Lee È Na Zán Xóɖɔɖókpɔ́ lɛ Sín Kpɔ́ndéwú Gbɔn É

Sín janvier 2018 ɔ, xóɖɔɖókpɔ́ lɛ sín kpɔ́ndéwú nɔ ɖò akpa Kplé Gbɛzán kpo Sinsɛnzɔ́ kpo Tɔn Sín Azɔ̌wema tɔn jí. Nɛ̌ è ka sixu zán ye gbɔn?

Hwenu E È Ðè Wemaxɔmɛvízɔ́ nú We É: A ɖó na zán nǔkanbyɔ ɔ, wemafɔ ɔ, kpo nǔkanbyɔ mɛbakpɔ́n tɔn kpo ɖěɖee ɖò xóɖɔɖókpɔ́ lɛ sín kpɔ́ndéwú ɔ mɛ é. É ɖò mɔ̌ có, ɖiɖɔ wɛ è ɖè ɖɔ a ɖó na zán xógbe ɖěɖee è zán ɖò video xóɖɔɖókpɔ́ lɛ sín kpɔ́ndéwú tɔn mɛ lɛ é pɛ́pɛ́pɛ́ ǎ. A sixu tò nǔ lɛ alɔkpa vo, sɔ́ xó nu ɖó te, jlɛ́ xó dó xó wu, kpo nǔ ɖevo lɛ kpo. Enyi alixlɛ́mɛ lɛ ma tlɛ ɖɔ a ni jó wema e ɖò Azɔ̌wanúgbá Mɛkplɔnkplɔn tɔn mǐtɔn mɛ é ɖé dó nú xwétɔ́ ɔ ǎ ɔ, a sixu wà mɔ̌.

Hwenu E A Ðò Sinsɛnzɔ́ ɔ Mɛ É: Linlin e nɔ d’alɔ mǐ lɛ é wɛ nɔ ɖò xóɖɔɖókpɔ́ lɛ sín kpɔ́ndéwú mɛ. Enyi mɛɖé ɖexlɛ́ nǔgbo nǔgbo ɖɔ emi jló na tuùn nǔ d’eji ɔ, a sixu gbɛ̀ kan dó xóɖɔɖókpɔ́ ɔ nu, bɔ vlafo ɔ, a sixu zán nǔ e ɖò mɛbakpɔ́n sín kpɔ́ndéwú ɔ mɛ lɛ é. A sixu huzu nǔ e ɖò xóɖɔɖókpɔ́ lɛ sín kpɔ́ndéwú ɔ mɛ é, alǒ zán nǔ ɖevo bǐ sésé. Sun e wá yì é sín xóɖɔɖókpɔ́ lɛ sín kpɔ́ndéwú ɖé sín xóta ɖé alǒ wemafɔ ɖevo ɖé ka dɔn mɛ lɛ hugǎn ɖò xá towe mɛ wɛ à? Xó ɖiɖɔ dó nǔ e jɛ yaɖeyaɖe ɖò fí ɖevo alǒ ɖò xá towe mɛ é ɖé jí ka nɔ dɔn mɛ lɛ hugǎn wɛ à? A sixu zán xóɖɔɖókpɔ́ lɛ sín kpɔ́ndéwú ɔ ɖò ali ɖebǔ nu. Amɔ̌, nǔ e gbé a ɖó na nya é wɛ nyí ɖɔ ‘a na wà nǔ lɛ bǐ ɖó wɛnɖagbe ɔ wutu, bo na dó sixu jla nú mɛ ɖevo lɛ.’—1Kɔ 9:22, 23.