TÀN 43
Jozuwe Jɛ Mɔyizi Tɛnmɛ
MƆYIZI jló na xwedó Izlayɛli-ví lɛ yì Kanaa. Enɛ wu ɔ, é ɖɔ: ‘Jehovah, kɛnklɛn bonu ma d’asa Judɛɛn Tɔ̀ ɔ, ba mɔ ayikúngban ɖagbe ɔ.’ Amɔ̌ Jehovah ɖɔ: ‘Xwíwún! Un ma sɔ́ sè ɖě ó!’ A ka tuùn nǔ e wu Jehovah ɖɔ mɔ̌ é à?
Ðó nǔ e jɛ hwenu e Mɔyizi dó kpò só é wu wɛ. A ka flín ɖɔ Mɔyizi kpo Alɔɔn kpo kún sɔ́ Jehovah sù hwenɛnu ó à? Ye ɖɔ nú togun ɔ ɖɔ Jehovah wɛ na sìn ye sín só ɔ mɛ ǎ. Enɛ wu wɛ Jehovah ɖɔ emi kún na jó ye dó bonu ye na yì Kanaa ó.
Enɛ wu ɔ, Alɔɔn kú bɔ é bló sun yɔywɛ ɖé é ɔ, Jehovah ɖɔ nú Mɔyizi ɖɔ: ‘Sɔ́ Jozuwe ɖó vɔsanúxwlémawutɔ́ Eleazaa kpo togun ɔ kpo nukɔn. Bo ɖɔ nú ye bǐ ɖɔ Jozuwe wɛ na kplá ye yì Kanaa.’ Mɔyizi bló nú e Jehovah ɖɔ n’i é pɛ́ɛ́, lee mɔ gbɔn a ɖè ɖò ɖiɖe ɔ mɛ é.
Enɛ gudo ɔ, Jehovah ɖɔ nú Jozuwe ɖɔ: ‘Kpàn akɔ́n, ado ni ma hu we ó. A na kplá Izlayɛli-ví lɛ yì Kanaa. Ayikúngban enɛ sín akpá wɛ Un dó nú ye. Un ka na ɖò kpɔ́ xá we.’
Enɛ gudo ɔ, Jehovah ɖɔ nú Mɔyizi ɖɔ é ni xá Nebo Só e ɖò Mɔwabu é jí. Mɔyizi xá só ɔ jí, bo mɔ Kanaa sɛ́dó gbɔn Judɛɛn Tɔ̀ ɔ ta nu. Jehovah ɖɔ n’i ɖɔ: ‘Ayikúngban e sín akpá Un dó nú Ablaxamu, Izaki kpo Jakɔbu kpo sín vǐ lɛ é nɛ. Un xlɛ́ we kpowun wɛ, a ka na yì jí ǎ.’
Nebo Só enɛ jí wɛ Mɔyizi kú ɖè. Xwè 120 wɛ é ɖó bo kú. Agbɔ̌n ka kpó ɖò wutu tɔn, bɔ nukún tɔn lɛ lɔ kpò ɖò nǔ mɔ wɛ ganji. Wǔ kú togun ɔ ɖesu, bɔ ye ya Mɔyizi ví. Amɔ̌, xomɛ hun ye ɖɔ Jozuwe ɖò nu yetɔn.
Nombres 27:12-23; Deutéronome 3:23-29; 31:1-8, 14-23; 32:45-52; 34:1-12.