A ka Na Xwedó Kanɖodonǔwu Jehovah kpo Jezu kpo Tɔn Sín Kpɔ́ndéwú Ðò Flǐn Sín Táan Elɔ Mɛ À?
1. Etɛ Kúnnuɖetɔ́ Jehovah Tɔn lɛ ka nɔ dó gǎn tawun bo nɔ wà ɖò Flǐn sín táan mɛ?
1 Jehovah nɔ ɖókan dó nǔ wu bonu linlin tɔn lɛ na dó jɛ jlɔ́. Ezayíi 9:6 ɖɔ dó Axɔsuɖuto Mawu Tɔn sín nyɔna ɖé lɛ wu ɖɔ: “Mawu Mavɔmavɔ Nǔbǐwukpétɔ́ ɔ na bló kpo wanyiyi tɔn ɖaxó ɔ [alǒ “kanɖodonǔwu,” NW] kpo.” Mɔ̌ ɖokpo ɔ, hwenu e Vǐ Mawu Tɔn ɖò sinsɛnzɔ́ tɔn wà wɛ ɖò ayikúngban jí é ɔ, nǔwiwa tɔn lɛ xlɛ́ ɖɔ akpàkpà nɔ sɔ́ ɛ tawun dó sinsɛn nugbǒ ɔ wu. (Jaan 2:13-17; 4:34) Xwè ɖokpo ɖokpo mɛ ɖò Flǐn sín táan mɛ, gbɔn gbɛ̀ ɔ bǐ mɛ ɔ, wɛnjlatɔ́ livi mɔkpan nɔ dó gǎn tawun, bo nɔ xwedó kanɖodonǔwu Jehovah kpo Jezu kpo tɔn sín kpɔ́ndéwú bo nɔ gbló ada nú sinsɛnzɔ́ yetɔn. Hwi lɔ ka na wà mɔ̌ à?
2. Etɛ kanɖodonǔwu ka na sísɛ́ mǐ bɔ mǐ na wà bɛ́sín azǎn 7gɔ́ Xwèjísun ɔ tɔn gbè?
2 Mɛylɔwema Flǐn Tɔn Mímá: Ðò xwè elɔ mɛ ɔ, è na jɛ mɛylɔwema Flǐn tɔn ɔ má jí ɖò Síbígbe azǎn 7gɔ́ Xwèjísun ɔ tɔn gbè. Blǒ tuto towe dìn bo na ɖ’alɔ ɖò sinsɛnzɔ́ ɔ mɛ kpo kanɖodonǔwu kpo. Akpàkpà na sɔ́ agun lɛ tawun hwenu e ye na ɖò gǎn dó wɛ bo na má mɛylɔwema ɔ gbɔn fí e ɖò acɛ yetɔn mɛ lɛ é wɛ é. Dǒ gǎn bo ylɔ mɛ e a nɔ kplɔ́n Biblu xá lɛ é, mɛ e a nɔ yì ba kpɔ́n lɛ é, azɔ̌gbɛ́ lɛ, hɛnnumɔ lɛ, kpo azɔ̌mɛvigbɛ́ lɛ kpo gbɔn mɛylɔwema ɔ mímá nú ye alǒ jw.org zinzan gblamɛ.
3. Nɛ̌ mǐ ka sixu gbló ada nú sinsɛnzɔ́ mǐtɔn ɖò Xwèjísun kpo Lidosun kpo mɛ gbɔn?
3 Gbexosin-Alijitɔ́ Alɔgɔtɔ́ Tɔn: Kanɖodonǔwu na lɛ́ sísɛ́ mǐ bɔ mǐ na gbló ada nú sinsɛnzɔ́ mǐtɔn. É ɖò wɛn ɖɔ mɛ gègě na kpéwú bo na nyí gbexosin-alijitɔ́ alɔgɔtɔ́ tɔn ɖò Xwèjísun kpo Lidosun kpo mɛ, ɖó mǐ hɛn ɔ mǐ na nya ganxixo 30 gbé. Ðò sinsɛn-biblo xwédo tɔn alǒ nùkpinkplɔn mɛɖesunɔ tɔn towe hwenu hǔn, xoɖɛ bo lin tamɛ kpɔ́n dó lee a sixu wà enɛ gbɔn é jí. (Nùnywɛxó 15:22) Lee akpàkpà na sɔ́ we ɖò mɛylɔwema ɔ mímá hwenu gbɔn é sixu sísɛ́ mɛ ɖevo lɛ bɔ ye lɔ na ɖókan dó azɔ̌ ɔ wu. Enyi a vɔ́ nùɖé lɛ tò ɖò gbɛzán towe ɖesu mɛ bo na mɔ tɛn dó ɖ’alɔ ɖò sinsɛnzɔ́ ɔ mɛ d’eji hǔn, kanɖodonǔwu Jezu tɔn sín kpɔ́ndéwú xwedó wɛ a ɖè nɛ.—Mak. 6:31-34.
4. Enyi mǐ xwedó kpɔ́ndéwú kanɖodonǔwu tɔn Jehovah kpo Jezu kpo tɔn ɔ, lè tɛ lɛ é ka nɔ hɛn wá?
4 Kanɖodonǔwu Jehovah kpo Jezu kpo tɔn sín kpɔ́ndéwú xwixwedó ɖò Flǐn sín táan elɔ mɛ na hɛn lè ɖaxó lɛ wá. Mɛ gègě ɖevo lɛ na sè wɛn ɔ. Mǐ na mɔ awǎjijɛ kpo vivo kpo e è nɔ mɔ ɖò Jehovah sinsɛn kpo nǔ na mɛ ɖevo lɛ kpo mɛ é. (Mɛ. 20:35) Ee lɛ́ ɖò taji hugǎn é wɛ nyí ɖɔ nǔ mǐtɔn na nyɔ́ Mawu mǐtɔn kanɖodonǔwutɔ́ ɔ kpo Vǐ tɔn kpo sín nukúnmɛ.