TÀN 30
Zungwede E Ðò Myɔ Jì Wɛ É
MƆYIZI kplá lɛngbɔ̌ tɔn lɛ kaka wá só Olɛbu kɔn, bonu ye na mɔ gbehan bo ɖu. É mɔ zungwede ɖé ɖò myɔ jì wɛ ɖò finɛ, bɔ ama tɔn lɛ ka fyɔ ǎ.
Mɔyizi ɖɔ nú éɖee ɖɔ: ‘Nùbudo tɛ ɖíe! Un na sɛya bo kpɔ́n tlítlí.’ Ee é sɛya é ɔ, gbè ɖé gosin zungwede ɔ mɛ bo ɖɔ n’i ɖɔ: ‘Ma sɔ́ sɛya hú mɔ̌ ó. Ðè afɔkpa towe lɛ, ɖó ayikúngban mímɛ́ jí wɛ a ɖò te ɖè.’ Mawu wɛ ɖò xó ɖɔ nú Mɔyizi wɛ gbɔn wɛnsagun ɖé jí. Enɛ wu ɔ, Mɔyizi xwè agbɔnnúsú dò.
Mawu lɛ́ ɖɔ n’i ɖɔ: ‘Un mɔ ya e jì wɛ togun ce ɖè ɖò Ejipu é. Enɛ wu ɔ, Un wá hwinhwlɛn ɛ gán gbé. Hwi wɛ Un na sɛ́dó bɔ a na kplá ye sín Ejipu.’ Jehovah jló na kplá togun tɔn yì ayikúngban ɖagbe ɖagbe Kanaa tɔn jí.
Loɔ Mɔyizi ɖɔ: ‘Un nyí nùɖé ǎ. Nɛ̌ un ka sixu wà nǔ mɔhun gbɔn? Amɔ̌, enyi un yì bonu Izlayɛli-ví lɛ kanbyɔ mì ɖɔ, “Mɛ̌ ka sɛ́ we dó?” ɔ, etɛ un ka na ɖɔ?’
Mawu ka yí gbè n’i ɖɔ: ‘Nǔ e a na ɖɔ é ɖíe: “JEHOVAH, Mawu Ablaxamu tɔn, Mawu Izaki tɔn kpo Mawu Jakɔbu tɔn kpo wɛ sɛ́ mì dó gɔ̌n mitɔn.”’ Jehovah lɛ́ ɖɔ: ‘Enɛ wɛ nyí nyikɔ ce kaka sɔyi.’
Mɔyizi lɛ́ yí xó bo ɖɔ: ‘Amɔ̌, enyi un ɖɔ Hwi wɛ sɛ́ mì dó, bonu ye ma ka ɖi ǎ ɔ ló?’
Mawu ka kanbyɔ ɛ ɖɔ: ‘Etɛ ka ɖò alɔ towe mɛ nɛ?’
Mɔyizi ɖɔ: ‘Kpò.’
Mawu ka ɖɔ n’i ɖɔ: ‘Sɔ́ nyì kɔ mɛ.’ Ee Mɔyizi sɔ́ kpò ɔ nyì kɔ mɛ é ɔ, kpò ɔ huzu dan. Jehovah lɛ́ ɖè nùjiwǔ ɖevo xlɛ́ Mɔyizi. É ɖɔ n’i ɖɔ: ‘Sɔ́ alɔ dó awu towe mɛ.’ Ee Mɔyizi sɔ́ alɔ dó awu ɔ mɛ bo ɖé tɔ́n é ɔ, alɔ tɔn cí mɛ e bɛ́ wutuzɔn-baɖabaɖa e nɔ nyí gudu é ɖɔhun. É lɛ́ sɔ́ d’emɛ bo ɖé tɔ́n, bɔ alɔ ɔ jɛ tɛn tɔn mɛ. Jehovah lɛ́ na acɛ Mɔyizi bonu é na dó bló nùjiwǔ atɔngɔ ɔ. Jehovah wá ɖɔ n’i ɖɔ: ‘Enyi a bló nùjiwǔ enɛ lɛ ɔ, Izlayɛli-ví lɛ na ɖi ɖɔ Nyɛ wɛ sɛ́ we dó.’
Enɛ gudo ɔ, Mɔyizi yì xwégbe bo ɖɔ nú Jetlo ɖɔ: ‘Kɛnklɛn ma lɛkɔ yì kpɔ́n lee hɛnnumɔ ce lɛ ɖè gbɔn é ɖò Ejipu.’ Jetlo ka dó yì bo wá nú Mɔyizi, bɔ é wlí ali bo ɖido Ejipu.
Exode 3:1-22; 4:1-20.