Alɔnuwema Wɛnɖagbe Zinzan Dó Kplɔ́n Nǔ Mɛ
1. Nɛ̌ è ka sɔnǔ nú alɔnuwema Wɛnɖagbe ɔ gbɔn?
1 Ði lee mǐ ko mɔ gbɔn ɖò Sinsɛnzɔ́ Axɔsuɖuto ɔ Tɔn Mǐtɔn Liyasun ɔ tɔn mɛ é ɔ, azɔwanú taji e ɖò azɔwanúgbá mɛkplɔnkplɔn tɔn mǐtɔn mɛ lɛ é ɖokpo wɛ nyí alɔnuwema Wɛnɖagbe ɖé Sín Mawu Gɔ́n! È xà wemafɔ e ɖ’emɛ lɛ é d’emɛ, bonu xwétɔ́ lɛ ɖesunɔ na ɖu vivǐ Biblu ɔ kpinkplɔn tɔn tlɔlɔ yeɖesunɔ ǎ. Nugbǒ wɛ ɖɔ è bló wema nùkplɔnkplɔn tɔn mǐtɔn lɛ gègě ɖó alɔ ɖé jí bonu nǔxatɔ́ ɔ na dó sixu kplɔ́n nǔ éɖesunɔ, amɔ̌, è sɔnǔ nú alɔnuwema enɛ bonu è na ɖɔ xó d’eji kpo nùkplɔnmɛtɔ́ ɖé kpo wɛ. Enɛ wu ɔ, enyi mǐ xwlé alɔnuwema ɔ xwétɔ́ ɖé ɔ, mǐ ɖó na tɛnkpɔn bo xlɛ́ ɛ lee nùkpinkplɔn ɔ nɔ yì gbɔn é, bonu é ni mɔ vivǐ ɖaxó e ɖò wɛnɖagbe e ɖò Biblu mɛ é kpinkplɔn mɛ é.—Mat. 13:44.
2. Nɛ̌ mǐ ka sixu zán alɔnuwema Wɛnɖagbe ɔ gbɔn hwenu e mǐ mɔ xwétɔ́ ɖé azɔn nukɔntɔn ɔ é?
2 Hwenu E A Mɔ Xwétɔ́ ɖé Azɔn Nukɔntɔn ɔ É: A sixu ɖɔ: “Un wá gɔ̌n mitɔn ɖó fí e gbɛ̀ elɔ xwè é nɔ ɖu ayi mɛ nú mɛ gègě. Mi ka lin ɖɔ ninɔmɛ lɛ na wá kpɔ́n te gbè ɖokpo à? [Jǒ é dó nú é na xósin.] Wɛnɖagbe lɛ ɖò Biblu mɛ bo sixu na mǐ nukúnɖiɖo. Nùkanbyɔ ɖěɖee sín sìnkɔn Biblu na é ɖé lɛ ɖíe.” Sɔ́ alɔnuwema ɔ nú xwétɔ́ ɔ bo byɔ ɛ ɖɔ é sɔ́ nùkanbyɔ e ɖò wexwɛ gudo tɔn ɔ jí lɛ é ɖokpo. Enɛ gudo hǔn, zǎn akpáxwé nukɔntɔn nùkpinkplɔn enɛ tɔn bo xlɛ́ ɛ lee é nɔ yì gbɔn é. Wlɛnwín ɖevo wɛ lɛ́ nyí ɖɔ a na kàn nǔ e sixu fɔ́n jlǒ xwétɔ́ ɔ tɔn nyì te é ɖé byɔ ɛ dó nùkpinkplɔn e hwɛ ko sɔ́ é jí, bɔ enɛ gudo ɔ, a na xlɛ́ ɛ lee alɔnuwema ɔ sixu d’alɔ ɛ b’ɛ na mɔ xósin Biblu tɔn gbɔn é. Enyi video ɖé ɖò jw.org jí bo sɔgbe xá nùkpinkplɔn enɛ ɔ, wɛnjlatɔ́ ɖé lɛ nɔ xò video ɔ ɖò nùxwlémɛ yetɔn hwenu.
3. Tinmɛ lee è sixu zán alɔnuwema Wɛnɖagbe ɔ dó kplɔ́n Biblu xá mɛ gbɔn é?
3 Lee Nùkpinkplɔn Sixu Yì Gbɔn É: (1) Xà nùkanbyɔ e è wlan kpo wekwín tlitli kpo bɔ nǔlɛnkwín ɖò nukɔn na é bonu xwétɔ́ ɔ ni dó sixu sɔ́ ayi ɖó nǔ taji ɔ jí. (2) Xà akpáxwé e ɖò glɔ tɔn é. (3) Xà wemafɔ e kpá è wlan xà dó lɛ é, bo zán nùkanbyɔ e è cyan ganji lɛ é dó d’alɔ xwétɔ́ ɔ bonu é ni mɔ lee wemafɔ lɛ na sìnkɔn nú nùkanbyɔ e nukɔn nǔlɛnkwín ɖè é gbɔn é. (4) Enyi akpáxwé ɖevo lɛ ɖò nùkanbyɔ ɔ glɔ hǔn, vɔ̌ nǔ 2gɔ́ ɔ kpo 3gɔ́ ɔ kpo bló. (5) Ðò vivɔnu ɔ, byɔ xwétɔ́ ɔ ɖɔ é ni na sìnkɔn nú nùkanbyɔ e nukɔn nǔlɛnkwín ɖè é bo na dó sixu mɔ nǔ jɛ wu ɖɔ é mɔ nukúnnú jɛ mɛ.
4. Etɛ ka na d’alɔ mǐ bɔ mǐ na zán azɔwanú xɔ akwɛ enɛ kpo azɔ̌ tuùntuùn kpo?
4 Tɛnkpɔn bonu azɔwanú xɔ akwɛ enɛ ni má we. Zǎn hweɖebǔnu e ali tɔn hun nú we é. Jɛ nukɔn nú nùkpinkplɔn ɖokpo ɖokpo hǔn, nɔ lin tamɛ kpɔ́n dó nùkplɔntɔ́ ɔ kpo lee a sixu zán wemafɔ e ɖò nùkpinkplɔn ɔ mɛ lɛ é dó jlɛ́ xó dó xó wu xá ɛ ganji gbɔn é kpo jí. (Nùnywɛxó 15:28; Mɛ. 17:2, 3, NW) Hwenu e a na ɖò azɔ̌ tuùn d’eji wɛ bo na ɖò nǔ wu kpé d’eji wɛ é ɔ, a sixu wá kpɔ́n alɔnuwema enɛ dó mɔ azɔwanú ɖěɖee a yí wǎn na hugǎn bo nɔ zán dó kplɔ́n nugbǒ ɔ mɛ lɛ é ɖokpo!