔzo ɖé alǒ dó Mawu é wɛ nyí ɖɔ mɔ̌ biblo na zɔ́n bɔ nǔ mǐtɔn na nyɔ́ Mawu nukúnmɛ. Jezu Klisu ɖexlɛ́ ɖɔ mǐ ɖó na tó yì ɖeɖɛ tagba ɖebǔ e ɖò mǐ kpo nɔzo mǐtɔn lɛ kpo tɛntin é hwɛ̌, bo nɔ fífá mɛ xá ye cobo na dó sixu sɛn Mawu kpo ayixa ɖagbe ɖé kpo. (Matie 5:23, 24) Nǔnywɛxó 28:13 ɖɔ: “Mɛ e nɔ sɔ́ hwɛ tɔn hwlá ɔ nɔ yì nukɔn ǎ; amɔ̌, mɛ e nɔ ɖɔ hwɛ tɔn lɛ, bo nɔ jó dó ɔ, è nɔ sɔ́ hwɛ tɔn kɛ ɛ.” Enyi mǐ sɔ́ mǐɖée hwe ɖò Jehovah Mawu nukɔn bo byɔ hwɛsɔ́kɛ ɔ, mǐ na mɔ fɛ́nú tɔn, b’ɛ na sɔ́ mǐ sù hwetɔnnu.—1 Piyɛ́ɛ 5:6.
14-20 OCTOBRE
DƆKUN MAWUXÓ Ɔ TƆN ÐÉ LƐ | 1 PIYƐ́Ɛ 1-2
“Mi Nyí Mɛ Mímɛ́”
Gbɛxixɔ ɔ, “Nǔnamɛ E Nǔ Vɔ Ð’ewu” É ɖé Sín Mawu Gɔ́n
5 Nɛ̌ mǐ ka sixu xlɛ́ ɖɔ mǐ yí wǎn nú nyikɔ Jehovah tɔn gbɔn? Gbɔn nǔwiwa mǐtɔn lɛ gblamɛ. Jehovah byɔ mǐ ɖɔ mǐ ni nyí mɛ mímɛ́. (Xà 1 Piyɛ́ɛ 1:15, 16.) Enɛ sín tinmɛ wɛ nyí ɖɔ mǐ ni sɛn Jehovah kɛɖɛ bo setónú n’i kpo ayi mǐtɔn bǐ kpo. É tlɛ nyí hwenu e è klán gbè xá mǐ é ɔ, mǐ nɔ wà nǔ e wu mǐ kpé é bǐ bo nɔ zán gbɛ̀ sɔgbe xá nǔgbododó jlɔjlɔ tɔn lɛ kpo sɛ́n tɔn lɛ kpo. Gbɔn nǔ jlɔjlɔ lɛ wiwa gblamɛ ɔ, mǐ nɔ bló bɔ weziza mǐtɔn nɔ hɔ́n, bɔ mɔ̌ mɛ ɔ, mǐ nɔ kpa susu nú nyikɔ Jehovah tɔn. (Mat. 5:14-16) Ði togun mímɛ́ ɖé ɔ, mǐ nɔ xlɛ́ ɖò ali e nu mǐ nɔ zán gbɛ̀ mǐtɔn ɖè é ɖɔ sɛ́n Jehovah tɔn lɛ nyɔ́ bɔ hwɛdómɛ Satáan tɔn lɛ nyí adingban. Enyi mǐ wà nǔ nyi dò lee é nɔ nyí gbɔn nú mǐ bǐ é ɔ, nǔwanyido mǐtɔn lɛ nɔ vɛ́ nú mǐ nǔgbo nǔgbo tɔn bɔ mǐ nɔ lɛkɔ sín nǔwalɔ ɖěɖee nɔ kɔn cí dó Jehovah wu lɛ é gudo.—Ðɛh. 79:9.
Lee Mǐ Na Cyan Ayiɖeɖayǐ Mǐtɔn lɛ Gbɔn É
6 Jehovah ɖɔ nú mǐ ɖɔ: “Mi nyí mɛ mímɛ́, ɖó mɛ mímɛ́ wɛ un nyí.” (1 Piyɛ́ɛ 1:14-16; 2 Piyɛ́ɛ 3:11) Enyi sinsɛn-biblo mǐtɔn mɛ́ ɔ jɛn Jehovah na yí gbè na. (Sɛ́nflínmɛ 15:21) Nú mǐ wà nǔ e Jehovah gbɛ́ wǎn na lɛ é, ɖi nǔbliblíwiwa, dakaxixo alǒ awovínúwiwa ɔ, sinsɛn-biblo mǐtɔn sixu nyí nǔ mímɛ́ ǎ. (Hlɔmanu lɛ 6:12-14; 8:13) Enyi mǐ sɔ́ nǔ mɔhun lɛ ɖě dó ɖè ayi ɖ’ayǐ na ɔ, é na lɛ́ nyla Jehovah nukúnmɛ. Enɛ sixu zɔ́n bɔ sinsɛn-biblo mǐtɔn na nyí nǔbliblí, bɔ Jehovah na yí gbè na ǎ, bo sixu lɛ́ hɛn kancica e ɖò mǐ kpo é kpo tɛntin é gblé tawun.
Nǔ Xɔ Akwɛ Biblu Tɔn lɛ Biba
w08 15/11 21 akpá. 10
Nǔ Taji Ðěɖee Ðò Wema-Sɛ́dó-Mɛ Jaki kpo Piyɛ́ɛ kpo Tɔn lɛ Mɛ lɛ É
1:10-12. Wɛnsagun lɛ nɔ ba na ki ta dó nǔgbo gbigbɔ tɔn e gɔ́ngɔ́n bɔ gbeyiɖɔ Mawu tɔn hwexónu tɔn lɛ wlan, b’ɛ kúnkplá agun Klisanwun yí ami dó ɖè lɛ tɔn é mɛ, lobo mɔ nǔ jɛ ye mɛ. É ɖò mɔ̌ có, hwenu e Jehovah jɛ nǔ wà ɖó kpɔ́ xá agun ɔ jí é jɛn nǔgbo enɛ wá jɛ wě bǐ mlɛ́mlɛ́. (Efɛ. 3:10) É sɔgbe ɖɔ mǐ ni xwedó kpɔ́ndéwú wɛnsagun lɛ tɔn, bo tɛ́n kpɔ́n bo ba dò nú “tito Mawu tɔn e ɖò hwlahwlá ɖò gɔngɔn mɛ lɛ é” à cé?—1 Kɔ. 2:10.
it-2 1021 akpá. 4
Nukúnkpénuwutɔ́
Nukúnkpénuwutɔ́ Ðaxó Hugǎn Ɔ. É ɖò wɛn ɖɔ 1 Piyɛ́ɛ 2:25 ɖè xó sín Ezayíi 53:6 mɛ cí ɖɔ é ɖò xó ɖɔ dó mɛ ɖěɖee ‘cí lɛngbɔ̌ e bú lɛ é’ wu wɛ ɖɔhun, enɛ gudo ɔ, Piyɛ́ɛ ɖɔ: “Amɔ̌ dìn ɔ, è ko lɛ́ kplá mi wà mɛ e nyí lɛngbɔ̌nyitɔ́ mitɔn, bo nɔ cɔ́ mi ɔ gɔ́n.” Jehovah Mawu wɛ ɖó na ko nyí mɛ e xó ɖɔ wɛ è ɖè é, ɖó mɛ ɖěɖee Piyɛ́ɛ wlan nǔ sɛ́dó lɛ é ko zɛ gbě sín Klisu gudo ǎ, loɔ, éyɛ gblamɛ wɛ è gbɔn bo lɛkɔ nú ye wá Jehovah Mawu e nyí Lɛngbɔ̌nyitɔ́ Ðaxó togun tɔn tɔn é gɔ́n. (Ðɛ 23:1; 80:2; Jel 23:3; Eze 34:12) Jehovah lɛ́ nyí nukúnkpénuwutɔ́, é wɛ nɔ gbéjé mɛ kpɔ́n. (Ðɛ 17:3) È sixu cá mɛ gbígbéjé kpɔ́n ɔ (épiskopê ɖò Glɛkigbe mɛ) xá hwɛ e é na ɖɔ dó mɛ é, lee é nyí gbɔn ɖò xwè kanweko nukɔntɔn H.M. tɔn mɛ, ɖò ninɔmɛ Jeluzalɛmu e ma tuùn hwenu e è “wá ba jonɔ” ɛ (épiskopês ɖò Glɛkigbe mɛ) dó é ǎ é tɔn mɛ é ɖɔhun. (Lk 19:44) Alǒ é sixu wà ɖagbe nú mɛ bo lɛ́ hɛn lè wá nú mɛ lee é na nyí gbɔn ɖò ninɔmɛ mɛ ɖěɖee na sɔ́ Mawu sù “ɖò azǎn e gbè é na ba ye kpɔ́n é [épiskopês ɖò Glɛkigbe mɛ]” tɔn mɛ é ɖɔhun.—1Pi 2:12.
21-27 OCTOBRE
DƆKUN MAWUXÓ Ɔ TƆN ÐE LƐ | 1 PIYƐ́Ɛ 3-5
“Hwenu Nǔ lɛ Bǐ Na Vɔ Dó ɔ Ko Yá”
w13 15/11 3 akpá. 1
“Ayixa Mitɔn Ni Nɔ Te Bonu Mi Na Nɔ Sixu Xoɖɛ”
Zǎnzɔ́watɔ́ xóxó ɖé ɖɔ ɖɔ, “táan e mɛ amlɔ nɔ nyí mɛ hugǎn ɖò zǎnmɛ bɔ è ma sɔ́ sixu nɔ wunzɛn ǎ é wɛ nyí hwenu kpɛɖé jɛ nukɔn nú ayitéhɔnnu.” Mɛ ɖevo e nɔ lɛ́ nɔ wunzɛn nú zǎn blebu ɖokpo lɛ é na ɖibla yí gbè ɖɔ mɔ̌ wɛ é ɖè gbɔn. Klisanwun égbé tɔn lɛ ɖò xwi ɖí xá wuvɛ̌ ɖokpo ɔ wɛ, ɖó zǎn gaga e kú ɖò gbɛ̀ nyanya Satáan tɔn mɛ é lɛ́ sɛyi tawun dìn hú ɖ’ayǐ tɔn. (Hlɔ. 13:12) Kpɔ́n lee é na nyí awovínú sɔ ɖɔ mǐ ni lɛ́ d’amlɔ, dìn e ganmɛ ko yì bǐ é é! É na nyɔ́ ɖɔ mǐ ni “zán gbɛ̀ ɖagbe” bo hɛn akpágbánúmɛ Mawuxówema ɔ tɔn e ɖɔ ɖɔ “ayixa [mǐtɔn] ni nɔ te bonu [mǐ] na nɔ sixu xoɖɛ” é ayi mɛ.—1 Pi. 4:7.
w99 15/4 22 akpá. 3
Lee È Na Tuùn Ablu Gbigbɔ Tɔn Ðebǔ Bo Xò Zlɛ́ Gbɔn É
Gudo tɔn ɔ, hɛn akpágbánúmɛ wanyiyi tɔn mɛsɛ́dó Piyɛ́ɛ tɔn elɔ ayi mɛ gbánwúngbánwún: “Hwenu nǔ lɛ bǐ na vɔ dó ɔ ko yá; mi zán gbɛ̀ e sɔgbe é; ayixa mitɔn ni nɔ te bonu mi na nɔ sixu xoɖɛ. Nǔ e mi na wà jɛ nukɔn nú nǔ lɛ bǐ ɔ wɛ nyí ɖɔ mi ni ɖó wanyiyi ɖaxó nú miɖée; ɖó wanyiyi ɔ nɔ [cyɔn nǔ dó] hwɛ wɔbuwɔbu e è hu ɔ.” (1 Piyɛ́ɛ 4:7, 8) É bɔwǔ tawun bɔ mǐ na jó hwɛhuhu gbɛtɔ́ tɔn dó, é sixu nyí mɛ ɖevo tɔn alǒ mǐɖesunɔ tɔn, bɔ ye na w’azɔ̌ dó ayi mǐtɔn kpo linlin mǐtɔn lɛ kpo jí, bo na huzu afɔklɛ́nnú nú mǐ. Satáan tuùn gǎnmaɖó gbɛtɔ́ lɛ tɔn enɛ ganji. Kínklán kpo agbahwlɛnxámɛ kpo nyí ɖé lɛ ɖò wlɛnwín tɔn e bí alɔ n’i hugǎn lɛ é mɛ. Enɛ wu ɔ, mǐ ɖó na yawǔ sɔ́ wanyiyi ɖaxó e mǐ ɖó nú mǐɖée lɛ é bo cyɔn nǔ dó hwɛ mɔhun lɛ, lobo na ‘na tɛn awoví bonu é na tɛ́n mǐ kpɔ́n ǎ.’— Efɛzinu lɛ 4:25-27.
Mɛ Yíyí: È Ðó Hudo Tɔn Tawun!
2 Gbɔn vo nú enɛ ɔ, Piyɛ́ɛ lɛ́ dó wusyɛn lanmɛ nú nɔví lɛ ɖɔ: “Mi ma hunhún nǔɖɔ cobo yí miɖée ó.” (1 Pi. 4:9) Xógbe “mɛ yíyí” ɔ sín tinmɛ tlɔlɔ ɖò Glɛkigbe mɛ wɛ nyí “è ni yí wǎn nú jonɔ lɛ, alǒ nyɔ́ xomɛ dó ye wu.” Amɔ̌, ɖǒ ayi wu ɖɔ Pɔlu dó wusyɛn lanmɛ nú nɔví Klisanwun lɛ ɖɔ ye ni nɔ yí “[ye]ɖée,” enɛ wɛ nyí mɛ ɖěɖee ye ko tuùn, bo nɔ nɔ kpɔ́ xá lɛ é. Nɛ̌ yǐ e ye na nɔ yí mɛ é ka na d’alɔ ye gbɔn?
3 É na zɔ́n bɔ ye na jɛ kpɔ́. Ðǒ ayi kpɔ́ndéwú hwiɖesunɔ tɔn wu. Mɛɖé ka ko ylɔ́ we bɔ a yì nɔ kpɔ́ xá ɛ ɖò xwé tɔn gbè kpɔ́n à? Hwenu enɛ nɔ flín we nǔ ɖagbe lɛ, kabǐ? Hwenu e a ɖè ayi ɖ’ayǐ kpo mɛɖé lɛ kpo ɖò agun towe mɛ é ɔ, xɔ́ntɔn e a zun xá ye é lɛ́ syɛn d’eji à cé? Nú mǐ nɔ yí nɔví sunnu kpo nɔví nyɔnu mǐtɔn lɛ kpo ɔ, mǐ nɔ tuùn ye mɛ ɖokpo ɖokpo d’eji, hú lee mǐ ko tuùn ye gbɔn ɖò ninɔmɛ ɖevo lɛ mɛ é. Ee ninɔmɛ lɛ fɔ́n bo ɖò nylanylá d’eji wɛ ɖò Piyɛ́ɛ sín azǎn gbè é ɔ, é byɔ ɖɔ Klisanwun lɛ ni lɛ́ jɛ kpɔ́ d’eji hú ɖ’ayǐ tɔn. Nǔ ɖokpo ɔ wɛ é nyí nú Klisanwun nǔgbo ɖěɖee ɖò gbɛ̀ nɔ wɛ ɖò “azǎn gudogudo tɔn lɛ mɛ” é.—2 Tim. 3:1.
Nǔ Xɔ Akwɛ Biblu Tɔn lɛ Biba
w13 15/6 23
Nǔ E Nǔxatɔ́ lɛ Kanbyɔ lɛ É
Biblu ɖɔ ɖɔ Jezu “jla Mawuxó [gbigbɔ] e ɖò ganmɛ lɛ” é. (1 Pi. 3:19) Etɛ ka nyí tinmɛ enɛ tɔn?
▪ Mɛsɛ́dó Piyɛ́ɛ ɖɔ ɖɔ gbigbɔ enɛ lɛ wɛ nyí mɛ ɖěɖee ko “vɛ́tóli nú Mawu ɖ’ayǐ xóxó ɖò hwenu e é ɖó suúlu bo nɔte kaka bɔ Nɔwée bló tɔjihun ɔ fó lɛ” é. (1 Pi. 3:20) É ɖò wɛn ɖɔ nǔɖiɖó gbigbɔ tɔn ɖěɖee xò kpóɖó nú Satáan ɖò gǔfínfɔ́n tɔn mɛ lɛ é dó gesí wɛ Piyɛ́ɛ ɖè. Judi ɖɔ xó dó wɛnsagun ɖěɖee “jó nɔtɛn yeɖesunɔ tɔn dó” lɛ é wu bo ɖɔ ɖɔ Mawu “dó wlɔ ye kaka sɔyi mavɔmavɔ, bo sɔ́ ye dó zinflu mɛ, ɖò dò gɔngɔn mɛ nú azǎn ɖaxó ɔ; azǎn enɛ gbè wɛ Mawu na ɖó hwɛ nú ye.”—Judi 6.
Ali tɛ nu nǔɖiɖó gbigbɔ tɔn lɛ ka vɛ́tóli ɖè ɖò Nɔwée sín azǎn gbè? Jɛ nukɔn nú Sinvɔgbɛ ɔ ɔ, nǔɖiɖó gbigbɔ tɔn nyanya enɛ lɛ sɔ́ gbɛtɔ́ gbaza dó; nǔ enɛ e ye bló é ka ɖò linlin e Mawu ɖó nú ye é mɛ ǎ. (Bǐb. 6:2, 4) Gɔ́ na ɔ, xó e wɛnsagun enɛ lɛ ɖó xá nyɔnu lɛ é xlɛ́ ɖɔ ye wà nǔ e xyɔwǔ é ɖé. Mawu dá nǔɖiɖó gbigbɔ tɔn lɛ bonu ye na zun ta dó xó ɖó xá nyɔnu lɛ mɛ ǎ. (Bǐb. 5:2) È na sú kún dó nú wɛnsagun nyanya tótlítɔ́ enɛ lɛ ɖò hwenu e Mawu ɖó dó é. Dìn hwɛ ɔ, lee Judi ɖɔ gbɔn é ɔ, ye “ɖò dò gɔngɔn mɛ,” alǒ ɖò xógbe ɖevo mɛ ɔ, gankpá gbigbɔ tɔn ɖé mɛ.
Hwetɛnu Jezu ka jla Mawuxó ɔ “[gbigbɔ] e ɖò ganmɛ lɛ” é? Nɛ̌ é ka wà mɔ̌ gbɔn? Piyɛ́ɛ wlan ɖɔ hwenu e “è fɔ́n ɛ wá gbɛ̀” “ɖò [gbigbɔ] ɔ sín alixo” é wɛ nǔ enɛ jɛ. (1 Pi. 3:18, 19) Lɛ̌ ɖ’ayi wu ɖɔ Piyɛ́ɛ ɖɔ Jezu “jla Mawuxó.” Lee Piyɛ́ɛ ɖɔ xó ɔ gbɔn é xlɛ́ ɖɔ Jezu ko jla wɛnɖagbe ɔ hwɛ cobɔ Piyɛ́ɛ wá wlan wema-sɛ́dó-mɛ tɔn nukɔntɔn ɔ. Enɛ wu ɔ, é cí ɖɔ táan kpɛɖé ɖò fínfɔ́n sín kú Jezu tɔn gudo ɔ, é jla awoví lɛ ɖɔ è na dɔn tó nú ye dó nǔjɔnǔ mɛ. Nukúnɖiɖó ɖebǔ ɖò wɛnɖagbe e è jla ye é mɛ ǎ. Wɛn hwɛɖónúmɛ tɔn wɛ. (Jona. 1:1, 2) Jezu ɖè nǔɖiɖi tɔn kpo gbejininɔ tɔn kpo xlɛ́ kaka yì kú bɔ è lɛ́ wá fɔ́n ɛ; é gbɔn yɛdo enɛ mɛ dó xlɛ́ ɖɔ awoví kún ɖ’acɛ ɖě dó emi jí ó. Jezu ɖó acɛ bo na jla wɛn hwɛɖónúmɛ tɔn mɔhun.—Jaan 14:30; 16:8-11.
Ðò sɔgudo ɔ, Jezu na blá Satáan kpo wɛnsagun enɛ lɛ kpo bo na sɔ́ ye nyi dó domaɖó azan ɔ mɛ. (Luk. 8:30, 31; Nǔɖe. 20:1-3) Bɛ́sín hwenɛnu ɖidó ɔ, wɛnsagun tótlítɔ́ enɛ lɛ na ɖò ablu gɔngɔn gbigbɔ tɔn ɖé mɛ bɔ è ka na wá sú kún dó nú ye dandan.—Nǔɖe. 20:7-10.
w08 15/11 21 akpá. 8
Nǔ Taji Ðěɖee Ðò Wema-Sɛ́dó-Mɛ Jaki kpo Piyɛ́ɛ kpo Tɔn lɛ Mɛ lɛ É
4:6—“Mɛkúkú” tɛ lɛ è ka “jla Wɛnɖagbe ɔ”? Mɛ ɖěɖee ‘kú ɖò tónúmase yetɔn kpo hwɛhuhu yetɔn lɛ kpo mɛ’ lɛ é, alǒ mɛ ɖěɖee kú ɖò gbigbɔ lixo cobo wá sè wɛnɖagbe ɔ lɛ é wɛ. (Efɛ. 2:1) Amɔ̌, ee ye ɖi nǔ nú wɛnɖagbe ɔ gudo é ɔ, ye jɛ “gbɛ̀” wá jí lo ɖò gbigbɔ lixo.
28 OCTOBRE–3 NOVEMBRE
DƆKUN MAWUXÓ Ɔ TƆN ÐÉ LƐ | 2 PIYƐ́Ɛ 1-3
“Hɛn Azǎn Jehovah Tɔn Sín Wiwá Dó Ayi Mɛ Gbánwúngbánwún”
w06 15/12 27 akpá. 11
Jehovah Na “Bló Bɔ È Na Ðɔhwɛ Jlɔjlɔ”
11 Amɔ̌, nɛ̌ mǐ ka ɖó na mɔ nǔ jɛ ganjɛwu e Jezu na bo ɖɔ Jehovah na “bló bɔ è na ɖɔhwɛ jlɔjlɔ” é mɛ gbɔn? Xó Mawu tɔn xlɛ́ ɖɔ Jehovah nɔ ɖó suúlu có, é ka na “lín cobo” ɖɔhwɛ jlɔjlɔ hwenu e gan ɔ na xò é ǎ. (Luki 18:7, 8; 2 Piyɛ́ɛ 3:9, 10) Ðò Nɔwée hwenu, hwenu e Sinvɔgbɛ ɔ é ɔ, é dán lɛjɛlɛjɛ cobo sú kún dó nú nǔnyanyawatɔ́ lɛ ǎ. Mɔ̌ ɖokpo ɔ, ɖò Lɔti sín hwenu ɔ, hwenu e myɔ gosin jixwé é ɔ, nǔnyanyawatɔ́ lɛ bǐ wɛ kú. Jezu ɖɔ: “Hwenu e nyɛ Gbɛtɔ́ví ɔ na ɖè susu ce xlɛ́ ɔ, lee é na nyí gbɔn ɔ nɛ.” (Luki 17:27-30) “Nǔ e na vívá kún [mɛ nyanya lɛ tɔn é na wá] ajijimɛ.” (1 Tɛsalonikinu lɛ 5:2, 3) Nǔgbo ɔ, mǐ sixu ɖeji bǐ mlɛ́mlɛ́ ɖɔ Jehovah kún na lɔn bonu gbɛ̀ Satáan tɔn na lɛ́ nɔ ayǐ nú azǎn ɖokpo d’eji hwenu e hwɛjijɔ hwenu na sù é ó.
w06 15/12 19 akpá. 18
“Azǎn Ðaxó Jehovah Tɔn Ko Sɛkpɔ”
18 Hwɛjijɔ e wu mɛsɛ́dó Piyɛ́ɛ gb’akpá nú mǐ ɖɔ mǐ ni hɛn ‘azǎn Jehovah tɔn sín wiwá’ dó ayi mɛ’ gbánwúngbánwún é nɛ. Nɛ̌ mǐ ka sixu wà enɛ gbɔn? Ali e nu mǐ sixu wà mɔ̌ ɖè é ɖokpo wɛ nyí ɖɔ mǐ na “zán gbɛ̀ mímɛ́, bo na ɖó sísí nú Mawu.” (2 Piyɛ́ɛ 3:11, 12) Alɔnu mǐtɔn hinhɛn ján ɖò azɔ̌ mɔhun lɛ mɛ na d’alɔ mǐ bɔ mǐ na ɖò te kpɔ́n ‘azǎn Jehovah tɔn’ sín wiwá kpo akpakpa sɔ́ mɛ kpo. Xókwín Glɛkigbe tɔn e è lilɛ dó ‘hɛn dó ayi mɛ gbánwúngbánwún’ é sín tinmɛ tlɔlɔ wɛ nyí “è ni yawǔ.” Cobonu azǎn Jehovah tɔn na wá ɔ, mǐ sixu bló dìn bɔ hwenu lɛ na yawǔ wá yì ǎ. Amɔ̌, enyi mǐ ɖò te kpɔ́n azǎn enɛ, bo hɛn alɔnu mǐtɔn ján ɖò sinsɛnzɔ́ Mawu tɔn mɛ ɔ, é na cí nú mǐ ɖɔ táan ɔ ɖò wiwáyi wɛ bléblé ɖɔhun.—1 Kɔlɛntinu lɛ 15:58.
Nǔ Xɔ Akwɛ Biblu Tɔn lɛ Biba
w08 15/11 22 akpá. 3
Nǔ Taji Ðěɖee Ðò Wema-Sɛ́dó-Mɛ Jaki kpo Piyɛ́ɛ kpo Tɔn lɛ Mɛ lɛ É
1:19—Mɛ̌ ka nyí “sunví zǎnzǎn tɔn” ɔ? Hwetɛnu é ka tɔ́n? Nɛ̌ mǐ ka wà gbɔn bo tuùn ɖɔ nǔ enɛ jɛ? Jezu Klisu wɛ nyí “sunví zǎnzǎn tɔn” ɔ, hwenu e é huzu Axɔ́su gudo é. (Nǔɖe. 22:16) Ðò 1914 ɔ, Jezu tɔ́n ɖò nǔɖiɖó lɛ bǐ nukɔn bo nyí Axɔ́su Mɛsiya ɔ, b’ɛ xlɛ́ ɖɔ ayǐ yɔyɔ̌ ɖevo hɔ́n. Ninɔmɛ e Jezu huzu ɖò nǔmimɔ ɖé mɛ é ko ɖè susu e é na wá ɖó é kpo acɛ e é ɖó bo na nyí Axɔ́su Axɔ́suɖuto Mawu tɔn tɔn é kpo xlɛ́. Nǔmimɔ enɛ dó zǒgbe jí ɖɔ nǔɖɔɖ’ayǐ Mawu tɔn lɛ ɖó ganjɛwu tawun. Ayi sísɔ́ ɖó nǔɖɔɖ’ayǐ enɛ lɛ jí na tá weziza dó ayi mǐtɔn lɛ mɛ, enɛ zɔ́n bɔ mǐ mɔ ɖɔ Sunví Zǎnzǎn tɔn ɔ ko tɔ́n nǔgbo.
w08-F 15/11 22 akpá. 3
Nǔ Taji Ðěɖee Ðò Wema-Sɛ́dó-Mɛ Jaki kpo Piyɛ́ɛ kpo Tɔn lɛ Mɛ lɛ É
2:4, nwt—Etɛ ka nɔ nyí “Talutalu”? Hwetɛnu è ka bɛ́ wɛnsagun gǔfɔntɔ́ lɛ kɔn nyi mɛ? Nǔ gankpá ɖɔhun ɖé wɛ Talutalu ɔ nyí; nǔɖiɖó gbigbɔ tɔn lɛ kɛɖɛ wɛ è nɔ bɛ́ d’emɛ, é nyí gbɛtɔ́ lɛ ǎ. Sɔgbe xá linlin Mawu tɔn e ma na gblá ǎ é ɔ, ablu gɔngɔn gbigbɔ tɔn ɖé wɛ. Mɛ ɖěɖee ɖò Talutalu mɛ lɛ é ɖó nukúnɖiɖó sɔgudo tɔn ɖebǔ ǎ. Mawu bɛ́ wɛnsagun tótlítɔ́ lɛ nyi dó Talutalu mɛ ɖò Nɔwée hwenu, bɔ ye na nɔ ninɔmɛ blawǔ enɛ mɛ kaka jɛ hwenu e è na sú kún dó nú ye é.