Ényí nǔ mɛ ɖěvo lɛ́ tɔn nɔ ɖu ayi mɛ nú mɛ ɔ, é nɔ hɛn nyɔ̌ná mavɔmavɔ lɛ́ wá

Agungán Église Unie du Canada tɔn lɛ́ ɖokpó wɛ tɔ́ ce nyí, énɛ́ wú ɔ, ɖo aklúnɔzángbla ɖokpó ɖokpó mɛ ɔ, tɔ́ ce nɔ sɛ́ nyi kpó nɔví nyɔ̌nu ce kpó dó wěmaxɔmɛ yɔkpɔ́vú lɛ́ tɔn e è ɖ’ayǐ ɖo sinsɛn ɔ mɛ, bɔ è nɔ bló ɖo dimanche zǎnzǎn lɛ́ bǐ é. Énɛ́ gúdo ɔ, ɖo gan wǒ-ɖokpó mɛ zǎnzǎn ɔ, mǐ nɔ xo kpóɖó n’i, bo nɔ bló nǔ ɖěvo e kúnkplá sinsɛn ɔ lɛ́ é xá ɛ. É su hwelɛ́kɔ ɔ, mǐ nɔ xwedó nɔ mǐtɔn yi kpléxɔ Axɔ́súɖuto ɔ tɔn mɛ. Mǐ sixú mɔ vogbingbɔn e ɖo sinsɛn we lɛ́ tɛ́ntin é vaan.

Nɔ mǐtɔn nɔ tínmɛ nǔ e kplɔ́n wɛ é ɖe ɖo Biblu mɛ lɛ́ é nú xɔ́ntɔn vívɛ́ tɔn Bob Hutcheson kpó Marion Hutcheson kpó, bɔ yě lɔ wá húzú Kúnnuɖetɔ́ Jexóva tɔn. Ðo 1958 ɔ, Bob Hutcheson kpó Marion Hutcheson kpó kplá nyi kpó vǐ yětɔn súnnuví atɔn lɛ́ kpó yi kpléɖókpɔ́ akɔjɔkplé tɔn azǎn tántɔn tɔn e è bló ɖo New York City, bɔ xóta tɔn nyí La volonté divine é. Un dó nukún nǔ e jɛ wá yi lɛ́ é mɛ kpɔ́n é ɔ, un wá ɖ’ayi wú din ɖɔ é kún bɔ wǔ nú yě ɖěbǔ cóbónú yě kplá mì sɔ́ yi ó, amɔ̌, hwenu ɖagbe hú gǎn e sín vǐví un ɖu ɖo gbɛ ce mɛ lɛ́ é ɖokpó wɛ kpléɖókpɔ́ énɛ́ nyí.

NƆVÍ LƐ́ D’ALƆ MÌ BƆ UN WA NǓ GĚGÉ ÐO SINSƐNZƆ́ JEXÓVA TƆN MƐ

Hwenu e un ɖo wǐnnyáwínnyá mɛ é ɔ, gletakɔ́xwé ɖé wɛ mǐ nɔ nɔ, bɔ un nɔ nyi kanlin, lobo nɔ ɖu vǐví azɔ̌ énɛ́ tɔn tawun. Un jló tawun bo ná kplɔ́n lěe è nɔ kpé nukún dó kanlin lɛ́ wú gbɔn é sín azɔ̌ (vétérinaire). Nɔ ce ɖɔ xó énɛ́ nú mɛxó agun tɔn ɖokpó. Mɛxó agun tɔn ɔ flín mì kpó xomɛnyínyɔ́ kpó ɖɔ “azǎn gǔdo gúdo tɔn lɛ́” mɛ nɔ gbɛ ɖe wɛ mǐ ɖe, bo kan lěe nǔkplɔ́nkplɔ́n ɖo kplɔ́nyijǐ-alavɔ nú xwe mɔ̌kpán ná wa nǔ dó vɛ̌ e un vɛ́ xá Jexóva é wú gbɔn é byɔ́ mì. (2 Tim. 3:1) Wǎgbɔ tɔn ɔ, un wá gbeta ɔ kɔn ɖɔ un kún sɔ́ ná yi kplɔ́nyijǐ-alavɔ ó.

Un kpo ɖo nǔ e un ná wa hwenu e un ná fó wěmaxɔmɛ linsinmɛ tɔn é kanbyɔ́ nyiɖée wɛ. Nǔgbó wɛ ɖɔ un nɔ ɖ’alɔ ɖo sinsɛnzɔ́ ɔ mɛ ɖo aklúnɔzángbla lɛ́ bǐ mɛ có, un nɔ ɖu vǐví sinsɛnzɔ́ ɔ tɔn ǎ, bo nɔ lin ɖɔ un kún sixú nyí gběxosín-alijítɔ́ ó. Hwe ɖokpó ɔ nu ɔ, tɔ́ ce e ma nyí kúnnuɖetɔ́ ǎ é kpó ataví ce kpó ɖo wǔsyɛ́n dó lanmɛ nú mì wɛ ɖɔ nyi ní yí gbe nú azɔ̌ hwebǐnu tɔn ɖé ɖo azɔ̌xwé ɖaxó assurance tɔn ɖé ɖo Toronto. Ataví ce ɖo tɛn nukúnɖéjí ɖé mɛ ɖo azɔ̌xwé ɔ, énɛ́ wú ɔ, un yí gbe nú azɔ̌ ɔ.

Ðo Toronto ɔ, ɖibla nyí hwenu ce bǐ wɛ un nɔ zán dó w’azɔ̌, lobo nɔ lɛ́ nɔ kpɔ́ xá mɛ ɖěɖěe ma nyí Kúnnuɖetɔ́ ǎ lɛ́ é, bɔ énɛ́ zɔ́n bɔ un nɔ sixú yi kplé agun tɔn lɛ́ kpó kúnnuɖegbé kpó ɖo gbesisɔmɛ ǎ. Gǎn’páa ce e ma nyí Kúnnuɖetɔ́ ǎ é gɔ́n wɛ un nɔ jɛ nukɔn, bɔ ée é kú é ɔ, un ba fí ɖěvo bo jɛ.

Tɔ́ kpó nɔ kpó ɖɔhun wɛ nɔví súnnu kpó nɔví nyɔ̌nu kpó Hutcheson, éé kplá mì yi kpléɖókpɔ́ akɔjɔkplé tɔn ɖo 1958 é cí nú mì. Yě ylɔ́ mì ɖɔ nyi ní wá nɔ xwé émítɔn gbe, bo d’alɔ mì bɔ un yi nukɔn ɖo gbigbɔ lixo. Ðo 1960 ɔ, nyi kpó vǐ súnnu yětɔn John kpó bló batɛ́mu. John bɛ́ gběxosín-alijítɔ́zɔ́, bɔ énɛ́ dó wǔsyɛ́n lanmɛ nú mì bɔ un ba ná gbló ada nú sinsɛnzɔ́ ce d’é jí. Nɔví e ɖo agun ɔ mɛ lɛ́ é ɖ’ayi wú ɖɔ un yi nukɔn ɖo gbigbɔ lixo, bɔ è sɔ́ mì nukúnkpénǔwútɔ́ nú kplé e mǐ nɔ ylɔ́ din ɖɔ Kplé gbɛzán kpó sinsɛnzɔ́ kpó tɔn é.

UN MƆ ALƆGƆ́TƆ́ ÐAAÐAGBE ÐÉ, BO LƐ́ HÚZÚ GBĚXOSÍN-ALIJÍTƆ́

Ðo 1966 ɔ, un wlí alɔ xá Randi Berge; gběxosín-alijítɔ́ kanɖódónǔwútɔ́ e jló tawun bá wa sinsɛnzɔ́ ɖo fí e hudó sukpɔ́ ɖe é ɖé wɛ n’i. Nǔ mǐtɔn nɔ ɖu ayi mɛ nú nukúnkpénǔwútɔ́ lɛ̌dó tɔn mǐtɔn, bɔ é dó wǔsyɛ́n lanmɛ nú mǐ ɖɔ mǐ ní d’alɔ ɖo agun Orillia tɔn mɛ, ɖo Ontario. Énɛ́ wú ɔ, mǐ bɛ́ agban bo yi jɛ dɔ̌n.

Ée mǐ wá Orillia tlóló é ɔ, un xo kpóɖó nú Randi, bo bɛ́ gběxosín-alijítɔ́ hwebǐnu tɔn sín azɔ̌. Akpakpa nɔ sɔ́ mì éɖɔhun. Ée un w’azɔ̌ syɛ́nsyɛ́n bo húzú gběxosín-alijítɔ́ ɖagbe ɖé gúdo é ɔ, un jɛ awǎjijɛ e è nɔ mɔ ɖo Biblu zínzán mɛ lɛ́ é mɔ jí, bɔ ényí un lɛ́ mɔ bónú mɛ lɛ́ ɖo nukúnnú mɔ jɛ nǔgbó Biblu tɔn lɛ́ mɛ wɛ ɔ, é nɔ lɛ́ víví nú mì tawun. Nyɔ̌ná ɖaxó ɖé wɛ é nyí ɖɔ mǐ d’alɔ asú kpó asi kpó ɖé ɖo Orillia, bɔ yě bló hǔzúhúzú lɛ́ ɖo gbɛzán yětɔn mɛ, lobo jɛ Jexóva sɛn jí.

UN HÚZÚ SƆGBE XÁ LĚE È NƆ LIN NǓ GBƆN ÐO AYǏ Ɔ JÍ É

Mǐ yi Toronto ɖokpó, bo xo go Arnold MacNamara; nɔví e ɖo nukún kpé dó nǔ lɛ́ wú wɛ ɖo Betɛ́li lɛ́ é ɖokpó wɛ. É kanbyɔ́ mǐ ɖɔ mǐ jló ná nyí gběxosín-alijítɔ́ titewungbe a jí. Tɛn tɔn mɛ jɛ́n un yí gbe n’i ɖe ɖɔ: “Ganjí! É ní ma vɛ́ ko nyí Québec ó kpowun!” Linlin masɔgbe e mɛ ɖěɖěe ɖo xá Canada tɔn e mɛ è nɔ dó Glɛ̌nsigbe ɖe lɛ́ é ɖó dó mɛ ɖěɖěe ɖo tokpɔn Québec tɔn mɛ, ɖo fí e è nɔ dó Flanségbe ɖe lɛ́ é wú é wɛ ɖo nǔ wa dó wǔ ce wɛ. Hwe énɛ́ nu ɔ, toví lɛ́ fɔ́n gǔ dó acɛkpikpa ɔ jí, bo ba ɖɔ tokpɔn Québec tɔn ní jɛ éɖée sí, bo ma sɔ́ nɔ Canada kannu ó.

Arnold yí gbe ɖɔ: “Québec wɛ nyí fí ɖokpó géé e alaxɔ ɔ ɖo gběxosín-alijítɔ́ titewungbe lɛ́ sɛ́ dó wɛ din é.” Afɔjíafɔjí wɛ un yí gbe bá yi. Un ka ko tuun ɖ’ayǐ ɖɔ Randi ɖo biba wɛ bá yi wa sinsɛnzɔ́ ɖo dɔ̌n. Un wá ɖ’ayi wú ɖɔ gbeta ɖagbe hú gǎn e kɔn mǐ wá ɖo gbɛzán mǐtɔn mɛ lɛ́ é ɖokpó wɛ nyí énɛ́!

Ée nyi kpó Randi kpó yi wěmaxɔmɛ Flanségbe kplɔ́nkplɔ́n tɔn nú aklúnɔzángbla atɔ́ɔ́n gúdo é ɔ, mǐ kpó asú kpó asi kpó ɖěvo kpó yi Rimouski; kilomɛ́tlu 540 mɔ̌ wɛ é ɖó dó totaligbé zǎnzǎnhwe jí Montréal tɔn. Nǔ gěgé wɛ kpo bɔ mǐ ná kplɔ́n, énɛ́ jɛ wě tawun hwenu e un xa ɖɔnúese ɖé lɛ́ ɖo kplé jí é. Un ɖɔ ɖɔ ɖo kpléɖókpɔ́ ɖaxó e jawě é hwenu ɔ, “afɔsɔ́ɖótetɔ́ gowungo (autruche)” gěgé ná wá; nǔ e ɖɔ gbé un ka ja é wɛ nyí, “afɔsɔ́ɖótetɔ́ e gosín Autriche lɛ́ é” gěgé ná wá.

Ée mǐ mɛ ɛnɛ lɛ́ ɖo Rimouski é ɔ, nɔví nyɔ̌nu tlɛnnɔ, éé nyí kanɖódónǔwútɔ́ é ɛnɛ, nɔví súnnu kpó nɔví nyɔ̌nu kpó Huberdeaus, gɔ́ nú vǐ nyɔ̌nu yětɔn we lɛ́ wá xo kpóɖó nú mǐ. Nɔví súnnu kpó nɔví nyɔ̌nu kpó Huberdeaus xáya xwé ɖaxó ɖé, bɔ gběxosín-alijítɔ́ e nɔ nɔ fínɛ́ lɛ́ é bǐ nɔ nɔ gbe, bo nɔ jɔ fún dó xɔkwɛ́ súsú ɔ mɛ; mǐ nɔ ylɔ́ xwé e gbe yě nɔ nɔ é ɖɔ maison blanche, ɖó sɛn wěwé wɛ è sá dó xwé ɔ nukɔn, bo lɛ́ sá dó dotín tɔn lɛ́ wú. Hwɛhwɛ ɔ, mɛ 12, alǒ 14 wɛ nɔ nɔ fínɛ́. Ðó nyi kpó Randi kpó nyí gběxosín-alijítɔ́ titewungbe wútu ɔ, mǐ nɔ yi jlá wɛn ɖagbe ɔ zǎnzǎn, hwemɛ kpó gbada kpó, énɛ́ wú ɔ, é nɔ su nukún mǐtɔn mɛ tawun ɖɔ hwebǐnu ɔ, mɛɖé nɔ ɖo gbesisɔmɛ bo ná kplá mǐ yi sinsɛnzɔ́ ɔ mɛ, é ná bo tlɛ nyí ɖo avivɔhwenu ɖo gbadanu lɛ́ ɔ nɛ́.

Mǐ kpó gběxosín-alijítɔ́ gbejínɔtɔ́ énɛ́ lɛ́ kpó wá vɛ́ káká bɔ, yě wá cí xwédo ɖé ɖɔhun nú mǐ. Hweɖélɛ́nu ɔ, mǐ nɔ bɔ myɔ bo nɔ xú ɖó kpɔ́, alǒ azǎn ɖé lɛ́ jí ɔ, mǐ nɔ ɖa nǔɖuɖu ɖó kpɔ́. Nɔví ɖokpó nyɔ́ nǔ xo ɖo mǐ mɛ, énɛ́ wú ɔ, samedi zǎnmɛ lɛ́ ɔ, hwɛhwɛ wɛ mǐ nɔ ji han bo nɔ ɖú we.

Mɛ e nɔ nɔ Rimouski lɛ́ é gěgé ɖó jlǒ bo ná kplɔ́n Biblu. Xomɛ hun mǐ tawun ɖɔ ɖo xwe atɔ́ɔ́n vlamɛ ɔ, Biblu kplɔ́ntɔ́ gěgé yi nukɔn, bo bló batɛ́mu. Wɛnjlátɔ́ e ɖo agun ɔ mɛ lɛ́ é sín kɛ́n jɛ jí bo yi 35.

Ðo Québec ɔ, è kplɔ́n azɔ̌ mǐ ganjí, bɔ mǐ húzú wɛnɖagbejlátɔ́ lɛ́. Mǐ mɔ lěe Jexóva d’alɔ mǐ ɖo sinsɛnzɔ́ ɔ mɛ, bo lɛ́ sú hudó agbaza tɔn mǐtɔn lɛ́ sín do nú mǐ gbɔn é. Gɔ́ ná ɔ, mǐ kplɔ́n bo yí wǎn nú mɛ e nɔ dó Flanségbe lɛ́ é, gbe yětɔn kpó lěe yě nɔ wa nǔ gbɔn ɖo xá yětɔn mɛ é kpó. Énɛ́ zɔ́n bɔ mǐ lɛ́ yí wǎn nú lěe è nɔ wa nǔ gbɔn ɖo fí ɖěvo lɛ́ é.—2 Kɔ. 6:13.

Mǐ ɖó nukún tɔn ǎ, bɔ alaxɔ byɔ́ mǐ ɖɔ mǐ ní sɛ tɛn yi toxo Tracadie tɔn mɛ; tɔtɛ́ntinto kpɛví ɖé wɛ bo ɖo zǎnzǎnhwe jí Nouveau-Brunswick tɔn. É vɛ́ wǔ nú mǐ kpɛɖé, ɖó tlóló wɛ mǐ d’alɔ wěma mɛ bo xáya xwé ɖé, bɔ un lɛ́ d’alɔ wěma mɛ bo ná wa mɛ̌sizɔ́ nú ganxixo kléwún ɖé ɖo aklúnɔzángbla ɖokpó ɖokpó mɛ. Gɔ́ ná ɔ, tlóló wɛ Biblu kplɔ́ntɔ́ mǐtɔn ɖé lɛ́ húzú wɛnjlátɔ́, bɔ è lɛ́ jɛ kpléxɔ Axɔ́súɖuto ɔ tɔn mǐtɔn gbá jí é ɔ, é lín ɖěbǔ ǎ.

Mǐ xo ɖɛ ɖo aklúnɔzángbla fífó ɔ bǐ dó tɛnsisɛ ɔ tamɛ, bo yi ba Tracadie kpɔ́n; toxo énɛ́ gbɔn vo nú Rimouski tawun. Amɔ̌, mǐ wá gbeta ɔ kɔn ɖɔ ɖó Jexóva ba ɖɔ mǐ ní yi dɔ̌n wútu ɔ, mǐ ná yi. Mǐ tɛ́n Jexóva kpɔ́n, bo mɔ lěe é ɖe nǔ e gbo kpo nyi ali jí nú mǐ lɛ́ é ɖokpó ɖokpó síin gbɔn é. (Mal. 3:10) Randi ɔ, mɛ e gbigbɔ mímɛ́ Mawu tɔn nɔ xlɛ́ ali é ɖé wɛ, é nɔ sɔ́ éɖée dó sá vɔ̌, bo nɔ dó nǔkiko nú mɛ tawun; jijɔ énɛ́ lɛ́ e é ɖó é zɔ́n bɔ tɛnsisɛ ɔ bɔ wǔ hú gǎn, lěe é ko nɔ nyí gbɔn tɛgbɛ é.

Robert Ross ɖokpónɔ wɛ nyí mɛxó agun tɔn e ɖo agun e mɛ mǐ wá jɛ din é, cóbɔ mǐ yi fínɛ́. É ɖo gběxosín-alijítɔ́zɔ́ wa wɛ ɖo fínɛ́, é kpó asi tɔn Linda kpó, bɔ ée yě ji vǐ yětɔn nukɔntɔn ɔ gúdo é ɔ, yě wá gbeta ɔ kɔn bo ná cí fínɛ́. Yě ɖo nukún kpé dó vǐ súnnu yětɔn kpɛví ɔ wú wɛ có, yě dó wǔsyɛ́n lanmɛ nú mǐ tawun, ɖó yě nɔ yí mɛ ganjí, bo nɔ lɛ́ ɖó kan dó wɛnɖagbejíjlázɔ́ ɔ wú.

MǏ MƆ AWǍJIJƐ E ÐO SINSƐNZƆ́WIWA ÐO FÍ ÐĚBǓ E HUDÓ ÐE É MƐ É

Ée mǐ wa gběxosín-alijítɔ́zɔ́ ɖo Tracadie nú xwe we gúdo é ɔ, nǔmaɖónukún ɖěvo lɛ́vɔ́ ba jǒnɔ mǐ; è ylɔ́ mǐ bónú mǐ ná wa nukúnkpénǔwútɔ́ lɛ̌dó tɔn sín azɔ̌. Mǐ wa sinsɛnzɔ́ ɖo lɛ̌dó e nɔ dó Glɛ̌nsigbe lɛ́ é mɛ nú xwe tɛ́nwe, énɛ́ gúdo ɔ, è sɛ́ mǐ dó lɛ̌dó e nɔ dó Flanségbe é ɖokpó mɛ ɖo Québec. Léonce Crépeault, éé nyí nukúnkpénǔwútɔ́ agbegbe tɔn mǐtɔn ɖo Québec é nɔ kpa mì ɖó xóɖiɖɔ ce lɛ́ wú. Amɔ̌ nukɔnmɛ ɔ, hwɛhwɛ wɛ é nɔ kanbyɔ́ mì ɖɔ: “É ka sixú lɛ́ nyɔ́ zán hú gǎn a?”a Alɔ énɛ́ e é dó mì é zɔ́n bɔ un sɔ́ ayi ɖó lěe un ma sɔ́ ná nɔ ɖo xógle lɛ wɛ ɖo xóɖiɖɔ ce lɛ́ mɛ ǎ, bo ka ná nɔ lɛ́ ɖɔ xó ɖo ali ɖé nu bɔ é ná nɔ bɔkun é jí.

Azɔ̌ e un ma ná wɔn gbeɖé ǎ é ɖokpó wɛ nyí ée è ɖe nú mì ɖo kpléɖókpɔ́ akɔjɔkplé tɔn e mǐ bló ɖo Montréal ɖo 1978 é jí é; xóta tɔn wɛ nyí “La foi victorieuse.” Un w’azɔ̌ ɖo azɔ̌xɔsá nǔɖuɖu tɔn. Gbɛtɔ́ 80000 ɖó nukún wɛ mǐ ɖe, bɔ lěe mǐ ka ná ná nǔɖuɖu yě gbɔn din é ná gbɔn vo nú lěe mǐ ko nɔ bló gbɔn ɖ’ayǐ é. Nǔ lɛ́ bǐ wɛ gbɔn vo tawun: nǔ e è ná zán dó ɖa nǔ lɛ́ é, nǔɖuɖu e è ná ɖa lɛ́ é kpó lěe è ná ɖa nǔ lɛ́ gbɔn é kpó. Mǐ ɖó nǔfánú ɖaxó 20, amɔ̌, hweɖélɛ́nu nɔ tíin bɔ yě nɔ w’azɔ̌ ǎ. Ðó yě ɖó tuto lɔ̌nyijǐ-fɔnkan-núwiwa tɔn ɖé ɖo fínɛ́ wútu ɔ, azǎn nukɔntɔn ɔ jí ɔ, mǐ sixú yi anyǔmlímlísɔ́afɔtɛn ɔ káká cóbónú é xo gan wěwe zǎnmɛ tɔn ǎ. Gɔ́ ná ɔ, mǐ ɖó ná yá wǔ flɔ́ myɔ e è nɔ ylɔ́ ɖɔ four lɛ́ é cóbɔ ayǐ ná hɔ́n, bá dó bló zǎnzǎn núɖuɖu. Agbɔ̌n kpé mǐ, amɔ̌, azɔ̌ syɛ́nsyɛ́n e mɛɖéezéjótɔ́ gbɛ̌ ce lɛ́ wa lɛ́ é, zin e yě zin ɖo gbigbɔ lixo é kpó nǔkiko e yě nɔ dó nú mɛ é kpó kplɔ́n nǔ gěgé mì. Káká jɛ din ɔ, mǐ lɛ́ kpo ɖo xɔ́ntɔn nyí wɛ. Kpléɖókpɔ́ manáwɔn énɛ́ e sín vǐví mǐ ɖu ɖo Québec é ná mǐ awǎjijɛ tawun; xá énɛ́ mɛ wɛ è dó ya nú nɔví mǐtɔn lɛ́ dó nǔjɔnǔ mɛ ɖe, ɖo avla 1940 kpó 1960 kpó tɔn mɛ.

Un kplɔ́n nǔ gěgé ɖo nukúnkpénǔwútɔ́ gbɛ̌ ce lɛ́ gɔ́n, ɖo kpléɖókpɔ́ ɖaxó e mǐ bló ɖo Montréal lɛ́ é hwenu. Xwe ɖé xwe ɔ, David Splane, éé ɖo Hǎgbɛ́ alixlɛ́mɛtɔ́ ɔ mɛ din é wɛ nyí nukúnkpénǔwútɔ́ kpléɖókpɔ́ ɖaxó ɔ tɔn. Amɔ̌, ɖo kpléɖókpɔ́ ɖaxó e wá bɔ d’é wú lɛ́ é ɖě hwenu ɔ, ée è byɔ́ mì ɖɔ nyi ní w’azɔ̌ énɛ́ é ɔ, David w’azɔ̌ ɖó kpɔ́ xá mì tawun.

Ðo 2011 hwenu e mǐ ko ɖu vǐví tomɛyiyizɔ́ ɔ tɔn nú xwe 36 gúdo é ɔ, è byɔ́ mì ɖɔ nyi ní wá húzú mɛ̌si nú Wěmaxɔmɛ mɛxó agun tɔn lɛ́ tɔn. Mǐ dɔ́ zan vovo 75 jí ɖo xwe we vlamɛ, amɔ̌, vɔ̌ e mǐ sá lɛ́ é sɔ mɔ̌ kɔ. Ðo vivɔnu aklúnɔzángbla ɖokpó ɖokpó tɔn ɔ, ényí mɛxó agun tɔn lɛ́ mɔ lě do ganjíninɔ yětɔn ɖo gbigbɔ lixo nɔ ɖu ayi mɛ nú Hǎgbɛ́ alixlɛ́mɛtɔ́ ɔ sɔ é ɔ, é nɔ su nukún yětɔn mɛ tawun.

Nukɔnmɛ ɔ, un kplɔ́n nǔ mɛ ɖo Wěmaxɔmɛ nú wɛnɖagbejlátɔ́ Axɔ́súɖuto ɔ tɔn lɛ́. Hwɛhwɛ ɔ, lě do tuto ɔ ján sɔ é nɔ zɔ́n bɔ agbɔ̌n nɔ kpé wěmaxɔmɛví lɛ́, bɔ ado nɔ lɛ́ hu yě: yě ná jínjɔ́n klási nú ganxixo tɛ́nwe ɖo azǎn ɖokpó ɖokpó jí, bo wa azɔ̌zɔ́nmɛ yětɔn lɛ́ nú ganxixo atɔn gbadanu lɛ́ bǐ, lobo ka ná lɛ́ wa wěmaxɔmɛvízɔ́ ɛnɛ, alǒ atɔ́ɔ́n ɖo aklúnɔzángbla ɖokpó ɖokpó mɛ. Nɔví e kpó nyi kpó nyí mɛ̌si nú yě é nɔ ɖɔ nú yě ɖɔ alɔdó Jexóva tɔn mɛvo ɔ, é kún sixú kpa yě ó. Un kpo ɖo lěe ényí wěmaxɔmɛví lɛ́ gán jɛ Jexóva wú ɔ, yě nɔ kpé wú bo nɔ wa nǔ hú nǔ e yě sixú wa é, bɔ é nɔ jí wǔ nú yě sɔ é flín wɛ.

ÉNYÍ NǓ MƐ ÐĚVO LƐ́ TƆN NƆ ÐU AYI MƐ NÚ MƐ Ɔ, É NƆ HƐN NYƆ̌NÁ MAVƆMAVƆ LƐ́ WÁ

Nǔ mɛ ɖěvo lɛ́ tɔn e nɔ ɖu ayi mɛ nú mamáa ce é zɔ́n bɔ é d’alɔ Biblu kplɔ́ntɔ́ tɔn lɛ́ bɔ yě yi nukɔn; é tlɛ d’alɔ Papá ce ɖésú bɔ é húzú linlin e é nɔ ɖó dó nǔgbó ɔ wú é. Nɔ ce kú bɔ é bló azǎn atɔn gúdo é ɔ, Papá mǐtɔn bló nǔɖé bɔ é jí wǔ nú mǐ tawun; é wá kpléxɔ Axɔ́súɖuto ɔ tɔn mɛ, hwenu e è ɖo xóɖiɖɔ nú mɛ bǐ xwlé mɛ wɛ é, bɔ nú xwe 26 e bɔ d’é wú lɛ́ é ɔ, é gɔn kplé ɖě gbeɖé ǎ. Nǔgbó wɛ ɖɔ Papá ce bló batɛ́mu gbeɖé ǎ có, mɛxó agun tɔn lɛ́ ɖɔ nú mì ɖɔ é wɛ nɔ nyí mɛ nukɔn nukɔntɔn e nɔ wá kplé lɛ́ ɖo aklúnɔzángbla ɖokpó ɖokpó mɛ é.

Nɔ ce sɔ́ kpɔ́ndéwú ɖagbe ɖé ɖ’ayǐ nú nyi kpó nɔví nyɔ̌nu ce lɛ́ kpó. Nɔví nyɔ̌nu ce atɔn lɛ́ kpó asú yětɔn lɛ́ kpó ɖo Jexóva sɛn wɛ kpó gbejíninɔ kpó. Nɔví nyɔ̌nu ce we ɖo sinsɛnzɔ́ wa wɛ ɖo alaxɔ mɛ; mɛ ɖokpó ɖo Portugal, bɔ mɛ ɖě ɔ ɖo Haiti.

Din ɔ, Randi kpó nyi kpó nyí gběxosín-alijítɔ́ titewungbe ɖo Hamilton, ɖo Ontario. Hwenu e mǐ ɖo nukúnkpénǔwútɔ́ lɛ̌dó tɔn sín azɔ̌ wa wɛ é ɔ, é nɔ víví nú mǐ tawun ɖɔ mǐ ní kplá mɛ ɖěvo lɛ́ yi mɛbakpɔ́n yětɔn lɛ́ kpó Biblu kplɔ́nkplɔ́n yětɔn lɛ́ kpó domɛ. Amɔ̌ din ɔ, ényí mǐ mɔ Biblu kplɔ́ntɔ́ mǐtɔn lɛ́ bónú yě ɖo nukɔn yi wɛ ɖo gbigbɔ lixo ɔ, é nɔ víví nú mǐ tawun. Gɔ́ ná ɔ, ée mǐ ɖo xɔ́ntɔn zun xá nɔví e ɖo agun mǐtɔn yɔ̌yɔ́ ɔ mɛ lɛ́ é wɛ é ɔ, lěe Jexóva nɔ nɔ gǔdo nú yě ɖo hwenu ɖagbe lɛ́ kpó hwenu vɛ́ wǔ lɛ́ kpó mɛ gbɔn é nɔ dó wǔsyɛ́n lanmɛ nú mǐ.

Ényí mǐ dó nukún nǔ e jɛ wá yi lɛ́ é mɛ kpɔ́n ɔ, nǔ mǐtɔn e nɔ ɖu ayi mɛ nú mɛ ɖěvo lɛ́ é nɔ su nukún mǐtɔn mɛ tawun. Énɛ́ wú ɔ, mǐ lɔ dó gǎn e wú mǐ kpé é bɔ nǔ mɛ ɖěvo lɛ́ tɔn “nɔ ɖu ayi mɛ nú mǐ tawun,” lobɔ mǐ nɔ lɛ́ dó wǔsyɛ́n lanmɛ nú mɛ ɖěvo lɛ́ ɖɔ yě ní sɛn Jexóva lěe yě kpé wú gbɔn é bǐ. (2 Kɔ. 7:6, 7) Ði kpɔ́ndéwú ɔ, ɖo xwédo ɖokpó mɛ ɔ, mamáa ɔ, vǐ súnnu yětɔn kpó vǐ nyɔ̌nu yětɔn kpó bǐ wɛ ɖo sinsɛnzɔ́ hwebǐnu tɔn mɛ. Un kanbyɔ́ asú ɔ ɖɔ é ka ko lin tamɛ dó gběxosín-alijítɔ́zɔ́ wiwa jí kpɔ́n a jí. Bɔ é yí gbe nú mì ɖɔ émí ɖo gǔdo nɔ nú gběxosín-alijítɔ́ atɔn wɛ. Énɛ́ wú ɔ, un kanbyɔ́ ɛ ɖɔ: “A sixú nɔ gǔdo nú yě hú Jexóva wɛ a?” Un dó wǔsyɛ́n lanmɛ n’i ɖɔ élɔ́ ní ɖu nǔ e sín vǐví ɖu wɛ yě ɖe é. Sun ayizɛ́n gúdo ɔ, é húzú gběxosín-alijítɔ́.

Randi kpó nyi kpó ná kpo ɖo “nǔjíwǔ” Jexóva tɔn lɛ́ “xó ɖɔ nú jijimɛ e ná jɔ sɔ é” wɛ, bɔ nukúnɖíɖó mǐtɔn wɛ nyí ɖɔ yě ná ɖu vǐví Jexóva sinsɛn tɔn lěe mǐ ɖu vǐví tɔn gbɔn é.—Ðɛh. 71:17, 18, nwt.