TÀN 41
Dan E È Sɔ́ Ganvɔ Dó Bló É
DAN jɔ dan jɛn ka nyí dan e xasa dó kpò kɔ ɖò ɖiɖe ɔ mɛ é à? Eǒ. Dan e è sɔ́ ganvɔ dó bló é wɛ. Jehovah wɛ ɖɔ nú Mɔyizi ɖɔ é ni sɔ́ dan enɛ ɖó kpò ɔ kɔ, bonu mɛ lɛ ni kpɔ́n bo nɔ gbɛ̀. Amɔ̌, dan jɔ dan wɛ nyí dan e ɖò kɔ mɛ lɛ é. Ye ɖu mɛ lɛ, bo dó azɔn ye. A ka tuùn nǔ e wu wɛ é à?
Izlayɛli-ví lɛ ɖɔ xó agɔ dó Mawu kpo Mɔyizi kpo wu wɛ zɔ́n. Ye hlun nǔ ɖɔ, bo ɖɔ: ‘Etɛwu mi ka kplá mǐ sín Ejipu, bɔ mǐ na kú dó gbetótló elɔ mɛ? Nùɖuɖu kpo sìn kpo ɖebǔ ɖò fí ǎ. Mǐ na ɖu mana sɔmɔ̌ ǎ.’
Amɔ̌, mana ɔ nùɖuɖu ɖagbe wɛ. Nùjiwǔ wɛ Jehovah bló bo na mana ɔ ye. É lɛ́ bló nùjiwǔ bo na sìn ye. Loɔ, togun ɔ dó alɔgudokpɛ nú Mawu nú lee é kpé nukún dó ye wu gbɔn é. Enɛ wu ɔ, Jehovah sɛ́ dan aɖivɛnɔ enɛ lɛ dó bo dó dɔn tó nú Izlayɛli-ví lɛ. Dan lɛ ɖu ye, bɔ ye mɛ gègě kú.
Gudo mɛ ɔ, togun ɔ wá mɔ Mɔyizi bo ɖɔ: ‘Mǐ hu hwɛ, ɖó mǐ ɖɔ xó agɔ dó Jehovah kpo hwi kpo wu. Xoɖɛ sɛ́dó Jehovah bonu é ni ɖè dan elɔ lɛ síìn.’
Mɔyizi xoɖɛ dó togun ɔ tamɛ nugbǒ. Jehovah ɖɔ n’i ɖɔ é ni bló dan ganvɔ tɔn enɛ, bo sɔ́ kplá kpò kɔ, bonu mɛɖebǔ e dan ɖu é ni kpɔ́n. Mɔyizi bló nǔ e Mawu ɖɔ é pɛ́ɛ́. Mɛ e dan ɖu lɛ é nɔ kpɔ́n dan ganvɔ tɔn ɔ, bo nɔ gán.
Etɛ tàn elɔ ka kplɔ́n mǐ? Mǐ bǐ wɛ cí Izlayɛli-ví enɛ lɛ e dan ɖu é ɖɔhun. Égbé ɔ, mǐ nɔ kpò, nɔ j’azɔn lobo nɔ kú. Nǔ ɖò mɔ̌, ɖó sunnu nukɔntɔn Adamu kpo nyɔnu nukɔntɔn Ɛva kpo tlitó nú Jehovah, bɔ mǐdɛɛ lɛ ka nyí vǐ yetɔn. Amɔ̌, Jehovah hun ali nú mǐ, bɔ mǐ hɛn ɔ mǐ na nɔ gbɛ̀ kaka sɔyi.
Jehovah sɛ́ Vǐ tɔn Jezu Klisu dó ayikúngban jí. Mɛ gègě lin ɖɔ mɛ nyanya wɛ n’i, lobo xwè é dó atín wu. Amɔ̌, Jehovah sɛ́ Jezu dó bonu é na hwlɛn mǐ wɛ. Enyi mǐ kpɔ́n Jezu, bo xwedó afɔdo mɛ tɔn ɔ, mǐ na mɔ gbɛ̀ mavɔmavɔ. Mǐ na wá kplɔ́n nǔ gègě dó wutu tɔn ɖò nukɔn mɛ.
Nombres 21:4-9; Jaan 3:14, 15.