TÀN 64
Salomɔɔ Gbá Tɛmpli Ɔ
DAVIDI zé tuto e Jehovah ɖɔ n’i ɖɔ è na xwedó, bo gbá tɛmpli ɔ é nú Salomɔɔ cobo kú. Salomɔɔ jɛ gǎn ɖu jí é ɔ, é jɛ tɛmpli ɔ gbá jí xwè ɛnɛgɔ ɔ mɛ. Xwè tɛnwe adaɖé gudo wɛ é wá fó. Azɔ̌watɔ́ afatɔ́ɔ́n donu mɔkpan wɛ gbá tɛmpli ɔ. Xɔ ɔ ɖu akwɛ bɔ é vɛ́ jlɛ, ɖó siká kpo kpatagan gègě kpo wɛ è zán.
Tɛmpli ɔ ɖó xɔnu taji wè, lee goxɔ Jehovah tɔn ɖó gbɔn é ɖɔhun. Amɔ̌, xɔnu enɛ lɛ d’agba bo yì xɔnu goxɔ Jehovah tɔn lɛ tɔn donu wè. Salomɔɔ zé akɔjɛgba ɔ dó tɛmpli ɔ mɛ.
Ee ye gbá tɛmpli ɔ fó é ɔ, ye ɖu agɔ̌ gɛnnyigɛnnyi ɖé. Salomɔɔ jɛkpo ɖò tɛmpli ɔ nukɔn bo xoɖɛ sɛ́dó Jehovah, lee mɔ gbɔn wɛ a ɖè ɖò ɖiɖe ɔ mɛ é. Salomɔɔ ɖɔ: ‘Jinukúnsin e d’agba sɔmɔ̌ é sixu kpéwú, bo hɛn we ǎ. Tɛmpli kpɛví elɔ tɔn ko zun kwínkwín ma kwín. Amɔ̌, Mawu ce è, enyi togun towe nɔ xɔ elɔ mɛ, bo xoɖɛ sɛ́dó we hǔn, kɛnklɛn ɖótó é.’
Ee Salomɔɔ xoɖɛ ɔ fó é ɔ, myɔ jɛte sín jixwé, bo fyɔ kanlin e sɔ́ dó savɔ̌ na wɛ ye ɖè lɛ é. Weziza ɖé lɛ́ gosin Jehovah gɔ́n, bɔ tɛmpli ɔ mɛ bǐ kɔ́n lánlán. Nǔ enɛ xlɛ́ ɖɔ Jehovah ɖò tó ɖó Salomɔɔ wɛ, bo lɛ́ hun xomɛ dó tɛmpli ɔ kpo ɖɛ e é xò é kpo wu. Tɛmpli ɔ jɛ goxɔ Jehovah tɔn tɛnmɛ, bɔ togun ɔ nɔ sɛ̀n ɛ ɖò finɛ.
Salomɔɔ sɔ́ nùnywɛ dó ɖu axɔsu nú xwè gègě, bɔ xomɛ hun togun ɔ. Amɔ̌, Salomɔɔ da nyɔnu gègě sín tò ɖevo lɛ mɛ. Ye nɔ sɛ̀n Jehovah ǎ. Mɛ ɖokpo nɛ ɖò vodun sɛ̀n wɛ ɖò ɖiɖe ɔ mɛ nɛ. Gudo mɛ ɔ, asì Salomɔɔ tɔn lɛ dɔn ɛ, bɔ é lɔ sɛ̀n yɛhwe ɖevo lɛ. Ee Salomɔɔ dó nǔ enɛ sìn é ɔ, a ka tuùn nǔ e jɛ é ǎ? É jɛ nukún syɛn dó togun ɔ wu jí, bo huzu alannuwatɔ́. Akpɔ̀ wá ci togun ɔ bǐ.
Nǔ enɛ sìn xomɛ nú Jehovah ɖesu, bɔ é ɖɔ nú Salomɔɔ ɖɔ: ‘Un na yí axɔsuɖuto ɔ sín así towe, bo na sɔ́ nú mɛ ɖevo. Hwenu e vǐ towe na ɖò axɔsu ɖu wɛ ɖò kú towe gudo é wɛ Un na bló mɔ̌. Amɔ̌, Un na jó axɔsuɖuto ɔ sín mɛɖé lɛ dó, bɔ ví towe na kpa acɛ dó ye jí.’ Mi nú mǐ ni kpɔ́n lee nǔ nyí mɔ̌ gbɔn é.
1 Chroniques 28:9-21; 29:1-9; 1 Rois 5:1-18; 2 Chroniques 6:12-42; 7:1-5; 1 Rois 11:9-13.