TÀN 45
Ye Xò Judɛɛn Tɔ̀ Zlɛ
KPƆ́N, Izlayɛli-ví lɛ ɖò Judɛɛn Tɔ̀ xò zlɛ wɛ! Fitɛ sìn ɔ ka gbɔn? Cɛju yɔywɛ ɖé có ye na xò tɔ̀ ɔ zlɛ ɔ, tɔ̀ ɔ ɖò adǎn jí, ɖó hwenu e jǐ nɔ ja sukpɔ́ ɖò xwè ɔ mɛ é wɛ. Amɔ̌ dìn ɔ, sìn ɔ bǐ ko mɛ̀! Bɔ Izlayɛli-ví lɛ ɖò tɔ̀ ɔ xó zlɛ wɛ gbɔn ayikúngban xúxú jí, lee ye xò Xù Vɔvɔ ɔ zlɛ gbɔn é! Nɛ̌ sìn ɔ ka mɛ̀ gbɔn? Mi nú mǐ ni kpɔ́n.
Ee hwenu sù bɔ Izlayɛli-ví lɛ na xò Judɛɛn Tɔ̀ ɔ zlɛ é ɔ, Jehovah ɖɔ nú Jozuwe ɖɔ é ni ɖɔ nú togun ɔ ɖɔ: ‘Vɔsanúxwlémawutɔ́ lɛ na zé akɔjɛgba ɔ, bo jɛ nukɔn. Enyi ye dó afɔ Judɛɛn Tɔ̀ ɔ mɛ ɔ, é na gbò.’
Vɔsanúxwlémawutɔ́ lɛ zé akɔjɛgba ɔ nugbǒ, bo jɛ nukɔn nú togun ɔ. Ee ye wá Judɛɛn Tɔ̀ ɔ tó é ɔ, é ɖò adǎn jí ɖesu, bo lɛ́ gɔ́ngɔ́n. Ye kpàn akɔ́n, bo byɔ mɛ. Amɔ̌, ye na dó afɔ tɔ̀ ɔ mɛ kpo na gbɔ kpo lě é ɔ, é jɛ gbigbo jí. Nùjiwǔ nɛ! Jehovah gbò tɔ̀ ɔ ɖò tɔ̀ ɔ sín taligbé. Enɛ wu ɔ, sìn ɔ bǐ mɛ̀ tlolo!
Vɔsanúxwlémawutɔ́ e hɛn akɔjɛgba ɔ lɛ é nɔte ɖò tɔ̀ e ko mɛ̀ e tɛntin. A ka mɔ ye ɖò ɖiɖe ɔ mɛ à? Ee ye ɖò te ɖò finɛ é ɔ, Izlayɛli-ví lɛ bǐ xò Judɛɛn Tɔ̀ ɔ zlɛ gbɔn ayikúngban xúxú jí!
Ee ye bǐ xò tɔ̀ ɔ zlɛ gudo é ɔ, Jehovah ɖɔ nú Jozuwe ɖɔ é ni ɖɔ nú sunnu glegbenu 12 ɖɔ: ‘Mi yì tɔ̀ dodo ɔ mɛ fí e vɔsanúxwlémawutɔ́ e hɛn akɔjɛgba ɔ lɛ é nɔte ɖè é. Mi fɔ awinnya 12, bo lí ye ɖǒ fí e mi na dɔ zǎnmɛ dìn é. Enɛ ɔ, enyi vǐ mitɔn lɛ wá kàn nǔ e wá nú awinnya enɛ lɛ nyí é byɔ mi ɖò sɔ ɔ, mi na ɖɔ nú ye ɖɔ hwenu e akɔjɛgba Jehovah tɔn xò Judɛɛn Tɔ̀ zlɛ é ɔ, sìn ɔ mɛ̀. Awinnya enɛ lɛ na flín mi nùjiwǔ enɛ!’ Jozuwe lɔmɔ̌ fɔ awinnya 12, bo lí ye ɖǒ fí e vɔsanúxwlémawutɔ́ lɛ nɔte ɖè ɖò tɔ̀ dodo ɔ mɛ é.
Enɛ gudo ɔ, Jozuwe ɖɔ nú vɔsanúxwlémawutɔ́ e hɛn akɔjɛgba ɔ lɛ é ɖɔ: ‘Mi tɔ́n sín Judɛɛn Tɔ̀ ɔ mɛ.’ Ee ye tɔ́n sín mɛ tlolo é ɔ, tɔ̀ ɔ lɛ́ jɛ adǎn wà jí.
Josué 3:1-17; 4:1-18.