Sinsɛngbɛ́ E Bú Dò É ɖé Wɛ Kúnnuɖetɔ́ Jehovah Tɔn lɛ Nyí À?

Eǒ, Kúnnuɖetɔ́ Jehovah tɔn lɛ nyí sinsɛngbɛ́ e bú dò é ɖé ǎ. É nyɔ́ wà ɔ, Klisanwun ɖěɖee nɔ tɛ́n kpɔ́n bo nɔ xwedó kpɔ́ndéwú Jezu Klisu tɔn lɛ é wɛ mǐ nyí, bo nɔ lɛ́ zán nǔkplɔnmɛ tɔn lɛ ɖò gbɛzán mǐtɔn mɛ.

Etɛ ka nyí sinsɛngbɛ́ e bú dò é ɖé?

Nǔ vovo wɛ mɛ lɛ nɔ lin dó xógbe “sinsɛngbɛ́ e bú dò é” wu. Enɛ wu ɔ, mǐ ni gbéjé nǔ e mɛ lɛ nɔ lin kpaa dó sinsɛngbɛ́ e bú dò lɛ é wu é we kpɔ́n, kpo nǔ e wu linlin enɛ lɛ ma sɔgbe xá mǐ ǎ é kpo.

• Mɛɖé lɛ lin ɖɔ sinsɛngbɛ́ yɔyɔ̌, alǒ ee jó nǔkplɔnmɛ dodó lɛ dó é ɖé wɛ nɔ nyí sinsɛngbɛ́ e bú dò é. Kúnnuɖetɔ́ Jehovah tɔn lɛ dó sinsɛn yɔyɔ̌ ɖé wá ǎ. É nyɔ́ wà ɔ, Klisanwun xwè kanweko nukɔntɔn ɔ tɔn ɖěɖee xó Biblu ɖɔ lɛ é sín kpɔ́ndéwú wɛ mǐ nɔ xwedó. (2 Timɔtée 3:16, 17) Mǐ ɖi nǔ ɖɔ nú è na ɖɔ Mawu sinsɛn xó ɔ, Biblu jí wɛ nǔkplɔnmɛ lɛ ɖó na jinjɔn.

• Mɛɖé lɛ lin ɖɔ sinsɛngbɛ́ baɖabaɖa ɖé wɛ sinsɛngbɛ́ e bú dò é nyí bɔ mɛ ɖokpo nɔ nyí gǎn na. Kúnnuɖetɔ́ Jehovah tɔn lɛ nɔ ylɔ́ gbɛtɔ́ ɖebǔ ɖɔ agungán ǎ. É nyɔ́ wà ɔ, mǐ nɔ xwedó xó elɔ e Jezu ɖɔ nú ahwanvu tɔn lɛ é: “Klisu ɖokponɔ géé wɛ nyí Gǎn mitɔn.”—Matie 23:10.

Kúnnuɖetɔ́ Jehovah tɔn lɛ nyí sinsɛngbɛ́ baɖabaɖa ɖé ǎ, loɔ, nǔ e ye nɔ kplɔ́n lɛ é nɔ hɛn lè wá nú mɛ e ɖò agun yetɔn mɛ lɛ é, kaka jɛ mɛ ɖevo lɛ jí. Ði kpɔ́ndéwú ɔ, sinsɛnzɔ́ mǐtɔn ko d’alɔ mɛ gegě bɔ ye ɖu ɖò jijɔ nyanya lɛ jí, ɖi gěe zinzan nyi dò kpo ahannumu kpo. Gɔ́ na ɔ, mǐ ɖó klási nyɔ̌wlan-nyɔ̌xa tɔn lɛ gbɔn gbɛ̀ ɔ bǐ mɛ, bo nɔ d’alɔ gbɛtɔ́ afatɔ́n mɔkpan bɔ ye nɔ kplɔ́n nǔxixa kpo nǔwlanwlán kpo. Mǐ nɔ lɛ́ hɛn sɔ mɛ. Mǐ nɔ wà nǔ e wu mǐ kpé é bǐ bɔ mɛ ɖevo lɛ nɔ kpɔ́n dó walɔ ɖagbe mǐtɔn wu bo nɔ mɔ ɖɔ mǐ gbɔn vo, lee Jezu ɖegbe nú ahwanvu tɔn lɛ gbɔn é.—Matie 5:13-16.