Hwenu E Adla J’ayǐ É

“Tlolo hwɛ̌ ɔ, mǐ flú bǐ. Babá kpo sin kpo ee gbà mɛ é hɛn nǔɖokan mǐtɔn lɛ bǐ gblé. ”—Andrew, ɖò Sierra Leone.

“Ee jɔhɔn ɖaxó ɖé gbà nǔ gudo é ɔ, mǐ lɛkɔ yì xwé mǐtɔn gbè. Nǔ ɖě sɔ́ kpò ǎ. Ahwi xò mǐ. Vǐ nyɔnu ce j’ayǐ jɛ kɔ́mɛ bo ya avǐ.”—David, ɖò Tɔtɛntinto Vierges tɔn mɛ.

ENYI a ko gan ɖò adla j’ayǐ ɖé hwenu kpɔ́n ɔ, a sixu mɔ nukúnnú jɛ nǔ e mɛ ɖevo e gán lɛ é ɖí xwi xá é mɛ; nǔ enɛ lɛ wɛ nyí: ahwixomɛ, gbejijó, gbɛwlúdómɛ, adohu adohu, kpo dlɔ̌ baɖabaɖa lɛ kpo. Awakanmɛ nɔ kú mɛ e gán lɛ é gegě, bɔ agbɔ̌n nɔ lɛ́ kpé ye, bɔ ye nɔ ba na xò nǔ kplá.

Enyi a hɛn nǔ e a ɖó lɛ é bǐ bú ɖó adla j’ayǐ ɖé wu ɔ, hwi lɔ sixu ko lin ɖɔ emi kún sɔ́ sixu dɛ ɖò nǔ ɖě nu hú mɔ̌ ó. A tlɛ sixu jɛ linlin jí ɖɔ emi na jó gbè. Amɔ̌, Biblu tinmɛ ɖɔ gbɛ̀ towe xɔ akwɛ, bɔ a sixu ɖó hwɛjijɔ ɖagbe e wu a na ɖó nukún sɔgudo ɖagbe hugǎn ɖé é gegě.

NǓGBO BIBLU TƆN LƐ NƆ NA MǏ NUKÚNÐIÐÓ

Nǔnywɛtɔ́xó 7:8 ɖɔ: “Hwenu e è fó nǔɖe dó ɔ, é nyɔ́ hú hwenu e è bɛ́ é.” Enyi a jɛ tintɛnkpɔn jí, bo na mɔ hwiɖée mɛ ɖò adla j’ayǐ ɖé gudo ɔ, tlolo hwɛ̌ ɔ, gbɛ̀ ɔ sixu d’ablu dó we. Amɔ̌, enyi a ɖó suúlu bo jɛ nǔ lɛ vɔ́ tò jí ɖò gbɛzán towe mɛ ɔ, gbɛzán towe sixu wá kpɔ́n te tawun.

Biblu ɖɔ ɖ’ayǐ ɖɔ hwe ɔ nu jawě bɔ è kún “sɔ́ na sè avǐ kpo xósusu kpo ɖě gbeɖé ɖò finɛ [ó].” (Ezayíi 65:19) Nǔ na nyí mɔ̌ hwenu e ayikúngban ɔ na huzu palaɖisi ɖé ɖò Axɔ́suɖuto Mawu tɔn glɔ́ é. (Ðɛhan 37:11, 29) Adla j’ayǐ lɛ na huzu nǔ xóxó. Nǔ e mǐ nɔ flín bɔ ye nɔ ɖó akpɔ nú mǐ lɛ é kpo wuvɛ̌ e nɔ gbɛ́ vivɔ lɛ é kpo ɖě sɔ́ na tíìn ǎ, ɖó Mawu Nǔbǐwukpétɔ́ ɔ d’akpá ɖɔ: “Mɛɖé sɔ́ na flín nǔ xóxó lɛ ǎ. Ye sɔ́ na wá ayi mɛ nú mɛɖé ǎ.”—Ezayíi 65:17.

Lin tamɛ dó nǔ elɔ jí: Gbɛɖotɔ́ ɔ ko bló tuto bonu “sɔ na nyɔ́ nú [we]” nú a na ɖó nukúnɖiɖó; gbɛ̀ e mɛ fífá gɔ́ é ɖé wɛ é na nyí ɖò acɛkpikpa Mawu tɔn maɖóblɔ̌ ɔ glɔ́. (Jelemíi 29:11) Nɛ̌ nǔgbo enɛ tuùntuùn ka ɖexlɛ́ ɖɔ gbɛ̀ towe xɔ akwɛ gbɔn? Sally e xó mǐ ɖɔ ɖò xóta e wá yì é mɛ é ɖɔ: “Nǔjiwǔ e Axɔ́suɖuto Mawu tɔn na wà nú mǐ ɖò sɔgudo lɛ é bǐ flínflín sixu d’alɔ we, bɔ a na ɖè ayi sín nǔ e ko jɛ wá yì lɛ é jí, bo na xò ninɔmɛ dìn tɔn lɛ zlɛ́.”

Etɛwu a ma ka na kplɔ́n nǔ dó nǔ e Axɔ́suɖuto Mawu tɔn na wà nú gbɛtɔ́ lɛ zaanɖé dìn é wu d’eji ǎ? Mɔ̌ wiwa na na we jiɖiɖe, bɔ a na tuùn ɖɔ enyi emi tlɛ ɖò didɛ ɖò adla j’ayǐ ɖebǔ nu wɛ ɔ, emi kún na jó gbè ó, lobɔ a na lɛ́ ɖò te kpɔ́n hwenu e adla ɖebǔ ma sɔ́ na j’ayǐ ǎ é kpo akpakpa sɔ́ mɛ kpo. Amɔ̌ dìn hwɛ̌ ɔ, Biblu na alixlɛ́mɛ tawun tawun e sixu d’alɔ we, bɔ a na ɖí xwi xá nǔ e mɛ adla j’ayǐ ɖé nɔ tɔ́n kɔ dó lɛ é é. Mǐ ni kpɔ́n kpɔ́ndéwú ɖé lɛ.

Wemafɔ Biblu Tɔn E Sixu D’alɔ We lɛ É

Nɔ gbɔjɛ ganji.

“È ɖó nǔ kpɛɖé bo na agbɔ̌n mɛɖée ɔ, é nyɔ́ hú è ɖò azɔ̌ wà wɛ hwebǐnu, kaka bo ba agbɔ̌n kpò.”—Nǔnywɛtɔ́xó 4:6.

Dobanúnǔtɔ́ lɛ ɖɔ ɖɔ enyi nǔ e nɔ ɖó adohu adohu nú mɛ é ɖé jɛ dó mɛ wu, bonu “è ma d’amlɔ ganji ǎ ɔ, . . . wuntun e nɔ xlɛ́ ɖɔ è ɖò adohu adohu jí lɛ é sixu lɛ́ jɛji, bɔ è na mɔ wuvɛ̌ ɖò lee nǔ nɔ cí nú mɛ é linu hugǎn.” Enɛ wu ɔ, nǔnywɛnú wɛ é nyí ɖɔ è ni gbɔjɛ ganji.

Ðɔ lee nǔ cí nú we é.

“Linkpɔ́n ɖò ayi mɛ nú mɛ ɔ, kanmɛ nɔ gbɔjɔ mɛ; è ka ɖɔ xó ɖagbe nú mɛ ɔ, wǔ nɔ yá mɛ.”—Nǔnywɛxó 12:25.

Ðɔ xó nú hagbɛ̌ xwédo towe tɔn ɖé, alǒ xɔ́ntɔn e wu a ɖeji dó é ɖé. Hagbɛ̌ xwédo towe tɔn lɛ alǒ xɔ́ntɔn vívɛ́ towe lɛ na ɖótó we, bo sixu lɛ́ ɖɔ xó gbɔdónúmɛ tɔn lɛ nú we, lobo wà nǔ tawun tawun ɖé lɛ dó d’alɔ we.a

Sɔ́ ayi towe ɖó nǔ ɖagbe e jawě lɛ é jí.

“Mawu dó jinukúnsin yɔyɔ̌ kpo ayikúngban yɔyɔ̌ kpo sín akpá; finɛ wɛ è na nɔ wà nǔ kpodo hwɛjijɔ kpan ɖè; nǔ e mǐ ɖò te kpɔ́n ɔ nɛ.”—2 Piyɛ́ɛ 3:13.

a Mɛ e ɖò linkpɔ́n mɛ sín hwenu línlín ɖíe, alǒ ado ɖò huhu i wɛ tawun é ɖé sixu ba alɔdó dotóo lɛ tɔn.