TÀN 48
Gabawɔɔnnu lɛ Wà Nǔ kpo Nùnywɛ Kpo
TOXO ɖé lɛ ɖò Kanaa gbeji ko sɔnǔ bo na tɔ́n ahwan Izlayɛli. Ye lin ɖɔ emi na ɖu ɖ’eji. Amɔ̌, mɛ e nɔ nɔ Gabawɔɔn lɛ é lin mɔ̌ ǎ. Toxo yedɛɛ lɛ tɔn lín dó Izlayɛli ǎ. Ye ɖi nǔ ɖɔ Mawu nɔ d’alɔ Izlayɛli-ví lɛ. Enɛ wu ɔ, ye jló na tɔ́n ahwan Mawu ǎ. A ka tuùn nǔ e Gabawɔɔnnu lɛ bló é à?
Ye ɖɔ emi na bló nǔ mɛ e gosin fí línlín é ɖɔhun. Enɛ wu ɔ, sunnu ɖé lɛ dó awu e ko vún lɛ é kpo afɔkpa e ko li lɛ é kpo. Ye fɔ wɔxúxú e dó xó lɛ é dó glo vúnvún lɛ mɛ, bo dó agban tɔn dó sɔkɛtɛkɛtɛ yetɔn lɛ jí. Enɛ gudo ɔ, ye wá Jozuwe gɔ́n, bo ɖɔ n’i ɖɔ: ‘Fí línlín wɛ mǐ gosin, ɖó mǐ sè lee Jehovah Mawu mitɔn ɖó hlɔnhlɔn sɔ́ é. Mǐ sè nǔ e é wà nú mi ɖò Ejipu lɛ é bǐ. Enɛ wu wɛ gǎn mǐtɔn lɛ ɖɔ mǐ ni fɔ nùɖuɖu e mǐ na dó zɔn ali na lɛ é, bo wá ɖɔ nú we ɖɔ: “Kannumɔ mitɔn wɛ nú mǐ. Mi d’akpá nú mǐ ɖɔ emi kún na tɔ́n ahwan mǐ ó.” Mi kpɔ́n lee awu mǐtɔn lɛ vún gbɔn é, wɔxúxú mǐtɔn lɛ lɔ bǐ ko dó xó, ɖó ali mǐtɔn lín.’
Jozuwe kpo mɛ ɖevo e ɖò togun ɔ nu lɛ é kpo ɖi xó Gabawɔɔnnu lɛ tɔn. Enɛ wu ɔ, ye d’akpá ɖɔ emi kún na tɔ́n ahwan ye ó. Amɔ̌, azǎn atɔn gudo ɔ, ye sè ɖɔ Gabawɔɔnnu lɛ kún lín dó emi ó.
Jozuwe wá kanbyɔ ye ɖɔ: ‘Aniwu mi ka ɖɔ nú mǐ ɖɔ fí línlín wɛ emi gosin?’
Gabawɔɔnnu lɛ ka ɖɔ: ‘Mǐ ɖɔ mɔ̌, ɖó mǐ sè ɖɔ Jehovah Mawu mitɔn d’akpá ɖɔ emi na na ayikúngban Kanaa tɔn ɔ bǐ mi. Enɛ wu wɛ mǐ ɖi xɛsi ɖɔ mi taa hu mǐ.’ Amɔ̌, Izlayɛli-ví lɛ ɖè akpá e ye dó é, bo hu Gabawɔɔnnu lɛ ǎ. Ye gbɔ bo sɔ́ Gabawɔɔnnu lɛ dó ɖó kannumɔ na.
Axɔsu Jeluzalɛmu tɔn sìn xomɛ, ɖó Gabawɔɔnnu lɛ yì jɛ akɔ xá Izlayɛli. Enɛ wu ɔ, é ɖɔ nú axɔsu ɛnɛ ɖevo ɖɔ: ‘Mi wá d’alɔ mì nú ma tɔ́n ahwan Gabawɔɔn.’ Nǔ e axɔsu atɔ́ɔ́n lɛ bló é nɛ. Gabawɔɔnnu lɛ nɛ axɔsu atɔ́ɔ́n lɛ tɔ́n ahwan nɛ. Ye ka ɖu lè akɔ e ye jɛ xá Izlayɛli é tɔn à? Mǐ ni bo kpɔ́n.
Josué 9:1-27; 10:1-5.