Ði Nǔ Ye Ðɔhun

1. Etɛ mǐ ka na kplɔ́n ɖò Biblu Kplɔnkplɔn Agun Tɔn hwenu bɛ́sín aklunɔzán gbla azǎn 19 Kɔnyásun ɔ tɔn mɛ?

¹ Bɛ́sín aklunɔzán gbla azǎn 19 Kɔnyásun 2015 tɔn tɔn mɛ ɔ, mǐ na jɛ wema Ði Nǔ Ye Ðɔhun kplɔ́n jí ɖò Biblu Kplɔnkplɔn Agun Tɔn hwenu. Wema enɛ gbajɛ̌mɛ nú tan Biblu tɔn nùɖitɔ́ sunnu kpo nyɔnu kpo 14 tɔn. É bló mɔ̌ ɖò alixo ɖé mɛ bɔ mǐ na lin tamɛ kpɔ́n dó lee gbejinɔtɔ́ enɛ lɛ wà nǔ gbɔn é jí, b’ɛ na d’alɔ mǐ bɔ mǐ na kpɔ́n ye dó mɔ gbɛtɔ́ jɔ gbɛtɔ́ e ɖí xwi xá tagba lɛ hwenu e ye ɖò Jehovah sɛ̀n wɛ é é. Wema ɔ lɛ́vɔ ɖè nùkplɔnmɛ e ɖò tan enɛ lɛ mɛ bɔ mǐɖesunɔ na zán égbé lɛ é tɔ́n.—Ebl. 6:12.

2. Tinmɛ nǔ e ɖò wema Ði Nǔ Ye Ðɔhun mɛ é ɖé lɛ.

² Nǔ E Ð’emɛ lɛ É: Ðiɖe hwenu e nǔ lɛ jɛ dó é tɔn kpo ɖiɖe tò tɔn lɛ kpo ɖò wema ɔ mɛ bo na d’alɔ mǐ bɔ mǐ na ba hwenu e mɛ lɛ ɖokpo ɖokpo nɔ gbɛ̀ dó é kpo fí e ye nɔ é kpo. Gɔ́ na ɔ, akpáxwé ɖé nɔ ɖò wemata ɖokpo ɖokpo mɛ bɔ xota tɔn nyí “Etɛ A ka Lin . . . ,” bo na d’alɔ mǐ bɔ mǐ na lin tamɛ kpɔ́n dó tan lɛ jí lobo zán nǔ e ye kplɔ́n mǐ lɛ é. Fɔtóo ɖɛkpɛɖɛkpɛ gègě wɛ è ba dò nú nǔ hlɛ́nhlɛ́n bo ɖè dó wema ɔ mɛ, bɔ ye na d’alɔ mǐ b’ɛ na cí ɖɔ mǐ ɖò nǔ e jɛ lɛ é tɛnmɛ wɛ ɖɔhun.

3. Etɛ mǐ ka sixu wà bo na mɔ lè ɖò wema elɔ kpinkplɔn mɛ?

³ Lee A Sixu Mɔ Lè Ð’emɛ Gbɔn É: Wema-sɛ́dó-mɛ Hagbɛ̌ Alixlɛ́mɛtɔ́ ɔ tɔn e ɖò bǐbɛ̌mɛ wema ɔ tɔn é dó wusyɛn lanmɛ nú mǐ ɖɔ: “Lin tamɛ kpɔ́n d’eji; sɔ́ hwiɖée bǐ d’emɛ. Tɛnkpɔn bonu lee nǔ cí nú mɛ e sín tan ɖ’emɛ lɛ é ni cí mɔ̌ nú hwi lɔ, tɛnkpɔn bo mɔ nǔ e ye mɔ é. Sɔ́ lee ye wà nǔ gbɔn é sɔ́ jlɛ́ dó lee hwɛ na ko wà gbɔn é wu.” É ɖò wɛn ɖɔ tamɛ linlinkpɔ́n nyí tamɛ gbigba zɛ xwé wu dó jɔmɛ ǎ, loɔ, nukún didó nǔ e tan ɔ ɖɔ é mɛ kpɔ́n bo sè wuvɛ̌ xá mɛ e xó tan ɔ ɖɔ lɛ é wɛ nyí mɔ̌. Mɔ̌ biblo nɔ byɔ è ni zán hwenu bo lɛ́ dó ayi dò. (Nɛɛ. 8:8) Enyi nùkpinkplɔn ɔ bɛ́sín tɛntin wemata ɖé tɔn ɔ, mɛ e ɖò nukún na kpé d’ewu wɛ é na sɔ́ segɔndu 30 jɛ 60 dó vɔ́ nùkpinkplɔn e wá yì é jí gbɔn ɖò bǐbɛ̌mɛ. Enyi akpáxwé “Etɛ A ka Lin . . . ” ma ɖò nùkpinkplɔn ɔ mɛ ǎ ɔ, è sixu kàn nǔ ɖokpo alǒ wè byɔ bo dó vɔ́ nǔ e è kplɔ́n lɛ é jí gbɔn ɖò tasuna hwenu.

4. Etɛwu mǐ ka ɖó na kplɔ́n wema Ði Nǔ Ye Ðɔhun ɔ?

⁴ Ayihɔngbe ayihɔngbe ɔ, gbɛ̀ elɔ e mɛ mǐ ɖè é nɔ ba na hú nùɖiɖi mǐtɔn alǒ vɔ́da na ɖò ali lɛ bǐ nu. Wema elɔ kpodo xota ɖěɖee jí é jinjɔn bɔ ye nɔ tɔ́n ɖò La Tour de Garde mɛ lɛ é kpo nyí nùnina ɖé bo gosin Jehovah gɔ́n, bo na d’alɔ mǐ bɔ mǐ na hɛn nùɖiɖi mǐtɔn lidǒ. (Ja. 1:17) Mi nú mǐ ni nɔ wá Biblu Kplɔnkplɔn Agun Tɔn lɛ ɖò gbesisɔmɛ, bo nɔ ɖ’alɔ ɖò xósin lɛ nina mɛ ganji lee é sixu nyɔ́ bló gbɔn é ɖò hwenu e mǐ na ɖò wema elɔ kplɔ́n ɖó kpɔ́ wɛ é, bo na dó sixu ɖu lè ɖ’emɛ bǐ mlɛ́mlɛ́!