TÀN 63
Axɔsu Nùnywɛtɔ́ Salomɔɔ
SALOMƆƆ ɖó xwè 20 vɔ́vɔ́ cobo jɛ axɔsu ɖu jí ǎ. É yí wǎn nú Jehovah, bo nɔ lɛ́ setónú nú nǔ ɖagbe e tɔ́ tɔn Davidi kplɔ́n ɛ lɛ é. Xomɛ hun Jehovah dó Salomɔɔ wu, bɔ é xò dlɔ̌ ɛ zǎn ɖokpo mɛ, bo ɖɔ n’i ɖɔ: ‘Salomɔɔ, etɛ a ka jló ɖɔ ma na we?’
Salomɔɔ ɖɔ: ‘Jehovah, Mawu ce, un kpò ɖò kpɛví, bo tuùn lee un na ɖu axɔsu gbɔn é ǎ. Enɛ wu ɔ, na nùnywɛ mì, bonu ma kpa acɛ nú togun towe lee a jló gbɔn é.’
Nǔ e Salomɔɔ byɔ é hun xomɛ nú Jehovah. Enɛ wu ɔ, É ɖɔ: ‘Ðó a byɔ nùnywɛ, bo ma byɔ dɔkun alǒ jidɔ́ ǎ é wu ɔ, Un na na nùnywɛ e mɛɖé ma ko ɖó kpɔ́n gbeɖé ǎ é we. Un ka na lɛ́ na we nǔ e a ma byɔ ǎ é: dɔkun kpo susu kpo.’
Hwenu kpɛɖé gudo ɔ, nyɔnu wè ɖé lɛ hɛn hwɛgbe syɛnsyɛn ɖé wá Salomɔɔ gɔ́n. Nyɔnu lɛ ɖokpo ɖɔ: ‘Nawe elɔ kpo nyɛ kpo wɛ nɔ nɔ xɔ ɖokpo ɔ mɛ. Un jì vǐ sunnu ɖokpo, bɔ azǎn atɔn gbè tɔn ɔ, elɔ jì vǐ sunnu. Zǎnmɛ ɔ, vǐ tɔn kú. Ee un ɖò amlɔ dɔ wɛ é ɔ, é zé vǐ kúkú ɔ mlɔ́ akpá ce, bo zé vǐ ce. Ee un fɔ́n, bo kpɔ́n vǐ kúkú ɔ é ɔ, un mɔ ɖɔ é kún nyí vǐ ce nɛ ó.’
Nyɔnu wegɔ ɔ yí xó bo ɖɔ: ‘Adingban wɛ! Vǐ gbɛɖe ɔ wɛ nyí vǐ ce, bɔ vǐ kúkú ɔ nyí éyɛ tɔn.’ Nyɔnu nukɔntɔn ɔ lɛ́ yí xó, bo ɖɔ: ‘Gbeɖé kpɔ́n! Towe wɛ nyí vǐ kúkú ɔ, bɔ vǐ gbɛɖe ɔ nyí cɛ.’ Lee dɔn nǔ gbɔn wɛ ye mɛ wè lɛ ɖè ɖò yeɖee tɛntin é nɛ. Etɛ Salomɔɔ ka na wà dìn?
É sɛ́ mɛ dó ɖɔ è ni sɔ́ hwǐ wá nú emi. Ee hwǐ ɔ wá é ɔ, Salomɔɔ ɖɔ: ‘Vlɔ̌ vǐ gbɛɖe ɔ ɖó wè, bo sɔ́ vlɔ vlɔ nú ye mɛ ɖokpo ɖokpo.’
Mɛ e jì vǐ ɔ tawun é súxó, bo ɖɔ: ‘Eǒ! Kɛnklɛn, ma hu vǐ ɔ ó. Gbɔ bo sɔ́ ɛ n’i.’ Amɔ̌ nyɔnu ɖě ɔ ɖɔ: ‘Ma sɔ́ ɛ nú mǐ mɛ ɖebǔ ó; vlɔ̌ ɛ ɖó wè kpowun.’
Salomɔɔ yí xó gbɔn gudo bo ɖɔ: ‘Ma hu vǐ ɔ ó. Sɔ́ ɛ nú nyɔnu nukɔntɔn ɔ. É tɔn wɛ nyí vǐ ɔ.’ Salomɔɔ mɔ nǔ jɛ enɛ wu, ɖó mɛ e jì vǐ ɔ tawun é yí wǎn nú vǐ ɔ kaka, bo jló na jó é dó nú nyɔnu wegɔ ɔ, bonu è ma hu i ó. Ee togun ɔ sè lee Salomɔɔ gbò hwɛ ɔ gbɔn é ɔ, ye mɔ ɖɔ axɔsu nùnywɛtɔ́ wɛ emi ɖó, bɔ xomɛ hun ye.
Hwenu e Salomɔɔ ɖu axɔsu é ɔ, Mawu dǒ nú togun ɔ, bɔ jinukún kpo atín sínsɛ́n gègě kpo nyɔ́. Togun ɔ nɔ dó avɔ ɖɛkpɛɖɛkpɛ, bo nɔ nɔ xɔ ɖagbe ɖagbe lɛ mɛ. Mɛ bǐ wɛ vo.
1 Rois 3:3-28; 4:25-34.