Mǐ Nɔ Kplɔ́n Nǔ Dó Mawu Wu Gbɔn Gbeyiɖɔ Tɔn lɛ Gblamɛ

ABLAXAMU

Mawu nɔ ɖè mɛɖé ɖó vo ǎ, bo jló na dó nú gbɛtɔ́ lɛ bǐ.

Mawu dó akpá nú gbeyiɖɔ Ablaxamu bo ɖɔ: “Hwi jí wɛ un na gbɔn bo na xoɖɛ dó hɛ̌nnu e ɖò gbɛ̀ ɔ mɛ lɛ bǐ jí.”—Bǐbɛ̌mɛ 12:3.

Etɛ enɛ ka kplɔ́n mǐ? Mawu yí wǎn nú mǐ tawun, bo jló na dó nú xwédo lɛ bǐ; ye wɛ nyí sunnu, nyɔnu, kpo vǐ kpo ee setónú n’i lɛ é bǐ.

MƆYIZI

Mawu nyí nǔblawukúnúmɛtɔ́ bo nɔ dó nú mɛ e nɔ dó gǎn bo na tuùn i lɛ é.

Nǔbǐwukpétɔ́ ɔ na hlɔnhlɔn gbeyiɖɔ Mɔyizi bɔ é bló nǔjiwǔ ɖaxó ɖaxó lɛ. É ɖò mɔ̌ có, Mɔyizi xoɖɛ ɖɔ: “Blǒ bonu má tuùn linlin towe lɛ; enɛ ɔ, un na tuùn we nǔgbo nǔgbo, bɔ a na lɛ́ na fɛ́nú towe mì yì fó.” (Tíntɔ́n 33:13) Nǔ e Mɔyizi byɔ é nyɔ́ Mawu nukúnmɛ bɔ é dó n’i, bɔ é ɖó nǔnywɛ kpo nukúnnúmɔjɛnǔmɛ kpo d’eji dó linlin Tɔn lɛ kpo jijɔ Tɔn lɛ kpo wu. Ði kpɔ́ndéwú ɔ, Mɔyizi kplɔ́n ɖɔ Gbɛɖotɔ́ ɔ nyí “Mawu nǔblawukúnúmɛtɔ́, Mawu xomɛfátɔ́.”—Tíntɔ́n 34:6, 7.

Etɛ enɛ ka kplɔ́n mǐ? Mawu jló na dó nú mǐ bǐ; sunnu lɛ, nyɔnu lɛ kpo vǐ lɛ kpo; enyi mǐ dó gǎn bo tuùn i ganji ɔ nɛ. É xlɛ́ lee mǐ sixu sɛn ɛ gbɔn é kpo lee akpakpa ɖò sísɔ́ ɛ wɛ bonu é na kɔn nyɔna dó mǐ jí gbɔn é kpo mǐ ɖò Nǔwlanwlán Mímɛ́ lɛ mɛ.

JEZU

Enyi mǐ kplɔ́n nǔ dó Jezu, nǔ e é wà é kpo nǔ e é kplɔ́n mɛ é kpo wu ɔ, mǐ sixu ɖu vivǐ nyɔna mavɔmavɔ Mawu tɔn lɛ tɔn.

Doyidoslɔ́ gbɛzán Jezu tɔn tɔn kpo nǔkplɔnmɛ tɔn lɛ kpo tɔn gegě wɛ ɖò Xó Mawu tɔn mɛ. Mawu na hlɔnhlɔn Jezu bɔ é bló nǔjiwǔ hlɔnhlɔnnɔ gegě; ɖi kpɔ́ndéwú ɔ, é hun nukún nú nukúntíntɔ́nnɔ, hun tó nú tókúnɔ, bo bló bɔ sékunɔ ɖi zɔnlin. É tlɛ fɔ́n mɛkúkú lɛ wá gbɛ̀. Mɔ̌ mɛ ɔ, Jezu ɖè nyɔna e Mawu na kɔn dó gbɛtɔ́ lɛ bǐ jí ɖò sɔgudo é xlɛ́. É tinmɛ lee ɖokpo ɖokpo mǐtɔn sixu ɖu nyɔna enɛ lɛ sín lè gbɔn é bo ɖɔ: “Gbɛ̀ mavɔmavɔ ɔ wɛ nyí ɖɔ ye ni tuùn we, bo tuùn ɖɔ hwi wɛ nyí Mawu nǔgbo ɖokpo e tíìn é, bo lɛ́ tuùn Jezu Klisu e a sɛ́dó gbɛ̀ ɔ mɛ é.”—Jaan 17:3.

Jezu nyí wuvɛ̌sexámɛtɔ́, wanyiyinɔ bo lɛ́ nyí xomɛnyɔtɔ́. Sunnu kpo nyɔnu kpo, yɔkpɔvu kpo mɛxo kpo bǐ wɛ sɔ ylɔ̌ tɔn elɔ bo nɔ nyi ahwan wá gɔ̌n tɔn: “Mi yí nǔkplɔnmɛ ce lɛ sè, bonu lindɔ̌n mitɔn lɛ na vo, ɖó mɛfífá wɛ un nyí, bo nyí xomɛnyɔtɔ́.” (Matie 11:29) Jezu gbɔn vo nú mɛ e nɔ gbɛ̀ ɖò hwetɔnnu bo nɔ xò daka nyɔnu lɛ wu é; éyɛ nɔ wà nǔ xá ye kpo xomɛnyínyɔ́ kpo, nɔ ɖó wi ta nú ye, bo nɔ sí ye.

Etɛ enɛ ka kplɔ́n mǐ? Jezu nɔ ɖè wanyiyi ɖaxó xlɛ́ mɛ lɛ, bo sɔ́ kpɔ́ndéwú nukúnɖeji ɖé ɖ’ayǐ nú mǐ dó lee mǐ ɖó na nɔ wà nǔ xá mɛ ɖevo lɛ gbɔn é wu.

JEZU NYÍ MAWU Ǎ

Nǔwlanwlán Mímɛ́ lɛ kplɔ́n mɛ ɖɔ “Mawu ɖokpo géé wɛ tíìn nú mǐdɛɛ lɛ” bɔ Jezu Klisu nyí ɖɛ̌mɛnu mɛɖéesɔ́hwetɔ́ Mawu tɔn. (1 Kɔlɛntinu lɛ 8:6) Jezu ɖɔ nyi wɛn ɖɔ Mawu hugǎn emi, bo sɛ́ emi dó ayikúngban ɔ jí.—Jaan 11:41, 42; 14:28.a