Xóɖɔɖókpɔ́ Tasuna Tɔn Xá Mɛ E Jló Na Bló Baptɛm lɛ É

Hwɛhwɛ ɔ, kpléɖókpɔ́ lɛdo tɔn kpo kpléɖókpɔ́ ɖaxó kpo ɖěɖee Kúnnuɖetɔ́ Jehovah tɔn lɛ nɔ bló lɛ é jí wɛ è nɔ bló baptɛm ɖè. Ðò xóɖiɖɔ baptɛm tɔn ɔ sín vivɔnu ɔ, xóɖɔtɔ́ ɔ na byɔ mɛ e jló na bló baptɛm lɛ é ɖɔ ye ni site, bo zé gbè dó jǐ dó na xósin nú nǔkanbyɔ we elɔ lɛ:

1. A ka ko lɛkɔ sín hwɛ towe lɛ gudo, bo zé hwiɖée jó nú Jehovah, lobo yí gbè nú hwlɛngán sín ali e é hun gbɔn Jezu Klisu jí é à?

2. A ka mɔ nukúnnú jɛ wu ɖɔ baptɛm towe na xlɛ́ ɖɔ a nyí ɖokpo ɖò Kúnnuɖetɔ́ Jehovah tɔn lɛ mɛ ɖò kɔnɖókpɔ́ mɛ kpo tutoblonunu Jehovah tɔn kpo à?

Xósin “ɛɛn” e mɛ e jló na bló baptɛm lɛ é na na nú nǔkanbyɔ enɛ lɛ é na xlɛ́ ɖɔ ye “sɔ́ nu [yetɔn] dó ɖɔ na ɖò mɛ bǐ nukɔn” ɖɔ emi ɖi nǔ nú gbɛxixɔ ɔ, lobo sɔ́ emiɖée jó nú Jehovah bǐ mlɛ́mlɛ́. (Hlɔ. 10:9, 10) É na nyɔ́ ɖɔ mɛ e jló na bló baptɛm lɛ é ni xoɖɛ, bo lin tamɛ dó nǔkanbyɔ enɛ lɛ jí jɛ nukɔn, enɛ ɔ, ye na sixu na xósin ɔ sɔgbe xá nǔ e jí yeɖesunɔ kú dó lɛ é.

A ka ko zé hwiɖée jó nú Jehovah ɖò ɖɛ mɛ, bo d’akpá n’i ɖɔ emi na sɛn éɖokponɔ géé, bo lɛ́ sɔ́ jlǒ tɔn wiwa dó ɖó nǔ taji hugǎn ɖò gbɛzán emitɔn mɛ à?

A ka kúdeji bǐ mlɛ́mlɛ́ ɖɔ emi ɖó na bló baptɛm dìn e ali tɔn ɖò hunhun nú we wɛ é à?

Etɛ é ka jɛxa ɖɔ è ni dó bá dó bló baptɛm? (1 Tim. 2:9, 10; Jaan 15:19; Fili. 1:10)

Mǐ ɖó na nɔ sɔnǔ “ɖò yɛ̌yi mɛ, ɖò jlɛ̌ jí” dó xlɛ́ ɖɔ mǐ “nɔ sí Mawu.” Enɛ wu ɔ, mɛ e jló na bló baptɛm lɛ é ɖó na dó tɔlɛwu e na ɖè mɛ̌ xlɛ́ lɛ é, alǒ nǔ e wu è wlan acagbe lɛ alǒ xógbe ɖevo lɛ dó é ǎ. Nǔsisɔ yetɔn ɖó na mɛ́, cí kluyɔɔ ǎ, zɛkpá ǎ, lobo ka jɛxa ninɔmɛ ɔ.

Nɛ̌ mɛɖé ka ɖó na wà nǔ gbɔn hwenu e é ɖò baptɛm bló wɛ é? (Luk. 3:21, 22)

Baptɛm Jezu tɔn nyí kpɔ́ndéwú ɖé nú Klisanwun lɛ ɖò baptɛm biblo linu égbé. É mɔ nǔ jɛ wu ɖɔ baptɛm biblo nyí afɔ taji ɖé bɔ è nɔ ɖé, lobɔ enɛ tɔ́n ɖò linlin tɔn kpo nǔwiwa tɔn lɛ kpo mɛ. Enɛ wu ɔ, fí e è nɔ bló baptɛm ɖè é ɖó na nyí ayihundatɛn ɖé, fí e è na lɛ̀ tɔ̀ ɖè é, alǒ fí e walɔ ɖevo ɖěɖee na ɖè yɛ̌yi sín nǔwiwa ɔ wu lɛ é na tɔ́n ɖè é ɖé ǎ; Klisanwun yɔyɔ̌ ɖé ka na wà nǔ cí nǔ ɖɔ ɖuɖeji ɖaxó ɖé wɛ é ɖó ɖɔhun ǎ. Awǎjijɛ sín hwenu ɖé wɛ baptɛm nyí có, è ɖó na j’awǎ ɔ b’ɛ na nɔ yɛ̌yi mɛ.

Nɛ̌ kplé lɛ yiyi ɖò gbesisɔmɛ kpo gbɛ̌didó xá agun ɔ kpo ka na d’alɔ we bɔ hwiɖée e a zé jó nú Jehovah é na kpa we gbɔn?

Enyi a bló baptɛm gudo ɔ, etɛwu é ka ɖò taji ɖɔ a ni kpó ɖò nǔkplɔnkplɔn mɛɖesunɔ tɔn kpo alɔɖiɖó ɖò sinsɛnzɔ́ ɔ mɛ hwɛhwɛ kpo sín tuto ɖagbe ɖé xwedó wɛ?

ALIXLƐ́MƐ LƐ NÚ MƐXO AGUN TƆN LƐ

Enyi wɛnjlatɔ́ e ma ko bló baptɛm ǎ é ɖé ɖɔ ɖɔ emi jló na bló baptɛm ɔ, è ɖó na dó wusyɛn lanmɛ n’i ɖɔ é ni gbéjé xóta “Nǔkanbyɔ lɛ nú Mɛ E Jló Na Bló Baptɛm lɛ É” kpɔ́n kpo sɔxwixwe kpo, ɖò wema elɔ sín wexwɛ 185-207 jí. È ɖó na dɔn ayi tɔn wá xóta “Wɛn ɖé nú Wɛnjlatɔ́ E Ma Ko Bló Baptɛm Ǎ É,” ee bɛ́sín wexwɛ 182 jí, bo tinmɛ lee é sixu sɔnǔ nú xó e é na ɖɔ ɖó kpɔ́ xá mɛxo agun tɔn lɛ é gbɔn é jí. Lee è tinmɛ gbɔn ɖò finɛ é ɔ, mɛ e jló na bló baptɛm é sixu zán nǔ e é wlan ɖ’ayǐ lɛ é, bo sixu lɛ́ jó wema elɔ dó hunhun ɖò xóɖɔɖókpɔ́ lɛ hwenu. Amɔ̌, é byɔ ɖɔ mɛɖé ni ba dò nú nǔkanbyɔ enɛ lɛ xá ɛ hwɛ̌ cobonu é na ɖɔ xó dó ye jí xá mɛxo agun tɔn lɛ ǎ.

Nú mɛɖé jló na bló baptɛm ɔ, é ɖó na ɖɔ nú titoblonunutɔ́ kplékplé mɛxo lɛ tɔn tɔn. Enyi mɛ e byɔ ɖɔ emi na bló baptɛm é ko mɔ hwenu bo xà “Nǔkanbyɔ lɛ nú Mɛ E Jló Na Bló Baptɛm lɛ É” gudo ɔ, titoblonunutɔ́ kplékplé mɛxo lɛ tɔn tɔn na kanbyɔ mɛ ɔ ɖɔ é ko zé éɖée jó nú Jehovah ɖò ɖɛ mɛ bá wà jlǒ Tɔn à jí. Enyi mɛ ɔ ko zé éɖée jó nú Jehovah ɔ, titoblonunutɔ́ kplékplé mɛxo lɛ tɔn tɔn na bló tuto, bɔ mɛxo agun tɔn we na gbéjé “Nǔkanbyɔ lɛ nú Mɛ E Jló Na Bló Baptɛm lɛ É” kpɔ́n xá mɛ ɔ. Mɛxo agun tɔn vovo we wɛ na gbéjé akpáxwé we lɛ kpɔ́n xá ɛ. É byɔ ɖɔ è ni nɔte bonu kpléɖókpɔ́ lɛdo tɔn ɖé alǒ kpléɖókpɔ́ ɖaxó ɖé ni sɛkpɔ́ hwɛ̌ cobo ɖɔ xó ɖó kpɔ́ dó nǔkanbyɔ lɛ jí xá mɛ ɔ ǎ.

Hwɛhwɛ ɔ, è sixu gbéjé akpáxwé we lɛ kpɔ́n ɖò ayijinjɔn we hwenu, bɔ ɖokpo ɖokpo na ɖu ganxixo ɖokpo mɔ̌; nǔɖe ka nyla ɖ’emɛ ɖɔ è ni zán táan hú mɔ̌ ǎ, enyi é byɔ ɖó mɔ̌ ɔ nɛ. È ɖó na hun nǔ sín ayijinjɔn ɖokpo ɖokpo nu, bo lɛ́ sú ta na kpo ɖɛ kpo. Mɛ e jló na bló baptɛm ɔ é kpo mɛxo agun tɔn lɛ kpo ɖebǔ ɖó na nɔ kplakpla jí, ɖò nǔkanbyɔ lɛ gbígbéjé kpɔ́n hwenu ǎ. Mɛxo agun tɔn ɖěɖee è ɖè bɔ ye na kpé nukún dó xóɖɔɖókpɔ́ lɛ wu lɛ é ɖó na sɔ́ dó ɖó nǔ taji hugǎn ɔ ɖò tuto yetɔn mɛ.

Hwɛhwɛ ɔ, é nɔ nyɔ́ hugǎn ɖɔ è ni gbéjé nǔkanbyɔ lɛ kpɔ́n xá mɛ e jló na bló baptɛm lɛ é ɖokpo ɖokpo ɖó vovo, è na xò ye kplé ǎ. Gbɔn xósin e mɛ e jló na bló baptɛm é na na nú nǔkanbyɔ ɖokpo ɖokpo é gblamɛ ɔ, mɛxo agun tɔn lɛ na mɔ lee nukúnnúmɔjɛnǔmɛ tɔn gɔ́ngɔ́n sɔ́ é céɖécéɖé, bo na tuùn ɖɔ é ɖò gbesisɔmɛ bá bló baptɛm alǒ gbɔ. Gɔ́ na ɔ, mɛ e byɔ ɖɔ emi na bló baptɛm é sixu vo ganji bo ɖɔ nǔ e ɖò xò tɔn mɛ é ɖò ninɔmɛ enɛ mɛ. È sixu gbéjé akpáxwé enɛ lɛ kpɔ́n xá asú kpo asì kpo lɛ ɖó kpɔ́.

Enyi nyɔnu ɖé wɛ nú mɛ e jló na bló baptɛm é ɔ, è ɖó na kpé nukún dó xóɖɔɖókpɔ́ lɛ wu xá ɛ ɖò fí e mɛ ɖevo lɛ sixu mɔ mɛ ɖè, bo ma ka sixu sè xò e ɖɔ wɛ è ɖè é ǎ ɖè lɛ é. Enyi é byɔ ɖɔ mɛɖé ni gɔ́ nú mɛ ɔ, mɛxo agun tɔn ɖé alǒ devízɔ́watɔ́ sinsɛnzɔ́wiwa tɔn ɖé wɛ mɛ ɔ ɖó na nyí, bo ka na sín akpáxwé e na gbéjé kpɔ́n wɛ è ɖè é wu, lee è tɛɖɛ̌ jí gbɔn bɔ d’ewu é.

Ðò agun ɖěɖee mɛ mɛxo agun tɔn ma sukpɔ́ ɖè ǎ lɛ é mɛ ɔ, devízɔ́watɔ́ sinsɛnzɔ́wiwa tɔn ɖěɖee jɛxa, bo ka ko ɖexlɛ́ ɖɔ emi ɖó linlin e sɔgbe é kpo nukúnnúmɔjɛnǔmɛ kpo lɛ é sixu kpé nukún dó nǔkanbyɔ baptɛm tɔn ɖěɖee ɖò “Akpáxwé 1: Nǔ E Klisanwun lɛ Ði Nǔ Na lɛ É” mɛ lɛ é wu. Mɛxo agun tɔn lɛ kɛɖɛ wɛ ɖó na kpé nukún dó “Akpáxwé 2: Klisanwun Gbɛ̀ Zinzan” wu. Enyi agun ɔ ma ɖó nɔví sunnu e jɛxa é gegě ǎ ɔ, è sixu ɖɔ nú nukúnkpénuwutɔ́ lɛdo tɔn ɔ, b’ɛ na kpɔ́n ɖɔ agun e sɛkpɔ́ é ɖé ka na sixu d’alɔ à jí.

Nú mɛ e jló na bló baptɛm é ma ko ɖó xwè 18 ǎ ɔ, mɛjitɔ́ tɔn (lɛ) ɖó na nɔ ayijinjɔn lɛ tɛnmɛ, enyi é (ye) ɖò agun mɛ ɔ nɛ. Enyi mɛjitɔ́ tɔn (lɛ) ma sixu nɔ ayijinjɔn lɛ tɛnmɛ ǎ ɔ, mɛxo agun tɔn we (alǒ mɛxo agun tɔn ɖé kpo devízɔ́watɔ́ sinsɛnzɔ́wiwa tɔn ɖé kpo, sɔgbe xá akpáxwé e na gbéjé kpɔ́n wɛ è ɖè é) wɛ ɖó na gbéjé akpáxwé ɖokpo ɖokpo kpɔ́n xá ɛ.

Mɛxo agun tɔn lɛ na kúdeji ɖɔ mɛ e jló na bló baptɛm é mɔ nukúnnú jɛ nǔkplɔnmɛ dodó Biblu tɔn lɛ mɛ ɖó bǎ e ɖò jlɛ̌ jí é ɖé mɛ. Gɔ́ na ɔ, ye ɖó na kúdeji ɖɔ nǔgbo ɔ nɔ xɔ akwɛ n’i tawun, bɔ é nɔ lɛ́ ɖexlɛ́ ɖɔ emi ɖó sísí e jɛxa é nú tutoblonunu Jehovah tɔn alǒ gbɔ. Enyi mɛ ɔ ma mɔ nukúnnú jɛ nǔkplɔnmɛ dodó Biblu tɔn lɛ wu ǎ ɔ, mɛxo agun tɔn lɛ na bló tuto bɔ è na d’alɔ ɛ, bonu é na jɛxa bá bló baptɛm ɖò nukɔnmɛ. Mɛ ɖevo lɛ tíìn bɔ é sixu byɔ ɖɔ è ni na hwenu ye, bonu ye na ɖexlɛ́ ɖɔ Mawuxóɖiɖɔzɔ́ ɔ alǒ yeɖée hwíhwɛ́ hwíhwɛ́ dó tutoblonunu ɔ glɔ́ ɖò taji. Mɛxo agun tɔn lɛ wɛ na zán nǔnywɛ dó kpɔ́n táan nabi e ye na zán ɖò akpáxwé ɖokpo ɖokpo jí é, bo na mɔ tɛn dó kpɔ́n ɖɔ mɛ ɔ ka ɖò gbesisɔmɛ bǐ mlɛ́mlɛ́ nú baptɛm alǒ gbɔ à jí. Nǔgbo wɛ ɖɔ è sixu zán hwenu ɖò nǔkanbyɔ ɖé lɛ jí hú ɖevo lɛ, é ɖò mɔ̌ có, nǔkanbyɔ lɛ bǐ wɛ è ɖó na gbéjé kpɔ́n.

Mɛxo agun tɔn ɖěɖee è ɖè bɔ ye gbéjé nǔkanbyɔ lɛ kpɔ́n xá mɛ lɛ é, na mɔ yeɖée ɖò akpáxwé wegɔ́ ɔ gbígbéjé kpɔ́n gudo, bo na wá gbeta ɔ kɔn ɖɔ è ɖó na yí gbè bɔ mɛ ɔ na bló baptɛm alǒ gbɔ. Mɛxo agun tɔn lɛ na sɔ́ ayi ɖó kplɔ́n e mɛ ɔ yí é, nǔwukpíkpé tɔn lɛ, kpo ninɔmɛ ɖevo lɛ kpo jí. Mɛ ɖěɖee sɔ́ ayi yetɔn jó nú Jehovah bo mɔ nukúnnú jɛ nǔgbo Biblu tɔn taji lɛ mɛ lɛ é wɛ è ɖó na yí gbè na. Alɔ e mi na dó mɛ ɖěɖee jló na bló baptɛm lɛ é kpo wanyiyi kpo é na d’alɔ ye, bɔ ye na sɔnǔ ɖ’ayǐ ganji bá wà devízɔ́watɔ́ wɛnɖagbe ɔ tɔn sín azɔ̌ yetɔn.

Enɛ gudo ɔ, mɛxo agun tɔn e è ɖè lɛ é ɖokpo alǒ we lɛ na mɔ mɛ ɔ, bo na ɖɔ n’i ɖɔ é jɛxa bá bló baptɛm alǒ gbɔ. Enyi mɛ ɔ jɛxa wɛ ɔ, mɛxo agun tɔn lɛ ɖó na gbéjé xóta “Xóɖɔɖókpɔ́ Tasuna Tɔn Xá Mɛ E Jló Na Bló Baptɛm lɛ É” kpɔ́n xá ɛ, ɖò wexwɛ 206-207 jí. Enyi mɛ e jló na bló baptɛm é ma ko kplɔ́n wema Kplɔ́n Mǐ kpo Hɛn Hwiɖée Ðò Wanyiyi Mawu Tɔn Mɛ kpo fó ǎ ɔ, mɛxo agun tɔn lɛ ɖó na dó wusyɛn lanmɛ n’i ɖɔ é ni wà mɔ̌ ɖò baptɛm tɔn gudo. Mi ɖɔ nú mɛ e jló na bló baptɛm é ɖɔ è na wlan azǎn e gbè é bló baptɛm é dó wɛnjlatɔ́ sín káti tɔn jí. Mi flín i ɖɔ mɛxo agun tɔn lɛ nɔ xò nǔ mɛɖesunɔ tɔn enɛ lɛ kplé, bonu tutoblonunu ɔ na dó sixu kpé nukún dó sinsɛn sín azɔ̌ Kúnnuɖetɔ́ Jehovah tɔn lɛ tɔn lɛ wu, gbɔn gbɛ̀ ɔ bǐ mɛ. Ye nɔ lɛ́ wà mɔ̌ bonu é na dó sixu ɖ’alɔ ɖò gbigbɔ sín nǔ lɛ mɛ, bɔ è na lɛ́ nɔ gudo n’i ɖò gbigbɔ lixo. Gɔ́ na ɔ, mɛxo agun tɔn lɛ sixu flín wɛnjlatɔ́ yɔyɔ̌ lɛ ɖɔ è nɔ zán nǔ mɛɖesunɔ tɔn yetɔn lɛ sɔgbe xá Sɛ́n E Kúnnuɖetɔ́ Jehovah Tɔn lɛ Nɔ Xwedó Gbɔn Gbɛ̀ ɔ Bǐ Mɛ Dó Alɔcyɔncyɔn Nǔ lɛ Jí Wu lɛ É, ee ɖò jw.org jí é. Hwɛhwɛ ɔ, cɛju wǒ alǒ hwe hú mɔ̌ wɛ è ɖó na zán nú xóɖɔɖókpɔ́ enɛ.

Enyi mɛɖé bló baptɛm bɔ é bló xwè ɖokpo gudo ɔ, mɛxo agun tɔn we ɖó na mɔ ɛ, bo dó wusyɛn lanmɛ n’i, lobo ɖè wě e na d’alɔ ɛ lɛ é xá ɛ. Mɛxo agun tɔn lɛ ɖokpo ɖó na nyí gbɛ̌ta kúnnuɖegbé tɔn e mɛ mɛ ɔ ɖè é sín nukúnkpénuwutɔ́. Enyi mɛ ɔ ma ko ɖó xwè 18 ǎ wɛ nyí ɔ, mɛjitɔ́ tɔn nǔɖitɔ́ lɛ ɖó na nɔ tɛn tɔn mɛ. Xóɖɔɖókpɔ́ enɛ ɖó na dó wusyɛn lanmɛ nú mɛ tawun. Mɛxo agun tɔn lɛ na ɖɔ xó xá ɛ dó nukɔnyiyi e é ɖó ɖò gbigbɔ lixo é jí, bo na ɖè wě tawun tawun ɖé lɛ xá ɛ dó lee é sixu kpó ɖò aca ɖagbe ɖé ɖó wɛ ɖò ali elɔ lɛ nu gbɔn é jí: nǔkplɔnkplɔn mɛɖesunɔ tɔn, Biblu xixa ayihɔngbe ayihɔngbe, sinsɛn-biblo xwédo tɔn, kplé lɛ yiyi bo ɖ’alɔ ɖò ye mɛ ɖò gbesisɔmɛ, kpo alɔɖiɖó ɖò Mawuxóɖiɖɔzɔ́ ɔ mɛ aklunɔzán gbla ɖokpo ɖokpo mɛ kpo. (Efɛ. 5:15, 16) Enyi é ma ko kplɔ́n wema Kplɔ́n Mǐ kpo Hɛn Hwiɖée Ðò Wanyiyi Mawu Tɔn Mɛ kpo fó ǎ ɔ, mɛxo agun tɔn lɛ ɖó na bló tuto, bɔ mɛɖé na d’alɔ ɛ b’ɛ na wà mɔ̌. Mɛxo agun tɔn lɛ ɖó na sɔ́ wanyiyi dó kpa ɛ ganji. Hwɛhwɛ ɔ, wěɖexámɛ kpo alixlɛ́mɛ lɛ kpo dó nǔ ɖokpo alǒ we jí ko kpé.