Nǔ Sinsɛnzɔ́ Towe Ni Bí Alɔ nú We D’eji: Kúnnuɖiɖe nú Mɛ E Nɔ Dó Gbè Ðevo lɛ É

Nǔ E Wu É Ðò Taji É: Gbɛtɔ́ lɛ na bo ɖò “akɔta ɖebǔ” mɛ ɔ, ganjininɔ gbigbɔ mɛ tɔn yetɔn nɔ ɖu ayi mɛ nú Jehovah. (Mɛ. 10:34, 35) Enɛ wu ɔ, Jezu ɖɔ ɖɔ è na jla wɛnɖagbe ɔ “gbɔn gbɛ̀ ɔ bǐ mɛ” nú “gbɛtɔ́ lɛ bǐ.” (Mat. 24:14) Zakalíi ɖɔ ɖ’ayǐ ɖɔ mɛ e nɔ “dó gbè vovo” lɛ é na yí wɛn ɔ. (Zak. 8:23) Sɔgbe kpo nǔmimɔ Jaan tɔn kpo ɔ, mɛ e xò ya ɖaxó ɔ zlɛ lɛ é na “gosin tò lɛ bǐ mɛ, bo gosin akɔta lɛ bǐ mɛ, bo gosin togun lɛ bǐ mɛ, bo gosin gbè e è nɔ dó lɛ bǐ mɛ.” (Nǔɖe. 7:9, 13, 14) Kpo nǔ e mǐ ko ɖɔ nɛ lɛ é kpo ɔ, enyi mǐ xò gò mɛɖé ɖò fí e mǐ nɔ jla wɛnɖagbe ɔ ɖè é, bonu é nɔ dó gbè ɖevo ɔ, mǐ ɖó na tɛnkpɔn bo ɖekúnnu n’i.

Lee È Sixu Bló Gbɔn É:

• Sɔnǔ ɖ’ayǐ. Nɔ hɛn Une bonne nouvelle pour des gens de toutes nations dó kúnnuɖegbe saki towe mɛ. Nǔ alixlɛ́mɛ e ɖò akpomɛwema ɔ sín bǐbɛ̌mɛ bɔ xota tɔn nyí Comment aider quelqu’un qui parle une langue que vous ne connaissez pas é ni má we. Lin tamɛ dó gbè ɖěɖee a sixu xò gò lɛ é jí, bo yí video ɖokpo alǒ wema ɖokpo dó gbè enɛ lɛ mɛ ɖò jw.org jí dó alokan towe jí. Kpɔ́n tuto ɔdinatɛ́ɛ jí tɔn Kúnnuɖetɔ́ Jehovah Tɔn lɛ tɔn JW Language ee nɔ d’alɔ mɛ bɔ è nɔ kplɔ́n gbè ɖevo é bá dó kplɔ́n nukɛgbe klewun ɖé lɛ dó gbè enɛ lɛ mɛ. Enyi agun towe kpo agun e nɔ dó gbè ɖevo lɛ é kpo nɔ jla wɛnɖagbe ɔ ɖò xá ɖokpo ɔ mɛ hǔn, nɔ hɛn wema lɛ dó agun towe sín gbè kɛɖɛ mɛ hwenu e a nɔ tɔ́n nú xwé ɖé gbè jɛ xwé ɖé gbè sín azɔ̌ ɔ é. É ɖò mɔ̌ có, enyi a ɖò kúnnuɖiɖe agbawungba tɔn mɛ ɖ’alɔ ɖè wɛ ɖò xá ɖěɖee mɛ è nɔ dó gbè gègě ɖè é hǔn, nɔ hɛn wema lɛ dó mɛ ɖěɖee a sixu xò gò lɛ é sín gbè mɛ.

• Enyi a xò gò mɛɖé bonu é ma nɔ dó gbè towe ǎ hǔn, wà nǔ e wu a kpé é bǐ bá dó ɖɔ “azɔ̌ ɖagbe ɖagbe e Mawu wà lɛ” é sín xó n’i dó gbè éɖesunɔ tɔn mɛ. (Mɛ. 2:11) Ðɔ n’i ɖɔ é yì jw.org jí ɔ, é na mɔ nǔ ɖevo lɛ dó gbè éɖesunɔ tɔn mɛ. Enyi é ɖè jlǒ xlɛ́ hǔn, yawu wlan nǔ dó Veuillez suivre l’intérêt (S-43) mɛ bo sɔ́ jó nú wěgbojinɔtɔ́ agun ɔ tɔn. Nɔ ɖò yiylɔ ɛ wɛ kaka jɛ hwenu e wɛnjlatɔ́ e nɔ dó gbè tɔn lɛ é na wá mɔ ɛ dó é.

Tɛ́n Nǔ Elɔ Kpɔ́n Sun ɔ Mɛ:

• Ðò Sinsɛn-Biblo Xwédo Tɔn mitɔn e ja é hwenu hǔn, mi bló wazexlɛ́ nǔ e mǐ ɖɔ dìn lɛ é tɔn bonu mɛɖé ni ɖekúnnu nú mɛ e ma nɔ dó gbè mitɔn ǎ é ɖé.