Nǔ Sinsɛnzɔ́ Towe Ni Bí Alɔ nú We D’eji: Zǎn Alɔnuwema Wɛnɖagbe ɖé Sín Mawu Gɔ́n! Dó Jɛ Biblu Kplɔ́n Xá Mɛ Jí Ðò Xɔlinu
Nǔ E Wu É Ðò Taji É: Bo na dó sixu kplɔ́n nǔ mɛ lɛ bonu ye na huzu ahwanvu ɔ, mǐ ɖó na nyí Xó Mawu Tɔn kplɔnmɛtɔ́ lɛ. (Mat. 28:19, 20) Mǐ mɛ bǐ hɛn ɔ, mǐ na kplɔ́n nugbǒ ɔ mɛ ganji, gbɔn azɔwanú e è na mǐ lɛ é zinzan gblamɛ. È sɔnǔ nú alɔnuwema Wɛnɖagbe ɖé Sín Mawu Gɔ́n! ɔ bonu é na d’alɔ mǐ bɔ mǐ na kplɔ́n nugbǒ ɔ mɛ ɖevo lɛ. Mǐ sixu zán alɔnuwema enɛ nugbǒ nugbǒ bo dó jɛ Biblu kplɔ́n xá xwétɔ́ ɖé jí azɔn nukɔntɔn e mǐ mɔ ɛ ɖò xɔ tɔn hɛnnu é.
Lee È Sixu Bló Gbɔn É:
• Vɔ̌ nùxwlémɛ e ɖò gbàví ɔ mɛ é jí gbɔn.—Lɛ̌ kpɔ́n Sinsɛnzɔ́ Axɔsuɖuto ɔ Tɔn Mǐtɔn Xwèjísun 2013 tɔn ɖò Gungbe mɛ.
• Sɔ́ alɔnuwema ɔ hwiɖesunɔ tɔn dó kúnnuɖegbe saki towe mɛ. Mɔ nǔ jɛ wu ɖɔ alɔnuwema ɔ gègě tɔn ɖò emi sí bɔ emi na xwlé mɛ lɛ.
• Ba dò nú akpáxwé ɖokpo alǒ wè kpowun xá xwétɔ́ ɔ, bo ma ka nɔ gɔ̌n tɔn hú cɛju wǒ ó.
Tɛ́n Nǔ Elɔ Kpɔ́n Sun ɔ Mɛ:
• Xoɖɛ bo byɔ jlǒ Biblu kplɔnkplɔn xá mɛ tɔn. Lɛ̌vɔ savo nú Jehovah ɖɔ é ni d’alɔ we bonu a na jɛ Biblu kplɔ́n xá mɛ jí, bonu a na lɛ́ nyí nugbǒ ɔ kplɔnmɛtɔ́ ɖagbe.—Fili. 2:13.
• Ðò sinsɛn-biblo xwédo tɔn alǒ nùkplɔnkplɔn mɛɖesunɔ tɔn towe hwenu hǔn, tɛnkpɔn bonu nùxwlémɛ ɔ ni dó ɖɔ dò ɖò ayi towe mɛ. Enɛ ɔ, a na kpéwú bo na ɖɔ xó kpo jiɖiɖe kpo, lobo na jɛ Biblu kplɔ́n xá mɛ jí ɖò xɔlinu hwenu e a ɖò sinsɛnzɔ́ ɔ mɛ é.
[Gbàví, Wexwɛ 1]
Kúnnuɖiɖe Xwé ɖé Gbè Jɛ Xwé ɖé Gbè Tɔn Hwenu:
“Un wá gɔ̌n mitɔn ɖó ɖò égbé ɔ, lee gbɛ̀ elɔ ɖò na wá cí wɛ é nɔ ɖu ayi mɛ nú mɛ gègě. Mi ka lin ɖɔ ninɔmɛ lɛ na wá kpɔ́n te à? [Jǒ é dó nú é na xósin.] É nɔ kpaca mɛ gègě ɖɔ wɛnɖagbe e sixu zɔ́n bɔ mǐ ɖó nukúnɖiɖo lɛ é ɖò Biblu mɛ. Nùkanbyɔ ɖěɖee sín sìnkɔn ɖò Biblu mɛ é ɖé lɛ ɖíe.” Zě alɔnuwema ɔ ɖokpo nú xwétɔ́ ɔ, bo byɔ ɛ ɖɔ é ni sɔ́ nùkanbyɔ e é yí wǎn na hugǎn é ɖò ɖěɖee ɖò alɔnuwema ɔ gudo lɛ é mɛ. Enɛ gudo hǔn, yì xota ɔ jí, bo xlɛ́ ɛ lee nùkplɔnkplɔn ɔ nɔ yì gbɔn é. Blǒ tuto bo na lɛkɔ wá bonu mi na ɖɔ xó dó nùkanbyɔ e bɔ d’ewu ɖò xota enɛ glɔ é jí.