Nǔ Sinsɛnzɔ́ Towe Ni Bí Alɔ nú We D’eji: Wema Biblu Kplɔ́n Mɛ Xwíxwlémɛ

Nǔ E Wu É Ðò Taji É: Wema Biblu Kplɔ́n Mɛ ɔ nyí azɔwanú taji ɖé ɖò azɔwanúgbá mɛkplɔnkplɔn tɔn mǐtɔn mɛ. Amɔ̌, cobonu mǐ na sixu zán wema enɛ dó kplɔ́n nǔ xá mɛɖé ɔ, mǐ ɖó na tó sɔ́ xwlé mɛ ɔ hwɛ̌. Enɛ wu ɔ, mǐ mɛ bǐ ɖó na tɛnkpɔn bɔ wema Biblu Kplɔ́n Mɛ ɔ xwíxwlémɛ na bí alɔ nú mǐ ɖò sinsɛnzɔ́ ɔ mɛ. (Nùnywɛxó 22:29) Wlɛnwín gègě wɛ tíìn, bɔ wɛnjlatɔ́ lɛ ka ɖó na zán ɖěɖee nɔ hɛn lè wá nú ye lɛ é.

Lee È Sixu Bló Gbɔn É:

• Kàn nǔ e na fɔ́n jlǒ xwétɔ́ ɔ tɔn nyite bo sixu d’alɔ we bɔ a na dɔn ayi tɔn wá wemata ɖé jí ɖò wema ɔ mɛ é byɔ. A tlɛ sixu sɔ́ nùkanbyɔ e ɖò bǐbɛ̌mɛ wemata ɖokpo ɖokpo tɔn é ɖokpo. Enyi a ɖótó xósin xwétɔ́ ɔ tɔn gudo hǔn, xà wemafɔ e sɔgbe xá é ɖé, enɛ gudo hǔn, xlɛ́ ɛ akpáxwé ɖokpo dó xota enɛ jí, bɔ vlafo mi sixu ɖɔ xó ɖó kpɔ́ d’eji klewun.

• Wlɛnwín ɖevo wɛ nyí ɖɔ è na zán nùkanbyɔ ɖěɖee ɖò wexwɛ nukɔn nukɔntɔn lɛ jí é dó fɔ́n jlǒ xwétɔ́ ɔ tɔn nyite, lobo wá xlɛ́ ɛ fí e wema ɔ na xósin Biblu tɔn lɛ ɖè é. Ði kpɔ́ndéwú ɔ, a sixu ɖɔ xó dó nǔ baɖabaɖa e jɛ wá yì b’ɛ ma lín ǎ, bɔ xójɛɖotozɔ́watɔ́ lɛ ɖɔ é ɖé jí, bo tinmɛ ɖɔ mɛ gègě nɔ kàn nùkanbyɔ e ɖò wexwɛ 3gɔ́ ɔ jí lɛ é byɔ yeɖée. Alǒ a sixu ɖɔ ɖɔ emi ɖò mɛ e ɖò xá ɔ mɛ lɛ é ba kpɔ́n wɛ bo na dó má nǔ ɖagbe e ja ɖò sɔgudo é ɖé xá ye. Enɛ gudo ɔ, xlɛ́ ɛ fɔtóo e ɖò wexwɛ 4-5 jí lɛ é bo kanbyɔ ɛ ɖɔ: “Akpá ɖětɛ sín jijɛ mi ka jló na mɔ ɖò elɔ lɛ mɛ?” Wlɛnwín ɖevo wɛ lɛ́ nyí ɖɔ a sixu ɖɔ ɖɔ emi ɖò mɛ lɛ ba kpɔ́n wɛ bo na dó d’alɔ ye nú ye na mɔ xósin nú nùkanbyɔ taji gbɛmɛ tɔn lɛ. Enɛ gudo ɔ, xlɛ́ nùkanbyɔ e ɖò wexwɛ 6gɔ́ ɔ sín dò lɛ é xwétɔ́ ɔ, bo kanbyɔ ɛ ɖɔ ɖětɛ ka mya nukún n’i ɖ’emɛ hugǎn à jí.

• Xwlé Biblu kpinkplɔn xwétɔ́ ɔ tlɔlɔ. A sixu ɖɔ: “Mǐ ɖò wema Biblu kplɔnkplɔn tɔn elɔ xlɛ́ nɔzo mǐtɔn lɛ wɛ. Mi ko mɔ kpɔ́n ɖ’ayǐ wɛ à? [Jǒ è dó nú é na xósin.] Enyi mi ɖó cɛju klewun ɖé ɔ, é na víví nú mì ɖɔ ma xlɛ́ mi lee è sixu zán gbɔn é kpodo Biblu miɖesunɔ tɔn kpo.”

Tɛ́n Nǔ Elɔ Kpɔ́n Sun ɔ Mɛ:

• Ðò sinsɛn-biblo xwédo tɔn towe hwenu hǔn, blǒ wazexlɛ́ nǔ e ɖò aga lɛ é tɔn kpɔ́n.

• Hwenu e a ɖò sinsɛnzɔ́ ɔ mɛ é ɔ, mǎ nǔ e a tò bo na ɖɔ é xá wɛnjlatɔ́ ɖě lɛ. (Nùnywɛxó 27:17) Ðyɔ nùxwlémɛ towe, enyi é ma w’azɔ̌ ǎ ɔ nɛ.