Mɛ̌ ka Nyí Mawu?

1. Etɛwu mǐ ka ɖó na sɛ̀n Mawu?

Mawu nugbǒ ɔ wɛ ɖó nǔ lɛ bǐ. É ɖó bǐbɛ̌ ǎ, É ka na lɛ́ ɖó vivɔnu gbeɖé ǎ. (Ðɛhan 90:2) Gɔ̌n tɔn wɛ wɛnɖagbe e ɖò Biblu mɛ ɔ gosin. (1 Timɔtée 1:11) Ðó Mawu wɛ na mǐ gbɛ̀ wutu ɔ, é ɖokponɔ géé wɛ mǐ ɖó na sɛ̀n.​—Xà Nǔɖexlɛ́mɛ 4:11.

2. Mɛ alɔkpa tɛ Mawu ka nyí?

Gbɛtɔ́ ɖebǔ mɔ Mawu kpɔ́n gbeɖé ǎ, ɖó Gbigbɔ wɛ é nyí. Gbɛ̀ alɔkpa e é ɖó é hugǎn gbɛtɔ́ lɛ tɔn tawun. (Jaan 1:18; 4:24) É ɖò mɔ̌ có, enyi mǐ nɔ lin tamɛ dó nǔ e Mawu bló lɛ é wu ɔ, mǐ sixu tuùn jijɔ tɔn lɛ. Kpɔ́ndéwú ɖokpo ɖíe, atín sínsɛ́n kpo folowa tɛnmɛ tɛnmɛ lɛ kpo nɔ xlɛ́ wanyiyi kpo nùnywɛ tɔn kpo. Lee wɛkɛ ɔ dagba gbɔn ɔ xlɛ́ hlɔnhlɔn tɔn mǐ.​—Xà Hlɔmanu lɛ 1:20.

Mǐ sixu lɛ́ kplɔ́n nǔ gègě dó jijɔ Mawu tɔn lɛ wu gbɔn Biblu xixa gblamɛ. Kpɔ́ndéwú ɖokpo ɖíe, é ɖɔ nǔ e Mawu yí wǎn na lɛ é kpo nǔ e é gbɛ́ wǎn na lɛ é kpo. É lɛ́ ɖɔ lee Mawu nɔ wà nǔ xá gbɛtɔ́ lɛ gbɔn é kpo lee é nɔ wà nǔ gbɔn ɖò ninɔmɛ vovo lɛ mɛ é kpo.​—Xà Ðɛhan 103:7-10.

3. Mawu ka ɖó nyikɔ ɖé à?

Jezu ɖɔ: “Tɔ́ mǐtɔn e ɖò [jìxwe] ɔ, nyikɔ towe ni nyí nǔ sísí.” (Matie 6:9) Mawu ɖó tɛnmɛ-nyikɔ gègě có nyikɔ ɖokpo géé wɛ é ɖó. Gbè ɖokpo ɖokpo ɖó lee é nɔ ylɔ ɛ gbɔn é. Ðò Fɔngbe mɛ ɔ, è nɔ ylɔ ɛ ɖɔ “Jehovah.” Amɔ̌, mɛɖé lɛ nɔ ɖɔ “Yahvé.”​—Xà Ðɛhan 83:18, nwt

È ɖè nyikɔ Mawu tɔn sín Biblu gègě mɛ bo sɔ́ tɛnmɛ-nyikɔ Aklunɔ alǒ Mawu ɖó tɛn tɔn mɛ. Loɔ, hwenu e è wlan Biblu é ɔ, nyikɔ Mawu tɔn tɔ́n ɖ’emɛ azɔn 7 000 mɔ̌. Jezu ɖè nyikɔ Mawu tɔn xlɛ́ hwenu e é ɖò nǔ kplɔ́n gbɛtɔ́ lɛ dó Mawu wu wɛ é. Jezu ɖɔ: “Un bló bɔ ye tuùn nyikɔ towe.” (Jaan 17:26, nwt)

Kpɔ́n video Mawu ka ɖó nyikɔ ɖé à?

4. Jehovah ka nɔ kpé nukún dó mǐ wu à?

Jehovah Mawu nɔ kpé nukún dó mǐ wu ǎ wɛ zɔ́n bɔ wuvɛ̌ mimɔ gbà kpé fí bǐ mɔ̌ à? Mɛɖé lɛ nɔ ɖɔ ɖɔ é nɔ doya nú mǐ bo nɔ dó tɛ́n mǐ kpɔ́n, amɔ̌, adingban sésé wɛ nyí enɛ.​—Xà Jaki 1:13.

Mawu sɔ́ gbɛtɔ́ lɛ sù bo na ye mɛɖesúsínínɔ bɔ ye sixu ɖɔ ɖɔ nǔ lě wɛ emi na wà. Mɛɖesúsínínɔ e Mawu na mǐ bɔ mǐ sixu ɖɔ ɖɔ mǐ na sɛ̀n ɛ é ɖó na sù nukún mǐtɔn mɛ à cé? (Jozuwée 24:15) Amɔ̌ mɛ gègě nɔ jló bo nɔ xò daka mɛ ɖevo lɛ wu wɛ zɔ́n bɔ wuvɛ̌ mimɔ gbà kpé. Nǔagɔwiwa alɔkpa enɛ lɛ nɔ vɛ́ nú Jehovah.​—Xà Bǐbɛ̌mɛ 6:5, 6.

Jehovah nyí Mawu ɖé bo nɔ kpé nukún dó mǐ wu. É jló ɖɔ mǐ ni mɔ gbɛ̀ víví. Zaanɖé dìn ɔ, é na ɖè wuvɛ̌ mimɔ kpo mɛ e nɔ zɔ́n bɔ wuvɛ̌ mimɔ nɔ tíìn lɛ é bǐ kpo síìn. Amɔ̌ dìn ɔ, é ɖó hwɛjijɔ bo dó jó wuvɛ̌ mimɔ dó nú hwenu ɖé. Ðò nùkplɔnkplɔn 8gɔ́ mɛ ɔ, mǐ na mɔ nukúnnú jɛ hwɛjujɔ enɛ ɔ mɛ.​—Xà 2 Piyɛ́ɛ 2:9; 3:7, 13.

5. Nɛ̌ mǐ ka sixu sɛkpɔ Mawu gbɔn?

Jehovah byɔ mǐ ɖɔ mǐ ni sɛkpɔ emi bo nɔ ɖɔ xó nú emi ɖò ɖɛ mɛ. É nɔ keya nú mǐ mɛ ɖokpo ɖokpo. (Ðɛhan 65:3; 145:18) É ɖò gbesisɔmɛ bo na sɔ́ hwɛ kɛ mǐ. É nɔ ɖ’ayi kàn e ván wɛ mǐ ɖè bonu nǔ mǐtɔn na nyɔ́ nukún tɔn mɛ é wu, enyi mǐ na bo tlɛ nɔ ɖè afɔ nyì dò hweɖelɛnu ɔ nɛ. Enɛ wu ɔ, mǐ nyí hwɛhutɔ́ có, mǐ hɛn ɔ mǐ na vɛ́ kpo Mawu kpo ganji.​—Xà Ðɛhan 103:12-14; Jaki 4:8.

Ðó Jehovah wɛ ɖó mǐ wutu ɔ, mǐ ɖó na yí wǎn n’i hú mɛ lɛ bǐ. (Maki 12:30) Nùkpinkplɔn dó Mawu kpo jlǒ tɔn wiwa kpo wu na xlɛ́ wanyiyi e a ɖó n’i é, bɔ a na sɛkpɔ ɛ ganji.​—Xà 1 Timɔtée 2:4; 1 Jaan 5:3.