TÀN 29
Nǔ E Wu Mɔyizi Hɔn É
KPƆ́N Mɔyizi ɖò hinhɔn sín Ejipu wɛ. A ka mɔ mɛ e ɖò nyinya ɛ wɛ lɛ é à? Aniwu ye ka jló na hu Mɔyizi? Mǐ ni ba dò na.
Mɔyizi sù ɖò axɔsu Ejipu tɔn Falawɔɔn sín xwégbe. É huzu nùnywɛtɔ́ ɖaxó, bo nyí mɛ nukúnɖeji ɖé. É tuùn ɖɔ kannumɔ Izlayɛlinu lɛ sín vǐ wɛ nú emi, emi kún nyí Ejipunu ó.
Mɔyizi jló na yì kpɔ́n lee mɛ tɔn lɛ ɖè gbɔn é gbè ɖokpo. Xwè 40 ɖó wɛ é ɖè hwenɛnu. Lee Ejipunu lɛ nɔ hɛn ye gbɔn é blawu ɖesu. É mɔ Ejipunu ɖé ɖò Izlayɛli-ví ɖokpo xó wɛ. Ee Mɔyizi kpɔ́n dě bo kpɔ́n dě, bo ma mɔ mɛɖé ǎ é ɔ, é xò Ejipunu ɔ hu, lobo sɔ́ ɛ ɖi.
Ayihɔngbe tɔn ɔ, Mɔyizi lɛ́ wá kpɔ́n mɛ tɔn lɛ. É lin ɖɔ emi na d’alɔ ye bɔ ye na gosin mɛkannu. Amɔ̌, é mɔ Izlayɛli-ví wè ɖò hun xò wɛ. Mɔyizi ka ɖɔ nú mɛ e kú hwɛ é ɖɔ: ‘Nɛ̌ ka gbɔn bɔ a ɖò nɔví towe xó wɛ?’
Nya ɔ ka ɖɔ n’i ɖɔ: ‘Mɛ̌ ka sɔ́ we gǎn, abǐ hwɛɖɔtɔ́ ɖò mǐ nu? A jló na hu mì lee a hu Ejipunu ɔ gbɔn é wɛ à?’
Xɛsi jɛ Mɔyizi jí. É mɔ ɖɔ nǔ e emi wà xá Ejipunu ɔ é ko gbakpé. Falawɔɔn lɔmɔ̌ sè xó ɔ, bo sɛ́ mɛ dó ɖɔ è ni hu Mɔyizi. Nǔ e wu Mɔyizi ɖó na hɔn sín Ejipu é nɛ.
Ee Mɔyizi hɔn sín Ejipu é ɔ, é yì tò línlín Madian mɛ. É nɔ kpɔ́ kpo xwédo Jetlo tɔn kpo ɖò Madian, lobo da vǐ nyɔnu tɔn Zipola. É huzu lɛngbɔnyitɔ́, bo nɔ nyì lɛngbɔ̌ Jetlo tɔn lɛ. É nɔ finɛ nú xwè 40. Mɔyizi ɖò lɛngbɔ̌ Jetlo tɔn lɛ nyì wɛ gbè ɖokpo, bo mɔ nùjiwǔ ɖé. Xwè 80 ɖó wɛ é ɖè hwenɛnu. Hun wexwɛ e bɔ d’ewu é, bonu mǐ ni kpɔ́n nùjiwǔ e wɛ é.
Exode 2:11-25; Mɛsɛ́dó 7:22-29.