TÀN 5
Ya Bɛ́
EE ADAMU kpo Ɛva kpo tɔ́n sín jikpá Edɛnu tɔn mɛ gudo é ɔ, ye jɛ ya jì jí. Ye ɖó na wà azɔ̌ syɛnsyɛn cobo mɔ nǔ bo ɖu. Ye sɔ́ mɔ atín sínsɛ́n ɖagbe ɖagbe ɖě ǎ, wunkan kɛɖɛ wɛ lɛlɛ̌ dó ye. Nǔ e jɛ dó Adamu kpo Ɛva kpo wu hwenu e ye tlitó nú Mawu, bo gbɛ́ xɔ́ntɔn tɔn é nɛ.
Ee lɛ́ nyla bǐ é wɛ nyí ɖɔ, Adamu kpo Ɛva kpo sɔ́ sixu nɔ gbɛ̀ kaka sɔyi ǎ. A ka flín ɖɔ Mawu ɖɔ ye na kú, enyi ye ɖu atín sínsɛ́n e sín sɛ́n é dó nú ye é à? Sín gbè e gbè ye ɖu é ɔ, ye jɛ kpikpò jí kaka bo wá kú. Tónúmase nú Mawu ɔ, xlonɔnú wiwa wɛ.
Mawu ko nya Adamu kpo Ɛva kpo sín jikpá Edɛnu tɔn mɛ cobɔ ye wá jì vǐ yetɔn lɛ. Enɛ xlɛ́ ɖɔ vǐ yetɔn lɛ lɔmɔ̌ na kpò bo kú.
Enyi Adamu kpo Ɛva kpo ko setónú nú Jehovah wɛ ɔ, ye kpo vǐ yetɔn lɛ kpo na ko nɔ gbɛ̀ ɖò ayikúngban ɔ jí kaka sɔyi ɖò awǎjijɛ mɛ. Mɛɖebǔ na kpò, j’azɔn bo kú ǎ.
Mawu jló ɖɔ gbɛtɔ́ lɛ ni nɔ gbɛ̀ kaka sɔyi ɖò awǎjijɛ mɛ. É dó akpá ɖɔ nǔ na nyí mɔ̌ gbè ɖokpo. Ayikúngban ɔ bǐ na huzu palaɖisi, bɔ gbɛtɔ́ lɛ na ɖò hunsin ɖagbe mɛ. Gɔ́ nú enɛ ɔ, mɛ bǐ na huzu xɔ́ntɔn ɖagbe, bɔ mɛ ɖokpo ɖokpo na zun xɔ́ntɔn xá Mawu.
Xɔ́ntɔn Ɛva kpo Mawu tɔn kpo gblé. Enɛ wu ɔ, é nɔ mɔ wuvɛ̌ ɖesu cobo nɔ jì vǐ. Tónúmase Ɛva tɔn zɔ́n bɔ é mɔ akpɔ̀ gègě.
Adamu kpo Ɛva kpo jì vǐ sunnu kpo vǐ nyɔnu gègě kpo. Vǐ yetɔn sunnu nukɔntɔn ɔ nɔ nyí Kanyɛɛ bɔ wegɔ ɔ nɔ nyí Abɛli. WA ka tuùn nǔ e jɛ dó Kanyɛɛ kpo Abɛli kpo wu é à?
Genèse 3:16-23; 4:1, 2; Nǔɖexlɛ́mɛ 21:3, 4.