Nɔ Xoɖɛ Dó Sɛkpɔ Mawu

1, 2. Etɛwu mǐ ka ɖó na lin ɖɔ ɖɛ xò sɛ́dó Mawu nyí wǔjɔmɛ ɖaxó ɖé? Etɛwu mǐ ka ɖó na tuùn nǔ e Biblu kplɔ́n mɛ ɖò ali enɛ nu é?

ENYI è sɔ́ ayikúngban ɔ sɔ́ jlɛ́ dó wɛkɛ ɔ bǐ wu ɔ, nǔ kpɛví ɖé wɛ é nyí. Ðò ali enɛ nu ɔ, gbɛtɔ́ lɛ bǐ cí sìn kunkun e kun sín tɔká mɛ é ɖɔhun ɖò Jehovah, “jǐ kpo dò kpo dátɔ́ ɔ,” sín nukúnmɛ. (Psaume 115:15; Isaïe 40:15) É ɖò mɔ̌ có, Biblu ɖɔ: “Jehovah yá dó mɛ e ɖò yiylɔ ɛ wɛ lɛ é bǐ, mɛ e nɔ ylɔ ɛ ɖò nugbǒ mɛ lɛ é bǐ. É na bló nǔ e jló mɛ e ɖò xɛsi ɖi n’i wɛ lɛ é nú ye, bo na ɖótó xó e sú wɛ ye ɖè bo ɖò alɔdo ba wɛ é.” (Psaume 145:18, 19) Lin tamɛ dó tinmɛ xó enɛ tɔn wu kpɛɖé! Gbɛɖotɔ́ nǔbǐwukpétɔ́ ɔ yá dó mǐ, bɔ enyi mǐ “nɔ ylɔ ɛ ɖò nugbǒ mɛ” ɔ, é na ɖótó mǐ. Wǔjɔmɛ tɛ ɖíe ɖɔ mǐ sixu xoɖɛ sɛ́dó Mawu!

² É ɖò mɔ̌ có, enyi mǐ jló ɖɔ Jehovah ni sè ɖɛ mǐtɔn lɛ ɔ, mǐ ɖó na xoɖɛ sɛ́dó é lee é ba gbɔn é. Enyi mǐ ma mɔ nukúnnú jɛ nǔ e Biblu kplɔ́n mɛ dó ɖɛxixo wu é mɛ ǎ ɔ, nɛ̌ mǐ ka sixu bló mɔ̌ gbɔn? Ðó ɖɛ nɔ zɔ́n bɔ mǐ nɔ sɛkpɔ Jehovah wutu ɔ, é ɖò dandan ɖɔ mǐ ni tuùn nǔ e Biblu ɖɔ ɖò ali enɛ nu é.

ETƐWU MǏ KA ÐÓ NA NƆ XOÐƐ SƐ́DÓ JEHOVAH?

3. Ðɔ hwɛjijɔ taji e wu mǐ ɖó na nɔ xoɖɛ sɛ́dó Jehovah é ɖokpo.

³ Hwɛjijɔ taji e wu mǐ ɖó na nɔ xoɖɛ sɛ́dó Jehovah é ɖokpo wɛ nyí ɖɔ éɖesunɔ wɛ byɔ ɖɔ mǐ ni nɔ wà mɔ̌. Xó tɔn dó wusyɛn lanmɛ nú mǐ ɖɔ: “Ado ma hu mi dó nǔ ɖebǔ wu ó; loɔ, mi ɖò ninɔmɛ ɖebǔ mɛ hǔn, mi ni nɔ sɔ́ kúdónúmɛ sín ayixa dó xoɖɛ, bo byɔ nǔ e hudo mi lɛ Mawu. Enɛ ɔ, fífá Mawu tɔn e hugǎn nukúnnúmɔjɛnǔmɛ gbɛtɔ́ tɔn bǐ ɔ na bló ayixa mitɔn kpodo linlin mitɔn lɛ kpo ɖó, bɔ mi na sixu nɔ bǔ ɖò Klisu Jezu mɛ.” (Filipunu lɛ 4:6, 7) É ɖò gaàn ɖɔ mǐ kún na jló na dovɛ̌ nú tuto mɔhun e Axɔsu Acɛbǐnɔ wɛkɛ ɔ tɔn bló nú mǐ é ó!

4. Nɛ̌ ɖɛxixo sɛ́dó Jehovah hwɛhwɛ ka na zɔ́n bɔ xɔ́ntɔn mǐ kpo é kpo tɔn na vɛ́ gbɔn?

⁴ Hwɛjijɔ ɖevo e wu mǐ ɖó na nɔ xoɖɛ sɛ́dó Jehovah hwɛhwɛ é wɛ nyí ɖɔ é nɔ zɔ́n bɔ mǐ kpo é kpo nɔ vɛ́ d’eji. Enyi hwenu e xɔ́ntɔn zɔnjɛzɔnfɔ́n lɛ ɖó hudo nùɖé tɔn é kɛɖɛ wɛ ye nɔ ɖɔ xó ɖó kpɔ́ ǎ. É nyɔ́ wà ɔ, xɔ́ntɔn mɔhun lɛ sín nǔ nɔ ɖu ayi mɛ nú yeɖee, bɔ enyi ye nɔ ɖɔ xomɛ nú yeɖee kpo jlǒ kpo ɔ, ye nɔ lɛ́ vɛ́ d’eji. Ðò ali ɖé lɛ nu ɔ, è sixu jlɛ́ xɔ́ntɔn e mǐ kpo Jehovah kpo nyí é dó xɔ́ntɔn mɔhun lɛ wu. A ko kplɔ́n nǔ gègě ɖò wema elɔ mɛ dó nǔ e Biblu kplɔ́n mɛ dó Jehovah, mɛ alɔkpa e nyí é, kpo linlin tɔn lɛ kpo wu. A wá tuùn ɖɔ Mawu nyí mɛ e a sixu zun xɔ́ntɔn xá é. Ðɛxixo nɔ hun ali nú we bɔ a na nɔ ɖɔ linlin towe lɛ kpo xó vívɛ́ towe lɛ kpo nú Tɔ́ towe jixwé tɔn ɔ. Enyi a nɔ bló gbɔn mɔ̌ ɔ, a na sɛkpɔ Jehovah.—Jaki 4:8.

ETƐ LƐ MǏ KA ÐÓ NA WÀ?

5. Etɛ ka ɖexlɛ́ ɖɔ Jehovah kún nɔ sè ɖɛ lɛ bǐ ó?

⁵ Jehovah ka nɔ sè ɖɛ lɛ bǐ à? Ðǒ ayi nǔ e é ɖɔ nú Izlayɛli-ví gufɔntɔ́ lɛ ɖò gbeyiɖɔ Ezayi hwenu é wu: “Mi nɔ xoɖɛ gègě có, un nɔ ɖótó ǎ; mɛhuhu gɔ́ alɔ mitɔn lɛ mɛ.” (Isaïe 1:15) Hǔn, nǔwiwa mǐtɔn ɖé lɛ sixu zɔ́n bɔ Mawu gɔn ɖɛ mǐtɔn lɛ sè. Enɛ wu ɔ, bonu Mawu na sè ɖɛ mǐtɔn lɛ ɔ, nùɖé lɛ ɖò dandan bɔ mǐ ɖó na bló.

6. Bonu Mawu na sè ɖɛ mǐtɔn lɛ ɔ, nǔ taji tɛ mǐ ka ɖó na bló? Nɛ̌ mǐ ka sixu bló gbɔn?

⁶ Nǔ taji e mǐ ɖó na bló é wɛ nyí ɖɔ mǐ ɖó na ɖè nùɖiɖi xlɛ́. (Matie 21:22) Mɛsɛ́dó Pɔlu wlan ɖɔ: “Nú mɛɖé ma ɖó nùɖiɖi ǎ ɔ, nǔ tɔn sixu nyɔ́ Mawu nukúnmɛ ǎ; ɖó mɛ e sɛkpɔ Mawu ɔ ɖó na ɖi nǔ ɖɔ Mawu tíìn, bo nɔ na ajɔ mɛ ɖò biba ɛ wɛ lɛ.” (Eble lɛ 11:6) Enyi è ko tuùn kpowun ɖɔ Mawu tíìn bo nɔ sè ɖɛ lɛ wɛ nyí nùɖiɖi jɔ nùɖiɖi ɖiɖó ǎ. Nǔwiwa mǐtɔn lɛ wɛ nɔ ɖè nùɖiɖi mǐtɔn xlɛ́. Gbɛzinzan mǐtɔn ayihɔngbe ayihɔngbe tɔn ɖó na xlɛ́ céɖécéɖé ɖɔ mǐ ɖó nùɖiɖi.—Jaki 2:26.

7. (a) Nɛ̌ ka gbɔn bɔ mǐ ka ɖó na ɖó sísí nú Jehovah hwenu e mǐ ɖò ɖɛ xò sɛ́dó é wɛ é? (b) Nɛ̌ mǐ ka sixu xoɖɛ sɛ́dó Mawu kpo mɛɖesɔhwe kpo kpodo ayijlɔjlɔ kpo gbɔn?

⁷ Jehovah lɛ́ byɔ ɖò mɛ e nɔ xoɖɛ sɛ́dó é lɛ é sí ɖɔ ye ni nɔ xò kpo mɛɖesɔhwe kpo kpodo ayijlɔjlɔ kpo. É jɛ ɖɔ mǐ ni sɔ́ mǐɖee hwe hwenu e mǐ ɖò xó ɖɔ nú Jehovah wɛ é à cé? Enyi ali hun nú mɛ lɛ bonu ye na ɖɔ xó xá axɔsu, alǒ togán ɖé ɔ, ye nɔ bló mɔ̌ hwebǐnu kpo sísí kpo, bo nɔ dó xlɛ́ ɖɔ emi tuùn tɛn ɖaxó e mɛ é ɖè é. Hwenu e mǐ ɖò ɖɛ xò sɛ́dó Jehovah wɛ é ɔ, é jɛ ɖɔ mǐ ni ɖó sísí e hugǎn mɔ̌ é n’i à cé? (Psaume 138:6) Nú è na ɖɔ xó jɔ xó ɔ, é wɛ nyí “Mawu Nǔbǐwukpétɔ́.” (Genèse 17:1) Lee mǐ nɔ xoɖɛ sɛ́dó Mawu gbɔn é ɖó na ɖexlɛ́ ɖɔ mǐ tuùn tɛn e mɛ mǐ ɖè ɖò nukɔn tɔn é. Mɛɖesɔhwe mɔhun na lɛ́ sísɛ́ mǐ bɔ mǐ na nɔ sɔ́ ayijlɔjlɔ dó xoɖɛ, lobo na nɔ nyì alɔ nú ɖɛ ɖokpo ɔ lɛ xixo kpo xó ɖokpo ɔ lɛ ɖiɖɔ ɖò ɖɛ mǐtɔn mɛ kpo.—Matie 6:7, 8.

8. Nɛ̌ mǐ ka sixu wà nǔ sɔgbe xá ɖɛ e mǐ xò é gbɔn?

⁸ Mawu lɛ́ byɔ mǐ ɖɔ mǐ ɖó na nɔ wà nǔ sɔgbe xá ɖɛ mǐtɔn lɛ cobɔ emi na sè. Jehovah nɔ ɖó nukún ɖɔ mǐ ni nɔ dó gǎn e wu mǐ kpé ɔ bǐ bo nɔ wà nǔ sɔgbe xá ɖɛ mǐtɔn. Ði kpɔ́ndéwú ɖé ɔ, enyi mǐ xoɖɛ ɖɔ, “Nǎ nùɖuɖu égbé tɔn mǐ” ɔ, mǐ ɖó na wà azɔ̌ ɖebǔ e mǐ mɔ bo ka sixu wà é ganji. (Matie 6:11; 2 Tɛsalonikinu lɛ 3:10) Enyi mǐ xoɖɛ ɖɔ Mawu ni d’alɔ mǐ nú mǐ na ɖu ɖò gǎnmaɖó agbaza tɔn ɖé jí ɔ, mǐ ɖó na nyì alɔ nú nǔwiwa kpo ninɔmɛ e sixu dɔn mǐ dó mɛtɛnkpɔn mɛ lɛ é kpo. (Kolɔsinu lɛ 3:5) Gɔ́ nú nǔ enɛ lɛ e ɖò dandan bɔ Mawu byɔ ɖò mǐ sí lɛ é ɔ, mǐ ɖó hudo xósin nùkanbyɔ e kúnkplá ɖɛxixo lɛ é tɔn.

XÓSIN NÙKANBYƆ ÐÉ LƐ TƆN DÓ ÐƐXIXO WU

9. Mɛ̌ mǐ ka ɖó na nɔ xoɖɛ sɛ́dó? Ðò nyikɔ mɛ̌ tɔn mɛ?

⁹ Mɛ̌ mǐ ka ɖó na nɔ xoɖɛ sɛ́dó? Jezu kplɔ́n ahwanvu tɔn lɛ ɖɔ ye ni nɔ xoɖɛ sɛ́dó “Tɔ́ mǐtɔn e ɖò [jixwé] ɔ.” (Matie 6:9) Enɛ wu ɔ, Jehovah Mawu kɛɖɛ wɛ mǐ ɖó na nɔ xoɖɛ sɛ́dó. É ɖò mɔ̌ có, Jehovah byɔ ɖɔ mǐ ni tuùn tɛn e mɛ Vǐɖokponɔ tɔn Jezu Klisu ɖè é. Lee mǐ ko kplɔ́n gbɔn ɖò Wemata 5gɔ́ ɔ mɛ é ɔ, Mawu sɛ́ Jezu dó ayikúngban ɔ jí bɔ é xɔ gbɛ̀ nú mǐ sín hwɛhuhu kpo kú kpo sí. (Jaan 3:16; Hlɔmanu lɛ 5:12) É sɔ́ ɛ bɔ é nyí Vɔsanúxwlémawutɔ́ Ðaxó kpo Hwɛɖɔtɔ́ kpo. (Jaan 5:22; Eble lɛ 6:20) Enɛ wu ɔ, Biblu byɔ ɖò mǐ sí ɖɔ mǐ ni nɔ xoɖɛ ɖò Jezu sín nyikɔ mɛ. Jezu ɖesunɔ ɖɔ: “Nǔ ɖebǔ e mi na sɔ́ nyikɔ ce ɖó nu, bo byɔ Tɔ́ ɔ, é na na bǐ mi.” (Jaan 15:16) Bonu è na sè ɖɛ mǐtɔn lɛ ɔ, mǐ ɖó na nɔ xoɖɛ sɛ́dó Jehovah kɛɖɛ ɖò Jezu sín nyikɔ mɛ.

10. Etɛwu é ma ka byɔ ɖɔ ɖě jɛn mǐ na nɔ hwenu e mǐ ɖò ɖɛ xò wɛ é ǎ?

¹⁰ Nɛ̌ mǐ ka ɖó na nɔ hwenu e mǐ ɖò ɖɛ xò wɛ é? Jehovah byɔ ɖò mǐ sí ɖɔ ɖě jɛn alɔ mǐtɔn lɛ alǒ agbaza mǐtɔn blebu na nɔ dandan ǎ. Biblu kplɔ́n mɛ ɖɔ mǐ hɛn ɔ, mǐ na jinjɔn ayǐ, xwè agbɔnnúsú dò, jɛkpoli, alǒ nɔte bo xoɖɛ. (1 Chroniques 17:16; Nehémia 8:6; Daniel 6:10; Maki 11:25) Lee mǐ na nɔ bɔ mɛ ɖevo lɛ hɛn ɔ, ye na mɔ mǐ é wɛ ɖò taji ǎ, loɔ, ayi mǐtɔn ni mɛ́ kpowun wɛ nyí xó ɔ. Ðò ali enɛ nu ɔ, hwenu e mǐ ɖò azɔ̌ mǐtɔn lɛ wà wɛ é, alǒ hwenu e nǔ ma ɖó ayi tɔn ɖé wá kpannukɔn mǐ é ɔ, mǐ sixu xoɖɛ dó ayi mɛ ɖò fí ɖebǔ e mǐ ɖè é. Mɛ e lɛlɛ̌ dó mǐ lɛ é sixu nɔ ma ɖó ayi ɖɛ mɔhun lɛ wu, amɔ̌, Jehovah nɔ sè.—Nehémia 2:1-6.

11. Etɛ lɛ mǐ ka sixu byɔ ɖò ɖɛ mǐtɔn lɛ mɛ?

¹¹ Etɛ lɛ mǐ ka sixu byɔ ɖò ɖɛ mǐtɔn lɛ mɛ? Biblu tinmɛ ɖɔ: “Mǐ byɔ nǔ ɖebǔ nú é sɔgbe xá jlǒ [Jehovah] tɔn ɔ, é nɔ ɖótó mǐ.” (1 Jaan 5:14) Hǔn, mǐ hɛn ɔ, mǐ na byɔ nǔ ɖebǔ e sɔgbe xá jlǒ Mawu tɔn é ɖò ɖɛ mǐtɔn lɛ mɛ. É ka jló ɖɔ mǐ ni nɔ xoɖɛ dó nǔ e nɔ ɖu ayi mɛ nú mǐ lɛ é jí à? Ganji! Ðɛxixo sɛ́dó Jehovah cí xóɖiɖɔ nú xɔ́ntɔn vívɛ́ná ɖé ɖɔhun. Mǐ sixu ‘ɖɔ nǔ e ɖò ayi mǐtɔn mɛ é bǐ’ nú Mawu. (Psaume 62:8) É nyɔ́ ɖɔ mǐ ni nɔ byɔ gbigbɔ mímɛ́ Mawu tɔn, ɖó é na d’alɔ mǐ bɔ mǐ na wà nǔ e sɔgbe é. (Luka 11:13) Mǐ sixu lɛ́ byɔ alixlɛ́mɛ Mawu tɔn bo na dó sixu nɔ wà nǔ kpo nùnywɛ kpo, lobo na dó sixu lɛ́ dɛ ɖò wuvɛ̌ lɛ nu. (Jaki 1:5) Enyi mǐ hu hwɛ ɔ, mǐ ɖó na byɔ sisɔkɛ gbɔn vɔsisa Klisu tɔn jí. (Efɛzinu lɛ 1:7, 8) É ɖò gaàn ɖɔ é kún nyí nǔ mǐɖesunɔ tɔn lɛ kɛɖɛ wɛ mǐ na nɔ byɔ ɖò ɖɛ mǐtɔn lɛ mɛ ó. Mǐ ɖó na nɔ lɛ́ xoɖɛ dó mɛ ɖevo lɛ tamɛ, ɖi hɛnnumɔ mǐtɔn lɛ kpo Klisanwun hàtɔ́ mǐtɔn lɛ kpo.—Mɛsɛ́dó 12:5; Kolɔsinu lɛ 4:12.

12. Nɛ̌ mǐ ka sixu xlɛ́ ɖò ɖɛ mǐtɔn lɛ mɛ ɖɔ nǔ e kúnkplá Tɔ́ mǐtɔn jixwé tɔn ɔ lɛ é mya nukún nú mǐ jɛ nukɔn gbɔn?

¹² Nǔ e kúnkplá Jehovah Mawu é wɛ ɖó na jɛ nukɔn ɖò ɖɛ mǐtɔn lɛ mɛ. Ðó ɖagbe e é nɔ wà nú mǐ lɛ é wutu ɔ, é jɛ ɖɔ mǐ ni nɔ kpa susu n’i, bo nɔ lɛ́ dó kú n’i. (1 Chroniques 29:10-13) Jezu sɔ́ ɖɛ sín kpɔ́ndéwú ɖ’ayǐ ɖò Matie 6:9-13 mɛ bo kplɔ́n mǐ ɖɔ mǐ ni nɔ xoɖɛ bo byɔ ɖɔ nyikɔ Mawu tɔn ni nyí nǔ sísí, enɛ wɛ nyí ɖɔ é ni nyí nǔ mímɛ́. Enɛ gudo ɔ, é ɖɔ mǐ ni nɔ byɔ ɖɔ Axɔsuɖuto Mawu tɔn ni wá bonu jlǒ tɔn ni nyí wiwa ɖò ayikúngban ɔ jí, lee é ɖè ɖò jixwé ɔ ɖɔhun. Jezu tó ɖɔ xó dó nǔ taji enɛ lɛ é kúnkplá Jehovah é jí hwɛ̌ cobo wá ɖɔ xó dó nǔ mɛɖesunɔ tɔn e nɔ ɖu ayi mɛ nú mɛ lɛ é jí. Mɔ̌ ɖokpo ɔ, enyi nǔ e kúnkplá Mawu lɛ é nɔ mya nukún nú mǐ jɛ nukɔn ɖò ɖɛ mǐtɔn lɛ mɛ ɔ, é na ɖexlɛ́ ɖɔ é kún nyí ɖagbe mǐtɔn kɛɖɛ wɛ nɔ ɖu ayi mɛ nú mǐ ó.

13. Etɛ Biblu ka ɖɔ dó gaɖiɖi ɖɛ e Mawu nɔ sè lɛ é tɔn wu?

¹³ Nɛ̌ ɖɛ mǐtɔn lɛ ka ɖó na ɖi ga sɔ? Biblu ɖɔ dandan ɖɔ lě jɛn ɖɛ mǐɖesunɔ tɔn alǒ agbawungba tɔn mǐtɔn lɛ ɖó na ɖi ga sɔ ǎ. Mǐ sixu ja nǔ ɖu gbé bo xoɖɛ klewun ɖé, alǒ ɖɛ mǐɖesunɔ tɔn e mɛ mǐ nɔ ɖɔ nǔ e ɖò ayi mǐtɔn mɛ é bǐ nú Jehovah ɖè é sixu ɖi ga. (1 Samuel 1:12, 15) É ɖò mɔ̌ có, Jezu ɖɔ Mawu na dɔn tó nú mɛ e nɔ ɖò ɖɛ gaga xò wɛ bonu mɛ ɖevo lɛ na dó sixu mɔ ɖɔ ye nyí nǔjlɔjlɔwatɔ́ lɛ é. (Luka 20:46, 47) Ðɛ mɔhun lɛ nɔ ɖɔ nǔ ɖebǔ nú Jehovah ǎ. Nǔ e ɖò taji é wɛ nyí ɖɔ mǐ ni xoɖɛ sín ayi mǐtɔn mɛ. Enɛ wu ɔ, gaɖiɖi ɖɛ e Mawu nɔ sè lɛ é tɔn sixu gbɔn vo ɖó hudo alǒ ninɔmɛ lɛ wu.

14. Etɛ ɖɔ wɛ Biblu ka ɖè hwenu e é dó wusyɛn lanmɛ nú mǐ ɖɔ mǐ ni “nɔ xoɖɛ hwebǐnu” é? Etɛ ka dó gbɔ nú mǐ ɖ’emɛ?

¹⁴ Azɔn nabi mǐ ka ɖó na nɔ xoɖɛ? Biblu dó wusyɛn lanmɛ nú mǐ ɖɔ mǐ ni “nɔ ɖókan dó ɖɛxixo wu,” bo “nɔ xoɖɛ hwebǐnu,” lobo ‘ma nɔ gɔn ɖɛ xò ó.’ (Hlɔmanu lɛ 12:12; 1 Tɛsalonikinu lɛ 5:17; 1 Timɔtée 5:5) É nyí ɖɛxixo sɛ́dó Jehovah kɛɖɛ wɛ na nyí azɔ̌ mǐtɔn ɖò kéze ɖé mɛ ɖɔ wɛ xógbe enɛ lɛ ɖè ǎ. É nyɔ́ wà ɔ, Biblu byɔ mǐ ɖɔ mǐ ni nɔ xoɖɛ hwɛhwɛ, bo nɔ ɖò kú dó nú Jehovah wɛ nú ɖagbe e é nɔ wà nú mǐ lɛ é, lobo nɔ lɛ́ byɔ ɛ ɖɔ é ni xlɛ́ ali mǐ, dó gbɔ nú mǐ, bo na hlɔnhlɔn mǐ. Jehovah ɖó dogbó nú lee ɖɛ mǐtɔn lɛ ɖó na ɖi ga sɔ é kpo azɔn nabi e mǐ sixu xoɖɛ sɛ́dó é é kpo ǎ. Nǔ enɛ e mǐ tuùn é ɖó na dó gbɔ nú mǐ à cé? Enyi wǔjɔmɛ e ɖɛxixo nyí é xɔ akwɛ ɖò nukún mǐtɔn mɛ nugbǒ nugbǒ ɔ, mǐ na nɔ xoɖɛ sɛ́dó Tɔ́ mǐtɔn jixwé tɔn ɔ hwɛhwɛ.

15. Aniwu mǐ ka ɖó na ɖɔ “Nicɛ” ɖò ɖɛ mɛɖesunɔ tɔn lɛ kpo agbawungba tɔn lɛ kpo sín fifonu?

¹⁵ Aniwu mǐ ka ɖó na ɖɔ “Nicɛ” ɖò fifonu ɖɛ ɖé tɔn? Xókwin “Nicɛ” ɔ sín tinmɛ wɛ nyí ɖɔ “é ni cɛ,” alǒ “é ni nyí mɔ̌.” Kpɔ́ndéwú gègě ɖò Biblu mɛ bo xlɛ́ ɖɔ é sɔgbe ɖɔ è ni ɖɔ “Nicɛ” ɖò ɖɛ mɛɖesunɔ tɔn lɛ kpo agbawungba tɔn lɛ kpo sín fifonu. (1 Chroniques 16:36; Psaume 41:13) Enyi mǐ ɖɔ “Nicɛ” ɖò ɖɛ mǐɖesunɔ tɔn lɛ sín fifonu ɔ, é nɔ ɖexlɛ́ ɖɔ mǐ ɖɔ xó e mǐ ɖɔ ɖò ɖɛ ɔ mɛ lɛ é kpo ayijlɔjlɔ kpo. Enyi mɛɖé xoɖɛ ɖò agbawungba bonu mǐ ɖɔ “Nicɛ” dó ayi mɛ, alǒ dó aga ɖò ɖɛ ɔ sín fifonu ɔ, é nɔ ɖexlɛ́ ɖɔ mǐ yí gbè nú linlin e tɔ́n ɖò ɖɛ ɔ mɛ lɛ é.—1 Kolɛntinu lɛ 14:16.

LEE MAWU NƆ SÈ ÐƐ MǏTƆN LƐ GBƆN É

16. Ganjɛwu tɛ mǐ ka sixu ɖó dó ɖɛ mǐtɔn lɛ wu?

¹⁶ Jehovah ka nɔ sè ɖɛ lɛ dóó à? Ganji! Mǐ ɖó hwɛjijɔ tawun bo na ganjɛwu ɖɔ “Mɛ e nɔ sè ɖɛ é” nɔ na sìnkɔn ɖɛ e gbɛtɔ́ livi mɔkpan lɛ nɔ xò sɛ́dó é kpo ayijlɔjlɔ kpo lɛ é tɔn. (Psaume 65:2) Jehovah sixu sè ɖɛ mǐtɔn lɛ gbɔn alɔkpa vovo mɛ.

17. Etɛwu è ka sixu ɖɔ ɖɔ Mawu nɔ zán wɛnsagun tɔn lɛ kpo deví tɔn e ɖò ayikúngban jí lɛ é kpo dó na sìnkɔn ɖɛ mǐtɔn lɛ tɔn?

¹⁷ Jehovah nɔ zán wɛnsagun tɔn lɛ kpo deví tɔn e ɖò ayikúngban jí lɛ é kpo dó na sìnkɔn ɖɛ lɛ tɔn. (Eble lɛ 1:13, 14) Mɛ gègě ko xoɖɛ sɛ́dó Jehovah ɖɔ é ni d’alɔ emi bonu emi na mɔ nukúnnú jɛ Biblu mɛ, bɔ ɖò ɖɛ ɔ gudo tlolo ɔ, Kúnnuɖetɔ́ Jehovah tɔn lɛ ɖokpo wá xúxú hɔn nú ye. Nǔ mɔhun lɛ xlɛ́ céɖécéɖé ɖɔ wɛnsagun lɛ ɖò gudo nú wɛnɖagbe Axɔsuɖuto ɔ tɔn jijla sín azɔ̌ ɔ. (Nǔɖexlɛ́mɛ 14:6) Bo na dó sè ɖɛ e mǐ xò hwenu e mǐ ɖó hudo tawun ɖé é ɔ, Jehovah sixu sísɛ́ Klisanwun ɖé bɔ é wá d’alɔ mǐ.—Proverbes 12:25; Jaki 2:16.

18. Nɛ̌ Jehovah ka nɔ zán gbigbɔ mímɛ́ tɔn kpo Xó tɔn kpo dó na sìnkɔn ɖɛ deví tɔn lɛ tɔn gbɔn?

¹⁸ Jehovah Mawu nɔ lɛ́ zán gbigbɔ mímɛ́ tɔn kpo Xó tɔn Biblu ɔ kpo dó na sìnkɔn ɖɛ deví tɔn lɛ tɔn. Enyi mǐ xoɖɛ bo byɔ alɔdo bo na dó ɖu ɖò mɛtɛnkpɔn lɛ jí ɔ, é sixu xlɛ́ ali mǐ bo na hlɔnhlɔn mǐ gbɔn gbigbɔ mímɛ́ tɔn gblamɛ. (2 Kolɛntinu lɛ 4:7) Hwɛhwɛ ɔ, ɖɛ e mǐ xò bo byɔ alixlɛ́mɛ Jehovah tɔn lɛ é sín sìnkɔn nɔ gosin Biblu ɔ mɛ. É wɛ é nɔ zán bo nɔ dó d’alɔ mǐ bɔ mǐ nɔ wà nǔ kpo nùnywɛ kpo. Mǐ sixu mɔ akpáxwé Biblu tɔn e na d’alɔ mǐ lɛ é ɖò Biblu kplɔnkplɔn mǐɖesunɔ tɔn hwenu kpo hwenu e mǐ ɖò wema junjɔn Biblu jí lɛ, ɖi wema elɔ, xá wɛ é kpo. Kplé Klisanwun tɔn ɖé alǒ nǔ e wu mɛxo agun tɔn e ɖagbe mǐtɔn nɔ ɖu ayi mɛ na é ɖé ɖ’ayi bo ɖɔ é, sixu flín xó Biblu tɔn e sín hudo mǐ ɖó lɛ é mǐ.—Galatinu lɛ 6:1.

19. Enyi é wá jɛ bɔ mǐ lin ɖɔ Jehovah kún ɖò sìnkɔn na nú ɖɛ mǐtɔn lɛ wɛ ó ɔ, etɛ mǐ ka ɖó na hɛn dó ayi mɛ?

¹⁹ Enyi é wá jɛ bɔ mǐ lin ɖɔ Jehovah kún ɖò sìnkɔn na nú ɖɛ mǐtɔn lɛ wɛ ó ɔ, é nyí ɖɔ é hwé d’ewu wɛ zɔ́n ǎ. É nyɔ́ wà ɔ, mǐ ɖó na flín ɖɔ Jehovah nɔ na sìnkɔn ɖɛ lɛ tɔn sɔgbe xá jlǒ tɔn kpo hwenu e é jɛxa dó é kpo. É tuùn hudo mǐtɔn lɛ kpo lee é na sú dò yetɔn gbɔn é kpo hugǎn mǐɖesu. Hwɛhwɛ ɔ, é nɔ jló ɖɔ mǐ ni ‘ɖò byɔbyɔ wɛ, bo ɖò biba wɛ, lobo ɖò hɔn xúxú wɛ.’ (Luka 11:5-10) Kanɖodonǔwu mɔhun nɔ xlɛ́ Mawu ɖɔ nǔ e mǐ xoɖɛ bo byɔ é vɛ́ adɔ̌ nú mǐ, bo nɔ lɛ́ xlɛ́ ɖɔ mǐ ɖó nùɖiɖi kpíkpé ɖɔ é na sè ɖɛ mǐtɔn lɛ. Gɔ́ nú enɛ ɔ, Jehovah sixu sè ɖɛ mǐtɔn lɛ gbɔn alɔkpa ɖé bɔ mǐ gbɔ ayi ɖ’ewu. Ði kpɔ́ndéwú ɖé ɔ, é sixu sè ɖɛ e mǐ xò bɔ é kúnkplá mɛtɛnkpɔn ɖé é bo gbɔ mɛtɛnkpɔn ɔ ɖé síìn lobo ka na mǐ hlɔnhlɔn bɔ mǐ na dɛ ɖ’enu.—Filipunu lɛ 4:13.

20. Etɛwu mǐ ma ka ɖó na dovɛ̌ nú wǔ e Jehovah jɔ mǐ ɖɔ mǐ ni nɔ xoɖɛ sɛ́dó emi é ǎ?

²⁰ Xomɛ ɖó na hun mǐ tawun ɖɔ Mɛ e ɖó wɛkɛ ɖaxó elɔ é yá dó mɛ e nɔ ylɔ ɛ kpo ayijlɔjlɔ kpo ɖò ɖɛ mɛ lɛ é bǐ. (Psaume 145:18) Mǐ ɖó na nɔ xoɖɛ sɛ́dó Jehovah hwɛhwɛ ɖó wǔjɔmɛ ɖé wɛ ɖɛ nyí. Enyi mǐ wà mɔ̌ ɔ, mǐ na ɖó nukún kpo awǎjijɛ kpo ɖɔ mǐ na sɛkpɔ Jehovah, Mɛ e nɔ sè ɖɛ é.