Wěɖexámɛ E Na Zɔ́n Bɔ Kplé Kúnnuɖegbé Tɔn lɛ Na Kplɔ́n Nǔ Mɛ Ganji lɛ É

Kplé agun tɔn lɛ bǐ ɖɔhun ɔ, Jehovah sɔnǔ nú kplé kúnnuɖegbé tɔn lɛ bɔ ye nɔ flɔ́ wanyiyi kpo ɖagbewiwa kpo sín zo dó lanmɛ nú mǐ. (Eb 10:24, 25) Kplé kúnnuɖegbé tɔn lɛ ɖó na zɛ cɛju atɔ́ɔ́n jɛ tɛnwe wu ǎ: mɛ e wá lɛ é mímá, fí e è na w’azɔ̌ ɖè é ɖiɖɔ, kpo ɖɛxixo kpo bǐ wɛ ɖ’emɛ. (Enyi kplé ɔ bɔ dó kplé agun tɔn ɖé wu ɔ, cɛju ɔ ɖó na hwe hú mɔ̌.) Mɛ e jló na kpé nukún dó kplé kúnnuɖegbé tɔn ɔ wu ɖò gbè nɛ gbé é ɖó na sɔnǔ nú nǔ e na d’alɔ mɛ e jló na ɖɔ Mawuxó gbè nɛ gbé lɛ é. Ði kpɔ́ndéwú ɖò samedi ɔ, é sixu nyɔ́ ɖɔ è ni ɖɔ xó dó nǔ e mǐ sixu ɖɔ xá xwétɔ́ ɖé é jí kpowun, ɖó mɛ gegě ɖò mɛ e wá lɛ é mɛ bo ko ɖɔ Mawuxó ɖě ɖò aklunɔzán gblamɛ ɔ mɛ ǎ wutu. Xóta ɖevo tɛ lɛ é ka nyɔ́ ɖɔ è ni ɖɔ xó dó ye jí?

• Xóɖɔɖókpɔ́ lɛ sín kpɔ́ndéwú e nɔ ɖò Gbɛzán Klisanwun Tɔn kpo Sinsɛnzɔ́ Mǐtɔn Kpo: Kplé Sín Azɔ̌wema mɛ lɛ é ɖé

• Lee è sixu zán nǔ e jɛ agaɖanu é ɖé dó bɛ́ xóɖɔɖókpɔ́ ɖé gbɔn é

• Lee è sixu ɖu ɖò nǔ e mɛ lɛ nɔ ɖɔ dó gbɛ́ wɛn ɔ é ɖé jí gbɔn é

• Lee è sixu na xósin nú mɛ e ma ɖi nǔ ɖɔ Mawu tíìn ǎ é ɖé, mɛ e ɖi nǔ ɖɔ nǔ lɛ jɔ nú yeɖée wɛ é ɖé, mɛ e nɔ dó gbè ɖevo é ɖé, alǒ mɛ e nɔ yì sinsɛn e ma gbakpé sɔmɔ̌ ɖò fí e mǐ nɔ ɖɔ Mawuxó gbɔn é ǎ ɖé gbɔn é

• Lee è sixu zán nǔ e ɖò tɛn Ɛntɛnɛti tɔn jw.org jí, JW Library^® alǒ Biblu mɛ gbɔn é

• Lee è sixu zán azɔ̌wanú e ɖò Azɔ̌wanúgbá Mɛkplɔnkplɔn tɔn mǐtɔn mɛ é ɖé gbɔn é

• Lee è sixu zé sinsɛnzɔ́ ɔ sín akpáxwé ɖé lě tawun bo w’azɔ̌ d’eji gbɔn é, ɖi kúnnuɖiɖe ɖò alokan jí, wema winwlán sɛ́dó mɛ, kúnnuɖiɖe agbawungba tɔn, mɛbakpɔ́n lɛ, alǒ Biblu kplɔnkplɔn xá mɛ lɛ

• Nǔflínmɛ lɛ dó acéjíninɔ, alɔ ɖyɔɖyɔ, zinzán ɖagbe lɛ, linlin e sɔgbe é ɖiɖó, alǒ nǔ mɔ̌hun ɖevo jí

• Nǔkplɔnkplɔn alǒ video ɖé sín alɔnuwema Ðǒkan Dó Nǔxixa kpo Mɛkplɔnkplɔn kpo Wu mɛ

• Lee è sixu dó wusyɛn lanmɛ nú azɔ̌watɔ́gbɛ́ mɛtɔn bo lɛ́ d’alɔ ɛ gbɔn é

• Wemafɔ e ɖɔ xó dó sinsɛnzɔ́ ɔ wu é ɖé alǒ nǔ e è mɔ kpɔ́n ɖò sinsɛnzɔ́ ɔ mɛ b’ɛ dó wusyɛn lanmɛ nú mɛ é ɖé