TÀN 1
Mawu Jɛ Nǔ lɛ Bló Jí
MAWU gɔ̌n wɛ nǔ ɖagbe e mǐ ɖó lɛ é bǐ gosin. É bló hwe bonu é na na mǐ weziza ɖò kéze, bo bló sun kpo sunví lɛ kpo bonu mǐ ni dó sixu mɔ nǔ ɖò zǎnmɛ. Mawu lɛ́ bló ayikúngban ɔ bonu mǐ na nɔ jí.
Amɔ̌, hwe, sun, sunví lɛ kpo ayikúngban kpo nyí nùɖíɖó Mawu tɔn nukɔntɔn lɛ ǎ. A ka tuùn nǔ nukɔntɔn e é bló é à? Wɛnsagun lɛ wɛ Mawu bló dó nukɔn bɔ ye cí éɖesunɔ ɖɔhun. Lee mǐ ma sixu mɔ Mawu ǎ é ɔ, mɔ̌ jɛn mǐ ma sixu mɔ ye lɔmɔ̌ ǎ é nɛ. Mawu bló wɛnsagun lɛ bonu ye na nɔ kpɔ́ xá ɛ ɖò jixwé.
Wɛnsagun nukɔntɔn e Mawu bló é gbɔn vo tawun. Vǐ Mawu tɔn nukɔntɔn wɛ é nyí bo w’azɔ̌ kpo Tɔ́ tɔn kpo. É d’alɔ Mawu bɔ É bló nǔ ɖevo lɛ bǐ sésé. É d’alɔ Mawu bɔ É bló hwe, sun, sunví lɛ, gɔ́ nú ayikúngban mǐtɔn.
Nɛ̌ ayikúngban ɔ ka cí hwenɛnu? Ðò bǐbɛ̌mɛ ɔ, mɛɖebǔ sixu nɔ ayikúngban ɔ jí ǎ. Nǔ ɖebǔ ɖè ǎ, sìn kɛɖɛ wɛ gɔ́ ayikúngban ɔ bǐ jí. Amɔ̌, Mawu ka jló ɖɔ gbɛtɔ́ ni nɔ ayikúngban ɔ jí. Enɛ wu ɔ, é jɛ nǔ lɛ bló nú mǐ jí. Etɛ é ka bló?
Dó nukɔn ɔ, ayikúngban ɔ ɖó hudo weziza tɔn. Enɛ wu ɔ, Mawu bló bɔ weziza hwe tɔn hɔ́n dó ayikúngban ɔ jí. Lee é bló weziza ɔ gbɔn é zɔ́n bɔ zǎn na nɔ kú bɔ ayǐ na nɔ hɔ́n. Enɛ gudo ɔ, Mawu bló bɔ ayikúngban ɔ tɔ́n sín sìn mɛ.
Ðò bǐbɛ̌mɛ ɔ, nǔ ɖebǔ ɖò ayikúngban ɔ jí ǎ. É cí ɖiɖe e mɔ wɛ a ɖè ɖò fí é ɖɔhun. Folowa, atín alǒ kanlin ɖebǔ ko ɖè ǎ. Hweví ɖebǔ tlɛ ɖò tɔ̀ lɛ mɛ ǎ. Azɔ̌ kpò tawun bɔ Mawu na wà cobɔ ayikúngban ɔ jí na nyɔ́ nɔ nú kanlin kpo gbɛtɔ́ kpo.
Jérémie 10:12; Kolɔsinu lɛ 1:15-17; Genèse 1:1-10.