TÀN 58
Davidi kpo Goliati Kpo
FILISITIINU lɛ ko lɛ́ tɔ́n ahwan Izlayɛli-ví lɛ. Davidi sín fofó atɔn nukɔntɔn lɛ ɖò ahwangɔnu Sawulu tɔn mɛ hwenɛnu. Enɛ wu ɔ, Jɛse ɖɔ nú Davidi gbè ɖokpo ɖɔ: ‘Sɔ́ nùɖuɖu yí jó nú fofó towe lɛ, bo kpɔ́n lee ye ɖè gbɔn é.’
Ee Davidi wá ahwansla ɔ mɛ é ɔ, é kanwezun, bo yì kpɔ́n fofó tɔn lɛ ɖò fí e ye nɔ fun ahwan ɔ ɖè é. Nya jiganjigan Filisitiinu e nɔ nyí Goliati é wá Izlayɛli-ví lɛ cá ko gbé. É wà mɔ̌ zǎnzǎn gbada nú azǎn 40. É súxó, bo ɖɔ: ‘Mi ɖè sunnu ɖokpo ɖò mi mɛ, bonu é na kpé hun xá mì. Enyi é ɖu ɖò jǐ ce, bo hu mì ɔ, mǐ na nyí kannumɔ mitɔn. Amɔ̌, enyi un ɖu ɖò jǐ tɔn, bo hu i ɔ, mi na nyí kannumɔ nú mǐdɛɛ lɛ. Mi gla hǔn, mi ɖè mɛ ɖokpo sɛ́dó mì.’
Davidi kanbyɔ ahwanfuntɔ́ ɖé lɛ ɖɔ: ‘Etɛ mɛ e na hu Filisitiinu enɛ, lobo na ɖè winnya nú Izlayɛli é ka na yí?’
Ahwanfuntɔ́ lɛ ɖokpo ɖɔ n’i ɖɔ: ‘Sawulu na na dɔkun gègě mɛ ɔ, bo na lɛ́ sɔ́ vǐ nyɔnu tɔn da n’i.’
Amɔ̌, Izlayɛli-ví lɛ bǐ wɛ ɖò xɛsi ɖi nú Goliati wɛ, ɖó é hwǎn ɖesu. É ɖi ga yì mɛtlu 3 mɔ̌, lobo lɛ́ ɖó ahwanfuntɔ́ ɖevo, bɔ é nɔ hɛn gǎglónú tɔn n’i.
Ahwanfuntɔ́ ɖé lɛ yí ɖɔ nú Axɔsu Sawulu ɖɔ Davidi jló na kpé hun xá Goliati. Amɔ̌, Sawulu ɖɔ nú Davidi ɖɔ: ‘A sixu kpé hun xá Filisitiinu enɛ ǎ. Yɔkpɔvu wɛ nú we. Éyɛ ka ko nyí ahwanfuntɔ́ sín dɔnkpɛvu mɛ tɔn.’ Davidi ɖɔ n’i ɖɔ: ‘Un hu lɔnmɔ kpo kinikini e wlí lɛngbɔ̌ tɔ́ ce tɔn é kpo. Nǔ ɖokpo ɔ wɛ un na jlɛ xá Filisitiinu enɛ lɔ. Jehovah na d’alɔ mì.’ Enɛ wu ɔ, Sawulu ɖɔ: ‘Bo yì, Jehovah ni nɔ xá we.’
Davidi yì tɔsisa ɖé tó, bo cyan kɛ́n e ɖíɖí é atɔ́ɔ́n dó glo tɔn mɛ. Enɛ gudo ɔ, é zé klohwán tɔn, bo ɖido Goliati kpé gbé. Ee Goliati mɔ ɛ é ɔ, é kpaca ɛ, bɔ é mɔ ɖɔ Davidi huhu na bɔwǔ ɖesu.
Goliati ɖɔ: ‘Sɛkpɔ mì, un na na lan towe xɛ lɛ kpo kanlin lɛ kpo, bɔ ye na ɖu.’ Amɔ̌, Davidi ɖɔ: ‘A ja gɔ̌n ce kpo hwǐ kpo, kpo hwǎn kpo. Loɔ, nyɛ ka ja gɔ̌n towe ɖò Jehovah nyikɔ mɛ. Jehovah na jó we dó nyì alɔ ce mɛ égbé, bɔ un na hu we.’
Davidi kanwezun, bo dlɔ́n dó Goliati jí. É zé kɛ́n ɖokpo sín glo tɔn mɛ, bo zé dó klohwán tɔn mɛ, lobo nyì kpo hlɔnhlɔn tɔn bǐ kpo. Kɛ́n ɔ zlɔ́n, bo xò nukɔn nú Goliati, bo byɔ taka tɔn mɛ. É j’ayǐ, bo kú! Ee Filisitiinu lɛ mɔ ɖɔ ahwangán yetɔn j’ayǐ é ɔ, ye bǐ hɔn. Izlayɛli-ví lɛ zun dó ye jǐ, bo ɖu ɖò ahwan ɔ jí.
1 Samuel 17:1-54.