TÀN 35
Jehovah Dó Sɛ́n Tɔn Lɛ
IZLAYƐLI-VÍ lɛ tɔ́n sín Ejipu, bɔ é ɖó sun wè mɔ̌ é ɔ, ye wá Sinayi Só kɔn. È nɔ lɛ́ ylɔ só enɛ ɖɔ Olɛbu. Finɛ wɛ Jehovah ɖɔ xó sín zungwede e ɖò myɔ jì wɛ é mɛ nú Mɔyizi ɖè. Togun ɔ yí agbɔ̌n ɖò finɛ nú hwenu ɖé.
Mɔyizi xá só ɔ jí, bɔ togun ɔ nɔte kpɔ́n ɛ ɖò só ɔ kpá. Jehovah ɖɔ nú Mɔyizi ɖò só ɔ jí ɖɔ Emi jló ɖɔ Izlayɛli-ví lɛ ni setónú nú Emi. Enɛ ɔ, ye na huzu togun bunɔ Emitɔn. Ee Mɔyizi jɛte é ɔ, é ɖɔ xó e Jehovah ɖɔ é nú Izlayɛli-ví lɛ. Ye mɛ bǐ ɖɔ emi na setónú nú Jehovah, ɖó ye jló na nyí togun tɔn.
Enɛ gudo ɔ, Jehovah bló nùjiwǔ ɖé. É bló bɔ só ɔ ta jɛ azɔ tún jí, lobɔ xɛbyoso nɔ nyáwǎn. É lɛ́ ɖɔ nú Izlayɛli-ví lɛ ɖɔ: ‘Nyɛ Jehovah Mawu mitɔn e kplá mi sín Ejipu é wɛ.’ É wá ɖegbe nú ye ɖɔ: ‘Mi ɖó na sɛ̀n yɛhwe ɖevo zɛ nyɛ wu ǎ.’
Mawu dó sɛ́n tɛnnɛ ɖevo nú Izlayɛli-ví lɛ. Xɛsi jɛ togun ɔ jí, bɔ ye ɖɔ nú Mɔyizi ɖɔ: ‘Hwɛ ni ɖɔ xó nú mǐ, ɖó mǐ ɖò xɛsi ɖi wɛ ɖɔ enyi Mawu ɖɔ xó nú mǐ ɔ, mǐ taa kú.’
É wá ya é ɔ, Jehovah ɖɔ nú Mɔyizi ɖɔ: ‘Wǎ gɔ̌n ce ɖò só ɔ jí. Un na fɔ awinnya-tɛ wè e jí Un wlan sɛ́n ce lɛ dó é nú we. Sɛ́n enɛ lɛ wɛ Un jló ɖɔ togun ɔ ni nyì.’ Enɛ wu ɔ, Mɔyizi lɛ́ xá só ɔ jí. É nɔ finɛ nú kéze 40 zǎn 40.
Mawu ɖó sɛ́n gègě ɖevo lɛ, bo dó nú togun tɔn. Mɔyizi wlan sɛ́n enɛ lɛ. Mawu lɛ́ fɔ awinnya-tɛ wè lɛ nú Mɔyizi. Mawu ɖesu wɛ wlan sɛ́n 10 e é ko dó nú togun ɔ ɖ’ayǐ lɛ é dó awinnya-tɛ enɛ lɛ jí. È nɔ ylɔ sɛ́n enɛ lɛ ɖɔ Sɛ́n Wǒ lɛ.
Sɛ́n titewungbe wɛ nú Sɛ́n Wǒ lɛ. Mɔ̌ jɛn sɛ́n gègě ɖevo e Mawu dó nú Izlayɛli-ví lɛ é lɔ nyí nùjɔnǔ é nɛ. Sɛ́n enɛ lɛ ɖokpo ɖɔ: ‘A ɖó na yí wǎn nú Jehovah Mawu towe kpodo ayi towe bǐ kpo, kpodo linlin towe bǐ kpo, kpodo lindɔ̌n towe bǐ kpo, kpodo hlɔnhlɔn towe bǐ kpo.’ Ðevo lɛ́ ɖɔ: ‘A ɖó na yí wǎn nú nɔzo towe hwiɖesu ɖɔhun.’ Jezu Klisu, Mawu sín Vǐ ɔ ɖɔ jí sɛ́n taji wè e Jehovah dó nú Izlayɛli é nɛ. Mǐ na wá kplɔ́n nǔ gègě dó Jezu Klisu kpo nùkplɔnmɛ tɔn lɛ kpo wu ɖò nukɔn mɛ.
Exode 19:1-25; 20:1-21; 24:12-18; 31:18; Deutéronome 6:4-6; Lévitique 19:18; Matie 22:36-40.