Nya nǔɖé lɛ́ gbé ɖo kú Klísu tɔn flínflín sín táan mɛ

Xwewú xwewú tɛgbɛ ɔ, togun Jexóva tɔn nɔ ɖo nukún ɖó wɛ bá nɔ kpɔ́ bo flín kú Klísu tɔn. Ðo aklúnɔzángbla e nɔ jɛ nukɔn nú kú Klísu tɔn flínflín lɛ́ é kpó éé nɔ bɔ d’é wú lɛ́ é kpó mɛ ɔ, mǐ nɔ zán ali bǔnɔ e nɔ hun nú mǐ lɛ́ é dó kpa susu nú Jexóva bo lɛ́ dó kú n’i nú nǔníná gbɛxɔnúmɛ tɔn ɔ. (Efɛ́ 1:3, 7) Ði kpɔ́ndéwú ɔ, mǐ nɔ w’azɔ̌ syɛ́nsyɛ́n bá dó ylɔ́ mɛ ɖěvo lɛ́ wá kú Klísu tɔn flínflín tɛnmɛ. Mɛɖé lɛ́ nɔ kpé wú bo nɔ bló hǔzúhúzú lɛ́ bá dó nyí gběxosín-alijítɔ́ alɔgɔ́tɔ́, ɖo sun mars alǒ avril tɔn mɛ, bo nɔ nya ganxixo 30 alǒ 50 gbé. A ba ná zán hwenu d’é jí ɖo sinsɛnzɔ́ ɔ mɛ, ɖo kú Klísu tɔn flínflín sín táan élɔ́ mɛ a? Tɛ́ ka sixú d’alɔ we bɔ a ná wa mɔ̌?

Hwɛhwɛ ɔ, ényí mǐ bló tito jɛ nukɔn ɔ, mǐ nɔ kpé nǔ gěgé wú bo nɔ wa. (Nǔx 21:5) Ðó kú Klísu tɔn flínflín sín táan ko ɖo sisɛkpɔ́ wɛ wunnáwúnná wútu ɔ, din wɛ nyí hwenu ɔ bɔ mǐ ná jɛ tito bló jí. Lin tamɛ dó lěe a sixú gbló ada nú sinsɛnzɔ́ towe ɖo kú Klísu tɔn flínflín sín táan mɛ gbɔn é, kpó lěe a ná kpé nǔ e a sɔ́ ɖó nukɔn nú hwiɖée bá nya gbě yětɔn lɛ́ é wú gbɔn é kpó jí. Énɛ́ gúdo hǔn, byɔ̌ Jexóva ɖɔ é ní dó nú gǎndídó towe lɛ́.—1Jn 5:14, 15.

A sixú lin tamɛ dó ali e nu a sixú gbló ada nú sinsɛnzɔ́ towe ɖe ɖo kú Klísu tɔn flínflín sín táan mɛ lɛ́ é ɖé lɛ́ jí a?