Hulda kpé nǔ e gbé nya wɛ é ɖe é wú

NƆVÍ nyɔ̌nu mǐtɔn atɔn nɔ nɔ tɔtɛ́ntinto kpɛví Sangir Besar tɔn mɛ ɖo Indonésie. Xwe ɖé lɛ́ ɖíe ɔ, yě nɔ w’azɔ̌ ɖó kpɔ́ ɖo xu tó. È tuun yě tawun ɖo tɔtɛ́ntinto ɔ mɛ, ɖó sinsɛnzɔ́ yětɔn wú; yě nɔ d’alɔ mɛ lɛ́ bɔ yě nɔ mɔ nukúnnú jɛ Biblu mɛ. Amɔ̌, ɖo ninɔmɛ énɛ́ mɛ ɔ, azɔ̌ vo séé wɛ yě nɔ wa.

Jɛ nukɔn hwɛ̌ ɔ, yě nɔ byɔ́ xu ɔ mɛ, bo nɔ bɛ́ awǐnnya lɛ́ tɔ́n wá xu ɔ tó. Awǐnnya énɛ́ ɖé lɛ́ nɔ d’agba káká bo nɔ cí balɔ́ɔn e è nɔ xo kpó afɔ kpó é ɖɔhun. Énɛ́ gúdo ɔ, nyɔ̌nu lɛ́ nɔ jínjɔ́n zinkpo kpɛví lɛ́ jí, bo nɔ gba awǐnnya énɛ́ lɛ́ ɖó yɔywɛ kpó marteau kpó, bɔ é nɔ hwe hú koklózin. Énɛ́ wá yi ɔ, yě nɔ bɛ́ awǐnnya e yě gba ɖó yɔywɛ lɛ́ é dó alǎ mɛ, bo nɔ bɛ́ yi fí e yě nɔ nɔ é. Énɛ́ gúdo ɔ, yě nɔ bɛ́ awǐnnya énɛ́ lɛ́ dó ati mɛ, bɔ è sixú bɛ́ dó agbanhún lɛ́ mɛ, dó yi bló ali ná.

Nɔví nyɔ̌nu énɛ́ lɛ́ ɖokpó nɔ nyí Hulda. Ninɔmɛ tɔn yí gbe n’i, bɔ é nɔ zán hwenu ɖo azɔ̌ ɔ kɔn hú mɛ ɖě lɛ́. Hwɛhwɛ wɛ é nɔ zán akwɛ́ e é nɔ mɔ lɛ́ é bǐ dó xɔ dandannú gbɛ mɛ tɔn lɛ́ nú xwédo tɔn. Amɔ̌, nǔ ɖěvo wɛ ɖo ayi tɔn mɛ din bɔ é ɖo gbě tɔn nya wɛ. É ɖo tablɛ́ti e ná d’alɔ ɛ bɔ é ná nɔ zán JW Library^® é ba wɛ. Hulda tuun ɖɔ video kpó nǔ ɖěvo kpó e ɖo JW Library^® mɛ lɛ́ é ná d’alɔ émí bɔ émí ná nɔ ɖɔ mawuxó nú mɛ ɖěvo lɛ́, lobo lɛ́ mɔ nukúnnú jɛ Biblu mɛ d’é jí.

Hulda nɔ w’azɔ̌ nú ganxixo we zǎnzǎn lɛ́ bǐ nú sun ɖokpó adaɖé, bo ná dó gba awǐnnya gěgé dó dó agban hǔnta kpɛví ɖokpó. Gǔdo mɛ ɔ, é mɔ akwɛ́ gěgé bá dó xɔ tablɛ́ti ɔ.

Hulda ɖɔ: “Nǔ ci mì, bɔ un lɛ́ se wǔvɛ́ ɖó awǐnnya e un gba lɛ́ é wú, amɔ̌, ée un kpé wú bo zán tablɛ́ti ce yɔ̌yɔ́ ɔ, bɔ é d’alɔ mì bɔ alɔ lɛ́ se kpɛ́n nú mì d’é jí ɖo sinsɛnzɔ́ ɔ mɛ, lobɔ un nɔ lɛ́ zán dó sɔ́ nǔ nú kplé klisánwun tɔn lɛ́ faa é ɔ, un yá wǔ wɔn wǔvɛ́ ce lɛ́ bǐ.” É lɛ́ ɖɔ ɖɔ hwenu e jɛmɛjí ɔ bɛ́ bɔ é ná nɔ zaan é ɔ, tablɛ́ti ɔ lɛ́ d’alɔ émí, ɖó nǔ e agun ɔ ko nɔ wa ɖ’ayǐ lɛ́ é bǐ wɛ jɛ kan jí. Xomɛ hun mǐ ɖɔ Hulda kpé nǔ e gbé nya wɛ é ɖe é wú.