TÀN 49
Hwe Nɔte Xwii
KPƆ́N Jozuwe. É ɖò ɖiɖɔ wɛ ɖɔ: ‘Hwe, nɔte xwii!’ Bɔ hwe ɔ nɔte nugbǒ. É nɔte hwe nyì hwǎn ɖɔhun kaka nú kéze blebu ɖokpo. Jehovah wɛ bló nùjiwǔ enɛ! Amɔ̌, mǐ ni kpɔ́n nǔ e wu Jozuwe ba ɖɔ hwe ɔ ni nɔte é.
Ee axɔsu nyanya Kanaa tɔn atɔ́ɔ́n tɔ́n ahwan Gabawɔɔnnu lɛ é ɔ, Gabawɔɔnnu lɛ sɛ́ mɛ dó Jozuwe ɖɔ é ni wá d’alɔ emi. Mɛ e ye sɛ́dó é ɖɔ: ‘Yawu wá hwlɛn mǐ! Axɔsu e ɖò sókan mɛ lɛ é tɔ́n ahwan kannumɔ towe lɛ.’
Tlolo ɔ, Jozuwe kpo ahwanfuntɔ́ tɔn lɛ kpo ɖido. Ye ɖi zɔnlin ɖò zǎn ɔ bǐ mɛ. Ee ye wá Gabawɔɔn é ɔ, ado hu ahwanfuntɔ́ axɔsu atɔ́ɔ́n lɛ tɔn, bɔ ye jɛ hinhɔn jí. Jehovah ja kɛ́njí ɖaxó ɖé, bɔ mɛ e kɛ́njí ɔ hu lɛ é hugǎn mɛ e ahwanfuntɔ́ Jozuwe tɔn lɛ hu é.
Jozuwe mɔ ɖɔ hwe ko ɖò xɔ na yì wɛ, bɔ ablu na dó. Ablu ka dó ɔ, ahwanfuntɔ́ axɔsu nyanya atɔ́ɔ́n lɛ tɔn gègě na hɔn yì. Nǔ enɛ wu wɛ Jozuwe xoɖɛ sɛ́dó Jehovah, bo ɖɔ: ‘Hwe, nɔte xwii!’ Ee hwe ɔ nɔte xwii é ɔ, Izlayɛli-ví lɛ kpé nǔ wu bo ɖu ɖò ahwan ɔ jí yí fó.
Axɔsu nyanya gègě wɛ ɖò Kanaa, bo gbɛ́ wǎn nú togun Mawu tɔn. Jozuwe kpo ahwangɔnu tɔn lɛ kpo bló xwè ayizɛ́n mɔ̌ cobo ɖu ɖò axɔsu 31 e ɖò ayikúngban Kanaa tɔn jí lɛ é jí. Ee ye wà enɛ fó é ɔ, Jozuwe má ayikúngban Kanaa tɔn nú akɔta e kpò, bo ma ko mɔ ǎ lɛ é.
Xwè mɔkpan gudo ɔ, Jozuwe kú hwenu e é ɖó xwè 110 é. Hwenu e xɔ́ntɔn tɔn lɛ kpo é kpo ɖò gbɛ̀ é ɔ, togun ɔ nɔ setónú nú Jehovah. Amɔ̌, ee mɛ ɖagbe enɛ lɛ kú gudo é ɔ, togun ɔ jɛ nǔ baɖabaɖa dosin jí, lobo dɔn nǔgbomɛ gègě dó kɔ. Hwenɛnu wɛ ye ɖó hudo alɔdo Mawu tɔn tawun.
Josué 10:6-15; 12:7-24; 14:1-5; Juges 2:8-13.