Ðu Vivǐ Gbɛɖotɔ́ Mǐtɔn Sín Nyɔna lɛ Tɔn Kaka Sɔyi

Mawu d’akpá nú gbeyiɖɔ Ablaxamu ɖɔ emi na gbɔn mɛ e ɖò kúnkan tɔn mɛ é ɖé jí, bo na kɔn nyɔna dó “akɔta e ɖò ayikúngban jí lɛ” é bǐ jí. (Bǐbɛ̌mɛ 22:18) Mɛ̌ ka na nyí kúnkan enɛ?

Xwè 2 000 mɔ̌ ɖíe ɔ, Mawu na hlɔnhlɔn Jezu e nyí kúnkan Ablaxamu tɔn ɖé é, bɔ é bló nǔjiwǔ agbɔ̌nnɔ lɛ. Nǔjiwǔ enɛ lɛ xlɛ́ ɖɔ akɔta lɛ na ɖu vivǐ akpá e Mawu dó nú Ablaxamu é tɔn gbɔn Jezu gblamɛ.—Galatinu lɛ 3:14.

Nǔjiwǔ e Jezu bló lɛ é d’alɔ bɔ è tuùn ɖɔ é wɛ nyí mɛ e gblamɛ Mawu na gbɔn bo na dó nú gbɛtɔ́ lɛ é. Ye lɛ́ xlɛ́ lee Mawu na zán ɛ bo na dó nú gbɛtɔ́ lɛ gbɔn kaka sɔyi é. Kpɔ́n lee nǔjiwǔ Jezu tɔn lɛ ɖè jijɔ tɔn e dɔn mɛ é ɖé lɛ xlɛ́ gbɔn é.

Xomɛnyínyɔ́: Jezu gbɔ azɔn nú mɛ.

Gbè ɖokpo ɔ, gudunɔ ɖé savo nú Jezu ɖɔ é ni gbɔ azɔn nú emi. Jezu ɖ’alɔ wǔ tɔn bo ɖɔ: “Un jló”! Tlolo ɔ, gudu ɔ gbɔ.—Maki 1:40-42.

Alɔhundónanǔmɛ: Jezu na nǔɖuɖu mɛ.

Jezu jló na ɖó gbɛtɔ́ lɛ xovɛ́ ǎ. É na nǔɖuɖu gbɛtɔ́ afatɔ́n mɔ̌kpan ɖò nǔjiwǔ linu, é ka nyí azɔn ɖokpo wɛ é wà mɔ̌ ǎ. Wɔ̌xúxú kpɛɖé kpo hweví kpɛɖé kpo jí wɛ é xoɖɛ dó bɔ é sukpɔ́. (Matie 14:17-21; 15:32-38) Ee ye ɖu kpé é ɔ, ye bǐ gɔ́ xò, bɔ nǔɖuɖu ɔ lɛ́ kpò kpɔ́.

Wuvɛ̌sexámɛ: Jezu fɔ́n mɛ sín kú.

Asúkúsi e vǐ sunnu ɖokpo e é ɖó é kú bɔ é ma ka lɛ́ ɖó mɛ ɖevo bonu é na kpé nukún dó wǔtu tɔn ǎ é sín nǔ “blawǔ” nú Jezu bɔ é fɔ́n vǐ tɔn sín kú.—Luki 7:12-15.