TÀN 27
Axɔsu Nyanya Ðé Kpa Acɛ Ðò Ejipu
MƐ E ɖò ɖiɖe ɔ mɛ lɛ é nɔ hɛn gbɛtɔ́ lɛ gannugánnú bɔ ye nɔ w’azɔ̌. Kpɔ́n nya e ɖò azɔ̌watɔ́ lɛ xò ɖó bǎ wu wɛ é! Jakɔbu sín mɛ lɛ wɛ nyí azɔ̌watɔ́ lɛ. È nɔ ylɔ ye ɖɔ Izlayɛli-ví lɛ. Ejipunu lɛ wɛ ɖò ya enɛ dó nú ye wɛ. Izlayɛli-ví lɛ huzu kannumɔ Ejipunu lɛ tɔn. Nɛ̌ nǔ ka wá nyí mɔ̌ gbɔn?
Jakɔbu sín xwédo nɔ vivo mɛ ɖò Ejipu nú xwè mɔkpan. Jozɛfu e nyí mɛ nukúnɖeji, bo bɔ dó axɔsu Ejipu tɔn Falawɔɔn wu é kpé nukún dó ye wu. Amɔ̌, Jozɛfu wá kú. Falawɔɔn ɖevo wá nyí axɔsu ɖò Ejipu bo gbɛ́ wǎn nú Izlayɛli-ví lɛ.
Falawɔɔn nyanya enɛ sɔ́ Izlayɛli-ví lɛ dó ɖó kannumɔ. É fɔ alannuwatɔ́ ɖé lɛ dó ye nu. Alannuwatɔ́ enɛ lɛ nɔ hɛn ye gannugánnú bɔ ye nɔ gbá xɔ lɛ nú Falawɔɔn. É ɖò mɔ̌ có, Izlayɛli-ví lɛ kpó ɖò kpɔ́ sú wɛ. Ado jɛ Ejipunu lɛ hu jí, ɖó ye mɔ ɖɔ Izlayɛli-ví lɛ na sukpɔ́, bo na ɖó hlɔnhlɔn hú emi.
A ka tuùn nǔ e Falawɔɔn wà é à? É ɖɔ nú nyɔnu e nɔ nɔ aji nú Izlayɛli-ví lɛ é ɖɔ: ‘Mi ɖó na hu sunnu-ví e ye na jì lɛ é bǐ.’ Amɔ̌ nyɔnu enɛ lɛ nyɔ́ xomɛ, bo nɔ hu sunnu-ví lɛ ǎ.
Enɛ wu ɔ, Falawɔɔn ɖegbe nú mɛ tɔn lɛ bǐ bo ɖɔ: ‘Mi hu sunnu-ví Izlayɛli-ví lɛ tɔn bǐ. Nyɔnu-ví lɛ kɛɖɛ jɛn mi na jó dó ɖó gbɛ̀.’ Nǔ baɖabaɖa tɛ nɛ! Mǐ ni kpɔ́n lee è hwlɛn sunnu-ví lɛ ɖokpo gán gbɔn é.
Exode 1:6-22.