TÀN 36
Nyibuví E È Zé Siká Dó Bló É
YĚGÈ! Etɛ wà wɛ togun ɔ ka ɖè nɛ? Ye ɖò nyibuví ɖé sɛ́n wɛ! Aniwu ye ka ɖò mɔ̌ wà wɛ?
Ee Mɔyizi ɖò línlín wɛ ɖò só ɔ jí é ɔ, togun ɔ ɖɔ: ‘Mǐ tuùn nǔ e jɛ dó Mɔyizi wu é ǎ. Enɛ wu ɔ, mi nú mǐ ni bló yɛhwe ɖé, bonu é na kplá mǐ sín ayikúngban elɔ jí.’
Mɔyizi sín fofó Alɔɔn ɖɔ: ‘É nyɔ́. Mi bo ɖè siká tógbé e ɖò asì mitɔn kpo vǐ nyɔnu mitɔn lɛ kpo tó mɛ lɛ é wá.’ Ee ye wà mɔ̌ é ɔ, Alɔɔn sínsín tógbé lɛ, bo sɔ́ dó bló nyibuví siká tɔn ɖé na. Togun ɔ ɖɔ: ‘Mawu mǐtɔn e kplá mǐ sín Ejipu é ɖíe!’ Enɛ gudo ɔ, Izlayɛli-ví lɛ bló nǔwiwa gɛnnyigɛnnyi ɖé, bo dó sɛ̀n nyibuví siká tɔn ɔ.
Ee Jehovah mɔ nǔ e wà wɛ ye ɖè é ɔ, xomɛ sìn i ɖesu. Enɛ wu ɔ, é ɖɔ nú Mɔyizi ɖɔ: ‘Yawu bo jɛte. Togun ɔ ɖò nǔ baɖabaɖa ɖé dosin wɛ. Ye ko wɔn sɛ́n ce lɛ, bo ɖò kɔ́ ɖé nú nyibuví siká tɔn ɖé wɛ.’
Mɔyizi yawu jɛte sín só ɔ jí. Ee é sɛkpɔ fí e Izlayɛli-ví lɛ ɖè é ɔ, é mɔ ye ɖò han jì wɛ, lobo ɖò wè ɖú lɛlɛ̌ dó nyibuví siká tɔn ɔ wɛ. Xomɛ sìn Mɔyizi kaka bɔ é nyì awinnya-tɛ e jí sɛ́n lɛ ɖè é dó gbě, bɔ ye gbà hánnyá. É wá zé nyibuví ɔ bo sínsín i bǐ. Enɛ gudo ɔ, é li i bǐ kpɔ́ɖɔ́ kpɔ́ɖɔ́.
Nǔ baɖabaɖa ɖesu wɛ togun ɔ dosin. Enɛ wu ɔ, Mɔyizi ɖɔ nú sunnu ɖé lɛ ɖɔ ye ni fɔ hwǐ yetɔn lɛ. Mɔyizi ɖɔ: ‘Mɛ e sɛ̀n nyibuví siká tɔn ɔ lɛ é ɖó na kú.’ Enɛ wu ɔ, sunnu e fɔ hwǐ lɛ é hu gbɛtɔ́ 3 000. Tàn elɔ kplɔ́n mǐ ɖɔ mǐ ɖó na sɛ̀n Jehovah kɛɖɛ, bo na cɔ́ mǐɖee dó yɛhwe lɛ sínsɛ́n wu. Kabǐ mɔ̌ wɛ à cé?
Exode 32:1-35.