Ji ɖiɖe dó Jexóva wú zɔ́n bɔ ayi ce j’ayǐ

LĚE UN TUUN JEXÓVA BO JƐ JIÐE ÐÓ DÓ WǓTU TƆN JÍ GBƆN É

È ji mì ɖo gletoxo kpɛví ɖé mɛ ɖo 1948, ɖo tofɔligbé gbadahwe jí Awɔnlin tɔn. Hwe ɔ nu ɔ, ataví ce Moustapha, gɔ́ nú Wahabi, fofó ce ɖaxó ɔ bló batɛ́mu bo húzú Kúnnuɖetɔ́ Jexóva tɔn. Hwenu e un ɖó xwe tɛ́nnɛ é ɔ, tɔ́ ce kú. Ayi ce bǐ fan. Wahabi ɖɔ nú mì ɖɔ mǐ sixú lɛ́ mɔ papá ɖo fínfɔ́n sín kú hwenu. Gbɔdónúmɛxó énɛ́ e é ɖɔ nú mì é sísɛ́ mì bɔ un jɛ Biblu kplɔ́n jí. Un bló batɛ́mu ɖo 1963. Nɔví ce atɔn e kpo lɛ́ é lɔ bló batɛ́mu.

Ðo 1965 ɔ, un yi gɔ́ nú foó ce Wilson ɖo Lagos, bo ɖu vǐví xɔ́ntɔn vívɛ́ zunzun xá gběxosín-alijítɔ́ hwebǐnu tɔn ɖěvo e ɖo agun Igbobi tɔn mɛ lɛ́ é tɔn. Awǎjijɛ yětɔn kpó akpakpa e nɔ sɔ́ yě é kpó sísɛ́ mì bɔ ɖo janvier 1968 ɔ, nyi lɔ hǔzú gběxosín-alijítɔ́ yěɖɔhun.

Nɔví súnnu ɖé nɔ w’azɔ̌ ɖo Betɛ́li bo nɔ nyí Albert Olugbebi, bo bló kplé bǔnɔ ɖé xá mǐ mɛ mɛ wínnyáwínnyá lɛ́, dó hudó gběxosín-alijítɔ́ titewungbe tɔn lɛ́ tɔn e è ɖó ɖo totaligbé Awɔnlin tɔn é wú. Un kpo ɖo gbehwan élɔ́ e nɔví Olugbebi nyi sɛ́dó mǐ kpó akpakpa sɔ́ mɛ kpó é flín wɛ: “Mi kpo ɖo wǐnnyáwínnyá mɛ, mi zán hwenu mitɔn kpó hlɔ̌nhlɔ́n mitɔn kpó bǐ nú Jexóva. Azɔ̌ sukpɔ́ ɖo dɔ̌n bɔ mi ná wa!” Ðó akpakpa ɖo sísɔ́ mì wɛ bɔ un ná sɔ́ nyiɖée jó gbeyíɖɔ Ezayíi ɖɔhun wútu ɔ, un d’alɔ wěma mɛ.—Eza. 6:8.

Ðo mai 1968 ɔ, è ɖe azɔ̌ nú mì bɔ un húzú gběxosín-alijítɔ́ titewungbe ɖo toxo Kano tɔn mɛ, ɖo totaligbé Awɔnlin tɔn. Hwe ɔ nu wɛ Biafra lɛ́ ɖo tohwan fun wɛ; yě fun ahwan énɛ́ sín 1967 jɛ 1970; ahwan énɛ́ dɔn tagba gěgé nyi ayǐ, bɔ mɛ gěgé kú ɖo totaligbé Awɔnlin tɔn. Énɛ́ gúdo ɔ, Biafra lɛ́ ɖidó zǎnzǎnhwe jí Awɔnlin tɔn. Nɔví súnnu ɖé wa nǔ e wú é kpé é bǐ bónú un ma yi totaligbé Awɔnlin tɔn ó. Amɔ̌ un ɖɔ n’i ɖɔ: “É ná cɛ nú we ɖɔ nǔ ce ɖu ayi mɛ nú we. Ényí Jexóva jɛ́n ba ɖɔ má sɛn émí ɖo dɔ̌n ɔ, nǔxokpɔ́n ɖ’é mɛ ǎ, é ná nɔ kpɔ́ xá mì.”

JI ÐIÐE DÓ JEXÓVA WÚ ÐO TOXO E AHWAN HƐN HÁNNYÁ É MƐ

Gbɛ blá wǔ tawun ɖo Kano. Toxo ɖaxó énɛ́ bǐ wɛ tohwan ɔ hɛn hánnyá. Ényí mǐ ɖo sinsɛnzɔ́ ɔ mɛ ɔ, mǐ nɔ wá yi tɔ́n jɛ cyɔ mɛ ɖěɖěe è hu ɖo ahwan ɔ hwenu lɛ́ é tɔn jí hweɖélɛ́nu. Agun gěgé wɛ ɖo Kano có, nɔví lɛ́ gěgé wɛ hɔn sín fínɛ́. Wɛnjlátɔ́ e kpo ɖo fínɛ́ lɛ́ é sɔ́ yi 15 ǎ; xɛsi kpó awakanmɛ kú mɛ kpó ɖí bú yě. Xomɛ hun nɔví énɛ́ lɛ́ tawun hwenu e mǐ mɛ gběxosín-alijítɔ́ titewungbe ayizɛ́n lɛ́ wá é. Wǔsyɛ́n e mǐ dó lanmɛ nú yě é wa ɖagbe nú yě tawun. Mǐ d’alɔ yě bɔ yě lɛ́ vɔ́ tito gbigbɔ tɔn yětɔn lɛ́ ɖ’ayǐ, jɛ ganmɛ yětɔn lɛ́ sín gbe ɖó sɛ́dó alaxɔ jí, bo lɛ́ jɛ wěma lɛ́ zɔ́n sɛ́dó alaxɔ mɛ jí.

Mǐ mɛ gběxosín-alijítɔ́ titewungbe lɛ́ jɛ Awúságbe kplɔ́n jí. Ðó mǐ nɔ jlá wɛn ɖagbe Axɔ́súɖuto ɔ tɔn ayǐ ɔ jí nu lɛ́ dó anɔ̌nugbe yětɔn mɛ wútu ɔ, yě mɛ gěgé jɛ tó ɖó mǐ jí. Amɔ̌, mɛ e ɖo sinsɛn e kpa zinkpo ɖo to ɔ mɛ é mɛ lɛ́ é yí wǎn nú wɛnɖagbejíjlázɔ́ mǐtɔn ǎ, énɛ́ wú ɔ, ayi mǐtɔn ɖó ná ɖo te nǔjɔnǔ tɔn. Gbe ɖokpó ɔ, nya ɖé hɛn jivǐ bo nya mɛ e kpó nyi kpó ɖo wɛn ɖagbe ɔ jlá wɛ é. Amɔ̌, mǐ d’afɔ wezun mɛ bo hɔn yi tɛ ɛ bǐ! Awǒvinú lɛ́ ɖo fínɛ́ có, Jexóva ka bló bɔ mǐ nɔ “vivo mɛ,” bɔ kɛ́n wɛnjlátɔ́ lɛ́ tɔn jɛ jijɛjí jí. (Ðɛh. 4:9) Égbé ɔ, wɛnjlátɔ́ 500 jɛjí wɛ ɖo agun 11 e ɖo Kano lɛ́ é mɛ.

È KLÁN GBE XÁ MǏ ÐO NIGER

Nukɔnmɛ ɖo août 1968, ée mǐ ko nɔ Kano nú sun kléwún ɖé gúdo é ɔ, è sɛ́ mì dó Niamey, éé nyí azinkan République du Niger tɔn é, gɔ́ nú gběxosín-alijítɔ́ titewungbe we ɖěvo lɛ́. Nǔ e wú mǐ yá wǔ ɖ’ayi lɛ́ é ɖokpó wɛ nyí ɖɔ, ɖo to e ɖo gbadahwe jí Aflíka tɔn lɛ́ é mɛ ɔ, Niger nyí to e mɛ yǒzo nɔ gbɛ́ ɖe tawun lɛ́ é ɖokpó. Gbɔn vo nú dɛ e mǐ ná dɛ ɖo yǒzo nu é ɔ, mǐ ɖó ná lɛ́ kplɔ́n gbe tají e è nɔ dó ɖo to ɔ mɛ é, énɛ́ wɛ nyí Flanségbe. Wǔvɛ́ énɛ́ lɛ́ ɖo fínɛ́ có, mǐ ɖeji dó Jexóva wú bo bɛ́ wɛnɖagbejíjlázɔ́ ɔ ɖo azinkan to ɔ tɔn kpó nɔví alɔsɛ́xwi bǔ ɖé, éé ɖo fínɛ́ lɛ́ é kpó. Ðo táan kléwún ɖé mɛ ɔ, ɖibla nyí mɛ e ɖo Niamey bo sixú xa nǔ lɛ́ é bǐ wɛ è sɔ́ wěma Biblu kplɔ́nkplɔ́n tɔn e xóta tɔn nyí Oyọnẹn He Nọ Planmẹ Sọyi Ogbẹ̀ Madopodo Mẹ é ɖokpó ɖokpó jó ná. Mɛ lɛ́ tlɛ nɔ tɔ́n gbě tɔn bo nɔ wá gɔ̌n mǐtɔn!

É sɔ́ lín ǎ bɔ mǐ ɖ’ayi wú ɖɔ nǔ Kúnnuɖetɔ́ Jexóva tɔn lɛ́ tɔn kún nɔ jɛ gǎn ayǐ ɔ jí tɔn lɛ́ tɔn jí ó. Ðo juillet 1969 ɔ, mǐ bló kpléɖókpɔ́ ɖaxó mǐtɔn nukɔntɔn manáwɔn ɔ ɖo to ɔ mɛ; mɛ 20 wɛ wá tɛn tɔn mɛ. Mǐ ɖo nukún ɖó wɛ ɖɔ wɛnjlátɔ́ yɔ̌yɔ́ we ná bló batɛ́mu. Amɔ̌, ɖo azǎn nukɔntɔn kpléɖókpɔ́ ɔ tɔn jí ɔ, kponɔ lɛ́ wá bo ɖó tuto ɔ te. Yě wlí mǐ mɛ gběxosín-alijítɔ́ titewungbe lɛ́ kpó nukúnkpénǔwútɔ́ lɛ̌dó tɔn ɔ kpó bo kplá mǐ yi kponɔzɔ́watɛn. Ée yě kan nǔ byɔ́ mǐ gúdo é ɔ, yě ɖɔ nú mǐ ɖɔ mǐ ní wlán wěma ɖé bo zé wá ayǐhɔ́ngbe tɔn. Mǐ ɖ’ayi wú ɖɔ nǔ ná wa dó mǐ wú wɛ yě ɖe, énɛ́ wú ɔ, mǐ bló tuto bo xwlé xóɖiɖɔ batɛ́mu tɔn ɔ mɛ ɖo nɔví súnnu ɖé xwé, lobo hɛn ayi dó bló batɛ́mu nú mɛ e jló ná bló lɛ́ é ɖo tɔsisa ɖé mɛ.

Aklúnɔzángbla kléwún ɖé gúdo ɔ, gǎnhɔnyitɔ́ e nɔ ɖɔ nǔ dó ayijayǐxó wú ɖo to ɔ mɛ é nya nyi kpó gběxosín-alijítɔ́ atɔ́ɔ́n ɖě lɛ́ kpó. Ganxixo 48 wɛ yě ná mǐ bónú mǐ ná tɔ́n sín to ɔ mɛ, mǐɖésúnɔ wɛ ka ná bló tuto lěe mǐ ná yi gbɔn é tɔn. Mǐ se tónú, bo ɖidó alaxɔ Awɔnlin tɔn mɛ tlɔlɔ, fínɛ́ wɛ è sɔ́ azɔ̌ yɔ̌yɔ́ lɛ́ dó así nú mǐ ɖe.

Gletoxo Awɔnlin tɔn e nɔ nyí Orisunbare é mɛ wɛ è sɛ́ mì dó; un ɖu vǐví sinsɛnzɔ́ ɔ tɔn ɖo fínɛ́ tawun, gɔ́ nú kánɖó e mɛ wɛnjlátɔ́ kwínwe ɖé lɛ́ ɖe ɖo fínɛ́ é. Amɔ̌, sun ayizɛ́n gúdo ɔ, alaxɔ byɔ́ mì ɖɔ nyiɖokpónɔ ní lɛ́ kɔ yi Niger. Ðo bǐbɛ́mɛ ɔ, é kpácá mì bɔ un lɛ́ bú ɖ’é mɛ, amɔ̌, énɛ́ gúdo ɔ, akpakpa lɛ́ sɔ́ mì bónú má lɛ́ mɔ nɔví e ɖo Niger lɛ́ é!

Un lɛ́ kɔ yi Niamey. Un yi dɔ̌n é ɔ, ayǐhɔ́ngbe tɔn ɔ, ajɔ̌tɔ́ Awɔnlinnu ɖé ɖ’ayi wú ɖɔ Kúnnuɖetɔ́ Jexóva tɔn wɛ nú mì, bo jɛ nǔ kanbyɔ́ mì dó Biblu wú jí. Mǐ kplɔ́n Biblu ɖó kpɔ́, bɔ ée é jó azɔ nunu kpó ahan syɛ́nsyɛ́n nunu zɛ xwé wú kpó dó gúdo é ɔ, é bló batɛ́mu. Xomɛ hun mì ɖɔ un ɖɔ mawuxó xá nɔví lɛ́ ɖo awa vovo Niger tɔn lɛ́ xwé, bo mɔ lěe mɛ lɛ́ yí nǔgbó ɔ ɖo xwe lɛ́ vlamɛ gbɔn é. Hwenu e un wá fínɛ́ tlóló é ɔ, Kúnnuɖetɔ́ 31 wɛ ɖo to ɔ mɛ, hwenu e un ka ɖo fínɛ́ gosín wɛ é ɔ, 69 wɛ yě ko nyí.

“MǏ TUUN NǓ KÁKÁ ÐÉ DÓ AZƆ̌ AXƆ́SÚÐUTO Ɔ TƆN WÚ ÐO GUINÉE Ǎ”

Nukɔnmɛ, ɖo 1977 ɔ, un lɛ́ kɔ yi Awɔnlin bónú è ná kplɔ́n azɔ̌ mì. Ée è kplɔ́n azɔ̌ mì nú aklúnɔzángbla atɔn gúdo é ɔ, Malcolm Vigo, éé nyí titoblónúnǔtɔ́ Wěɖegbɛ́ alaxɔ tɔn é sɔ́ wěma e è sɛ́ dó sín alaxɔ Sierra Leone tɔn mɛ é ɖé nú mì, bɔ un xa. Nɔví lɛ́ ɖo gběxosín-alijítɔ́ tlɛnnɔ e ɖo ganjí ɖo lanmɛ, bo nɔ dó Glɛ̌nsigbe kpó Flanségbe kpó, bo sixú nyí nukúnkpénǔwútɔ́ lɛ̌dó tɔn ɖo Guinée é ba wɛ. Nɔví súnnu Vigo ɖɔ nú mì ɖɔ è ko kplɔ́n azɔ̌ nyi bɔ nyi ná wa wǔjɔmɛzɔ́ énɛ́. É ɖɔ nú mì nyi wɛn ɖɔ azɔ̌ énɛ́ kún nyí azɔ̌ fífá ó. É gb’akpá élɔ́ nú mì: “Lin tamɛ ganjí cóbó yí gbe.” Un yí gbe n’i afɔjíafɔjí ɖɔ: “Ðó Jexóva wɛ ɖo sísɛ́ mì dó wɛ wú ɔ, un ná yi.”

Un dó jɔmɛhún bo yi Sierra Leone, bo xo go nɔví lɛ́ ɖo alaxɔ mɛ. Mɛ e ɖo Wěɖegbɛ́ alaxɔ tɔn mɛ é ɖokpó ɖɔ nú mì ɖɔ: “Mǐ tuun nǔ káká ɖé dó azɔ̌ Axɔ́súɖuto ɔ tɔn wú ɖo Guinée ǎ.” Alaxɔ ɔ wɛ ná kpé nukún dó mawuxóɖiɖɔzɔ́ e è nɔ wa ɖo Guinée, éé ɖo Sierra Leone kpá é wú có, ɖó hunnyahunnya tíin ɖo toxóɖiɖɔ linu ɖo fínɛ́ wútu ɔ, mǐ nɔ sixú ɖɔ xó ɖó kpɔ́ xá wɛnjlátɔ́ lɛ́ ǎ. Azɔn gěgé wɛ yě tɛ́n kpɔ́n, bo ná sɛ́ nɔví súnnu ɖé dó, bónú é ná yi ba nɔví e ɖo Guinée lɛ́ é kpɔ́n, amɔ̌, é kpa yě ǎ. Énɛ́ wú ɔ, yě byɔ́ mì ɖɔ nyi sixú yi Conakry, azinkan Guinée tɔn, bo kpɔ́n ɖɔ nyi ná mɔ wěma e ná ná acɛ mì bɔ un ná nɔ to ɔ mɛ é a jí.

Ée un yi Conakry é ɔ, un yi fí e afɔsɔ́ɖótetɔ́ Awɔnlin tɔn nɔ nɔ é, bo yi mɔ afɔsɔ́ɖótetɔ́ ɔ. Un ɖɔ n’i ɖɔ un ba ná ɖɔ mawuxó ɖo Guinée. É ɖɔ nú mì ɖɔ nyi kún sixú nɔ fí ó, é ma nyí mɔ̌ ǎ ɔ, è ná wlí nyi, bɔ nǔ e nylá hú mɔ̌ é tlɛ sixú xá nyi. É ɖɔ: “Lɛ̌ kɔ yi Awɔnlin, bo yi ɖɔ mawuxó ɖo dɔ̌n.” Bɔ un yí gbe n’i ɖɔ: “Un ba tawun bo ná ɖɔ mawuxó ɖo fí.” Énɛ́ wú ɔ, é wlán wěma sɛ́dó gǎnhɔnyitɔ́ Guinée tɔn e nɔ ɖɔ nǔ dó ayijayǐxó wú é ɖɔ é ní d’alɔ nyi. Nǔgbó ɔ, gǎnhɔnyitɔ́ ɔ d’alɔ mì.

Énɛ́ gúdo zaan ɔ, un lɛ́ kɔ yi alaxɔ Sierra Leone tɔn mɛ, bo ɖɔ gbeta e kɔn gǎnhɔnyitɔ́ ɔ wá é nú nɔví lɛ́. Nɔví lɛ́ sú xó kpó awǎjijɛ kpó, hwenu e yě se lěe Jexóva kɔn nyɔ̌ná dó tomɛ e un yi bo wá é jí gbɔn é. È yí gbe bɔ un ná nɔ Guinée!

Sín 1978 jɛ 1989 ɔ, un wa nukúnkpénǔwútɔ́ lɛ̌dó tɔn sín azɔ̌ ɖo Guinée kpó Sierra Leone kpó, bo lɛ́ wa nukúnkpénǔwútɔ́ tɛnmɛkpɔ́nnúmɛtɔ́ sín azɔ̌ ɖo Libéria. Ðo bǐbɛ́mɛ ɔ, azɔn nɔ ɖe dó mì. Fí e jɛ zɔ tawun lɛ́ é wɛ nǔ nɔ nyí mɔ̌ ɖe hwɛhwɛ. Amɔ̌, nɔví lɛ́ nɔ wa nǔ e wú yě kpé é bǐ bo nɔ kplá mì yi dotóoxwé.

Hweɖénu ɔ, un bɛ́ zǎnsúkpɛ́zɔn syɛ́nsyɛ́n ɖé, bɔ vɔ̌n lɛ́vɔ́ ɖo nǔ wa xá mì wɛ. Ée un wá mɔ nyiɖée mɛ gúdo é ɔ, un se ɖɔ nɔví lɛ́ ko ɖo wě ɖe dó fí e è ná ɖi mì dó é wú wɛ! Nǔ énɛ́ lɛ́ e sɔ́ gbɛ ce ɖ’axɔ́ nu é xá mì có, un lin gbeɖé bo ná fɔ azɔ̌ kɔn nyi ayǐ ǎ. Gɔ́ ná ɔ, un lɛ́ kpo ɖo kú kú d’é jí wɛ ɖɔ ayijayǐ jɔ ayijayǐ e nɔ nɔ ayǐ sɔ́yi é ɔ, Mawu e sixú fɔ́n mɛ sín kú é gɔ́n wɛ è nɔ mɔ ɖe.

NYI KPÓ ASI È KPÓ NƆ ÐEJI DÓ JEXÓVA WÚ

Ðo 1988 ɔ, un xo go Dorcas; nɔví nyɔ̌nu gběxosín-alijítɔ́ e nɔ sɔ́ éɖée hwe tawun é ɖé wɛ, bo lɛ́ yí wǎn nú nǔ gbigbɔ tɔn lɛ́. Mǐ wlí alɔ, bɔ é xo kpóɖó nú mì ɖo nukúnkpénǔwútɔ́ lɛ̌dó tɔn sín azɔ̌ ce mɛ. Dorcas xlɛ́ ɖɔ asi e yí wǎn nú mɛ, bo nɔ lɛ́ sɔ́ éɖée dó sá vɔ̌ é wɛ émí nyí. Nyi kpó é kpó nɔ zun zɔnlin nú kilomɛ́tlu 25 sín agun ɖé mɛ jɛ ɖěvo mɛ, kpó sáki mǐtɔn lɛ́ kpó. Nú agun e jɛ zɔ tawun lɛ́ é ɔ, mǐ nɔ zán nǔ ɖěbǔ e è sixú zán dó sɛ tɛn sín fí ɖé jɛ fí ɖěvo é, lobo nɔ gbɔn ali e jí babá ɖe, bɔ do lɛ́ gbɔn kétekéte ɖ’é jí lɛ́ é.

Dorcas nɔ kpankɔ́n tawun. Ði kpɔ́ndéwú ɔ, hweɖélɛ́nu ɔ, mǐ nɔ d’asá tɔ e mɛ lǒ lɛ́ ɖe é. Ðo tomɛyiyi azǎn atɔ́ɔ́n tɔn ɖé hwenu ɔ, anǎ e è sɔ́ kpo dó bló ná, bɔ è nɔ gbɔn jí dó d’asá tɔ ɔ é wɛ́n, bɔ é byɔ́ ɖɔ mǐ ní zɔn akló mɛ. Ée Dorcas sí te bo ná tɔ́n sín akló ɔ mɛ é ɔ, é zɔn tɔ ɔ mɛ. Mǐ mɛ ɖě nɛ́ ma ka nyɔ́ tɔ lin ǎ nɛ́, bɔ lǒ lɛ́ lɛ́vɔ́ ɖo tɔ ɔ mɛ. Mawu glá bɔ súnnu ajasyɛ́n ɖé lɛ́ ɖo fínɛ́, bo byɔ́ tɔ ɔ mɛ, lobo hwlɛ́n ɛ. Mǐ kú dlɔ̌ nú hwenu ɖé, ɖó nǔ énɛ́ e jɛ é wú, amɔ̌, mǐ gbɛ kan dó azɔ̌ mǐtɔn nu.

Ðo bǐbɛ́mɛ 1992 tɔn ɔ, é jí wǔ nú mǐ tawun, hwenu e mǐ se ɖɔ Dorcas ɖo xo é. Fó jɛ́n sinsɛnzɔ́ hwebǐnu tɔn mǐtɔn ko fó jɛ́n nɛ́ a? Mǐ lin tamɛ gbɔn lě: “Jexóva ná nǔníná ɖé mǐ!” Énɛ́ wú ɔ, mǐ wá gbeta ɔ kɔn bo ná sun nyǐ vǐ nyɔ̌nu mǐtɔn ɖɔ Jahgift. Mǐ ji Jahgift, bɔ é ná ɖó xwe ɛnɛ mɔ̌ gúdo é ɔ, Eric xo kpóɖó n’i. Nǔníná ɖagbe ɖé wɛ vǐ mǐtɔn we lɛ́ nyí bɔ Jexóva ná mǐ. Jahgift wa azɔ̌ nú hwenu ɖé ɖo azɔ̌xɔsá nǔtínmɛdógbeɖévomɛ tɔn Conakry tɔn, bɔ Eric nyí mɛsɛntɔ́ agun tɔn.

Dorcas ɖó gběxosín-alijítɔ́ titewungbezɔ́ wiwa te có, é kpo ɖo gběxosín-alijítɔ́ hwebǐnu tɔn nyí wɛ, hwenu e é ɖo vǐ mǐtɔn lɛ́ kplɔ́n wɛ é. Kpó alɔdó Jexóva tɔn kpó ɔ, un gbɛ kan dó sinsɛnzɔ́ hwebǐnu tɔn bǔnɔ e wa wɛ un ɖe é nu. Dorcas lɛ́ kpé wú bo wá húzú gběxosín-alijítɔ́ titewungbe, ée vǐ mǐtɔn lɛ́ su gúdo é. Din ɔ, mǐ mɛ we lɛ́ bǐ nyí mɛsɛ́dó ɖo Conakry.

JEXÓVA CYƆ́N ALƆ MǏ JÍ

Hwebǐnu wɛ un yi fí e Jexóva kplá mì gbɔn lɛ́ é. Hwɛhwɛ wɛ é nɔ cyɔ́n alɔ nyi kpó asi ce kpó jí, lobo nɔ lɛ́ kɔn nyɔ̌ná dó mǐ jí. Ji ɖiɖe dó Jexóva wú zɔ́n bɔ mǐ xo gló tagba ɖěɖěe nɔ wa nǔ dó mɛ ɖěɖěe nɔ ɖeji dó nǔɖókan lɛ́ wú é gěgé. Nǔ e nyi kpó Dorcas kpó mɔ kpɔ́n lɛ́ é zɔ́n bɔ mǐ mɔ ɖɔ Jexóva e nyí jɔtɛn ayijayǐ jɔ ayijayǐ tɔn é wɛ nyí “Mawu mɛhwlɛ́ngántɔ́ mǐtɔn.” (1 Tan 16:35) Un ɖeji ɖɔ mɛ ɖěɖěe nɔ ɖeji dó wǔtu tɔn lɛ́ é bǐ sín gbɛ “ná ɖo ayijayǐ mɛ ɖo sáki gbɛ tɔn mɛ, ɖo Jexóva gɔ́n.”—1 Sam. 25:29, nwt.