TÀN 4
Nǔ E Wu È Nya Ye Sín Jikpá ɔ mɛ É
KPƆ́N nǔ e ɖò jijɛ wɛ é. È nya Adamu kpo Ɛva kpo sín jikpá ɖɛkpɛɖɛkpɛ Edɛnu tɔn mɛ. A ka tuùn nǔ e zɔ́n é à?
Ðó ye wà nùɖé, bɔ é nyla ɖesu. Enɛ wu ɔ, Jehovah dɔn tó nú ye. A ka tuùn nǔ nyanya e Adamu kpo Ɛva kpo wà é à?
Ye wà nǔ e Mawu gbɛ́ nú ye é. Mawu ɖɔ ye ni ɖu sínsɛ́n atín e ɖò jikpá ɔ mɛ lɛ é bǐ tɔn. Amɔ̌, atín ɖokpo ɖò finɛ, bɔ Mawu ɖɔ ye ni ma ɖu sínsɛ́n tɔn ó, é ma nyí mɔ̌ ǎ ɔ, ye na kú. Ðó é bló atín enɛ bonu ye na ɖu sínsɛ́n tɔn ǎ. Mǐ ka tuùn ɖɔ é nyla, enyi è sɔ́ nǔ e sín gbè è ma na mɛ ǎ é, kabǐ mɔ̌ wɛ ǎ é? Adamu kpo Ɛva kpo ka setónú nú Mawu à? Mǐ ni ba dò na.
Dan ɖé ɖɔ xó nú Ɛva hwenu e é ɖokpo ɖò jikpá ɔ mɛ é gbè ɖokpo. Aní ò? É ɖɔ nú Ɛva ɖɔ é ni ɖu atín sínsɛ́n e Mawu ɖɔ ye ni ma ɖu ó é. Amɔ̌, Jehovah bló dan lɛ bonu ye na ɖɔ xó ǎ. Hǔn, mɛɖé jɛn ɖò xó ɖɔ gbɔn dan ɔ jí wɛ. Mɛ̌ ka à?
Adamu wɛ ǎ. Hǔn, wɛnsagun lɛ ɖokpo jɛn na ko nyí. Jehovah ko ɖó ye jɛ nukɔn cobo wá bló ayikúngban ɔ. Mǐ sixu mɔ ye ǎ. Wɛnsagun ɖokpo wá huzu goyitɔ́. É jló na kpa acɛ Mawu ɖɔhun. É jló ɖɔ gbɛtɔ́ lɛ ni tlitó nú Jehovah bo setónú nú emi. Wɛnsagun enɛ ɔ wɛ ɖɔ xó gbɔn dan ɔ jí.
Wɛnsagun enɛ ɔ kpéwú bo blɛ́ Ɛva. Ee é ɖɔ n’i ɖɔ enyi é ɖu atín sínsɛ́n ɔ, é na cí Mawu ɖɔhun é ɔ, Ɛva ɖi nǔ n’i. Enɛ wu ɔ, Ɛva ɖu atín sínsɛ́n ɔ, bɔ Adamu lɔ ɖu. Adamu kpo Ɛva kpo tlitó nú Mawu, nǔ e wu é nya ye sín jikpá ɔ mɛ é nɛ.
Amɔ̌, Mawu na bló gbè ɖokpo, bɔ ayikúngban ɔ jí bǐ na nyɔ́ ɖɛkpɛ jikpá Edɛnu tɔn ɖɔhun. Mǐ ɖò yìyì wɛ ɔ, mǐ na kplɔ́n lee a sixu ɖó alɔ ɖò ayikúngban ɔ jijla ɖó mɛ gbɔn é. Amɔ̌ dìn ɔ, mǐ ni ba dò nú nǔ e wá jɛ dó Adamu kpo Ɛva kpo wu é.
Genèse 2:16, 17; 3:1-13, 24; Nǔɖexlɛ́mɛ 12:9.