Etɛwu Gbɛtɔ́ ka Nɔ Kú?

Xósin e Biblu na é

É sɔgbe ɖɔ mǐ ni kan nǔ e wu gbɛtɔ́ nɔ kú é byɔ mǐɖée, ɖò taji ɔ, hwenu e mɛvívɛ́ mǐtɔn ɖé kú é. Biblu ɖɔ: “Kú nɔ yí acɛ tɔn e é nɔ dó wà nǔ nyanya na ɔ ɖò hwɛhuhu sí.”—1 Kɔlɛntinu lɛ 15:56.

Etɛwu gbɛtɔ́ lɛ bǐ ka nɔ hu hwɛ bo nɔ kú?

Adamu kpo Ɛvu kpo é nyí gbɛtɔ́ nukɔntɔn lɛ é kú, ɖó ye hu hwɛ dó Mawu. (Bǐbɛ̌mɛ 3:17-19) Kú kɛɖɛ mɛ jɛn gǔ e ye fɔ́n dó Mawu jí é sixu tɔ́n kɔ dó, ɖó é “gɔ́n wɛ gbɛ̀ ɔ jɔ sín.”—Ðɛhan 36:10; Bǐbɛ̌mɛ 2:17.

Adamu jó hwɛhuhu sín gǔ dó nú kúnkan tɔn bǐ. Biblu ɖɔ: “Hwɛhuhu ɔ, gbɛtɔ́ ɖokpo géé jí wɛ é gbɔn bo wá gbɛ̀ ɔ mɛ; mɛ enɛ wɛ nyí Adamu; hwɛhuhu ɔ ka dɔn kú wá. Enɛ ɔ, gbɛtɔ́ lɛ bǐ nɔ kú, ɖó mɛ bǐ wɛ hu hwɛ.” (Hlɔmanu lɛ 5:12) Gbɛtɔ́ lɛ bǐ wɛ nɔ kú, ɖó ye bǐ wɛ hu hwɛ.—Hlɔmanu lɛ 3:23.

Lee è na sú kú sín kún dó gbɔn é

Mawu dó akpá bo “na sú kú sín kún dó kaka sɔyi.” (Ezayíi 25:8) Bo na dó ɖè kú síìn ɔ, è ɖó na sú kún dó nú nǔ e nɔ zɔ́n é, é wɛ nyí hwɛhuhu. Mawu na gbɔn Jezu Klisu e “sɔ́ hwɛ kɛ gbɛtɔ́ lɛ” é jí dó wà enɛ.—Jaan 1:29; 1 Jaan 1:7.