Kplé Kúnnuɖegbe Tɔn Ðěɖee Nɔ Wà Nǔ E Wu Ye Dó Tíìn lɛ É

1. Linlin tɛ wu kplé kúnnuɖegbe tɔn lɛ ka dó tíìn?

¹ Gbè ɖokpo ɔ, Jezu bló kplé xá ahwanvu tɔn 70a hwɛ̌ có ye yì yɛhwexó ɖɔ gbé. (Luk. 10:1-11) É dó wusyɛn lanmɛ nú ye bo flín ye ɖɔ ye kún na ɖò ye ɖokpo ó, lé Jehovah “jinukúnnɔ ɔ” na xlɛ́ ali ye. É lɛ́ kplɔ́n nùɖé lɛ ye bo dó sɔnǔ nú ye bonu ye na w’azɔ̌ ɔ, lobo wá má ye “webɔ webɔ.” Égbé ɔ, linlin ɖokpo ɔ wutu wɛ kplé e mǐ nɔ bló cobo nɔ yì kúnnuɖegbe lɛ é dó tíìn, é wɛ nyí ɖɔ ye na dó wusyɛn lanmɛ nú mǐ, sɔnǔ nú mǐ, lobo na bló tuto nú mǐ.

2. Táan nabi è ka ɖó na nɔ bló kplé kúnnuɖegbe tɔn na?

² Ð’ayǐ ɔ, cɛju 10 jɛ 15 wɛ è nɔ bló kplé kúnnuɖegbe tɔn na, bɔ mɛ mímá, fí e è na w’azɔ̌ ɖè é ɖiɖɔ, kpo ɖɛxixo kpo bǐ nɔ ɖ’emɛ. Dìn ɔ, é na gbɔn vo. Bɛ́sín Lidosun ɔ mɛ ɔ, kplé kúnnuɖegbe tɔn sɔ́ ɖó na zɛ cɛju atɔ́ɔ́n jɛ tɛnwe wu ǎ. Amɔ̌, enyi é bɔ dó kplé agun tɔn ɖé wu ɔ, é ɖó na nɔ hwe hú mɔ̌, ɖó mɛ ɖěɖee jló na tɔ́n nú kúnnuɖegbe ɔ lɛ é ko ɖu vivǐ Biblu sín xóɖɔɖókpɔ́ ɖagbe ɖé tɔn. Enyi kplé kúnnuɖegbe tɔn lɛ nɔ klewun ɔ, é na zɔ́n bɔ mɛ bǐ na zán hwenu hugǎn ɖò sinsɛnzɔ́ ɔ mɛ. Gɔ́ na ɔ, enyi gbexosin-alijitɔ́ lɛ alǒ wɛnjlatɔ́ lɛ ko jɛ yɛhwexó ɖɔ jí jɛ nukɔn nú kplé kúnnuɖegbe tɔn ɔ, hwenu klewun ɖé jɛn é na ɖò dandan ɖɔ ye ni ɖó azɔ̌ te na.

3. Nɛ̌ è ka sixu bló tuto kplé kúnnuɖegbe tɔn lɛ tɔn gbɔn bonu ye na d’alɔ wɛnjlatɔ́ lɛ hugǎn?

³ È ɖó na nɔ bló tuto kplé kúnnuɖegbe tɔn lɛ tɔn ganji bonu ye na d’alɔ wɛnjlatɔ́ lɛ hugǎn. Ðò agun gègě mɛ ɔ, nǔ ɖagbe wɛ é nyí ɖɔ gbɛ̌ta kúnnuɖiɖe tɔn lɛ ni bló kplé kúnnuɖegbe tɔn lɛ ɖò fí vovo hú ɖɔ ye ni nɔ kplé ɖò fí ɖokpo ɔ. Enɛ sixu zɔ́n bɔ fí e è na kplé ɖè é kpo fí e è na yì ɖekúnnu ɖè é kpo yiyi na bɔkun. Enɛ sixu lɛ́ zɔ́n bɔ è yawu má wɛnjlatɔ́ lɛ, bo lɛ́ zɔ́n bɔ nukúnkpénùwùtɔ́ gbɛ̌ta lɛ tɔn sín nukún na ɖò mɛ e wu kpé nukún dó wɛ ye ɖè lɛ é wu ganji. Kplékplé mɛxo lɛ tɔn sixu kpɔ́n ninɔmɛ xá ɔ mɛ tɔn lɛ bo ɖɔ nǔ e na nyɔ́ hugǎn na é. Cobonu kplé ɔ na fó kpo ɖɛ klewun ɖé kpo ɔ, mɛ bǐ ɖó na tuùn fí e na w’azɔ̌ ɖè wɛ ye ɖè é kpo mɛ e na zɔn xá wɛ ye ɖè lɛ é kpo.

4. Etɛwu è ma ka ɖó na lin ɖɔ kplé kúnnuɖegbe tɔn lɛ kún hwɛ́n nùɖé alǒ ɖò taji sɔ kplé agun tɔn ɖevo lɛ ó ǎ?

⁴ Ye Ðò Taji Kplé Agun Tɔn Ðě lɛ Ðɔhun: Ðó mɛ ɖěɖee xwè kúnnuɖegbe lɛ é sín takún mɛ wɛ è nɔ bló kplé kúnnuɖegbe tɔn lɛ dó wutu ɔ, é ɖò dandan ɖɔ agun ɔ bǐ ni yì ǎ. É ɖò mɔ̌ có, enɛ xlɛ́ ɖɔ ye kún hwɛ́n nùɖé alǒ ɖò taji sɔ kplé agun tɔn ɖevo lɛ ó ǎ. Ði kplé mǐtɔn lɛ bǐ ɖɔhun ɔ, Jehovah wɛ sɔnǔ nú kplé kúnnuɖegbe tɔn lɛ, bɔ ye nɔ d’alɔ mǐ bɔ mǐ nɔ flɔ́ wanyiyi kpo nǔɖagbewiwa kpo sín zo dó lanmɛ nú mǐɖée. (Ebl. 10:24, 25) Enɛ wu ɔ, mɛ e ɖò nukún kpé d’ewu wɛ é ɖó na sɔnǔ ganji, bonu xóɖɔɖókpɔ́ ɔ na dó sixu kpa susu nú Jehovah, bɔ mɛ e wá lɛ é bǐ na ɖu lè tɔn. Enyi wɛnjlatɔ́ e xwè kúnnuɖegbe lɛ é kpéwú ɔ, ye ɖó na dó gǎn bo yì tɛn tɔn mɛ.

5. (a) Azɔ̌ tɛ ka nyí nukúnkpénùwùtɔ́ sinsɛnzɔ́ tɔn ɖò kplé kúnnuɖegbe tɔn lɛ sín tuto biblo mɛ? (b) Nɛ̌ nɔví nyɔnu ɖé ka ɖó na kpé nukún dó kplé kúnnuɖegbe tɔn ɖé wu gbɔn?

⁵ Lee Nukúnkpénùwùtɔ́ ɔ Na Sɔnǔ Gbɔn É: Bonu mɛɖé na mɔ tɛn dó sɔnǔ ganji bo na xwlé akpáxwé kplé lɛ tɔn ɖé mɛ ɔ, è ɖó na sɔ́ azɔ̌ ɔ n’i dó mɛhwenu. Nǔ ɖokpo ɔ wɛ é ɖó na nyí nú kplé kúnnuɖegbe tɔn lɛ lɔ. Hwenu e gbɛ̌ta kúnnuɖiɖe tɔn lɛ kplé ɖò fí vovo é ɔ, nukúnkpénùwùtɔ́ gbɛ̌ta lɛ tɔn alǒ alɔgɔtɔ́ yetɔn lɛ wɛ na kpé nukún dó kplé ɔ wu nú gbɛ̌ta yetɔn. É ɖò mɔ̌ có, hwenu e agun ɔ bǐ na kplé nú kplé kúnnuɖegbe tɔn é ɔ, nukúnkpénùwùtɔ́ sinsɛnzɔ́ tɔn na ɖè mɛ ɖokpo b’ɛ na kpé nukún dó kplé ɔ wu. Nukúnkpénùwùtɔ́ sinsɛnzɔ́ tɔn ɖé lɛ nɔ sɔ́ tuto ɖé nú mɛ e na kpé nukún d’ewu lɛ é bǐ, lobo nɔ tɛ́ tuto ɔ ɖokpo dó kpatako jí. Nukúnkpénùwùtɔ́ sinsɛnzɔ́ tɔn ɔ sín ayi ɖó na ɖò te hwenu e é na ɖò mɛ e na kpé nukún d’ewu lɛ é ɖè wɛ é, bo na hɛn dó ayi mɛ ɖɔ enyi kplé enɛ lɛ na yì ganji ɔ, é na sín nǔwukpikpé mɛkplɔnkplɔn tɔn kpo tutoblonunu tɔn mɛ ɖěɖee na kpé nukún dó ye wu lɛ é tɔn kpo wu. Enyi mɛxo agun tɔn, devizɔwatɔ́ sinsɛnzɔ́wiwa tɔn, alǒ nɔví sunnu e ko bló baptɛm bo jɛxa é ɖě ma ɖè bonu è na ɖè azɔ̌ ɔ na ɖò azǎn ɖé lɛ jí ǎ ɔ, nukúnkpénùwùtɔ́ sinsɛnzɔ́ tɔn ɔ ɖó na ɖè azɔ̌ ɔ nú nɔví nyɔnu nǔwukpétɔ́ e ko bló baptɛm é ɖé.—Kpɔ́n xota “Hwenu E Nɔví Nyɔnu ɖé Ðó Na Kpé Nukún D’ewu É.”

6. Etɛwu é ka nyí nǔ taji ɖɔ mɛ e na kpé nukún dó kplé kúnnuɖegbe tɔn ɔ wu é ni sɔnǔ ganji?

⁶ Enyi è ɖè azɔ̌ nú mǐ ɖò Wemaxɔmɛ Azɔ̌ Yɛhwexɔsuɖuto ɔ Tɔn alǒ Kplé Sinsɛnzɔ́ Tɔn sín hwenu ɔ, mǐ nɔ sɔ́ ylɔ ɖɔ nǔ bo nɔ sɔnǔ na ganji. É na vɛwǔ ɖɔ mǐ ni nɔte kaka jɛ hwenu e mǐ na ɖò ali jí bo xwè kplé ɔ jí é cobo na jɛ tamɛ lin kpɔ́n dó nǔ e mǐ na ɖɔ é wu jí. Linlin ɖokpo ɔ wɛ mǐ ɖó na nɔ ɖó dó nukúnkpikpe dó kplé kúnnuɖegbe tɔn lɛ lɔ wu. Dìn e è ɖè kplé kúnnuɖegbe tɔn sín ganmɛ kpò é ɔ, é nyí nǔ taji tawun ɖɔ è ni sɔnǔ ganji, bonu kplé ɔ na yì ganji bo lɛ́ fó dó ganmɛ. Nǔsisɔ ganji nɔ lɛ́ byɔ ɖɔ è ni ko tuùn fí e na w’azɔ̌ ɖè wɛ è ɖè é dó mɛhwenu.

7. Nǔ tɛ lɛ jí mɔ̌ mɛ e na kpé nukún dó kplé kúnnuɖegbe tɔn wu é ka sixu ɖɔ xó dó?

⁷ Nǔ E Jí È Na Ðɔ Xó Dó É: Ðó ninɔmɛ lɛ nɔ gbɔn vo ɖò xá ɖokpo ɖokpo mɛ wutu ɔ, deví gbejinɔtɔ́ ɔ sɔnǔ nú nǔ e è na nɔ ɖɔ ɖò kplé kúnnuɖegbe tɔn ɖokpo ɖokpo hwenu lɛ é ǎ. Gbàví “Nǔ E Jí È Sixu Ðɔ Xó Dó Ðò Kplé Kúnnuɖegbe Tɔn ɖé Hwenu É” xlɛ́ nǔ e jí è sixu ɖɔ xó dó é ɖé lɛ. Hwɛhwɛ ɔ, è na nɔ bló kplé ɔ xóɖɔɖókpɔ́ ɖé ɖɔhun. Hweɖelɛnu ɔ, è sixu bló wazexlɛ́ e è sɔnǔ na ganji é ɖé, alǒ xlɛ́ video jw.org tɔn e jɛxa é ɖokpo ɖò kplé ɔ hwenu. Hwenu e mɛ e na kpé nukún dó kplé kúnnuɖegbe tɔn ɖé wu é ɖò nǔ tɔn sɔ́ wɛ é ɔ, é ɖó na lin nǔ kpɔ́n dó nǔ e na dó wusyɛn lanmɛ nú mɛ ɖěɖee xwè kúnnuɖegbe gbè nɛ gbè lɛ é kpo nǔ e na sɔnǔ nú ye lɛ é kpo jí.

8. Etɛ lɛ jí é ka sixu nyɔ́ hugǎn ɖɔ è ni nɔ ɖɔ xó dó ɖò kplé kúnnuɖegbe tɔn lɛ hwenu ɖò Síbígbe lɛ kpo Aklunɔzángbe lɛ kpo?

⁸ Ði kpɔ́ndéwú ɔ, ɖò Síbígbe lɛ ɔ, wɛnjlatɔ́ gègě nɔ xwlé La Tour de Garde kpo Réveillez-vous! kpo mɛ. Mɛ ɖěɖee nɔ tɔ́n nú kúnnuɖegbe ɖò Síbígbe lɛ é gègě tíìn bo nɔ ko tɔ́n ɖě ɖò aklunɔzán gbla ɔ mɛ ǎ, enɛ wu ɔ, é sixu vɛwǔ nú ye bɔ ye na flín nùxwlémɛ e ye sɔnǔ tɔn ɖò Sinsɛn-Biblo Xwédo Tɔn yetɔn hwenu é. Enɛ wu ɔ, é sixu nyɔ́ ɖɔ mɛ e ɖò nukún kpé dó kplé ɔ wu wɛ é ni vɔ́ nùxwlémɛ ɖěɖee nɔ ɖò Sinsɛnzɔ́ Axɔsuɖuto ɔ Tɔn Mǐtɔn gudo é ɖokpo jí gbɔn. É sixu lɛ́ ɖɔ xó dó lee è na bló gbɔn bɔ nùxwlémɛ xójlawema ɖé tɔn na cá kàn xá nǔ e jɛ ɖò xá ɔ mɛ é, nǔwiwa, alǒ xwèɖuɖu ɖé é, alǒ enyi mɛ lɛ yí xójlawema lɛ ɔ, lee è na bló ayǐ mɛ ɖó ɖ’ayǐ nú mɛbakpɔ́n gbɔn é jí. Enyi mɛ e wá kplé ɔ é ɖé lɛ ko ɖò xójlawema e xwlé mɛ wɛ è ɖè lɛ é ɖě zán wɛ ɔ, mɛ e ɖò nukún kpé dó kplé ɔ wu wɛ é sixu byɔ ye ɖɔ ye ni ɖɔ nùxwlémɛ klewun e è sixu zán é ɖé lɛ, alǒ ye ni ɖɔ nǔ e ko jɛ bo na dó wusyɛn lanmɛ nú mɛ é ɖé lɛ. Ðò Aklunɔzángbe lɛ ɔ, mɛ e na kpé nukún dó kplé ɔ wu é sixu wà nǔ ɖokpo ɔ nú wema ɖěɖee è na xwlé mɛ ɖò sun ɔ mɛ lɛ é. È sixu nɔ xwlé wema nùkplɔnkplɔn tɔn lɛ mɛ ɖò azǎn ɖebǔ jí, ɖi alɔnuwema Wɛnɖagbe kpo Ðǒtó Mawu kpo kpodo wema Biblu Kplɔ́n Mɛ kpo; enɛ wu ɔ, nukúnkpénùwùtɔ́ ɔ sixu ɖɔ xó dó lee è sixu xwlé wema enɛ lɛ ɖokpo mɛ gbɔn é jí ɖò klewun mɛ.

9. Etɛ lɛ jí è ka sixu ɖɔ xó dó ɖò aklunɔzán gblamɛ fifo lɛ hwenu e agun ɔ ɖò mɛylɔwema alǒ tlati bunɔ ɖé má wɛ é?

⁹ Enyi agun ɔ ɖò mɛylɔwema alǒ tlati bunɔ ɖé má wɛ ɖò aklunɔzán gblamɛ fifo lɛ ɔ, mɛ e ɖò nukún kpé dó kplé ɔ wu wɛ é sixu ɖɔ xó dó lee è na sɔ́ xójlawema gudo gudo tɔn lɛ kpo mɛylɔwema ɔ alǒ tlati ɔ kpo xwlé mɛ gbɔn é jí, alǒ é sixu ɖɔ xó dó lee è na wà nǔ gbɔn hwenu e mɛɖé ɖè jlǒ xlɛ́ é jí. Kplé ɔ sixu lɛ́ ɖɔ xó dó nǔ ɖěɖee ko jɛ kpɔ́n bo xlɛ́ ɖɔ mɛylɔwema alǒ tlati ɔ mímá xɔ akwɛ é jí.

10, 11. Bonu kplé kúnnuɖegbe tɔn ɔ na yì ganji ɔ, etɛwu nǔsisɔ wɛnjlatɔ́ lɛ tɔn ka ɖò taji?

¹⁰ Lee Wɛnjlatɔ́ lɛ Na Sɔnǔ Gbɔn É: Wɛnjlatɔ́ ɖěɖee yì kplé kúnnuɖegbe tɔn ɔ lɛ é lɔ ɖó akpáxwé ɖé bo na bló, cobɔ kplé ɔ na yì ganji. Enyi ye sɔnǔ nú kúnnuɖegbe ɔ jɛ nukɔn, vlafo ɖò sinsɛn-biblo xwédo tɔn yetɔn hwenu ɔ, ye na mɔ nǔ e ye na má xá wɛnjlatɔ́ ɖevo lɛ é. Nǔsisɔ ganji nɔ lɛ́ byɔ ɖɔ è ni ko yí xójlawema lɛ kpo wema lɛ kpo jɛ nukɔn cobo wá kplé kúnnuɖegbe tɔn ɔ, enɛ ɔ, mɛ bǐ na yì fí e è ja azɔ̌ wà ɖè gbé é azɔn ɖokpo bo sɔ́ na dán lɛjɛlɛjɛ ǎ.

¹¹ É lɛ́ ɖò taji ɖɔ è ni bló tuto bo wá kplé kúnnuɖegbe tɔn ɔ cɛju yɔywɛ ɖé jɛ nukɔn nú bìbɛ̌ tɔn. É ɖò wɛn ɖɔ, mǐ nɔ dó gǎn bo nɔ gbɔ hwenu dó kplé agun tɔn lɛ ǎ. É ɖò mɔ̌ có, enyi mǐ gbɔ hwenu wá kplé kúnnuɖegbe tɔn ɖé ɔ, é sixu d’avaja kplé ɔ mɛ tawun. Gbɔn nɛ̌ é? Nɔví e ɖò nukún kpé dó kplé ɔ wu wɛ é ko lin tamɛ kpɔ́n dó nǔ gègě jí hwɛ̌ cobo má mɛ. Enyi wɛnjlatɔ́ kpɛɖé wɛ wá ɔ, é sixu ɖɔ bɔ è yì fí e è ko wà azɔ̌ ɖ’akpo ɖè é. Enyi mɛɖé lɛ zɔn afɔ wá kplé kúnnuɖegbe tɔn ɔ, bonu fí e ja azɔ̌ wà ɖè gbé wɛ è ɖè é ka lín ɔ, é sixu ko má wɛnjlatɔ́ enɛ lɛ kpo mɛ e hɛn kɛkɛ alǒ mɔ̌to lɛ é kpo. Enyi fí e adakaxixo sukpɔ́ ɖè é w’azɔ̌ ɖè gbé wɛ è ja ɔ, é sixu ko má nɔví sunnu lɛ bɔ ye na w’azɔ̌ xá nɔví nyɔnu lɛ alǒ ye na lín dó gbɛ̌nu e mɛ ye ɖè é ǎ. É sixu ko ɖɔ bɔ wɛnjlatɔ́ wɔ̌nɖowǔnanɔ lɛ na w’azɔ̌ ɖò alitó fí e na bɔkun nú ye é alǒ ɖò xwé ɖěɖee ma ɖó kpokán sɔmɔ̌ ǎ lɛ é gbè. É sixu ko má wɛnjlatɔ́ yɔyɔ̌ lɛ bɔ ye na w’azɔ̌ kpo wɛnjlatɔ́ e ko mɔ nǔ kpɔ́n lɛ é kpo. Amɔ̌, enyi wɛnjlatɔ́ lɛ gbɔ hwenu bo wá ɔ, é na byɔ ɖɔ è ni lɛ́ vɔ́ nǔ lɛ tò bonu ye na dó sɔgbe xá hwenugbɔtɔ́ lɛ. É ɖò wɛn ɖɔ, hweɖelɛnu ɔ, hwɛjijɔ e wu mǐ gbɔ hwenu é sixu sɔgbe. Amɔ̌, enyi hwenu gbigbɔ huzu aca mǐtɔn ɔ, mǐ sixu kanbyɔ mǐɖée ɖɔ ya wɛ mǐ ma ka nɔ ké nú kplé kúnnuɖegbe tɔn ɔ ǎ alǒ mǐ nɔ yawu sɔnǔ dó mɛhwenu ǎ wutu wɛ à jí.

12. Enyi a nɔ bló tuto hwiɖesunɔ tɔn lɛ hwɛhwɛ ɔ, etɛ a ka sixu bló?

¹² Wɛnjlatɔ́ e wá kplé kúnnuɖegbe tɔn ɔ lɛ é sixu bló tuto yeɖesunɔ tɔn jɛ nukɔn nú kplé ɔ bíbɛ́, alǒ è sixu ko ɖè mɛɖé nú ye bɔ ye na w’azɔ̌ xá. Enyi hwiɖesu wɛ nɔ bló tuto towe lɛ hwɛhwɛ ɔ, a ka hɛn ɔ a na bló bonu wanyiyi towe na nyí “wanyiyi ɖaxó” gbɔn azɔ̌wiwa xá wɛnjlatɔ́ ɖevo lɛ gblamɛ, b’ɛ ma na nɔ nyí xá xɔ́ntɔn vívɛ́ towe lɛ kɛɖɛ hwebǐnu ǎ à? (2 Kɔ. 6:11-13) A ka sixu nɔ bló tuto bo na w’azɔ̌ xá wɛnjlatɔ́ yɔyɔ̌ ɖé hweɖelɛnu, bo na d’alɔ ɛ bonu nǔwukpikpé mɛkplɔnkplɔn tɔn tɔn na kpɔ́n te d’eji à? (1 Kɔ. 10:24; 1 Tim. 4:13, 15) Nɔ ɖótó alixlɛ́mɛ ɖebǔ e è na we é ganji, kaka jɛ ɖěɖee è na we dó fí e a na bɛ́ yɛhwexóɖiɖɔ sín é wu é jí. Enyi kplé ɔ fó hǔn, ma lɛ́ jɛ nǔ e è ko tò lɛ é ɖyɔ jí ó, ɖidó fí e è ja azɔ̌ wà ɖè gbé é azɔn ɖokpo.

13. Enyi mɛ ɖěɖee kplé kúnnuɖegbe tɔn lɛ kàn é bǐ bló akpáxwé yetɔn ganji ɔ, nɛ̌ kplé enɛ lɛ ka na hɛn lè wá nú mǐ gbɔn?

¹³ Ee ahwanvu 70 e Jezu bló tuto na lɛ é lɛkɔ sín yɛhwexóɖiɖɔ gbé gudo é ɔ, ye “lɛkɔ wá kpodo xomɛhunhun kpan.” (Luk. 10:17) É ɖò wɛn ɖɔ, kplé e Jezu bló xá ye hwɛ̌ có ye yì yɛhwexó ɔ ɖɔ gbé é zɔ́n bɔ é kpa ye. Kplé kúnnuɖegbe tɔn lɛ sixu hɛn lè ɖokpo ɔ wá égbé. Enyi mɛ ɖěɖee kplé kúnnuɖegbe tɔn lɛ kàn é bǐ bló akpáxwé yetɔn ganji ɔ, kplé enɛ lɛ na dó wusyɛn lanmɛ nú mǐ, sɔnǔ nú mǐ, bo bló tuto nú mǐ, bɔ mǐ na wà “kúnnuɖiɖe nú gbɛtɔ́ lɛ bǐ” sín azɔ̌ mǐtɔn ɔ.—Mat. 24:14.