Xóyidókanji Lɛ: Lee È Sixu Zán Ye Gbɔn É
1. Gɔ́ nú wema mǐtɔn lɛ ɔ, nǔ ɖagbe tɛ mǐ ka lɛ́ ɖó?
1 Mɛ gègě nɔ ɖu vivǐ jw.org zinzan dó xà nugbǒ ɔ sín xó e vivǐ sìn bo lɛ́ sɔgbe lɛ é tɔn. (Nùnywɛtɔ́xó 12:10) Amɔ̌, a ka ko zán xóyidókanji lɛ kpɔ́n à? Ye nɔ zɔ́n bɔ è nɔ ɖótó nǔ e ɖò tɛn ɛntɛnɛti tɔn mǐtɔn jí é gègě. Nɛ̌ mǐ ka sixu mɔ lè ɖò xóyidókanji lɛ mɛ gbɔn?
2. Nɛ̌ mǐ ka sixu zán xóyidókanji lɛ nú nùkplɔnkplɔn mɛɖesunɔ tɔn alǒ xwédo tɔn mǐtɔn gbɔn?
2 Nùkplɔnkplɔn Mɛɖesunɔ Tɔn alǒ Xwédo Tɔn: Xóyidókanji Biblu tɔn, xójlawema lɛ tɔn, alǒ wema ɖé tɔn ɖíɖótó hwenu e mǐ xwè fí ɖè é abǐ hwenu e mǐ ɖò ayihɔngbe ayihɔngbe sín azɔ̌ mǐtɔn lɛ wà wɛ é sixu d’alɔ mǐ bɔ mǐ na zán hwenu mǐtɔn lɛ ganji. (Efɛ. 5:15, 16) Mǐ sixu ɖyɔ nukúnmɛ nú sinsɛn-biblo xwédo tɔn mǐtɔn, bo ɖótó xóyidókanji wema e kplɔ́n wɛ mǐ ɖè é tɔn lobo na ɖò xwixwedó wɛ ɖò wema ɔ ɖesu mɛ. Xóyidókanji lɛ zinzan ɖò nùkplɔnkplɔn mɛɖesunɔ tɔn hwenu na d’alɔ mǐ tawun, enyi mǐ jló na yì nukɔn ɖò nùxixa mɛ alǒ mǐ ɖò gbè yɔyɔ̌ ɖé kplɔ́n wɛ ɔ nɛ.
3. Mɛ̌ mɛ̌ e ka sixu ɖu vivǐ xóyidókanji lɛ tɔn ɖò xá mǐtɔn mɛ?
3 Ðò Sinsɛnzɔ́ ɔ Mɛ: Mɛ ɖěɖee ɖò xá mǐtɔn mɛ bo nɔ lin ɖɔ emi kún ɖó táan ɖebǔ bo na xà nǔ ó lɛ é sixu ɖó jlǒ bo na nɔ ɖótó xóyidókanji lɛ. Alǒ mǐ sixu xò gò mɛ ɖěɖee nɔ dó gbè ɖevo, bɔ enyi ye sè wɛn Axɔsuɖuto ɔ tɔn dó ‘yeɖesunɔ sín gbè’ mɛ ɔ, ye na yí lɛ é. (Mɛ. 2:6-8) Ðò xá ɖé lɛ mɛ ɔ, tó ɖiɖó nùɖé nyí akpáxwé taji ɖé ɖò aca mɛ e nɔ nɔ finɛ lɛ é tɔn mɛ. Ði kpɔ́ndéwú ɔ, ɖò aca Hmong nu lɛ tɔn mɛ ɔ, mɛxo lɛ nɔ kpi tan yetɔn lɛ nú jijimɛ winnyawinnya lɛ, bɔ yedɛɛ lɛ nɔ hɛn xó e ye sè lɛ é ayi mɛ. Aca Aflika tɔn gègě mɛ wɛ è nɔ ɖu vivǐ nùkpinkplɔn tɔn ɖè gbɔn hwenuxó lɛ sísé gblamɛ.
4. Etɛ lɛ mǐ ka sixu kanbyɔ mǐɖée dó alɔdido mɛ lɛ ɖò xá mǐtɔn mɛ wu?
4 Ðò xá towe mɛ ɔ, xóyidókanji ɖé xixo nú xwétɔ́ ɖé dó gbè tɔn mɛ ka na hɛn lè wá à? Mɛɖé ka sixu ɖu vivǐ xóyidókanji wema ɖé tɔn e mǐ sɛ́dó é gbɔn ɛntɛnɛti jí é tɔn à? Mǐ ka sixu yí xóyidókanji wema ɖé tɔn dó CD jí bo sɔ́ jó nú xwétɔ́ e ɖè jlǒ xlɛ́ é ɖé, vlafo kpo wema ɔ ɖesu kpo à? Mǐ hɛn ɔ mǐ na sɔ́ xóyidókanji blebu wema, alɔnuwema, xójlawema, alǒ tlati ɖé tɔn e mǐ sɔ́ nú mɛɖé ɖò sinsɛnzɔ́ ɔ mɛ é sín kɛ́n, bo wlan dó ganmɛ wema mǐtɔn jí. È sɔnǔ nú xóyidókanji lɛ bonu mǐ na zán ɖò nùkplɔnkplɔn mɛɖesunɔ tɔn mǐtɔn hwenu, bo na lɛ́ zán dó dó nugbǒ Axɔsuɖuto ɔ tɔn sín nǔkún lɛ.—1 Kɔ. 3:6.