AKPÁXWÉ 1

Sín Nùɖúɖó Hwenu jɛ Sìn Vɔ Gbɛ̀ Hwenu

Mɛ̌ ka ɖó jinukúnsin kpo ayikúngban kpo? Nɛ̌ hwe, sun, sunví lɛ kpo nǔ gégě ɖevo e ɖò ayikúngban ɔ jí lɛ é kpo ka wá gbɔn? Biblu na xósin e sɔgbe é hwenu e é ɖɔ ɖɔ Mawu wɛ ɖó ye é. Nǔ e wu wema mǐtɔn jɛ tàn Biblu tɔn lɛ kpi jí sín hwenu e Mawu jɛ nǔ lɛ ɖó jí é nɛ.

Nùɖíɖó Mawu tɔn nukɔntɔn lɛ wɛ nyí wɛnsagun lɛ. Ye nyí nǔɖògbɛ gbigbɔ mɛ tɔn lɛ bo cí éɖesunɔ ɖɔhun. Amɔ̌, gbɛtɔ́ mǐ ɖɔhun lɛ wɛ Mawu ɖó ayikúngban ɔ na. Enɛ wu ɔ, É bló sunnu kpo nyɔnu kpo e è nɔ ylɔ ɖɔ Adamu kpo Ɛva kpo é bo sɔ́ ye dó jikpá ɖɛkpɛɖɛkpɛ ɖé mɛ. Amɔ̌, ye tlitó nú Mawu bo sɔ́ ɖó acɛ bo na nɔ gbɛ̀ ǎ.

Xwè e ɖò Adamu ɖiɖó kpo Sìn Vɔ Gbɛ̀ ɔ kpo tɛntin é bǐ bló 1 656. Mɛ nyanya gègě wɛ nɔ gbɛ̀ hwenɛnu. Ðò jixwé ɔ, ye wɛ nyí Sataan kpo wɛnsagun nyanya lɛ kpo. Nǔɖògbɛ gbigbɔ mɛ tɔn e nukún ma nɔ mɔ ǎ lɛ é wɛ nú ye. Ðò ayikúngban jí ɔ, ye wɛ nyí Kanyɛɛ kpo mɛ nyanya gègě ɖevo lɛ kpo, gɔ́ nú mɛ jiganjigan ɖé lɛ. Amɔ̌, mɛ ɖagbe ɖé lɛ lɔ nɔ gbɛ̀ ɖò ayikúngban jí hwenɛnu—ɖi Abɛli, Enɔki kpo Nɔwee kpo. Ðò Akpáxwé NUKƆNTƆN ɔ mɛ ɔ, mǐ na kplɔ́n nǔ dó mɛ enɛ lɛ bǐ kpo nǔ e jɛ hwenɛnu lɛ é kpo wu.