Nukplɔnkplɔn 7

Sisɛkpɔ Mawu ɖò Yɛhwexixa Mɛ

Etɛwu wɛ é nyí nǔ titewungbe bɔ mí na nɔ xa yɛhwe hwɛ̌hwɛ̌? (1)

Mɛ wɛ mí ka na nɔ xa yɛhwe na, lobɔ gbɔn nɛ ɛ? (2, 3)

Etɛ lɛ wɛ jɛ bɔ mí ka na xa yɛhwe ná? (4)

Hwetɛnu mì ɖo na nɔ xa yɛhwe? (5, 6)

Mawu ka nɔ ɖó tó yɛhwexixa lɛ bǐ à? (7)

1. Yɛhwexixa ɔ, xoɖiɖɔ nú Mawu kpó sísí kpó wɛ. Mí ɖo na nɔ xa yɛhwe nú Mawu hwɛ̌hwɛ̌. Hwenɛnu ɔ, a ná mɔ̀ ɖɔ̀ emi sɛkpɔ ɛ ɖi xɔntɔn vivɛ ɖe ɖɔhun. Jehovah ɔ nyí nuɖaxo bo lɛ́ nyí hlɔnhlɔnnɔ, e ɖo mɔ co ɔ, é nɔ ɖó tó yɛhwexixa mítɔn lɛ! A ka nɔ xa yɛhwe sɛdo Mawu hwɛ̌hwɛ̌ à?—Psaumes 65:2; 1 Tɛsalonikinu lɛ 5:17.

2. Yɛhwexixa ɔ, é nyí akpaɖexwe sinsɛ̀n bloblo mítɔn tɔn. Enyí mɔ ɔ, Mawu ɔ, Jehovah kɛ́ɖɛ́ wɛ mí ɖo na xa yɛhwe ná. Hwenu e Jezu ɖò ayikungban ji fi ɔ, Tɔ́ tɔn kɛ́ɖɛ́ wɛ é nɔ xa yɛhwe na, é sɔ nɔ xa yɛhwe nú mɛɖebu ǎ. Nǔ ɖokpo ɔ wɛ mí lɔ ɖo na blo. (Matie 4:10; 6:9) E ɖo mɔ co ɔ, yɛhwexixa mítɔn lɛ bǐ ɖo na nyí xixa gbɔn nyikɔ Jezu tɔn gbla mɛ. Enɛ ɔ xlɛ ɖɔ̀ mí ɖó sísí nú tɛn e mɛ Jezu ɖe ɔ bo ɖó nuɖiɖi ɖò avɔsisa gbɛxɔnumɛtɔ tɔn mɛ.—Jaan 14:6; 1 Jaan 2:1, 2.

3. Hwenu e mí ɖò yɛhwe xa wɛ ɔ, é ɖo na nyí xoɖiɖɔ nú Mawu de sín ayixa mítɔn mɛ. Mí ɖo na xa yɛhwe sin tamɛ abǐ sin yɛhwexixa-wema ɖe mɛ ǎ. (Matie 6:7, 8) Mí sixu xà yɛhwe ɖò ninɔmɛ sisi tɔn ɖebu mɛ, hweɖebu nu, kpó fiɖebu kpó. Enyí mí na bo xa yɛhwe ɖò ayixa mɛ ɔ, Mawu na sè. (1 Samuel 1:12, 13) Enyí mí jlo na xa yɛhwe mí ɖesunɔ tɔn, é nyɔ́ bɔ mí na yì ba fi xwii e gbɛtɔ ɖe ma ɖe ǎ é.—Maki 1:35.

4. Etɛ lɛ wɛ a ka na nɔ xa yɛhwe ná? Nǔɖebu e na hɛn xɔntɔn-xɔntɔn nyinyi mìtɔn gble. (Filipunu lɛ 4:6, 7) Yɛhwexixa xlɛ tɔn kplɔ́n mí ɖɔ̀ mí ɖó na nɔ xa yɛhwe nú nyikɔ kpó linlin Jehovah tɔn kpó. Mí sɔ sixu byɔ ɖɔ̀ nuhudo agbaza tɔn mítɔn lɛ ni nyí nina mǐ, ɖɔ̀ hwɛhuhu mítɔn lɛ ni nyí sisɔkɛ mǐ, lobɔ nú alɔgɔ bo na ɖù ɖò tɛnkpɔn lɛ ji. (Matie 6:9-13) Yɛhwexixa mítɔn ɖo na nɔ nyí cejɛnnabǐ tɔn ǎ. Mí ɖo na nɔ xa yɛhwe nú nǔ e sɔgbe kpó jlo Mawu tɔn kpó kɛ́ɖɛ́ é.—1 Jaan 5:14.

5. A sixu xa yɛhwe hweɖebu nu e ayixa towe ɖɔ nú we ɖɔ hwi ni kpà abǐ dókú nú Mawu. (1 Chroniques 29:10-13) A ɖo na nɔ xa yɛhwe hwenu e tagba lɛ wá e abǐ hwenu e nuɖiɖi towe nyí tintɛnkpɔn. (Psaumes 55:22; 120:1) É nyí nǔ e sɔgbe é bɔ a ɖo na nɔ xa yɛhwe cobo na nɔ ɖunu. (Matie 14:19) Jehovah ɖɔ nú mí dɔ mí ɖo na nɔ xa yɛhwe “hwɛbinu.”—Efɛzinu lɛ 6:18.

6. Mí ɖó nuhudo titewungbe bo na xa yɛhwe enyí mí huhwɛ syɛnsyɛn ɖe. Hwenɛnu ɔ mí ɖo na ɖo kɛnklɛn nú lɛblanu Jehovah tɔn kpó hwɛsɔkɛmɛ tɔn kpó. Enyí mí ɖɔ hwɛ mítɔn lɛ n’i bo tɛnkpɔn bo ma sɔ wà nu nyanya ɖe ǎ, Mawu ɖo “aceji bona sɔ kɛ mɛ.”—Psaumes 86:5; Proverbes 28:13.

7. Jehovah nɔ ɖó tó gbejinɔtɔ lɛ sin yɛhwexixa kɛ́ɖɛ́. Cobonu Mawu na sè yɛhwexixa towe lɛ ɔ, a na ɖokan do sɛ́n tɔn lɛ nyìnyì wu. (Proverbes 15:29; 28:9) A ɖo na sɔ hwiɖee hwè hwenu e a ɖò yɛhwe xa wɛ ɔ. (Luka 18:9-14) A ɖo na w’azɔ sɔgbe kpó nǔ e a xa yɛhwe na é kpó. Ðomɔ mɛ ɔ, a na ɖexlɛ ɖɔ émi ɖó nuɖiɖi bo ɖo kuɖeji nú nǔ e ɖɔ wɛ a ɖe ɔ. Hwenɛnu kɛ́ɖɛ́ wɛ Jehovah na yigbe nú yɛhwexixa towe lɛ.—Eble lɛ 11:6.