Xóta Ðevo Lɛ

Wɛn ɖé nú Mɛjitɔ́ Klisanwun Lɛ:

Ðó a nyí mɛjitɔ́ ɖé wutu ɔ, a jló ɖɔ emi na d’alɔ vǐ xɔ akwɛ towe lɛ, bɔ ye na wá yí wǎn nú Jehovah, lobo zé yeɖée jó n’i. Etɛ a ka sixu wà dó d’alɔ ye bɔ ye na sɔnǔ nú baptɛm? Hwetɛnu ye ka na ɖò gbesisɔmɛ bá ɖè afɔ taji enɛ?

Jezu ɖegbe nú ahwanvu tɔn lɛ ɖɔ: “Mi . . . kplɔ́n nǔ akɔta lɛ bǐ, bonu ye ni huzu ahwanvu ce. Mi . . . [bló baptɛm] nú ye.” (Mat. 28:19) Sɔgbe xá xó enɛ ɔ, nǔ taji e é byɔ cobɔ mɛɖé na bló baptɛm é wɛ nyí ɖɔ é na huzu ahwanvu ɖé, tinmɛ tɔn wɛ nyí ɖɔ é na mɔ nukúnnú jɛ nǔkplɔnmɛ Klisu tɔn lɛ wu, bo ɖi nǔ nú ye, lobo ɖó na nɔ lɛ́ xwedó ye télélé. Nǔɖe wɛ bɔ yɔkpɔvu lɛ lɔ tlɛ sixu bló.

Sɔ́ kpɔ́ndéwú ɖagbe ɖ’ayǐ nú vǐ towe lɛ, bo dó nǔkplɔnmɛ Jehovah tɔn lɛ sín kwín dó ayi yetɔn mɛ. (Sɛ́n. 6:6-9) Enɛ byɔ ɖɔ a ni zán nǔ e ɖò wema Etɛ Biblu ka Sixu Kplɔ́n Mǐ? kpo Lee A Na Hɛn Hwiɖée Ðò Wanyiyi Mawu Tɔn Mɛ Gbɔn É kpo mɛ lɛ é dó kplɔ́n nǔgbo nukɔntɔn e ɖò Biblu mɛ lɛ é ye, bo sɔnǔ nú ye bonu ye na lin tamɛ dó nǔgbododó Biblu tɔn lɛ jí, lobo zán gbɛ̀ sɔgbe xá. D’alɔ vǐ towe lɛ bonu ye na kpéwú bo sɔ́ xógbe yeɖesunɔ tɔn lɛ dó tinmɛ nǔ e ye ɖi nǔ na lɛ é. (1 Pi. 3:15, 16a) Nǔkplɔnmɛ kpo wusyɛn dó lanmɛ nú mɛ kpo e ye na mɔ ɖò gɔ̌n towe, bo na lɛ́ mɔ ɖò nǔkplɔnkplɔn yeɖesunɔ tɔn, sinsɛn-biblo xwédo tɔn, kplé agun tɔn lɛ, kpo gbɛ̌didó ɖagbe lɛ kpo hwenu é na d’alɔ ye, bɔ ye na yì nukɔn bo bló baptɛm, lobo lɛ́ wà nǔ hú mɔ̌. D’alɔ ye bonu ye ni nɔ lin tamɛ dó lee ye na sɛkpɔ́ Jehovah d’eji gbɔn é jí hwebǐnu.

Nǔnywɛxó 20:11 ɖɔ: “Enyi vǐ ɖé ɖò walɔ ɖé lɛ zán wɛ ɔ, è nɔ ko tuùn vǐ alɔkpa e é nyí é; é ɖò gbɛ̀ ɖagbe, gbɛ̀ jlɔjlɔ zán wɛ kpo é gbɔ kpo ɔ, è nɔ ko tuùn.” Etɛ lɛ mɔ̌ ka na xlɛ́ ɖɔ vǐ ɖé, é sixu nyí sunnu alǒ nyɔnu, ko huzu ahwanvu Jezu Klisu tɔn bo ɖò gbesisɔmɛ bá bló baptɛm?

Vǐ e ɖò nukɔn yì wɛ bo na bló baptɛm é ɖé ɖó na nɔ setónú nú mɛjitɔ́ tɔn (lɛ). (Mɛ. 5:29; Kolo. 3:20) Biblu ɖɔ xó elɔ dó Jezu wu hwenu e é ɖó xwè 12 é: “É nɔ setónú nú [mɛjitɔ́ tɔn lɛ].” (Luk. 2:51) A sixu ɖó nukún ɖɔ vǐ towe ni nyí mɛ maɖóblɔ̌ ǎ. Amɔ̌, mɛ e jló na bló baptɛm é na tɛ́n kpɔ́n bá nɔ xwedó kpɔ́ndéwú Jezu tɔn, bo na nyí mɛɖé bo na nɔ hwíhwɛ́ éɖée dó mɛjitɔ́ tɔn lɛ glɔ́.

É na nɔ lɛ́ ɖexlɛ́ ɖɔ emi ɖó jlǒ bá kplɔ́n nǔgbo Biblu tɔn lɛ. (Luk. 2:46) Kplé agun tɔn lɛ yiyi bo ɖ’alɔ ɖò ye mɛ ka nɔ jló vǐ towe à? (Ðɛh. 122:1) Biblu xixa hwɛhwɛ kpo nǔkplɔnkplɔn mɛɖesunɔ tɔn kpo sín kɔ ka nɔ xú i à?—Mat. 4:4.

Vǐ e ɖò nukɔn yì wɛ bo na bló baptɛm é nɔ tɛ́n kpɔ́n bo nɔ sɔ́ nǔ Axɔ́suɖuto ɔ tɔn lɛ ɖó tɛn nukɔntɔn ɔ mɛ. (Mat. 6:33) É tuùn azɔ̌ e é ɖó bo na nɔ má nǔ e é ɖi nǔ na lɛ é xá mɛ ɖevo lɛ é. É nɔ ɖ’alɔ ɖò akpáxwé sinsɛnzɔ́ ɔ tɔn vovo lɛ mɛ, bɔ ɖiɖexlɛ́ mɛ̌si tɔn lɛ kpo azɔ̌mɛvígbɛ́ tɔn lɛ kpo ɖɔ emi nyí ɖokpo ɖò Kúnnuɖetɔ́ Jehovah tɔn lɛ mɛ nɔ hu winnya n’i ǎ. É nɔ wlíbo nú azɔ̌ ɖěɖee è nɔ ɖè n’i ɖò Kplé Gbɛzán kpo Sinsɛnzɔ́ kpo tɔn hwenu lɛ é.

É na nɔ lɛ́ tɛ́n kpɔ́n bo nɔ mimɛ̌ jí ɖò walɔ lixo, gbɔn alɔ nyinyi nú gbɛ̌ nyanya lɛ gblamɛ. (Nǔx. 13:20; 1 Kɔ. 15:33) Enɛ na nɔ tɔ́n ɖò nǔ ɖěɖee nɔ jló è ɖò nǔxixo lɛ, fímu lɛ, tuto televiziɔn jí tɔn lɛ, ayihundida video jí tɔn lɛ, kpo Ɛntɛnɛti zinzan kpo linu lɛ é mɛ.

Mɛ gegě wà nǔ sɔgbe xá gǎn ɖěɖee mɛjitɔ́ yetɔn lɛ dó tawun lɛ é, bo sɔ́ nǔgbo ɔ dó ɖó yetɔn, lobo jɛxa bo bló baptɛm ɖò hwenu e ye ɖò vǔ é. Ee mi na ɖò alɔ dó vǐ mitɔn lɛ wɛ, bonu ye na kpé nǔ taji enɛ wu ɖò kancica e ye ɖó xá Jehovah é linu é ɔ, Jehovah ni kɔn nyɔna tɔn dó mi jí.

Wɛn ɖé nú Wɛnjlatɔ́ E Ma Ko Bló Baptɛm Ǎ É:

Wǔjɔmɛ ɖé wɛ é nyí ɖɔ a nyí wɛnjlatɔ́ e ma ko bló baptɛm ǎ é ɖé, bo nɔ w’azɔ̌ xá agun ɔ. É jɛxa ɖɔ è ni kpa we ɖó nukɔn e a yì ɖò gbigbɔ lixo é wu. A wá tuùn Mawu, gbɔn Xó tɔn kplɔnkplɔn gblamɛ, lobo ɖó nǔɖiɖi nú akpá tɔn lɛ.—Jaan 17:3; Ebl. 11:6.

Cobonu a na jɛ nǔ kplɔ́n xá Kúnnuɖetɔ́ Jehovah tɔn lɛ jí ɔ, a sixu ko nɔ dó hǎ xá tutoblonunu sinsɛn tɔn ɖevo, alǒ a sixu nɔ ma ɖó kancica xá ye mɛ ɖebǔ. Vlafo a nɔ ɖ’alɔ ɖò nǔwiwa e ma sɔgbe xá nǔgbododó Biblu tɔn lɛ ǎ é ɖevo lɛ mɛ. Amɔ̌ dìn ɔ, hwɛ e a hu wá yì lɛ é vɛ́ nú we tawun, bɔ a jó gbɛ̀ nyanya zinzan dó, bo kánɖeji bá nɔ wà nǔ e sɔgbe ɖò Mawu nukúnmɛ é, dó ɖè nǔɖiɖi towe xlɛ́.—Mɛ. 3:19.

Ðò alɔ ɖevo mɛ ɔ, vlafo “sín hwenu e a ɖò vǔ ɔ” wɛ a ko tuùn nǔwlanwlán mímɛ́ lɛ. Mɔ̌ mɛ ɔ, a sɔ́ ɖ’alɔ ɖò walɔ e ma sɔgbe xá Klisanwun ǎ lɛ é kpo hwɛhuhu syɛnsyɛn lɛ kpo mɛ ǎ. (2 Tim. 3:15) A kplɔ́n bo nɔ ɖí xwi xá kɔgbidínúmɛ gbɛ̌ lɛ tɔn, kpo nǔ ɖevo ɖěɖee na dɔn we bɔ a na wà nǔ e ma sɔgbe ɖò Jehovah nukúnmɛ ǎ lɛ é kpo. A ɖè nǔɖiɖi xlɛ́ gbɔn sinsɛn-biblo nǔgbo ɔ wu títɛ́dó kpo nǔ e a ɖi nǔ na lɛ é mímá xá mɛ ɖevo lɛ kpo gblamɛ. È kplɔ́n azɔ̌ we ɖò sinsɛnzɔ́ Klisanwun tɔn ɔ mɛ. Dìn ɔ, hwiɖesunɔ wá gbeta ɔ kɔn, bo nyí wɛnjlatɔ́ e ma ko bló baptɛm ǎ é ɖé, lobo nɔ sɛn Jehovah.

Enyi vǔ wɛ a ko kplɔ́n ali Jehovah tɔn lɛ ɖè, alǒ nukɔnmɛ wɛ a wá tuùn Jehovah ɖè ɔ, a sixu ko ɖò tamɛ lin dó nukɔnyiyi ɖò gbigbɔ lixo sín afɔ we elɔ lɛ ɖiɖe wu wɛ: mɛɖée zízé jó nú Jehovah kpo baptɛm kpo. A na sɔ́ hwiɖée jó nú Jehovah gbɔn ɖɛxixo sɛ́dó è, bo ɖɔ gbeta e kɔn hwiɖesunɔ wá bo na nyí étɔn bǐ mlɛ́mlɛ́ kaka sɔyi é n’i gblamɛ. (Mat. 16:24) Bo na dó xlɛ́ ɖɔ a ko wà mɔ̌ ɔ, a na bló baptɛm ɖò sin mɛ. (Mat. 28:19, 20) Gbɔn hwiɖée zízé jó nú Mawu kpo baptɛm kpo gblamɛ ɔ, a na huzu sinsɛnzɔ́watɔ́ Jehovah Mawu tɔn e è ɖegbe na é ɖé. Wǔjɔmɛ jiwǔ ɖé wɛ nyí enɛ!

É ɖò mɔ̌ có, lee Biblu kplɔnkplɔn towe ko xlɛ́ gbɔn é ɔ, a sixu mɔ mɛtɛnkpɔn alɔkpa alɔkpa lɛ. Flín ɖɔ táan kpɛɖé ɖò baptɛm Jezu tɔn gudo ɔ, ‘gbigbɔ ɔ kplá ɛ yì gbetótló mɛ bonu Awoví na tɛ́n ɛ kpɔ́n.’ (Mat. 4:1) Ðó a nyí ahwanvu Klisu tɔn ɖé wutu ɔ, ɖò baptɛm towe gudo ɔ, a sixu ɖó nukún mɛtɛnkpɔn lɛ d’eji. (Jaan 15:20) Alɔkpa vovo wɛ ɖè. Xwédo towe sixu klán gbè xá we. (Mat. 10:36) Wemaxɔmɛvígbɛ́ towe lɛ, azɔ̌gbɛ́ towe lɛ, kpo xɔ́ntɔn towe ɖ’ayǐ tɔn lɛ kpo sixu cá nú we. Nɔ flín xó Jezu tɔn elɔ e è mɔ ɖò Maki 10:29, 30 mɛ é hwebǐnu: “Má ɖɔ nǔgbo nú mi: mɛ e na jó xwé tɔn dó, bo na jó nɔví tɔn nyɔnu, nɔví tɔn sunnu dó, bo na jó tɔ́ tɔn kpodo nɔ tɔn kpo dó, bo na jó vǐ dó, bo na jó gle dó, ɖó nyɛ kpodo Wɛnɖagbe ɔ kpan wu ɔ, é na mɔ xwé, lobo mɔ nɔví sunnu, nɔví nyɔnu, bo na mɔ nɔ, bo na mɔ vǐ, bo na mɔ gle, bɔ nǔ enɛ e é jó dó lɛ ɔ, é na mɔ mɔhunkɔtɔn donu kanweko (100) hwe elɔ nu dìn; é ka na lɛ́ mɔ wuvɛ̌, é ka wá yá ɔ, é na mɔ gbɛ̀ mavɔmavɔ.” Enɛ wu ɔ, kpò ɖò azɔ̌ wà wɛ syɛnsyɛn bo na tɛ́dó Jehovah wu, lobo zán gbɛ̀ sɔgbe xá nǔgbododó tɔn jlɔjlɔ lɛ.

Enyi a jló na bló baptɛm hǔn, ɖɔ nú titoblonunutɔ́ kplékplé mɛxo lɛ tɔn tɔn. Mɛxo agun tɔn lɛ na ɖɔ xó xá we dó nǔkanbyɔ e bɔ dó wɛn elɔ wu lɛ é jí, bo na kpɔ́n ɖɔ a ko jɛxa bo na bló baptɛm alǒ gbɔ à jí. A sixu jɛ nǔkanbyɔ enɛ lɛ gbéjé kpɔ́n jí hwiɖokponɔ ɖò nǔkplɔnkplɔn mɛɖesunɔ tɔn towe lɛ hwenu.

Bo na dó sɔnǔ nú xóɖɔɖókpɔ́ enɛ lɛ hǔn, zǎn hwenu dó xà wemafɔ Biblu tɔn e ɖ’emɛ lɛ é, lobo lin tamɛ dó ye jí. A sixu wlan nǔɖe lɛ dó wema ɔ mɛ alǒ dó fí ɖevo. A sixu zán nǔ enɛ lɛ e a wlan é, bo lɛ́ jó wema elɔ dó hunhun ɖò hwenu e a na ɖò xó ɖɔ ɖó kpɔ́ xá mɛxo lɛ wɛ é. Enyi nukúnnú mimɔ jɛ nǔkanbyɔ enɛ lɛ ɖě wu vɛwǔ nú we hǔn, vo bo ba alɔdó ɖò mɛ e nɔ kplɔ́n Biblu xá we é alǒ mɛxo agun tɔn lɛ gɔ́n.

A ɖò xó ɖɔ ɖó kpɔ́ xá mɛxo agun tɔn lɛ wɛ hǔn, ma lin ɖɔ emi ɖó na na xósin gaga lɛ alǒ ee gɛ́dɛ́ lɛ é nú nǔkanbyɔ lɛ ó. Xósin e bɔkun, bo ɖò tlɔlɔ, lobɔ a zán xógbe hwiɖesu tɔn lɛ dó na lɛ é na nyɔ́. É lɛ́ nyɔ́ ɖɔ a ni dó gesí wemafɔ Biblu tɔn ɖokpo alǒ we ɖò hwenu e a ɖò xósin na nú nǔkanbyɔ lɛ wɛ é.

Enyi nukúnnúmɔjɛnǔmɛ e a ɖó dó nǔkplɔnmɛ nukɔntɔn Biblu tɔn lɛ wu é ma ko yì bǎ ǎ ɔ, mɛxo agun tɔn lɛ na bló tuto bɔ è na d’alɔ we, bonu a na kpé nǔ wu bo zán xógbe hwiɖesunɔ tɔn lɛ dó na xósin sɔgbe xá nukúnnúmɔjɛnǔmɛ Biblu tɔn e a ɖó é, bo na jɛxa bá bló baptɛm ɖò nukɔnmɛ.

[Ayiɖonuwu nú mɛxo agun tɔn lɛ: È na alixlɛ́mɛ lɛ dó lee è na kpé nukún dó xóɖɔɖókpɔ́ lɛ wu xá mɛ e jló na bló baptɛm lɛ é gbɔn é wu ɖò wexwɛ 208-212 jí.]