TÀN 7
Nya Akɔnkpantɔ́ Ðé
EE GBƐTƆ́ jɛ kpɔ́ sú jí ɖò ayikúngban jí é ɔ, ye mɛ gègě nɔ dó nǔ baɖabaɖa sìn Kanyɛɛ ɖɔhun. Amɔ̌, nya e è nɔ ylɔ ɖɔ Enɔki é gbɔn vo, bo lɛ́ nyí akɔnkpantɔ́. Mɛ e lɛlɛ̌ dó é lɛ é bǐ wɛ nɔ dó nǔ baɖabaɖa sìn, amɔ̌ Enɔki ka lɛkɔ sín Mawu gudo ǎ.
A ka tuùn nǔ e zɔ́n bɔ mɛ enɛ lɛ nɔ dó nǔ baɖabaɖa sìn sɔmɔ̌ é à? É nyɔ́, a ka flín mɛ e zɔ́n bɔ Adamu kpo Ɛva kpo tlitó, bo ɖu atín sínsɛ́n e Mawu dó sɛ́n tɔn é à? Wɛnsagun nyanya e Biblu ylɔ ɖɔ Sataan é wɛ. É kpó ɖò gǎn dó wɛ bo na dɔn mɛ bǐ dó nǔ nyanya mɛ.
Wɛn e gbɛtɔ́ lɛ ma ba na sè ǎ é wɛ Jehovah Mawu dó Enɔki gbè ɖokpo ɖɔ é ni dó ye. Wɛn ɔ ɖíe: ‘Mawu na sú kún dó nú mɛ nyanya lɛ gbè ɖokpo.’ Xomɛ na ko sìn mɛ lɛ hwenu e ye sè wɛn enɛ é. Ye sixu ko tɛnkpɔn lɔ bo na hu Enɔki. Enɛ wu ɔ, Enɔki ɖó na kpàn akɔ́n cobo sixu dó wɛn enɛ ye.
Hwenu kpɛɖé jɛn Enɔki nɔ mɛ nyanya lɛ tɛntin na. Xwè 365 géé jɛn é bló ɖò gbɛ̀. Etɛwu mǐ ka ɖɔ “xwè 365 géé”? Ðó mɛ e nɔ gbɛ̀ hwenɛnu lɛ é ɖó hlɔnhlɔn hú mɛ e ɖò gbɛ̀ égbé lɛ é, bo nɔ lɛ́ dɔ́ji hú mǐ. Enɔki sín vǐ e nyí Matusala é dɔ́ji nú xwè 969; etɛ!
Ee Enɔki kú gudo é ɔ, gbɛtɔ́ lɛ lɛ́ gbɛ́ hɛn d’eji. Biblu ɖɔ ɖɔ ‘nǔ nyanya kɛɖɛ wɛ ye nɔ lin hwebǐnu,’ bɔ ‘adakaxixo gɔ́ ayikúngban ɔ jí.’
A ka tuùn nǔ e wu nǔ nyanya gɔ́ ayikúngban jí hwenɛnu é à? Ðó Sataan lɛ́ hɛn ayixa yɔyɔ̌ ɖevo, bo nɔ dɔn gbɛtɔ́ lɛ dó nǔ nyanya mɛ. Mǐ na kplɔ́n nǔ d’eji ɖó tàn e bɔ d’ewu é mɛ.
Genèse 5:21-24, 27; 6:5; Eble lɛ 11:5, (Biblu Wiwe lɔ—Gun Alada); Judi 14, 15.