Lee A Sixu Bló Gbɔn Bɔ Biblu Kplɔnkplɔn Towe Na Ðò Gbɛ̀, Bo Na Lɛ́ Víví Hugǎn É

NǓDÓXƐSI ɖé kpannukɔn Jozuwée. É na kplá akɔta Izlayɛli tɔn ɔ yì Akpádídó Yikúngban ɔ jí, bɔ afɔklɛ́nnú ɖaxó lɛ ka ɖò nukɔn n’i. Amɔ̌, Jehovah na jiɖe è ɖɔ é na kpa ɛ, bo lɛ́ dó wusyɛn lanmɛ n’i ɖɔ: ‘Kpan akɔ́n bo dó gǎn. Nyì Sɛ́n ce lɛ bǐ. Nɔ xà zǎn kpo kéze kpo, bo nɔ bló nǔ e è ɖɔ d’emɛ ɔ bǐ ɖ’eji. Enɛ ɔ, a sɔ́ nùɖé bo na wà ɔ, a na mɔ nu tɔn. Lee nǔ na nyɔ́ nú we gbɔn ɔ nɛ.’—Joz. 1:7, 8.

Ðò ‘hwenu vɛwǔ elɔ lɛ’ mɛ ɔ, wuvɛ̌ ɖaxó lɛ nɔ kpannukɔn mǐ lɔ. (2 Tim. 3:1) Jozuwée ɖɔhun ɔ, enyi mǐ xwedó wě e Jehovah ɖè xá ɛ lɛ é ɔ, mǐ lɔ na mɔ nǔ e mǐ na wà lɛ é sín nu. Mǐ sixu xà Biblu ɖò gbesisɔmɛ, bo na xwedó nugbodòdó tɔn lɛ ɖò mɛtɛnkpɔn e na kpannukɔn mǐ lɛ é mɛ.

Amɔ̌, gègě mǐtɔn sixu yí gbè ɖɔ mǐ kún nyí nùkplɔntɔ́ ɖagbe hugǎn ó, bɔ nùkplɔnkplɔn nɔ lɛ́ vɛwǔ nú mǐ. É ɖò mɔ̌ có, ɖó Biblu kpinkplɔn nyí nǔ taji wutu ɔ, gbějé gbàví “Tɛ́n Alixlɛ́mɛ Elɔ lɛ Kpɔ́n” kpɔ́n bá mɔ alixlɛ́mɛ e sixu zɔ́n bɔ nùkplɔnkplɔn towe na ɖò gbɛ̀, bo na lɛ́ víví hugǎn é.

Ðɛhanwlantɔ́ ɔ jihan ɖɔ: “Kplá mì gbɔn nǔ e a zɔ́n lɛ sín ali jí, ɖó nǔ e a zɔ́n lɛ wiwa nɔ víví nú mì.” (Ðɛh. 119:35) Xó Mawu tɔn kplɔnkplɔn sixu nyí nùɖé bo na nɔ víví nú we tawun. Ajɔ xɔ akwɛ lɛ ɖò te kpɔ́n we hwenu e a na ɖò dɔkun gbigbɔ tɔn lɛ kije wɛ é.

Nugbǒ wɛ ɖɔ a na nɔ nukɔn nú akɔta ɖé Jozuwée ɖɔhun ǎ, amɔ̌, hwi lɔ ɖó wuvɛ̌ hwiɖesunɔ tɔn lɛ. Enɛ wu ɔ, nɔ kplɔ́n nǔ e è ko wlan ɖ’ayǐ nú lè towe é, bo nɔ xwedó. Enyi a wà mɔ̌ ɔ, a na mɔ nǔ e a na wà lɛ é sín nu, bɔ nǔ na nyɔ́ nú we.

TƐ́N ALIXLƐ́MƐ ELƆ LƐ KPƆ́N

Xoɖɛ cobo jɛ nǔ kplɔ́n jí. Linlin Mawu Nǔbǐwukpétɔ́ ɔ tɔn lɛ wɛ è wlan dó Biblu mɛ nú lè towe. Enɛ wu ɔ, enyi a ɖò Biblu xà wɛ hǔn, nɔ ba alɔdo tɔn, bo na dó mɔ nukúnnú jɛ mɛ, bo hɛn nǔ lɛ dó ayi mɛ, lobo zán ɖò gbɛzán towe mɛ.—Ɛsd. 7:10, nwt.
Kàn nǔ elɔ lɛ byɔ hwiɖée hwenu e a ɖò Biblu alǒ wema junjɔn Biblu jí lɛ xà wɛ é. ‘Etɛ akpáxwé elɔ ka kplɔ́n mì dó Jehovah wu? Nɛ̌ enɛ ka kúnkplá wɛn taji e ɖò Xó tɔn mɛ é gbɔn? Nɛ̌ un ka sixu zán nùkplɔnmɛ enɛ lɛ dó d’alɔ mɛ ɖevo lɛ gbɔn?’
Lin tamɛ dó nǔ e a kplɔ́n lɛ é jí. A ɖò nǔ xà wɛ hǔn, nɔte bo lin tamɛ kpɔ́n. Nɛ̌ nǔ ka cí nú mì dó nǔ e un xà é wu? Etɛwu nǔ ka cí mɔ̌ nú mì? Nɛ̌ enɛ ka kúnkplá nǔ e un ko mɔ kpɔ́n wá yì lɛ é, ninɔmɛ e mɛ un ɖè dìn é, alǒ nǔ e sixu wá jɛ sɔ lɛ é gbɔn? Nɛ̌ un ka sixu zán nugbodòdó Biblu tɔn enɛ lɛ kpo wěɖexámɛ enɛ lɛ kpo gbɔn ɖò gbɛzán ce mɛ? (Jɔb. 23:5; Ðɛh. 49:4) Kpɔ́n ɖɔ emi ka sixu tín nǔ e wu Jehovah dó wusyɛn lanmɛ nú togun tɔn ɖɔ é ni nyì alɔ nú nùwalɔ ɖé lɛ é mɛ à jí. Alǒ, lin tamɛ dó nǔ e nǔwiwa gbɔn vo nú nǔ e Biblu ɖɔ é sixu jì lɛ é jí.—Sɛ́n. 32:28, 29.
Dǒ nukún nǔ lɛ mɛ kpɔ́n hwenu e a ɖò akpáxwé e tinmɛ doyidoslɔ́ nùɖé tɔn é xà wɛ é. Ði kpɔ́ndéwú ɔ, dǒ nukún mɛ bo kpɔ́n nǔ e jɛ hwenu e Jozɛfu sín nɔví lɛ sà ɛ nú Isimayɛli ví lɛ é é. (Bǐb. 37:18-28) Etɛ a ka mɔ, sè, alǒ etɛ sín wǎn a ka sè? Sɔ́ hwiɖée ɖó mɛ e wu nǔ ɔ jɛ dó lɛ é sín tɛnmɛ. Etɛ ye ka lin? Nɛ̌ nǔ ka cí nú ye? Tamɛ linlin dó nǔ enɛ lɛ jí na zɔ́n bɔ nùkplɔnkplɔn towe na ɖò gbɛ̀, bo na lɛ́ ɖó nu.
Zǎn azɔ̌wanú nùkplɔnkplɔn tɔn e ɖè lɛ é, bonu dobanunǔ towe na kpɔ́n te d’eji. Azɔ̌wanú e ɖè ɖò gbè towe mɛ lɛ é ni má we, é sixu nyí ee ɖò ɛntɛnɛti jí é, alǒ wema e è ko zín é ɖé. Ma xò nǔ kpɔ́n cobo byɔ mɛ ɖevo lɛ ɖɔ ye ni d’alɔ we bonu a na kplɔ́n lee è nɔ zán ye gbɔn ganji é ó. Ði kpɔ́ndéwú ɔ, Index des publications des Témoins de Jéhovah, alǒ Anademẹwe Dodinnanu Tọn Na Kunnudetọ Jehovah Tọn Lẹ na d’alɔ we, bɔ a na mɔ nǔ e è ko wlan kpɔ́n dó xota gègě jí é, lobo na lɛ́ mɔ tinmɛ wemafɔ Biblu tɔn gègě tɔn. Zǎn nudọnamẹ dogọ e ɖò Lẹdogbedevomẹ Aihọn Yọyọ Tọn mɛ lɛ é, enyi è ko ɖetɔ́n dó gbè e a sè é ɖě mɛ ɔ nɛ. É na tinmɛ e nyɔ́ zán lɛ é dó ninɔmɛ ayǐ mɛ tɔn, lee nǔ lɛ jɛ ɖebɔdoɖewu gbɔn é, kpinkpɛn kpo ga nǔ lɛ tɔn kpo, kpodo nǔ ɖevo ɖevo lɛ kpo jí.
Wlǎn nǔ taji e a kplɔ́n lɛ é ɖ’ayǐ nú ye na d’alɔ we bonu a na flín nǔ e a ko kplɔ́n lɛ é. Taji bǐ ɔ, mǎ ye xá mɛ ɖevo lɛ. A ka sixu zán nùɖé ɖò nǔ enɛ lɛ mɛ ɖò sinsɛnzɔ́ ɔ mɛ à? Ðò ali enɛ lɛ nu ɔ, a hɛn nǔ e a kplɔ́n lɛ é dó ayi mɛ kpowun ǎ, amɔ̌, a lɛ́ zán ye nú lè mɛ ɖevo lɛ tɔn.