TÀN 33
Ye Xò Xù Vɔvɔ Ɔ Zlɛ
KPƆ́N nǔ e ɖò jijɛ wɛ ɖò ɖiɖe ɔ mɛ é! Mɔyizi wɛ dlɛn kpò tɔn dó Xù Vɔvɔ ɔ jí. Izlayɛli-ví lɛ wɛ nyí mɛ e kpo é kpo ɖò agě ɖě ɔ jí é. Amɔ̌, Falawɔɔn kpo ahwangɔnu tɔn lɛ kpo wɛ ɖò tɔ̀ kú wɛ. Mi nú mǐ ni kpɔ́n lee nǔ enɛ jɛ gbɔn é.
Ðò azɔn nyanya 10 gɔ́ e Mawu dó xò Ejipunu lɛ na é gudo ɔ, Falawɔɔn jó Izlayɛli-ví lɛ dó, bo ɖɔ ye ni yì lee mǐ ko kplɔ́n gbɔn é. Izlayɛli-ví sunnu 600 000 mɔ̌ wɛ tɔ́n sín tò ɔ mɛ, gɔ́ nú nyɔnu kpo vǐ gègě kpo. Gbɛtɔ́ wɔbuwɔbu ɖé ɖi nǔ nú Jehovah, bɔ ye lɔ xwedó Izlayɛli-ví lɛ. Ye bɛ̌ lɛngbɔ̌, gbagbǎ kpo nyibu yetɔn lɛ kpo bo yì.
Cobonu Izlayɛli-ví lɛ na yì ɔ, ye byɔ avɔ kpo nǔzìnzán e è sɔ́ siká kpo gankwɛ kpo dó bló na lɛ é kpo Ejipunu lɛ. Ejipunu lɛ ɖi xɛsi ɖesu, ɖó azɔn nyanya gudo tɔn e xò ye é wu. Enɛ wu ɔ, ye na nǔ e Izlayɛli-ví lɛ byɔ é bǐ ye.
Azǎn yɔywɛ ɖé gudo ɔ, Izlayɛli-ví lɛ wá Xù Vɔvɔ ɔ tó, bo yí agbɔ̌n ɖò finɛ. Hwenɛnu ɔ, jǒ e Falawɔɔn kpo mɛ tɔn lɛ kpo jó Izlayɛli-ví lɛ dó, bɔ ye yì é lɛ́ vɛ́ nú ye. Ye ɖɔ: ‘Mǐ jó kannumɔ mǐtɔn lɛ dó, bɔ ye yì!’
Enɛ wu ɔ, Falawɔɔn lin ɖɔ emi na jɛ gbě yetɔn mɛ. É na gbè, bɔ è yawu sɔnǔ nǔ ahwankɛkɛ kpo ahwangɔnu tɔn lɛ kpo. É fɔ ahwankɛkɛ titewungbe 600 kpo ahwankɛkɛ Ejipu tɔn ɖevo lɛ kpo.
Ee Izlayɛli-ví lɛ mɔ Falawɔɔn kpo ahwangɔnu tɔn lɛ kpo ja é ɔ, ado hu ye. Fí hɔn gbɔn ɖebǔ ɖè ǎ. Xù Vɔvɔ ɔ ɖò nukɔn nú ye, bɔ Ejipunu lɛ ɖò gudo yetɔn. Amɔ̌, Jehovah sɔ́ akpɔ́kpɔ́ ɖé dó gbò togun tɔn kpo Ejipunu lɛ kpo na. Enɛ wu ɔ, Ejipunu lɛ sɔ́ kpéwú bo mɔ Izlayɛli-ví lɛ wlí ǎ.
Jehovah ɖɔ nú Mɔyizi ɖɔ é ni dlɛn kpò tɔn dó Xù Vɔvɔ ɔ jí. Ee é wà mɔ̌ é ɔ, Jehovah fɔ́n zǎnzǎnhweji jɔhɔn ɖaxó ɖé, bɔ é má xù ɔ ɖó wè. Sìn ɔ cí dǒ ɖɔhun ɖò ɖisi kpo amyɔ kpo.
Izlayɛli-ví lɛ ɖi zɔnlin gbɔn xù ɔ tɛntin, ɖò ayikúngban xúxú jí. Ganxixo gègě wɛ gbɛtɔ́ livi mɔkpan enɛ lɛ kpo kanlin yetɔn lɛ kpo bló, cobo jɛ agě ɖě ɔ jí wuyɛyɛ̌-afɔyɛ́yɛ́. Jehovah ɖè akpɔ́kpɔ́ ɔ síìn, bɔ Ejipunu lɛ wá kpéwú bo mɔ Izlayɛli-ví lɛ sɛ́dó. Kannumɔ yetɔn lɛ ɖò hinhɔn yì wɛ! Enɛ wu ɔ, ye zun dó Izlayɛli-ví lɛ jí.
Ee ye zun dó Izlayɛli-ví lɛ jí é ɔ, Mawu sún ahwankɛkɛ yetɔn lɛ sín afɔ síìn. Xɛsi ɖaxó jɛ Ejipunu lɛ jí, bɔ ye jɛ xó sú jí, bo ɖɔ: ‘Jehovah ɖò hun xò dó Izlayɛli-ví lɛ tamɛ wɛ. Mi nú mǐ ni hɔn sín fí!’ Amɔ̌, hwenu ko yì tawun.
Hwenɛnu pɛ́ɛ́ wɛ Jehovah ɖɔ nú Mɔyizi ɖɔ é ni dlɛn kpò tɔn dó Xù Vɔvɔ ɔ jí, lee mɔ gbɔn wɛ a ɖè ɖò ɖiɖe ɔ mɛ é. Ee Mɔyizi wà mɔ̌ é ɔ, sìn e cí dǒ ɖɔhun é hɔ cyɔn Ejipunu lɛ kpo ahwankɛkɛ yetɔn kpo jí. Ahwangɔnu ɔ bǐ ko byɔ xù ɔ mɛ xwedó Izlayɛli-ví lɛ nɛ. Mɛ ɖokpo vɔ́vɔ́ gán ɖò ye mɛ ǎ.
Kpɔ́n lee xomɛ na ko hun togun Mawu tɔn sɔ́ hwenu e é hwlɛn ye gán é! Sunnu lɛ jihan dó dokú nú Jehovah ɖɔ: ‘Jehovah ɖu ɖò ahwan ɖaxó ɖé jí. É syɔ sɔ́ lɛ kpo sɔxatɔ́ lɛ kpo dó xù mɛ.’ Mɔyizi sín dada Miliamu zé hǔn tɔn, bɔ nyɔnu lɛ lɔ fɔ hǔn yetɔn lɛ. Ye jɛ han ɖokpo ɔ jì xá sunnu lɛ jí, bo nɔ ɖúwè kpo awǎjijɛ kpo lobo nɔ ɖɔ: ‘Jehovah ɖu ɖò ahwan ɖaxó ɖé jí. É syɔ sɔ́ lɛ kpo sɔxatɔ́ lɛ kpo dó xù mɛ.’
Exode wemata 12 jɛ 15.